Вести
Владата размислува за корекција на платите за функционерите
Владата размислува да ги коригира коефициентите за пресметување на плати, се до цел тоа зголемување да не биде толку големо колку што би требало да биде според одлуката на Уставниот суд, затоа што сме свесни за предизвиците со кои се соочуваме како држава, изјави на 31 март министерката за одбрана Славјанка Петровска. Ова се наметна како тема во јавноста по донесена одлука на Уставен суд со која се укинува член од закон со кој се укинува досегашната основница за пресметка на функционерската плата.
Петровска за владиниот став околу одлуката на Уставнио суд одговараше на новинарски прашања во касарната Илинден.
На исто прашање на друг настан одговори и министерот за надворешни работи Бујар Османи кој посочи дека секој политичар што живее од плата сака поголема плата. Но, додаде дека од етички аспект политичарите се последни кои треба да добијат поголема плата.
„Од практичен аспект, секој политичар кој ќе каже дека не му е важна платата не е добра порака бидејќи веројатно има друг извор. Јас немам друг извор за живеење освен оваа плата. Така што , секако дека секој би сакал подобра можност. Но, од етички аспект политичарите треба да бидат последни на листата на граѓани кои треба да имаат зголемување на платите. Да, треба да се зголемат, затоа што се скандалозно мали, ама треба да бидат последни на листата откако на сите ќе им се зголемат, тогаш на политичарите“ вели Османи.
Портпаролката на опозициската ВМРО-ДПМНЕ Марија Митевска изјави дека партијата бара од Владата веднаш да се намали и корегира коефициентот за сложеност на работното место со што би се намалиле платите на функционерите.
„Шесто илјади граѓани живеат со 150 денари на ден. Во услови на економска криза, енормна инфлација и сиромаштија, последна работа што треба да се направи е да се зголемат платите на функционерите“, изјави таа.
Претходно претседателот Стево Пендаровски во интервју за ТВ Сител ја повика Владата да се најде решение со кое ќе се регулира прашањето преку намалување на бодовите.
Со одлука на Уставниот суд на 21 март се укинати два члена во различни закони со кои се уредуваше основицата за пресметка на плата на функционери. Од Судот по објавување на одлуката објаснија дека причината за укинувањето е што функционерската плата се уредува со два закона што претставува неконзистентност во законското уредување на оваа материја.
Од Синдикатот на работниците во управата објаснија дека со одлуката на Уставниот суд се укинува основицата од 26.000 денари за пресметување на платите на функционерите. Од сега основицата ќе изнесува колку просечна бруто плата и таа сума ќе се множи со коефициентот. Според последните податоци од Управата за јавни приходи просечната бруто плата во јануари годинава изнесувала 49.397 денари.
Вицепремиерот Фатмир Битиќи вчера изјави дека мора да се почитува одлуката на Уставен суд за зголемување на платите на функционерите и дека покачувањето треба да се случи веќе следниот месец. Тој додаде дека ако има друга одлука со која што треба таму да се интервенира, тој ќе биде еден од првите што ќе ја поддржи.
Со одлука на Уставниот суд за укинување на два члена од Законот за плата и надоместоци на функционерите, се овозможува зголемување на платите на државните функционери за дури 78 отсто.
Покрај нив, законот се однесува и на примањата на премиерот, претседателот, собранискиот спикер, но и сите вршители на јавни функции, како што се сите заменици министри, градоначалници, директори во државни фирми и агенции.
види ги сите денешни вести
Ејпл отстрани неколку апликации на РСЕ/РЛ по барање на рускиот медиумски регулатор
Американскиот гигант Ејпл (Apple) ја извести Радио Слободна Европа (РСЕ/РЛ) дека отстранил неколку негови апликации по барање на рускиот медиумски регулатор Роскомнадзор.
Отстранетите апликации на РСЕ/РЛ се апликации на рускиот сервис на РСЕ и дел од проектите на рускиот сервис на руски јазик. Роскомнадзор го извести Ејпл дека апликациите содржат материјали од организација чии активности во Русија се прогласени за „непожелни“.
