Украинската армија соопшти дека руските сили започнале контранапади околу Харкив, во обид да ја вратат изгубената територија откако биле потиснати назад до границата.

Во областа на населбата Велика Комишваха, руските сили претрпеа значителни загуби и беа принудени да се повлечат на нивните претходно окупирани позиции, објави денеска Генералштабот на вооружените сили на Украина.

Гувернерот на руската област Курск денеска изјави дека едно лице е убиено, а друго рането по украинскиот напад на село во близина на границата.

Британското Министерство за одбрана во својот дневен билтен за разузнавање денеска објави дека генерал-полковник Сергеј Кисел кој командувал со елитната Прва гардиска тенковска армија, е суспендиран поради неуспехот да го заземе Харкив, вториот по големина украински град.

• Русија - Скоро 1.700 украински борци „се предадоа“ во Мариупол

Во извештајот на британската разузнавачка служба се наведува дека Кисел е само еден од високите руски офицери кои биле отпуштени во последните недели поради лошите перформанси во раните фази на инвазијата на Украина.

Меѓу другите руски команданти кои најверојатно биле отпуштени бил и вицеадмиралот Игор Осипов, кој командувал со руската Црноморска флота по потонувањето на крстосувачот Москва во април, објави британското разузнавање.

На таа позиција најверојатно ќе остане Валери Герасимов, началникот на Генералштабот на руската армија, се наведува во билтенот во кој се додава и дека не е јасно дали ја задржува довербата на претседателот Владимир Путин.

Од Институтот за јавно здравје информираат дека епидемиолози исконтактирале со лицата кои биле во контакт со позитивните лица со мајмунски сипаници и оти тие немаат никакви симптоми на заболување. Двете лица кај кои е констатиран вирусот, како што информира ИЈЗ, се во добра состојба.

Од Институтот соопштуваат дека нема нови сомнителни случаи кои што се испратени за тестирање.

„Во текот на вчерашниот ден беа објавени препораки на веб страната на ИЈЗ до граѓаните. Дополнително, ИЈЗ изработи краток водич за здравствени работници со препораки и патеки на движење за сомнителните случаи и истиот беше доставен до Министерството за здравство кое што ги проследи до надлежните здравствени институции. Институтот за јавно здравје, Министерство за здравство, заедно со останатите надлежни институции се во постојана комуникација и координација и остануваат посветени во следење на актуелната состојба како и справување со истата. Засега ризикот за ширење на оваа болест во нашата држава останува низок“, се наведува со соопштението на ИЈЗ.

Видете и ова:

Два случаи на мајмунски сипаници во нашата држава

Исто така отворени се две нови телефонски линии за информирање на граѓаните и здравствените лица со мајмунските сипаници. Граѓаните можат да добијат информирации на телефонскиот број 076/233-791, а здравствените работници на 076/233-792.

Мајмунските сипаници се пренесуваат преку близок контакт како што се сексуален однос, контакт кожа со кожа и зборување или дишење во близина на друго лице. Предизвикува симптоми слични на грип, потоа кожна болест и може да биде фатална.

Европската комисија се закани со мерки против Унгарија доколку владата на премиерот Виктор Орбан усвои контроверзен закон со кој се ограничува работата на невладините организации.

Воведувањето на законот за „транспарентност во јавниот живот“ би наметнало строги прописи за невладините организации финансирани од странство, кои се сметаат за ризик за суверенитетот на Унгарија, пишува ДПА.

Според Комисијата, предлог-законот, поднесен до унгарскиот парламент од конзервативната националистичка партија Фидес на Орбан, претставува сериозно кршење на правата на ЕУ.

Комисијата побара повлекување на нацрт-законот од законодавната постапка.

Доколку законот биде усвоен како што се очекува, Комисијата предводена од претседателката Урсула фон дер Лајен најави дека нема да се двоуми да ги преземе потребните мерки.

Комисијата може да покрене посебни постапки за вакви случаи на прекршувања, што резултира со високи казни за земјите-членки кои не го почитуваат правото на ЕУ.

Видете и ова:

Унгарскиот парламент треба да гласа за забрана за собири на ЛГБТК припадниците

Споредливо со сегашното законодавство во Русија, нацрт-законот им овозможува на невладините организации финансирани од странство кои можат да влијаат на јавното мислење да бидат ставени на црна листа.

