Претседателката на Европскиот парламент Роберта Мецола ја поддржа употребата на ракети со долг дострел од страна на Украина во одбрана од руската инвазија, велејќи дека Германија треба брзо да му достави на Киев ракетен систем со долг дострел.

Во интервју објавено од весникот Funke Mediengruppe на 23 ноември, Мецола вели дека поддржува испраќање вакви ракети во Украина и дека треба да им се дозволи да се користат против цели во Русија.

Германскиот канцелар Олаф Шолц се спротивстави на испраќањето на ракетниот систем Таурус во Украина.

Неговите коалициски партнери, Слободните демократи и Зелените се за испраќање проектили во Киев.

Дебатите за ракетите беа актуелни во последните денови откако, наводно, САД и дале дозвола на Украина да ги користи американските ракети АТАКМС за да ја напаѓа Русија.

Германските системи Таурус можат да нападнат цел оддалечена до 500 километри.

Русија во четвртокот истрела балистичка ракета со среден дострел врз украинскиот регион Днипро и предупреди дека таквите напади би можеле да бидат насочени и кон Западна Европа.

Војната во Украина започна на 24 февруари 2022 година. Рускиот претседател Владимир Путин ја нарече „специјална воена операција“ за демилитаризација на Украина.

Западот ѝ одговори на Русија со остри санкции за руската економија. Во руската инвазија на Украина, илјадници луѓе загинаа, а милиони беа раселени од своите домови.

Израелските воздухопловни сили на 23 ноември го нападнаа центарот на Бејрут, главниот град на Либан, додека Израел ја продолжува офанзивата против Хезболах, потврдија безбедносни извори, пишува Ројтерс.

Најмалку четири лица загинаа, а 23 се ранети во напад во областа Баста во Бејрут, јави телевизијата Хезболах ал Манар, повикувајќи се на информации од либанското Министерство за здравство.

Хезболах, проиранското движење во Либан, се смета за терористичка организација од Соединетите Американски Држави (САД), додека Европската унија (ЕУ) го стави на црната листа само неговото вооружено крило, но не и политичката партија претставена во либанскиот парламент.

Либанската Национална новинска агенција објави дека во нападот има жртви и дека е уништена осумкатница.

Снимката емитувана од либанската станица Ал Џадед покажува дека најмалку една зграда е уништена и неколку други се тешко оштетени.

Експлозиите го потресоа Бјерут околу 4 часот наутро, потврдија очевидци за Ројтерс. Безбедносни извори велат дека во нападот биле фрлени најмалку четири бомби.

Тоа е четврти израелски воздушен напад оваа недела насочен кон предградијата на Бејрут, иако повеќето израелски напади беа насочени кон јужните предградија контролирани од Хезболах.

Неколку функционери на Хезболах, најважниот сојузник на Техеран во регионот, беа убиени во воздушни напади врз јужните предградија на Бејрут.

Израел започна голема офанзива против Хезболах во септември, по речиси една година прекугранични непријателства предизвикани од војната во Газа.

Конфликтот започна кога Хезболах отвори оган во знак на солидарност со својот палестински сојузник Хамас, група на листата на САД и ЕУ како терористичка организација која го нападна јужен Израел на 7 октомври 2023 година.

Американскиот посредник Амос Хохштајн отпатува во Либан и Израел оваа недела во обид да обезбеди прекин на огнот.

Новоизбраниот американски претседател Доналд Трамп размислува да го избере Ричард Гренел, поранешен шеф на разузнавањето, за специјален пратеник за војната во Украина иницирана од Русија, потврдија извори блиски до Трамп.

Гренел, кој за време на претседателствувањето на Трамп од 2017 до 2021 година беше амбасадор во Германија и специјален пратеник за преговорите меѓу Србија и Косово и вршител на должноста директор на националното разузнавање, ќе одигра клучна улога во напорите на Трамп да ја запре војната во Украина, доколку тој биде избран, пишува Ројтерс.

Иако во моментов нема специјален пратеник посветен само на решавање на руско-украинскиот конфликт, Трамп размислува за тоа, велат изворите.

