Вести
По пожарот во Треска општината ќе решава за отстранување на отпадот
Кризниот штаб на Општина Центар, заедно со другите надлежни институции во понеделник ќе одржи состанок за начините на чистење на отпадот и анализа на последиците од пожарот кој пред два дена изби во поранешната фабрика „Треска“.
„Какви материјали гореле и дали истите биле закана по здравјето засега можеме само да претпоставуваме. Откако ќе се изврши анализа од стручните институции ќе имаме прецизен увид, но и ќе донесеме одлука за следните чекори како најбрзо и најбезбедно да го отстраниме целиот отпад и расчистиме просторот. Општината ќе се координира со останатите надлежни институции и ќе преземеме соодветни мерки“, вели градоначалникот Герасимовски.
Општина Центар ќе побара од овластени лаборатории за животна средина да извршат мерења и достават извештаи од мерењата, како би се одредиле следните чекори.
По овој состанок и насоките од институциите надлежни за овој проблем, Општина Центар ќе ги знае следните чекори и за истите ќе ги извести сопствениците.
Голем пожар во просторот на поранешната фабрика Треска
Градоначалникот на Центар Герасимовски, како што наведуваат оттаму, по стапувањето на функција, неколкупати досега во своите јавни настапи предупредуваше од можноста за еколошка катастрофа на местото на поранешната фабрика „Треска“, споредувајќи ја сега состојбата таму дури и со Чернобил.
„Повеќе пати сме апелирале за изнаоѓање издржано решение за отпадот кој се наоѓа таму, но поради објективни причини, локацијата сè уште не е исчистена. Чистењето на локацијата е и обврска на сопствениците на објектите. Досега до општината се пристигнати 28 барања за отстранувања на објекти од страна на сопствениците и истите се уште се во постапка“, рече Герасимовски.
Тој потенцира дека приоритет на општината е што поскоро безбедено да се расчисти целиот простор кај „Треска“ и да се стави крај на ваквите немили настани, бидејќи поголеми и помали пожари се случувале во изминатиот период повеќе пати. Покрај ова, старите хали се предмет на грабежи, а локалните жители се чуствуваат небезбедно.
Зависно од исходот и заклучоците на Кризниот штаб, потенцираше Герасимовски, можно е да се спроведе и забрзана постапка за издавање дозвола за рушење на објектите, со цел побрзо отстранување на опасниот азбестен отпад и како примарно, поголема безбедност на граѓаните.
види ги сите денешни вести
Уште петмина пациенти заминуваат на лекување во странство, сите повредени се во стабилна состојба
Министерот за здравство Арбен Таравари информира дека денеска е последниот транспорт на пациенти кои ќе се лекуваат во странство, од трагедијата во Кочани. Како што посочи, во 11:30 часот за Шведска денеска ќе бидат пренесени двајца пациенти, а после пладне уште тројца пациенти. Тој напомена дека може да се очекува во текот на следните денови и враќање на одредени пациенти кои се лекуваат надвор од државата.
„Последниот транспорт на пациенти е денеска (19 март). Веќе нема да има лекување на пациенти надвор од државата, дури може да чекаме некои и да се враќаат во следните денови. Денеска има само за Шведска и тука завршуваме. Веќе нема потреба за другите пациенти да се лекуваат надвор од државата“, рече Таравари на денешната прес-конференција.
Како што додаде, добрата вест е што поминаа 72 часа и нема починати. Сите пациенти се во стабилна состојба.
„Добрата вест е што поминаа 72 часа и нема ниту еден починат од тие што ја преживеаа трагедијата во Кочани. Вкупно, се третираат 178 пациенти низ различни здравствени установи, од кои што 64 се во болниците во Македонија во државните болници и 13 пациенти се во приватните болници. Сите се во релативно стабилна состојба“, додаде министерот.
Тој напомена дека во моментот, 101 пациент се третираат надвор од државата и тие се во релативно стабилна состојба.
Краткотраен притвор за вкупно 17 лица
На уште едно лице му е определен краткотраен притвор од 48 часа во врска со трагедијата во Кочани со што вкупниот број на лица опфатени со оваа мерка се искачи на 17 лица. На дел од оние кои им е изречена оваа мерка, вечерва (19 март) им истекуваат 48-те часа.
Јавниот обвинител Коцевски вчера изјави дека покрај 16-те лица, на уште едно лице ќе му биде определен 48-часовен притвор.
Најави брза и ефикасна истрага која ќе биде најпрофесионално изведена. Според него, се работи за многу тежок, комплициран предмет во кој има многу жртви.