Потоа, тие организации можат да добијат материјална поддршка од странство, само со одобрение од даночната администрација на земјата во која работат.

Доколку невладината организација се финансира на други начини, таа мора да ѝ плати на државата 25 пати поголема сума како казна, во спротивно ќе биде распуштена и забранета, пишува ДПА.

Невладините организации се организации кои, независно од владите, се борат за човекови права, животната средина или здравјето и други аспекти од јавниот живот.

Орбан, кој постојано се судираше со ЕУ во текот на неговите 15 години како лидер на Унгарија, е под зголемен притисок дома пред парламентарните избори во април следната година.

Петер Маѓар, политички почетник кој побегна од владејачката партија на премиерот, се појави како конзервативен предизвикувач чија нова партија Тиса, веќе неколку месеци доминира во анкетите на јавното мислење пред Фидес на Орбан.

Русија и Украина ја започнаа најголемата размена на затвореници од почетокот на руската инвазија, разменувајќи стотици војници и цивили во процес што се очекува да продолжи во текот на викендот, соопштија официјални лица од двете земји на 23 мај.

„Ги враќаме нашите луѓе дома. Првиот дел од договорот за размена од 1000 за 1000 е имплементиран“, напиша украинскиот претседател Володимир Зеленски во објава на Телеграм.

Зеленски рече дека се разменети 390 лица од секоја страна и дека се очекува размената да продолжи на 24-25 мај. Според руското Министерство за одбрана, тој број вклучува 270 воени заробеници и 120 цивили.

Неколку часа претходно, американскиот претседател Доналд Трамп изјави дека Украина и Русија „штотуку ја завршија“ размената, која беше во тек уште од мировните преговори во Истанбул пред една недела и дека таа „наскоро ќе стапи на сила“.

„Честитки до двете страни за овие преговори.Ова може да доведе до нешто големо?“, напиша Трамп на својата платформа Truth Social.

Еден ден претходно, Зеленски рече дека договорот е „можеби единствениот вистински резултат“ од 90-минутната средба меѓу украинските и руските преговарачи во Истанбул на 16 мај - првите директни мировни преговори меѓу украинските и руските претставници откако Москва започна целосна инвазија на Украина во февруари 2022 година.

Зеленски рече дека страните размениле списоци на затвореници кои би можеле да бидат разменети.

Руското Министерство за одбрана соопшти дека меѓу 120-те Руси кои се враќаат во Русија има жители на Курската област, која Украина ја нападна минатиот август.

Размената на 1000 луѓе од секоја страна би била најголемата од неколкуте размени на затвореници од почетокот на целосната инвазија. Претходните размени не доведоа до опиплив напредок во завршувањето на војната.

Русија ги отфрли повиците од Украина, САД и европските земји за 30-дневен прекин на огнот, а по разговорите во Истанбул не е закажана нова средба.

Во објава на Truth Social по телефонскиот разговор со рускиот претседател Владимир Путин на 19 мај, Трамп рече дека Русија и Украина „веднаш ќе започнат преговори“ за прекин на огнот и крај на војната. Тој го предложи Ватикан како можно место за понатамошни преговори.

Видете и ова:

Дипломатијата не донесе пробив во преговорите за крај на војната во Украина. Што е следно?

На 23 мај, рускиот министер за надворешни работи Сергеј Лавров ја отфрли идејата и нагласи дека датумот за новата средба сè уште не е одреден.

„Многу луѓе фантазираат за тоа кога и каде ќе се одржи. Во моментов немаме идеи“, рече Лавров во говорот на Дипломатската академија во Москва, додавајќи дека би било „малку невкусно“ ако Русија и Украина, кои се претежно православни земји, „користат католичка платформа“ за преговори.

„Мислам дека не би било многу пријатно за самиот Ватикан да биде домаќин на делегации од две православни земји под овие околности“, рече Лавров.

Украина и европските влади ја обвинија Русија дека го условува прекинот на огнот со неприфатливи барања и дека не преговара со добра намера. Многу аналитичари велат дека Путин не се откажал од својата цел да ја покори Украина.