Гренел се залагаше за создавање „автономни зони“ како средство за решавање конфликти. Тој исто така рече дека нема да биде за влез на Украина во НАТО во блиска иднина.

Доналд Трамп, кој ќе го преземе претседателството на 20 јануари, ја критикуваше силната поддршка на поранешниот претседател Џо Бајден за Киев и рече дека ќе бара што поскоро ставање крај на руската војна во Украина.

Каролин Левит, привремената портпаролка на Трамп, не го потврди назначувањето и рече дека новоизбраниот претседател јавно ќе ги соопшти своите одлуки.

Трамп веќе јавно ги објави имињата на некои луѓе за клучните позиции во неговата администрација, а меѓу нив е и Марко Рубио, кого го постави за државен секретар на САД.

Некои од номинациите ќе треба да ги одобри американскиот Сенат, со кој на следната седница ќе претседаваат републиканците на Трамп.

Денеска во претпладневните часови времето ќе биде променливо облачно со повремен снег претежно во западните делови.

Во текот на ноќта ќе дува умерен, а особено долж Повардарието засилен северен ветер, над 70 километри на час, соопшти Управата за хидрометеоролошки работи.

Минималната температура ќе биде во интервал од -6 до 3, а максималната ќе достигне од -1 до 11 степени.

Во наредните денови времето ќе биде стабилно и тивко со ниски утрински температури и со услови за појава на магла по котлините.

Воената мисија на НАТО на Косово (КФОР) во петокот (22 ноември) ниту ги демантираше ниту ги потврди тврдењата на Министерството за одбрана на Србија дека група вооружени косовски полицајци оваа недела без овластување ја преминале граничната линија во селото Ќирковиќ на територијата на Општина Лепосавиќ.

Наместо тоа, КФОР во својот одговор до Радио Слободна Европа (РСЕ) наведува дека ситуацијата долж граничната линија меѓу Косово и Србија е мирна и дека продолжува да го следи развојот на настаните.

„Имаме видливо и флексибилно присуство и сме добро позиционирани да одговориме на секое безбедносно сценарио, во согласност со нашиот долгогодишен мандат од ОН заснован на резолуцијата 1244 на Советот за безбедност на Обединетите нации од 1999 година“, одговорија од КФОР.

На крајот од својот одговор тие ја упатуваат редакцијата на РСЕ да побара одговор на конкретните прашања од српските власти.

На дополнителното прашање од РСЕ, да прецизира зошто само српските власти се надлежни да дадат одговори на конкретни прашања поврзани со овој случај, КФОР посочи дека го кажал својот став и нема што да додаде и повторно го упати РСЕ до Министерството за одбрана на Србија.

Косовската полиција во четвртокот ги отфрли како неточни тврдењата на српските власти дека косовски полицајци неовластено ја преминале граничната линија со Србија.

„Ваквите објави и соопштенија објавени на ваков начин претставуваат дезинформации со цел да се создаде несигурност кај граѓаните од тој крај и да се наруши угледот на работата на косовската полиција“, се наведува во реакцијата на косовската полиција.

Министерството за одбрана на Србија претходно соопшти дека „неовластеното преминување на административната линија“ меѓу Србија и Косово е „опасна провокација и закана за мирот“, и додаде дека српската армија ја следи ситуацијата на терен и е подготвена да реагира согласно со одредбите од кумановскиот Воено-технички договор.

Министерството за одбрана на Србија, исто така, побара од КФОР, „како единствена легална и легитимна воена сила“ на територијата на Косово, „да преземе мерки во согласност со својот мандат и да ги спречи привремените власти во Приштина да се обидат да предизвикаат ескалација на насилството“.

Српскиот претседател Александар Вучиќ во четвртокот изјави дека очекува реакција од САД бидејќи „тие знаат дека (косовскиот премиер Албин) Курти тоа намерно го наредил“. Тој побара од САД да ја известат Србија дали е во право „кога велиме дека Курти лично наредил провокација и упад на неговите вооружени сили на територијата на централна Србија во областа на селото Чирковиќе“.