„Ветив и ќе останам на тоа ветување дека истрагата ќе биде брза и ефикасна. Меѓутоа не значи дека ќе биде избрзано. Мора да се соберат сите докази по легален пат, мора доказите да си имаат доказно својство, односно да бидат на законит начин прибавени, што значи дека обвинителскиот тим постапува многу претпазливо, и многу внимателно“, изјави вчера Коцевски за телевизија „Сител“.
Меѓу притворените на кои им е изречен 48-часовен притвор се и поранешниот министер за економија Крешник Бектеши и поранешниот директор на Пазарниот инспекторат Горан Трајковски.
Мерката краткотраен притвор се предлага во особено сложени предмети, кога е потребно да се прибере поголем обем на докази за проверка на сите околности и евентуално формално поведување истрага. Оваа мерка, предвидена согласно член 170 од Законот за кривичната постапка, може да се определи најмногу два пати по 48 часа без да биде донесена формална наредба за спроведување истражна постапка.
Тоа му овозможува на јавниот обвинител да го задржи лицето за кое постои сомнение подолго од основните 24-часа полициско задржување. Смислата на оваа законска одредба е да му овозможи на јавниот обвинител да има доволно време, особено во тешки и сложени предмети, да ги преземе сите активности и да ги утврди фактите и околностите, како и конкретните својства и дејствија на лицето кои ќе ги испитува понатаму во истражната постапка.
По формалното отворање на истрагата, јавниот обвинител предлага нови мерки за обезбедување на осомничениот, односно краткотрајниот притвор се укинува и најчесто се определува редовен притвор.
Радио Слободна Европа поднесе тужба против Американската агенција за глобални медуми поради укинување на финансирањето
Радио Слободна Европа (РСЕ) на 18 март објави дека поднесе тужба против Американската агенција за глобални медиуми (УСАГМ), и претставниците на УСАГМ, Кари Лејк и Виктор Моралес, за да го блокираат нивниот обид да го прекинат федералното финансирање на РСЕ.
Во тужбата се тврди дека задржувањето на средствата одобрени од Конгресот за РСЕ ги прекршува федералните закони и Уставот на Соединетите Држави, кои на Конгресот му даваат ексклузивна власт за федералните трошоци.
Тужбата беше поднесена во Окружниот суд на САД за округот Колумбија.
„Ова не е време да се отстапи место на пропагандата и цензурата на американските противници. Ние веруваме дека законот е на наша страна и дека славењето на нашата пропаст од деспотите ширум светот е прерано“, рече претседателот и извршен директор на РСЕ, Стивен Капус.
Моралес е вршител на должноста извршен директор на Американската агенција за глобални медиуми, додека Лејк е виш советник на Моралес.
Веста за тужбата доаѓа додека политичарите од Европската Унија велат дека продолжуваат со напорите за можна поддршка за РСЕ, откако американската влада одлучи да го намали финансирањето на радиодифузерот со седиште во Прага, поради загриженоста дека неговото затворање ќе биде удар за продемократските медиуми.
Чешкиот министер за европски прашања Мартин Дворжак за новинарите во Брисел изјавија дека неколку нации досега ја поддржале иницијативата, но дека блокот мора брзо да дејствува бидејќи „би било голема грешка да се остави оваа институција да умре“.
„Треба да покажеме интерес и да се сретнеме со комесари и со некои држави. Во моментов оваа иницијатива е поддржана од седум други земји, а откако ќе ја објавиме иницијативата на Советот за општи работи, ќе ни се придружат повеќе земји“, рече Дворжак, додавајќи дека прашањето мора да се реши во рок од „неколку недели“.
На иницијатива на Чешката Република, на состанокот на министрите за надворешни работи од 27-те членки на блокот на 17 март се разговараше за иднината на РСЕ поради кратењата на финансирањето одобрено од Конгресот, кои беа скратени од администрацијата на претседателот Доналд Трамп во текот на викендот.
Земјите од ЕУ изразуваат поддршка за РСЕ
Иако Дворжак не сакаше да ги открие имињата на земјите кои изразија поддршка за овој потег, дипломатски извори за РСЕ велат дека меѓу земјите кои ја поддржуваат иницијативата се Германија, Австрија, Шведска, Холандија, Белгија, Словенија, Полска, Чешка и трите балтички земји.
„Финансиските предизвици со кои се соочува Радио Слободна Европа сериозно му се закануваат на независното новинарство во регионите каде што слободата на медиумите е задушена, од Русија и Белорусија до Иран и Авганистан“, рече белгискиот министер за надворешни работи Максим Прево во објавата на X.