Апликацијата на рускиот сервис на РСЕ сè уште е достапна за корисниците на Ејпл во други земји.
РСЕ беше ставена на руската листа на „непожелни организации“ во февруари. Претседателот на РСЕ, Стивен Капус, ја нарече одлуката „уште еден пример за тоа како руската влада го гледа вистинитото известување како егзистенцијална закана“.
Покрај апликациите на РСЕ, Ејпл исто така отстрани или сокри неколку подкасти на руски јазик произведени од независни новинари.
Новинската куќа „Медиазона“ на 14 ноември објави дека новите епизоди од онлајн радио станицата Ехо Москва и истражувачкиот медиум „Инсајдер“ повеќе не се достапни во Русија. Се чини дека е погоден и подкаст на руската служба на БиБиСи.
Во последниве години, руските власти ги забрзаа напорите за построго регулирање и контрола на содржината на интернетот на руски јазик, неформално познат како РуНет (RuNet).
Веб-страниците на социјалните платформи како X или Фејсбук (Facebook) беа пригушени или забавени во минатото во обид, како што велат експертите, кој се чини дека е тест од регулаторите за филтрирање на содржината или пренасочување на руските корисници.
Платформата за стриминг видео во сопственост на Гул (Google), Јутјуб (YouTube), која беше главно недопрена од регулаторите, забележа големо забавување почнувајќи од летото.
Некои официјални лица ја обвинија застарената опрема во Русија, опремата што Гугл не можеше да ја одржува поради западните санкции. Но, други рекоа дека „деградацијата“ е намерна, со цел да ја забави платформата и да ги фрустрира гледачите во обид да ги поттикне кон домашните руски алтернативи кои се построго контролирани.
Демонстранти се обидоа да влезат во Парламентот во грузиска Абхазија поради договорот со Русија
Демонстрантите предводени од опозицијата во грузискиот отцепен регион Абхазија, поддржан од Москва, се обидоа да упаднат во локалниот парламент во Сухуми, главниот град на регионот, со цел да ги натераат пратениците да се откажат од контроверзниот договор со Москва, кој им дава преференцијален третман на руските градежни имоти.
Според извештаите на локалните медиуми, обидот за ратификување на договорот на 15 ноември пропадна бидејќи демонстрантите се обидоа да влезат во Парламентот. Но, тоа не ја спречи толпата, која продолжи со протесто и сега бара од законодавниот дом да гласа за целосно откажување на договорот.
Локалните медиуми соопштија дека полицијата и стотици демонстранти се судриле, при што безбедносните сили наводно употребиле солзавец за да ја растераат толпата. Нема извештаи за апсења или повредени.
Тензиите во регионот се високи во последниве недели, а опозициските активисти бараат прекин на доминацијата на Русија над регионот и неговата економија, иако опозициските партии на 15 ноември изјавија дека нивниот протест не е против Русија.
Абхазија и Јужна Осетија се отцепија од владеењето на Грузија по распадот на Советскиот Сојуз во раните 1990-ти.
Москва ја призна независноста на двата региона откако руските сили го одбија грузискиот обид да ја вратат Јужна Осетија во петдневната војна во летото 2008 година, која заврши со пораз на Грузија.
Повеќето земји сè уште ја признаваат Абхазија како дел од Грузија, но нејзината економија е речиси целосно зависна од Москва, која ги плаќа платите на јавните администратори, како и социјалните плаќања на жителите.
Шолц во телефонски разговор побарал од Путин да се повлече од Украина
Германскиот канцелар Олаф Шолц и рускиот претседател Владимир Путин разговарале по телефон еден час во петокот попладне. Шолц побарал од лидерот на Кремљ да ја прекине војната против Украина и да преговара со Киев за „праведен и траен мир“, е наведено во соопштението од Кабинетот на кацеларот.
Шолц и Путин последен пат директно разговарале во декември 2022 година, соопшти владата.