„Тој очекуваше дека овие лица ќе бидат ликвидирани и дека тоа ќе биде неговата причина да го доведе НАТО во конфликт со Србија. Следниот пат ќе реагираме во согласност со целосните правила на службата“, изјави Вучиќ за РТС.

РСЕ побара од американската амбасада во Приштина и од Стејт департментот да ги коментираат изјавите на српскиот претседател, но одговор не доби.

Косово и Србија имаат гранична линија долга околу 350 километри, а над 60 отсто од неа опфаќа општини на северот на Косово, населени претежно со Срби.

Во последниве години, Косово често ја обвинуваше Србија дека ја приближува армијата до границата.

Во јуни 2023 година, Косово тврдеше дека тројца косовски полицајци биле уапсени во близина на границата со Србија, додека официјален Белград тврдеше дека тие ја преминале граничната линија. Неколку дена подоцна српските власти ги ослободија полицајците.

Границата меѓу Косово и Србија, Белград ја смета за административна линија.

Мисијата на НАТО на Косово, КФОР, е одговорна за безбедноста на границите на Косово со Србија, додека косовската полиција е одговорна за остатокот од граничната линија.

Според одлуката на командантот на КФОР од 2014 година, полицијата може да патролира на граничната линија меѓу Косово и Србија до најмногу еден километар во близина на границата.

Рускиот претседател Владимир Путин најави дека новата балистичка ракета со среден дострел, која може да носи нуклеарна боева глава, ќе продолжи да се тестира, вклучувајќи и во борбени услови како што беше случај претходно оваа недела при напад врз Украина.

„Ќе продолжиме со овие тестови, вклучително и во борбени услови, во зависност од ситуацијата и природата на безбедносните закани што се создаваат за Русија“, рече Путин на 22 ноември на состанокот со претставници на Министерството за одбрана и на воено-индустрискиот комплекс.

Русија ја употреби таканаречената хиперсонична ракета „Орешник“ против Украина на 21 ноември во напад насочен кон градот Днепар.

Путин тогаш рече дека тоа е дел од одговорот на Москва на украинските напади со ракетите ATACMS, испорачувани од САД, и ракетите „Storm Shadow“, кои ги испорачуваат Британците, кои следуваа по информациите дека овие две земји му дале дозвола на Киев да ги користи овие системи за да погоди цели на руска територија.

Украинските власти првично ја обвинија Русија за лансирање на интерконтинентална балистичка ракета, по што Путин објави дека тоа всушност е новата балистичка ракета со среден дострел.

Во изјавата денеска (22 декември), Путин додаде дека проектилот е нов и не е надградба на претходното вооружување од советската ера.

Портпаролот на Кремљ, Дмитриј Песков, исто така, денеска повтори дека тестот е порака до Западот дека Москва ќе одговори остро на сите „непромислени“ потези на западните земји за поддршка на Украина.

„Главната порака е дека непромислените одлуки и дејствија на западните земји кои произведуваат ракети, ги испорачуваат во Украина и потоа учествуваат во напади на руска територија, не можат да поминат без реакција од руската страна“, изјави Песков.

Украинската воена разузнавачка служба во соопшти дека Русија може да има до 10 единици од новата ракета што веќе ја лансираше.

Рускиот Врховен суд во петокот (22 ноември) ја прогласи меѓународната организација Форум на слободни нации пост-Русија за терористичка организација, што се смета за уште еден потег со цел да се потисне секаков обид за искажување на поинакви мислења.

Организацијата, основана во Полска во 2022 година, е обвинета за промовирање сепаратизам со цел распаѓање на Руската Федерација и нејзина поделба на независни држави под странско влијание, јавува рускиот сервис на Радио Слободна Европа.

Русија е мултиетничка земја која се состои од повеќе од 80 региони, од кои многу имаат големо домородно население, како што се Чеченија и Татарстан. Откако дојде на власт во 1999 година, рускиот претседател Владимир Путин ја централизираше моќта, ограничувајќи ја автономијата што ја уживаа некои етнички региони.