Една од неколкуте главни точки на спор е барањето на Кремљ Украина да ги повлече своите сили од четири делумно руско окупирани региони за кои Москва неосновано тврди дека ѝ припаѓаат на Русија. Зеленски нагласи дека Украина нема да ги повлече трупите од својата територија.

Седумнаесет лица биле повредени, од кои четворица се во животна опасност, во синоќешниот напад (23 мај) во Хамбург кога 39-годшина Германка со нож се нафрлила врз луѓето кои чекале на главната железничка станица, јави ДПА.

Жената напаѓач е уапсена, а при асењето не давала отпор. Полицијата верува дека таа дејствувала сама и не била политички мотивирана.

Видете и ова:

24-годишен Авганистанец осомничен за намерно влетување кон група луѓе во Минхен

Од 2023 година ножевите се забранети на главната станица во Хамбург и во јавниот превоз во вториот најнаселен град во Германија.

Ова е последен од серијата напади на јавни места во Германија што се случија годинава, особено во пресрет на парламентарните избори во февруари.

Со повеќе настани денеска (24 мај) во земјава се одбележува Денот на сесловенските просветители светите браќа Кирил и Методиј, кои се основоположници на словенската писменост и литература и се заслужни за културниот развој на сите словенски народи. Поради нивните заслуги за христијанството Светата црква ги прогласила за рамни на апостолите.

Државно-црковната делегација предводена од претседателката Гордана Сиљановска-Давкова престојува во Рим и во Ватикан на поконение на гробот на Свети Кирил, во рамки на манифестацијата „Ден на светите Кирил и Методиј“.

Премиерот Христијан Мицкоски денеска во Охрид ќе присуствува на одбележувањето на Денот на сесловенските просветители. Мицкоски ќе се обрати на свечената академија „Светилник низ векови и за иднината“ што ќе се одржи во црквата Св. Софија.

Денот на сесловенските просветители, светите браќа Кирил и Методиј, во Охрид се празнува и со низа други манифестации и настани. Чествувањата започнаа вчера со научна трибина, продолжуваат денеска со Меѓународен хорски фестивал на сцената на Античкиот театар, положување цвеќе пред монументалниот споменик во Градскиот парк и детски поетски фестивал, а ќе бидат заокружени вечер во црквата „Св. Софија“ со концертот „Уметниците во чест на Свети Кирил и Методиј“.

Видете и ова:

Сиљановска-Давкова на прием кај Папата, средба со Радев нема да има

Во храмовите на МПЦ-ОА, пак, се одржуваат празнични богослужби во чест на светите браќа.

Светите Кирил и Методиј иако имаат и посебни празници на денот на нивното упокојување, Црквата одредила и заедничко празнување на 24/11 мај. На почетокот Црквата одделно го празнувала споменот на двајцата браќа, на деновите на нивното упокојување Св. Кирил на 27/14 февруари и на Св. Методиј на 19/6 април, но подоцна се увидела потреба за нивен заеднички празник.

За двајцата браќа најважна е Моравската мисија, којашто е важна и за иднината на сите Словени и за ширењето на христијанството на словенски јазик.

Тогаш Словените немале букви, така што Кирил морал да состави и азбука и да ги преведе неопходните книги на словенски јазик. За составување на оваа прва словенска азбука (глаголицата), за првите преводи од грчки на словенски јазик Кирил го искористил јазикот на македонските Словени од Солун и околината.

Кирил починал во Рим на 27/14 февруари 869 година и денес неговите мошти почиваат во римската црква „Свети Климент“. Методиј починал на 19/6 април 885 година и бил погребан во моравската престолнина Велеград. По смртта на Методиј неговите ученици останале без заштита.

Светите Климент и Наум, делото на своите учители го продолжиле на брегот на Охридското Езеро во древниот град Охрид.

Основното јавно обвинителство Скопје, заедно со поднесените обвиненија во предметот „Онкологија“, до Основниот кривичен суд Скопје вчера (22 мај) поднесе и предлог за определување мерка притвор за двајца обвинети – медицинскиот и организацискиот директор на Универзитетска клиника за радиотерапија и онкологија Скопје.

„На обвинетите им се ставаат на товар повеќе кривични дела за кои се запретени високи затворски казни, а последицата од сторените кривични дела опфаќа и нанесување на значителна имотна штета на Буџетот на Република Северна Македонија, што може да влијае врз мотивот на обвинетите да се дадат во бегство“, соопштија од Обвинителството.