Шолц во разговорот, според германското соопштение, изразил „непоколеблива решеност да ја поддржи Украина во нејзината борба против руската агресија онолку долго колку што е потребно“.
Во него е наведено дека Шолц разговарал со украинскиот претседател Володимир Зеленски пред повикот на Путин и дека ќе разговара повторно потоа.
Шолц му рекол на Путин дека распоредувањето на севернокорејските трупи за борбени мисии е значајна ескалација и проширување на војната, изјавил анонимен германски висок функционер за новинската агенција Ројтерс.
Северна Кореја на 12 ноември го ратификуваше одбранбениот договор со Русија, со што е потврдено нивното зближување поради руската војна во Украина. Според украинските власти, околу 11 000 севернокорејски војници веќе се распоредени во Русија и почнале да се борат против Украинците на руска територија, во областа Курск.
Николовски ги повика обвинителите и ревизорите да ја проверат „сомнителната“ работа на Агенцијата за пошти
Државниот завод за ревизија и Обвинителството да ја проверат и работата на Агенцијата за пошти и нивното доделување лиценци на приватни пошти, повика на 15 ноември министерот за транспорт и врски Александар Николовски коментирајќи го вчерашниот ревизорски извештај за работата на Македонска пошта. Според него во таа институција работела се освен она што и е основна задача да биде регулаторно тело за работата на македонските компании кои нудат поштенски услуги.
Николовски тврди дека на терен има такви компании кои, како што вели, буквално работат од подрум. Тој очекува Обвинителството да постапи и по ревизорскиот извештај за работата на Македонски пошти и да утврди одговорност.
„И дај боже на претходната власт намерата да и била приватизација на Македонска пошта, иако јас не се согласувам со тоа но нивната цел не била ни приватизација туку пропаѓање на македонски пошти со отворање на приватни пошти“, изјави Николовски.
Ревизорите утврдија дека Македонска Пошта е загубар со милионски долгови, ама директорите во септември минатата година незаконски си покачиле плата.
„Според законот во случај на намалена добивка или значително влошена финансиска состојба на друштвото, надоместокот на плата и другите бенефиции предвидени со менаџерскиот договор може да се намалат“ се вели во извештајот за работата на Поштата во 2023.
Од 2017 година па навака, Македонска пошта работи со загуби, при што најголемата загуба е евидентирана во 2022 година во вредност од 3,7 милиони евра. Според ревизорите загубите се должат на неплатени кредити, заеми и сметки за струја.
Дополнително Николовски изјави дека зградата на Македонска пошта што настрада во пожар во 2013 година според плановите на претходната власт требало да биде дадена на користење на ресторан со кабаре.
„Знаете дека централниот објект на Македонска пошта настрада во пожар, и јас заедно со министерот за култура со поддршка на европската делегација формиравме работно тело кое работи интензивно на стане мултимедијален музејски центар. Планот на претходното раководство било да го издаде за ресторан со кабаре“, изјави Николовски.
Објектот изграден за да го симболизира подигнувањето и реконструкцијата на градот Скопје по силниот земјотрес што целосно го разурна во 1963 година, по пожарот во 2013 година сега е руиниран и веќе една деценија е симбол на системската негрижа за државниот имот и културното наследство.
Претходната Влада предводена од СДСМ и ДУИ се надеваше на европски пари за ревитализација на симболот на градот од постземјотресно Скопје, во период кога администрацијата на Пошта издвои 1,2 милиони евра за тендер за чистење.
Зградата на Македонски пошти е еден од најкарактеристичните објекти од бруталистичката архитектура во постземјотресно Скопје. Изградена е по проектот на македонскиот архитект Јанко Константинов во 1974 година. Во пожарот во 2013 година изгореа муралите на Борко Лазески со кои беше насликана внатрешноста на шалтерската сала, како и голем дел од мебелот и осветлувањето кои беа дизајнирани специјално за поштата.
Овој објект се најде на листата на седум најзагрозени споменици и локалитети на листата на Еуроностра. Објектите кои се избрани на оваа листа добиваат помош во форма на експертизи, ресурси и можност за аплицирање за инвестициски грантови.