Руската инвазија на Украина и нејзиниот обид да го избрише украинскиот идентитет фрлија светло и врз лошото постапување на Кремљ кон домородното население во Русија, но паралелно започна и движење за „деколонизација“ кое се обидува да им даде поголемо значење на етничките групи во проучувањето на историјата и културата во таа земја.

Тужбата против Форумот на слободни нации пост-Русија беше покрената на крајот на октомври од страна на Генералното обвинителство, кое ги наведе активностите на организацијата како закана за територијалниот интегритет и националната безбедност на Русија.

Во соопштението, Обвинителството наведува дека форумот функционира преку 172 регионални и национални ентитети, вклучувајќи ги и Балтичката републиканска партија, Движењето Ингри, Конгресот на народите на Северен Кавказ, Фондацијата Слободна Јакутија и Конфедерацијата на Далечниот Исток. Обвинителството тврди дека со овие групи управуваат прогонети водачи на сепаратистички движења.

„Овие лидери имаат за цел да ја поделат Руската Федерација на независни држави кои би потпаднале под влијание на непријателски странски држави“, објави Канцеларијата на јавниот обвинител на својата веб-страница.

Форумот на слободни нации пост-Русија е регистриран во Полска и се опишува себеси како граѓанско движење кое се залага за поголема регионална автономија во Русија, а некои членки ја поддржуваат и целосната регионална независност. На својата веб-страница и социјалните медиуми, организацијата користи и варијации на своето име, како што е Форумот на слободни држави пост-Русија.

Украинскиот бизнисмен Олех Махалечки се претставува како еден од основачите на групата и се верува дека е главен спонзор.

Активностите на групата вклучуваа дискусии за децентрализација и независност, на кои настапуваат значајни говорници како што се истакнатиот татарски активист Нафис Кашапов, башкирскиот активист Руслан Габасов, рускиот опозициски политичар Илја Пономарјев, американскиот политички аналитичар Јануш Бугајски и други.

Прогласувањето на организацијата за терористичка од страна на Врховниот суд значи дека се забранети сите активности на Форумот за слободни нации во Русија. Членството или здружувањето со оваа организација ќе биде предмет на кривично гонење, според руските антитерористички закони.

Критичарите на пресудата тврдат дека оваа одредба одразува широко задушување на различните мислења и на движењата за регионална автономија во Русија. Тие наведуваат дека Форумот првенствено работи во странство и на Интернет, што ја доведува во прашања ефективноста на пресудата надвор од границите на Русија.

Новоизбраниот претседател на САД, Доналд Трамп, нема да биде осуден овој месец во случајот за тајните исплати кон порно актерката Сторми Даниелс, потврди денеска судијата од Њујорк.

Наместо тоа, судот им наредил на обвинителите и адвокатите да размислат и да дадат предлози што да се прави понатаму со случајот.

Трамп во мај беше осуден за 34 кривични дела, откако поротата утврди дека тој лажно манипулирал со деловните евиденции со цел да се прикрие наводна сексуална средба со Даниелс пред изборите во 2016 година.

Порно актерката тврдеше дека претходно имала ваква средба со Трамп, а во замена за нејзиното молчење и биле исплаќани пари пред тој да стане претседател во 2016-та. Трамп, пак, ги негираше тврдењата на Даниелс велејќи дека не направил ништо лошо.

По неговата изборна победа на почетокот на месецов, следуваше наплив на поднесоци за овој случај до судот со што стана јасно дека на закажаниот датум – 26 ноември, нема да биде изречена казната за Трамп.

Одложувањето денеска го официјализираше и судијата Хуан Меркан без притоа да одреди нов датум.

Судијата Меркан ги повика обвинителите и адвокатите да достават дополнителни поднесоци во следните две и пол недели за тоа како да се продолжи со случајот со оглед на враќањето на Трамп во Белата куќа.

Адвокатите на Трамп бараат случајот целосно и веднаш да се отфрли. Тие сметаат дека во спротивно тоа ќе ги попречи транзицијата на власта и извршувањето на неговите должности.