Видете и ова:

Случај „Онкологија“: Обвинети онколози за несовесно лекување на пациенти и финансиски злоупотреби

Во фазата на истрага за овие лица на сила беа мерки на претпазливост, но со поднесување на обвинението подигнат е степенот на сомнение за обвинетите, како и извесноста од кривично правна одговорност и од санкционирање за нивните противправни дејствија.

„Поради опасност од бегство како резултат на природата и тежината на предметните кривични дела за кои им се поднесени обвиненија, за тројца обвинети лекари – онколози предложени се мерки на претпазливост – привремено одземање на патна или друга исправа за преминување на државната граница односно забрана за нејзино издавање“, велат од Обвинителство.

Ваквите мерки според обвинителството се неопходни за непречено водење на кривичната постапка.

Вчера Основното јавно обвинителство поднесе две обвиненија за случајот „Онкологија“. Првото се однесува на финансиски злоупотреби, а второто за третманот на пациентите. Двајцата поранешни директори, медицинскиот и економскиот се гонат за злоупотреба на службената положба, измама и проневера во службата, а во второто обвинение се опфатени четворица онколози кои се товарат дека извршил тешки дела против здравјето на луѓето и несовесно лекување на болни.

Турција уапси 65 војници и полицајци поради наводни врски со починатиот проповедник Фетула Ѓулен, кој е обвинет за организирање на неуспешниот државен удар во 2016 година.

Државната новинска агенција Анадолија објави дека се уапсени 56 активни војници на турските вооружени сили, а дека по уште седуммина сè уште се трага.

Ердоган ветува дека ќе продолжи со прогонот на следбениците на покојниот Ѓулен.

Во меѓувреме, ТВ Халк објави дека се уапсени девет полицајци, „повеќето од нив во Истанбул“.

„Во операцијата против терористичката организација ФЕТО во 36 провинции со центар во Истанбул, заробени се 56 од 63 активни војници за кои беа издадени наредби за притвор“, објави Анадолија.

Видете и ова:

Кој беше Фетула Ѓулен, влијателниот исламски свештеник?

ФЕТО, или „Терористичка организација на Фетула“, е името што Турција го дава на движењето Хизмет на Ѓулен, кое некогаш имаше широко влијание од сенка.

Ѓулен, кој почина минатиот октомври, некогаш беше близок сојузник на претседателот Реџеп Таип Ердоган пред двајцата да станат лути непријатели. Тој избега во Соединетите Држави во 1999 година и никогаш не се врати.

Дури и по неговата смрт, Турција се заколна дека ќе ги прогонува неговите следбеници низ целиот свет.

Повикувајќи се на соопштение од обвинителството, ТВ Халк објави дека операцијата за апсење започнала во Истанбул во раните утрински часови на 23 мај и дека во неа учествувале припадници на воздухопловните сили, жандармеријата, копнените и поморските сили.

Институт за јавно здравје информира дека за прв пат во нашата држава лабораториски се потврдени два случаи на мајмунски сипаници.

Од ЈЗУ Институт за јавно здравје, информираат дека од Клиниката за кожни болести им биле упатени два пациенти суспектни за мајмунски сипаници и воедно беше упатно назначено да се направи испитување и за ХИВ, сифилис и херпес.

„Институтот за јавно здравје изврши лабораториски испитувања на 3 различни начини со што лабораториски се потврдија два случаи на мајмунски сипаници. Бидејки за прв пат во нашата држава се лабораториски потврдени мајмунски сипаници, после добиените резултати, веднаш се реагираше брзо, се превземаа соодветни мерки и се известија надлежните институции, Министерство за здравство, Клиниката за кожни болести, Инфективна клиника и др“, се вели во соопштението.

Видете и ова:

СЗО: Мајмунските сипаници не се новиот Ковид

Согласно протоколите по добиеното известување, докторот кој ги примил пациентите ги информира пациентите за добиените резултати. Потоа следи епидемиолошка анкета од страна на епидемиолози од Институтот за јавно здравје.