„Ако РСЕ исчезне, дезинформациите и пропагандата ќе ја пополнат празнината. Тоа би било директна победа за оние кои сакаат да ја поткопаат демократијата... Европа не може да го дозволи тоа. Заштитата на слободните медиуми значи заштита на демократијата. Пристапот до известување засновано на факти не е само принцип, туку неопходност за безбедноста и основните слободи“, додаде тој.
Чешкиот министер за надворешни работи Јан Липавски по состанокот на министрите за надворешни работи на 17 март изјави дека чувствува „извесен интерес“ од другите членки на ЕУ за иницијативата на неговата земја и дека „наша одговорност е сериозно да се занимаваме со ова прашање“.
Историја на Радио Слободна Европа за време на Студената војна
Полскиот колега на Липавски, Радек Сикорски, исто така, изрази поддршка за РСЕ, потсетувајќи како неговиот татко го слушал радиото, како и Гласот на Америка, за време на Студената војна.
„Така ги дознавме основните факти за нашите земји бидејќи комунистичката пропаганда беше строго контролирана“, им рече Сикориски на новинарите.
„Шведска потпиша чешка иницијатива за изнаоѓање начини на кои ЕУ и нејзините земји-членки можат да го поддржат Радио Слободна Европа и неговата улога како глас на слободата, онаму каде што е најпотребно“, изјави шведската министерка за европски прашања Џесика Розенкранц.
На 14 март, Трамп потпиша извршна наредба со цел намалување на бројот на седум федерални агенции, вклучително и Американската агенција за глобални медиуми (УСАГМ), која ги надгледува РСЕ и другите федерални радиодифузери.
Наредбата, која ги таргетира и агенциите кои се занимаваат со бездомништво, работни спорови и развој на заедницата, им даде на раководителите на секоја именувана владина единица седум дена да поднесат извештај со кој се потврдува целосната усогласеност.
Неколку часа по објавувањето на извршната наредба, во писмото од УСАГМ се наведува дека овластувањето за РСЕ, одобрено од Конгресот, е одземено.
Шефот на РСЕ, Капус, рече дека прекинот на договорот за субвенционирање ќе биде „огромен подарок за непријателите на Америка“, чувство што го повторија многу активисти за медиумски права, застапници за демократија и политичари.
Хутите соопштија дека САД извршиле најмалку десет напади врз цели во Јемен
Најмалку 10 американски напади се извршени во Јемен, вклучително и во провинцијата Саада и Ходеида, објавија рано денеска (19 март) јеменските Хути.
Соединетите Држави започнаа бран напади врз областите на Јемен контролирани од Хутите кои се блиски со Иран, кои минатата недела рекоа дека ги продолжуваат нападите врз бродовите во Црвеното Море за да ги поддржат Палестинците во Газа.
Силите на Хутите открија непријателски воени движења во Црвеното Море како подготовка за извршување на голем воздушен напад врз земјата, изјави денеска воениот портпарол на Хутите, Јахја Сарија.
Сарија, без да обезбеди докази, истакна дека Хутите го нападнале американскиот носач на авиони Хари Труман и други воени бродови со проектили и беспилотни летала, што го спречило американскиот напад.
Зеленски: Руските дронови нападнаа цивилна инфраструктура
Претседателот Володимир Зеленски рече дека Русија лансирала повеќе од 40 дронови доцна синоќа за да ја нападне цивилната инфраструктура, што, според него, покажува дека мора да се изврши притисок врз рускиот претседател Владимир Путин заради мирот.
„Токму таквите ноќни напади на Русија ги уништуваат нашите енергетски системи, нашата инфраструктура, нормалниот живот на Украинците, рече Зеленски во објавата на Телеграм.
„Денес Путин де факто го отфрли предлогот за целосен прекин на огнот, би било правилно светот да одговори со отфрлање на сите обиди на Путин да ја продолжи војната“, додаде тој.
Претходно, на онлајн прес-конференција, Зеленски, цитиран од украинските медиуми, рече дека Украина и Русија, со посредство на американската страна, би можеле да се договорат меѓусебно да не ја напаѓаат енергетската инфраструктура.
„Не може да се случи Русија да го нападне нашиот енергетски сектор и ние да молчиме. Ќе одговориме. Но, двете страни, украинската и руската, не треба да ја напаѓаат енергијата - нашата земја ќе го поддржи тоа“, рече Зеленски.
Во меѓувреме, руските медиуми јавија дека имало експлозии во Киев, каде што е на сила режимот на воздушна тревога. Во главниот град на Украина се слушале сирени цели 3,5 часа, објавија украинските медиуми.