Обвинителите посочија дека се подготвени да го одложат случајот, можеби додека Трамп е на функцијата, но ои не сакаат тој целосно да биде укинат. Окружниот обвинител на Менхетен, Алвин Брег, демократ, рече дека решението треба да ги балансира должностите на претседателството со „светоста на пресудата од поротата“.

Канцеларијата на Брег одби да ја коментира денешната одлука за одложување на датумот за изрекување на казната. Портпаролот на Трамп и нов директор за комуникации во Белата куќа, Стивен Чеунг, ја оцени одлуката како „решавачка победа“ за Трамп.

Повеќе од 10.000 корисници во областите Златибор, Рашин и Рашкa во Србија во моментов се без електрична енергија поради дефекти на мрежата предизвикани од снежните врнежи и бурните ветрови, објави Радио-телевизија Србија (РТС) на 22 ноември.

Станува збор за области во централниот и југозападниот дел на Србија.

Според јавниот сервис, 160 екипи на Електродистрибуција Србија биле ангажирани за санирање на дефекти на територијата на дистрибутивната област Краљево, која опфаќа 43 општини и 11 градови со околу 900.000 корисници.

Балканскиот сервис на РСЕ побара повеќе детали од Електропривреда Србија, но до објавувањето на веста, одговорот не стигна.

Во текот на вечерта во Србија се очекува формирање на снежна покривка од пет до 10 сантиметри во пониските делови, а повеќе од 20 сантиметри на планините.

Компанијата „Ер Србија“ соопшти дека неповолните временски услови во Белград и на одредени аеродроми во регионот, ќе се одразат на протокот на сообраќајот на српската национална авиокомпанија и ќе доведат до доцнења и можни откажувања на одредени летови.

Претседателката на Северна Македонија, Гордана Сиљановска-Давкова денеска (22 ноември) во својот кабинет остварила средба со Радмила Шекеринска откако во вторникот поранешната министерка за одбрана беше избрана за заменик-генерална секретарка на НАТО.

Сиљановска-Давкова преку социјалните мрежи соопшти дека имале пријатна средба и плоден разговор, а назначувањето на Шекеринска, порача, е и државно признание.

„Искрени честитки за престижната функција, којашто е не само лично, туку и државно признание, доказ дека единството и консензусот меѓу носителите на највисоките функции се клучот за успехот и афирмацијата на државата“, напиша Сиљановска-Давкова на социјалните мрежи.

Во соопштение објавено од претседателскиот кабинет, пак, наведоа дека претседателката изразила уверување дека Шекеринска „ќе даде значаен придонес во остварувањето на клучните цели на Алијансата: унапредувањето на колективната безбедност, зајакнувањето на солидарноста меѓу сојузниците и справувањето со современите закани“.

„Со изборот на Радмила Шекеринска на високата функција во НАТО, Алијансата јасно и отворено ја манифестира свеста за важноста на регионот, како и посветеноста кон него“, соопштија од кабинетот на Сиљановска-Давкова.

Претходно, премиерот и лидер на ВМРО-ДПМНЕ, Христијан Мицкоски, изјави дека како Влада ја поддржале кандидатурата на Шекеринска која, инаку, долги години беше функционер до ривалскиот СДСМ.

Веста за изборот на Шекеринска за заменик-генерална секретарка на НАТО ја објавија од Алијансата на 19 ноември.

Дента, таа не доби честитки ниту од премиерот ниту од претседателката. Мицкоски ден потоа изјави дека имале телефонски разговор и и честитал.

Сиљановска-Давкова, исто така, на 20 ноември објави дека разговарале телефонски и ја поканила Шекеринска на средба.

Претседателката, како што може да се забележи на фотографии објавени од функционери на социјалните мрежи, присуствувала и на свечениот прием што го организирала Шекеринска денеска по повод назначувањето на функцијата.

Со нејзиното назначување, поранешната министерка за одбрана на Северна Македонија, стана највисокиот функционер во Алијансата досега што доаѓа од регионот на Западен Балкан, но и од земја надвор од Европската унија.

Пополнувањето на заменичката позиција беше приоритет за генералниот секретар Марк Руте, кој ја презеде оваа функција на 1 октомври, по 14 години како холандски премиер.