„Стручни лица епидемиолози од ИЈЗ се вратени на работа и пристапија кон епидемиолошко анкетирање на двете лица, како би се добиле податоци кои би биле исклучително важни за понатамошно постапување. Анкетата е се уште во тек. Ќе биде препорачано на позитивните пациенти да се јават на Инфективна клиника“, информираат од ИЈЗ.

Институтот за јавно здравје ќе продолжи да ја следи состојбата и информира дека во моментов нема простор за паника, бидејќи брзо и навремено институционално се превземаат сите потребни мерки.

Мајмунските сипаници се пренесуваат преку близок контакт како што се сексуален однос, контакт кожа со кожа и зборување или дишење во близина на друго лице. Предизвикува симптоми слични на грип, потоа кожна болест и може да биде фатална.

Дваесет и девет болни од канцер примиле несоодветни дози терапија и биле несоодветно лекувани на Клиниката за радиотерапија и онологија, утврдено е со медицинските вештачења во истрагата за случајот „Онкологија“.

Се набавувале лекови на реверс без да постои правна основа за тоа, се правеле постапки за јавни набавки, кои биле беспредметни, бидејќи добавувачите ги фактурирале претходно добавените лекови, нанесувајќи му на тој начин штета на Буџетот.

Основното јавно обвинителство денеска (22 мај) поднесе две обвиненија за случајот „Онкологија“. Првото се однесува на финансиски злоупотреби, а второто за третманот на пациентите.

„Предметот е поделен на два дела, првото обвинение се однесува на економското работење на клиниката – опфаќа две лица. Првиот медицински директор, вториот економски директор. Тие се гонат за злоупотреба на службената положба, измама и проневера во службата. Делата ги сториле од 2018 до 2022 година. Тие со дејствијата прибавиле значителна имотна корист за друг и нанеле штета на Буџетот. Исто така, двата се обвинети за измама, па во вршење на службена должност, го довеле до заблуда Фондот за здравствено осигурување да изврши незаконита исплата. Набавувале лекови на реверс, без да постои правен основ на тоа. Потоа правеле постапки за јавни набавки, кои биле беспредметни, бидејќи добавувачите ги фактурирале претходно добавените лекови. Со вакви противзаконити дејствија, креирале противправни обврски на Фондот“, образложи Ана Гоговска-Јакимовска, обвинителка во случајот „Онкологија“.

Поранешниот директор на Клиниката за онкологија, Нино Васев е обвинет дека прибавил имотна корист од 13 милиони денари со присвојување на дел од лековите.

„Откако со свој потпис ќе го потпишел и одобрел лековите, фиктивно ги раздолжувал, не ги аплицирал на пациентите во чие име биле требувани. И така постои разлика помеѓу требована разлика и раздолжена количина на пациенти од 2 милиони денари. Ова е констатирано кај девет пациенти. Медицинскиот директор користејќи ја неусогласеноста на издадените лекови од аптека и примени лекови во организационите едници на клиниката, каде бил одговорен организацискиот директор – присвоил дел од лековите кои Клиниката требало да ги има на залиха. Станува збор за девет лекови – авастин, херцептин ербитукс, фубрестан… Прибавил противправна имотна корист од најмалку 13 милиони денари“, рече Гоговска-Јакимовска.

Видете и ова:

Не им e страв само од ракот на дојка, туку од системот

Второто обвинение се однесува на третманот на пациентите. Опфаќа четворица лекари онколози. Прв обвинет е поранешниот директор на Клиниката, се товари дека извршил тешки дела против здравјето на луѓето и несовесно лекување на болни. Другите се товарат за несовесно лекување на болни.

„Со медицинските вештачења е утврдено дека кај 29 пациенти првообвинетиот применил неподобен начин на лекување, со што, тешко го нарушил здравјето на пациентите. Во дел од случаите му било ова овозможено од вториот обвинет кој му дал факсимил и податоци за влез во системот. Другите двајца лекари се обвинети за несовесно лекување болни, бидејќи врз основа на медицинските истории, се утврдува дека одредувале лекови од новите генерации, во фаза кога било очигледно дека пациентот нема да има корист поради лошиот статус, без да се наведе висината и тежината на пациентот, со отстапување од дозирањето, со што дополнително ја влошиле нивната состојба“, образложи обвинителката Гоговска-Јакимовска.