Уапсен министер во Сараево поради дивоградби на планината Бјелашница
Босанското обвинителство во Сараево го приведе министерот за просторно планирање, градежништво и заштита на животната средина, Бојан Бошњак под сомнение за злоупотреба на положба или овластување. Државната агенција за истрага и заштита на Босна и Херцеговина (СИПА) утрото на 15 ноември изврши претреси во зградата на Владата на кантонот Сараево (КС) поради дивоградби на планината Бјелашница. Бјелашница е ланина во централна Босна и Херцеговина, која се наоѓа југоисточно од Сараево и се граничи со Игман.
„Постои сомневање дека тој (Бошњак) дал позитивно мислење за извештајот за стратегиска оцена на влијанието врз животната средина, со кој сакал да ги легализира дивите урбанистички проекти во Бјелашница од страна на осомничените Ибра Берил и Надја Милишиќ“, се наведува соопштение на Обвинителството.
Градоначалникот на Трнов Ибро Берило на почетокот на август беше уапсен за дивоградба во Бјелашница. Покрај него, тогаш биле приведени уште три лица.
Обвинителство што ја спроведува акцијата тогаш извести дека „се работи за системска корупција во градежниот сектор и перење пари“.
Градоначалникот Берило беше ослободен од притвор на почетокот на ноември со преземените мерки за претпазливост.
Инаку, Канцеларијата за борба против корупцијата и управувањето со квалитетот на кантонот Сараево (КС) објави мапа во септември 2022 година на која се прикажани местата, главно во Бјелашница, каде што незаконски се сече шумата за изградба на станови и други објекти.
Хрватскиот обвинител го потврди приведувањето на министерот за здравство Берош
Хрватскиот државен обвинител Иван Турудиќ на 15 ноември потврди дека е уапсен министерот за здравство Вили Берош. Во меѓувреме хрватскиот премиер Андреј Пленковиќ го разреши Берош од должноста. Истрагата се води и против едно правно лице за примање и давање поткуп. Турудиќ изјави дека дека Берош се товари за тргување со влијание, додека според истрагата на Европското јавно обвинителство Берош е осомничен и за мито.
Турудиќ вели дека истрагата е под надлежност на Државното обвинителство на Хрватска (ДОРХ) и дека Европското јавно обвинителство (ЕППО) не постапувало согласно уредбите бидејќи не го информирало ДОРХ за истрагата. Тој смета дека ДОРХ е одговорен за овој случај бидејќи се работи за средства од државниот буџет.
„Нема да го контактирам со ЕППО, доколку предизвикаат судир на надлежност, тогаш ќе се одлучува за јурисдикцијата. И за тоа ќе одлучувам јас, односно надлежното национално тело ДОРХ“, рече Турудиќ.
Турудиќ потврди приведување на вкупно тројца осомничени, додека европските обвинители водат истрага против осум осомничени.
Хрватските медиуми јавуваат дека рано на 15 ноември истражителите упаднале во куќата на министерот Берош од Хрватската демократска заедница (ХДЗ), како и кај неколку други високопозиционирани лекари.
Спорна е набавката на двојни микроскопи за неврохирургија, кои биле преплатени.
Некои медиуми објавија дека меѓу уапсените е и Крешимир Ротим, шеф на Клиниката за неврохирургија на КБ „Сестри на милосрдието“, јавуваат хрватските медиуми.
Берош е вториот министер во владата на Пленковиќ кој беше уапсен додека беше на функцијата. Пред него, во 2022 година, беше уапсен тогашниот министер Дарко Хорват под сомнение дека незаконски давал државни стимулации, а во таа истрага беше опфатен и тогашниот вицепремиер Борис Милошевиќ, како и некои други функционери.