Нападите следуваат откако рускиот претседател Владимир Путин за време на разговорите со американскиот претседател Доналд Трамп се согласи да ги запре нападите врз енергетскиот сектор и инфраструктурата на Украина за 30 дена, како чекор кон постигнување целосен прекин на огнот.
Србија бара објаснување од Хрватска и Албанија за трилатералниот меморандум со Косово
Српското Министерство за надворешни работи ќе испрати итно барање до министерствата за надворешни работи на Хрватска и Албанија за детално објаснување во врска со потпишувањето на трилатералниот меморандум за соработка со Косово во областа на одбраната.
Во соопштението од српското министерство е наведено дека со тој договор двете земји „презеле чекори кои ја поткопуваат регионалната стабилност“.
Српските власти, кои не ја признаваат независноста на Косово, оценија дека иницијативата, која се спроведува без Белград, но со Приштина, „претставува отворена провокација и грубо непочитување на реалноста на теренот“.
„Очекуваме итен одговор од Загреб и Тирана за вистинските намери и крајни цели на оваа опасна воено-безбедносна игра. Србија нема да дозволи никакви еднострани дејствија кои можат да го загрозат нашиот територијален интегритет, безбедноста на граѓаните и мирот во регионот“, се вели во соопштението.
Српското Министерство за надворешни работи оцени дека меморандумот е резултат на „стратегија насочена кон изолација на Србија“.
Србија не ја признава независноста на Косово, додека со Европската унија преговара за нормализирање на односите со Приштина.
Во Охридскиот договор постигнат во 2023 година меѓу Србија и Косово, меѓу другото стои дека Србија „нема да се противи на членството на Косово во ниту една меѓународна организација“.
Министрите за одбрана на Хрватска, Албанија и Косово на 18-ти март во Тирана потпишаа Декларација, со која се зајакнува трилатералната соработка и се нагласува важноста на заедничките одговори на безбедносните предизвици, хибридните закани и другите ризици кои можат да ја загрозат регионалната стабилност.
Декларацијата вклучува, како што јави Хрватската радио телевизија, унапредување на одбранбените способности и соработка меѓу одбранбените индустрии, зајакнување на интероперабилноста преку образование, обука и вежби, спротивставување на хибридните закани, како и целосна поддршка за евроатлантските интеграции.
Како што е наведено, отворена е можноста и за други членки да се приклучат на Декларацијата.
Тошковски: Претреси во Министерството за економија, управителот и одговорното лице на „Пулс“ и Општината Кочани
Министерот за внатрешни работи Панче Тошковски на 18 март, соопшти дека за случајот со пожарот во дискотеката во Кочани досега приведени се 18, а задржани се 16 лица. За 14 лица е изречена мерка притвор во траење од 48 часа.
Тој додаде дека биле направени претреси во домови на две лица, вработени во Министерство за економија, при што одземени се техничка опрема, документација, оружје, муниција. Дополнителни биле извршени претреси и во службените простории кои се користат од државен советник во рамки на Министерство за економија.
Претреси, исто така, извршени се и кај управителот и одговорното лице на дискотеката, а денеска полициски службеници од одделот за крим полиција и организиран криминал влегоа и во општината, каде, како што изјави Тошковски, се преземаат мерки и активности за обезбедување на документација поврзана со дискотеката.
Досега, на 11 лица им е одредена мерка притвор за постоење на основано сомнение за сторени „тешки дела против општата сигурност“, додека на три лица име одреден притвор за „несовесно работење“.
Тошковски посочи дека последното задржано лице се терети за „тешки дела против општата сигурност“ во врска со предизвикување на општа опасност, а истото е потписник на еден од потребните документи за ставање во функција на еден кабаре клуб.
„Постојат основи, кои што, одат во насока дека незаконито, паушално, без утврдување на фактичка состојба биле изготвувани круцијални документи, кои што биле предуслов во понатамошната постапка за ставање во функција за предметното кабаре“, изјави Тошковски.
Во врска со агенцијата за обезбедување на дискотеката, Тошковски рече дека во овој момент согласно информациите коишто ги има и оние коишто може да ги сподели со јавноста, постојат основи на сомнение дека управителот на подружницата заедно со дел од ангажираните лица имаат сторени одредени незаконитости коишто ќе бидат предмет на кривична постапка, поврзани со кривично правниот настан.
Меѓу приведените со краткотраен притвор се поранешен министер за економија, поранешниот директор на Државниот пазарен инспекторат и поранешниот директор на Дирекцијата за спасување и кризи.