Видете и ова:

Галопира ракот на бели дробови - 870 нови пациенти годишно

Инаку истрагата за случајот „Онкологија“ започна по медиумските написи за злоупотреби во лекувањето на пациентите болни од рак, а меѓудругото беше објавено и дека скапа биолошка терапија завршувала на црн пазар во Косово.

Информациите предизвикаа остри реакции во јавноста, како и протести пред Владата и Јавното обвинителство со барања случајот веднаш да биде расчистен.

Поранешните директори на Клиниката за онкологија, но и ексминистри и други функционери во здравството, за случувањата во оваа здравствена установа зборуваа јавно пред пратениците на седници на Анкетната комисија- ад хок тело кое беше формирано за овој случај.

Со него претседаваше пратеничката од ВМРО-ДПМНЕ, Рашела Мизрахи. Комисијата заврши неславно на крајот на ноември лани, со изнесување заклучоци од страна на Мизрахи и од пратеници од владејачкото мнозинство, без да се изгласаат некои од нив.

Заклучоците се однесуваа на имиња од кои треба да се бара одговорност, но пратениците од СДСМ не се согласија со тие заклучоци кои, како што рекоа, се заклучоци само од членовите на ВМРО-ДПМНЕ, а бараа и оставка од Мизрахи.

По извештаите дека Москва ги зајакнала своите воени бази во близина на границата на НАТО алијансата, Финска изјави дека очекува Русија дополнително да го зголеми бројот на војници по должината на нивната заедничка граница откако ќе заврши војната во Украина.

Генерал-мајор Сами Нурми, шеф на стратегијата на финските одбранбени сили, изјави дека војската ги следи маневрите на Москва „многу внимателно“ и дека нивната работа, како дел од НАТО алијансата, е да се „подготват за најлошото“.

Финската гранична стража во среда (21 мај) објави дека ги завршила првите 35 километри од планираната ограда од 200 километри на нејзината источна граница со Русија, која е затворена повеќе од една година, откако Хелсинки ја обвини Москва за пренасочување на баратели на азил во Финска во „хибридна операција“. Оградата, исто така, користи камери и сензори за да прави разлика помеѓу луѓето и животните што ја преминуваат границата.

Се чини дека сателитските снимки, објавени од „Њујорк тајмс“, ја покажуваат експанзијата на руската воена инфраструктура во близина на финската граница, вклучувајќи редови шатори, воени возила, реновирање на засолништа за борбени авиони и изградба на претходно неискористен хелиодром.

Видете и ова:

Финска се повлекува од договорот за нагазни мини поради Русија

„Тие ги менуваат структурите и гледаме умерени подготовки кога станува збор за изградба на инфраструктура во близина на нашите граници, што значи дека кога војната во Украина, се надеваме, ќе заврши, тие ќе почнат да ги враќаат силите што се бореа во Украина, особено копнените сили“, рече Нуми.

Иако ова не беше неочекувано, бидејќи Финска се приклучи на НАТО со рекордно темпо во 2023 година по руската инвазија на Украина, Нурми рече дека тие „многу внимателно ги следат подготовките“.

„Тие го прават тоа во фази. Би рекол дека бројот на војници е сè уште умерен. Не е голема градба, но на одредени места се гради нова инфраструктура и се прават подготовки, се внесува нова опрема. Исто така, треба да процените дали се подготвуваат да испратат повеќе војници во Украина или се подготвуваат да ги зголемат своите сили во близина на нашата граница. Но, претпоставувам дека ги прават и двете“, истакна тој.

Реагирајќи на промената во активностите на Русија, американскиот претседател Доналд Трамп на новинарите им рече дека „воопшто не е загрижен за тоа“, додавајќи дека Финска и Норвешка „ќе бидат многу безбедни“.

Повторувајќи го мислењето на претседателот, Нурми рече дека „нема непосредна воена закана за Финска или НАТО од таа насока“ додавајќи:

„Она што се случи веднаш по нападот врз Украина беше дека аплициравме за членство во НАТО, а потоа, кога бевме примени, Русија објави дека ќе почне да го менува својот воен став преку границата“.

Финските граѓани се навикнаа на заканата од нивниот источен сосед, но стотици сè уште се запишуваат на курсеви за обука за да се подготват за вонредни ситуации.