Затвор од 5 години за украдени 120 илјади биткоини
За кражба на 120 илјади биткоини од глобалната берза за крипотовалути Битфинекс (Bitfinex) во Соеднитетите Држави е осуден на 5 години затвор 35 годишниот Илја Лихтеншајн. Станува збор за човек роден во Русија а израснат во САД, кој американските обвинители го обвинија за кражба сторена во 2016 година. Вредноста на украдените биткоини во тоа време изнесувала 71 милиони долари, додека сега нивната вредност е зголемена за илјада пати. Цената на криптовалутата Биткоин на 11 ноември за првпат го надмина прагот од 80.000 на платформата Битстамп (Bitstamp)
Ова се смета за најголемата кражба на биткоини во историјата.
Лихтенштајн во судот се изјаснил за виновен минатата година, како и неговата сопруга Хедер Морган, која му помогнала да ги испере парите, купувајќи златни монети и картички за подароци за купување.
Според судските документи, Лихтенштајн ја хакирал мрежата на Битфинекс во 2016 година, и со измама одобрил повеќе од 2.000 трансакции со пренос на 119.754 биткоини од Bitfinex во својот крипто паричник.
Обвинителите во текот на судскиот процес прикажале како Лихтенштајн, со помош на Морган, користел бројни софистицирани техники за перење на пари вклучително и користење на фиктивни идентитети за поставување онлајн сметки, автоматизирање на трансакции, депонирање на украдените средства на сметки на различни darknet пазари и размена на криптовалути.
Според американската судска практика, кога станува збор за враќање на украдениот имот на сопствениците, тие во посебна судска постапка можат да поднесуваат барање за враќање назад на нивните биткоини.
Во февруари догодина ќе биде објавен следниот повик на Владата за општините
Наредниот повик на Владата за поддршка на општините ќе биде објавен во февруари или март наредната година, во зависност од подготвеноста на општините изјави денеска премиерот Христијан Мицкоски, одговарајќи на новинарски прашања по одржувањето на годишната конференција на граѓански организации: „Соработка меѓу Владата и граѓанското општество“ која се одржа во Скопје.
За општините, олеснувања се и донесените измени на законот за градежно земјиште со што ќе бидат ослободени од плаќање на комуналии при изградба на училишта и градинки.
„Донесовме закон во парламентот, измени во законот за градежно земјиште каде што сите оние јавни објекти како што се градинки, училишта кои се сопственост на државата ќе бидат ослободени од плаќање на комуналии. Имаше случаи во Скопје, градот Скопје, знаете таму состојбата каква е да го издолжува периодот, да не ги ослободува општините во Скопје од комуналии, па тие не може да отпочнат со градба на градинки, училишта итн. и сега со овој закон и таа пречка е отстранета“, изјави премиерот.
Со донесените измени, посочи претседателот на Владата, очекува да се градат градинки, училишта и да се воведе едносменско учење што е дополнителна вредност и за родителите и за учениците.
Премиерот смета дека едносменското учење во основните училишта, што е владина определба, ќе овозможи поголема сигурност за родителите и е добра можност за учениците да стекнат нови пријателства, да другаруваат и да разменуваат знаења.
„Тоа значи ќе мора да има градежни интервенции во некои училишта каде има двосменско работење во некои од општините, не во сите и сега ако сè уште ние бевме заложници на однесувањето на Градот Скопје и на поединци таму, тогаш ќе требаше оваа политика којашто е додадена вредност за родителите и за децата да почека. Но, еве и тоа се надмина и мислам дека добро одат работите“, изјави премиерот Мицкоски.
За претходниот повик дел од општините требаше да достават дополнителни документи, за што информациите треба да ги обезбеди Министерството за локална самоуправа.
На првиот повик, четири општини не добија пари од кредитот, бидејќи задоцниле со документите. За нив рокот за достава на документацијата беше продолжен до 15 ноември.
Општините кои поминаа на огласот за доделување на државна помош за капитални инвестиции од парите од унгарскиот кредит веќе ги потпишаа договорите. Вкупно се потпишани 274 проекти за вкупно 4,1 милијарда денари. Договорите се однесуваат за реализација на проекти во делот на образованието, транспортот, социјалната политика, културата и туризмот, животната средина и во спортот.
Одложен е тендерот со понуди за цената на струјата по која ќе се снабдува ЕВН Хоум
ЕВН Хоум од технички причини и на барање на понудувачите за дополнителен период за доставување понуди го одложи за 28 ноември тендерот на кој треба да биде доставена понуда за цената со која ќе го снабдуват универзалниот снабдувач по 1 јануари.
За 27 ноември, како што информираат од ЕВН Македонија, е одложен и тендерот на Електродистрибуција за набавка на електрична енергија за покривање на загубите во системот.
Досега понуда на тендерот на ЕВН Хоум доставуваше државната компанија АД ЕСМ. Од тоа каква цена ќе понудат и колку од потребите на универзалниот снабдувач ќе задоволат, најмногу зависи какви сметки ќе имаат потрошувачите на регулираниот пазар по 1 јануари.
Моментално ЕСМ задоволува 100 проценти од потребите на ЕВН Хоум по цена од 60 евра за мегават час. Се очекуваше денеска (15 ноември) државната енергетска компанија да достави понуда на тендерите на ЕВН Хоум и Електродистрибуција.
Премиерот Христијан Мицкоски пред некој ден изјави дека доколку има зголемување на цената на струјата, тоа ќе биде минимално, од еден до три проценти.
ЕУ со раст од најмалку 1,5 отсто во следните две години
По подолг период на стагнација, економијата на ЕУ остварува скромен раст, а во исто време продолжува намалувањето на стапката на инфлација, се наведува во есенската прогноза на Европската комисија за економските перспективи во блокот.
ЕК во извештајот предвидува раст на БДП во 2024 година на 0,9 отсто на ниво на цела ЕУ и од 0,8 во Еврозоната. За следната година се прогнозира економски раст од 1,5 проценти во ЕУ и 1,3 отсто во Еврозоната, додека за 2026 година се проценува зголемување на БДП од 1,8 отсто на ниво на целиот блок и од 1,6 проценти во еврозоната во 2026 година.
Во однос на стапката на инфлација се предвидува нејзино намалување на ниво на ЕУ на крајот на годинава од ланските 6,4 на 2,6 проценти, а во следните две години се прогнозира нејзино натамошно намалување на 2,4 отсто во 2025 и 2,0 проценти во 2026 година.
Извршен потпретседател на Европската комисија за економија во интерес на луѓето, Валдис Домбровскис оцени дека постојаното закрепнување на економијата на ЕУ, ќе придонесе за забрзување на економскиот раст во следната година со зголемената потрошувачка, благодарение на зајакнувањето на куповната моќ, рекордно ниската невработеност и очекуваниот раст на инвестиции.
„Сепак, со оглед на актуелната геополитичка несигурност и многуте ризици, не можеме да си дозволиме да бидеме самозадоволни. Треба да се справиме со долготрајните структурни предизвици, да ја зголемиме продуктивноста и да се погрижиме економија на ЕУ да остане глобално конкурентна“, изјави Домбровскис.
Според него, од витално значење е земјите членки на ЕУ да ги спроведат сите реформи и инвестициски планови за закрепнување и отпорност и да ги намалат нивоата на јавниот долг во согласност со новите фискални правила.
Еврокомесарот за економија Паоло Џентилони, пак, порача дека европската економија полека закрепнува, со намалување на инфлацијата, растот на домашната потрошувачка и инвестициите и со намалување на невработеноста на рекордно ниско ниво.
„Сепак, структурните предизвици и геополитичката неизвесност влијаат на нашите идни перспективи. Земјите членки ќе мора да работат на намалување на нивото на долгот и истовремено поддржувајќи го растот“, оцени Џентилони.
Тој порача дека зајакнувањето на конкурентност на ЕУ преку инвестиции и структурни реформи е од клучно значење за поттикнување на потенцијалниот економски раст и за надминување на растечките геополитички ризици.
Мултимедија
Најпосетени
Што треба да знаете