Започна мирниот собир на плоштадот во Скопје во чест на починатите во Кочани
Стотици граѓани се собираат на на плоштадот Македонија во Скопје за да им оддадат почит на 59 -те жртвите во пожарот во Кочани. Вечерта на 15 спрема 16 март во пожар во дискотеката „Пулс“ загинаа 59 млади луѓе, а над 180 се повредени.
Голем дел од пациентите кои се во критична состојба имаат проблеми со респираторните органи, а некои дури и оштетувања од превисока температура. Дел од нив се уште дишат со респираторна поддршка.
„Вашиот систем уби една цела генерација- иднината на Кочани,“ „Парите со крвави раце ги броите“ и „Немаше да има крв, ако беше се по закон“ се дел од паролите на транспрентите со кои граѓаните излегоа на мирниот собир.
Грутка во грлото: Собир во Скопје за почит кон жртвите од трагедијата во Кочани
Граѓаните во Скопје се одѕваа на повикот на социјалните мрежи под паролата „ Кој е следен?“, откако во изминативе два дена се организираат во повеќе градови мирни собири на кои палат свеќи, оставаа цвеќиња и се потпишуваат во „книги на жалост“ во спомен на починатите.
Вчерашниот мирен собир во Кочани, на кој дојдоа стотици граѓани, се претвори во протест на кој демонстрантите бараа правда и одговорност за како што рекоа „корумпираниот систем во кој живеат“. Дел од нив гневни го демолираа кафулето кое според изјавите на жителите било во сопственост на човекот кој ја менаџирал дискотеката „Пулс“. Дел од демонстрантите својот револт го изразија и пред општината Кочани, полицијата и судот.
Објектот во кој изби пожар, а дел од министрите го нарекоа „шупа“, бил дивоградба изградена во 1999 година. Првично служел како текстилна работилница, а негова пренамена во кабаре не е пријавена. Легализиран бил во 2005 година. Реновиран е лани. Лиценца имал од Министерството за економија за која сега власта тврди дека е фалсификат и дека истекувала два дена пред да се случи пожарот.
Инаку за трагичниот настан до сега краткотраен притвор од 48 часа добија 16 луѓе, меѓу кои поранешен министер за економија, секретар во истото министерство екс директор на Државниот пазарен инспекторат, службеници и сопственикот на дискотеката.
Речиси третина дискотеки и кабареа работеле без валидна лиценца
Вкупно 22 угостителски објекти имале лиценца, а на 15 им била истечена, е исходот од 50-те контроли што ги спровеле инспекторите од Државниот пазарен инспекторат на 16 и 17 март. Угостителските објекти биле регистрирани како кабаре, ноќен клуб, диско клуб и за диско клуб на отворен простор. Масовната инспекција беше спроведена откако ноќта на 15 спрема 16 март во пожар што изби во кочанската дискотека „Пулс“ загинаа 59 луѓе, а над 180 се повредени.
„Со оглед дека овие угостителски објекти не работат деновиве поради денови на жалост, ДПИ ги обезбедил документите потребни за надзорот преку контакти со одговорните лица“, изјави владината портпаролка Марија Митева по седницата на Влада на која се разговарало за добиените информации за инспекцијата.
Митева додаде дека на цела територија на земјава се утврдени 22 угостителски објекти од овој сектор со валидни лиценци за вршење дејност, а 15 имале лиценци со истечена важност.
Од 13 објекти во Скопје, само два имале лиценци со важност за кабаре. Како што рече, осум биле истечени, а три воопшто немале лиценца.
Во Куманово има три објекти и сите со важечка лиценца за кабаре.
Штип, Виница и Делчево по еден објект регистриран како кабаре, сите со лиценца со важност.
Во Струмица има четири објекти – две лиценци со важност за диско клуб, една лиценца со важност за диско клуб на отворен простор и една истечена лиценца.
Во Гевгелија има еден објект со лиценца со важност за диско клуб. Битола се четири објекти – три се со важност за кабаре, една лиценца со важност за диско клуб на отворен простор.
Во Прилеп имаме два објекта и двата се со истечена лиценца. Кавадарци еден објект со лиценца со важност, Неготино еден објект со истечена лиценца.
Во Велес еден со важност за кабаре, Охрид четири објекти – две лиценци со важност, една лиценца за диско клуб, еден објект е без лиценца.
Кичево еден објект со важност за кабаре, Гостивар имаме еден објект со истечена лиценца, во Тетово шест објекти од кои за четири нема податок, а два се со истечена лиценца, информираше Митева.
Трамп и Путин телефонски разговараа за изгледите за прекин на огнот во војната во Украина
Американскиот претседател Доналд Трамп и неговиот руски колега Владимир Путин разговараа повеќе од 90 минути во обид да постигнат прекин на огнот во војната во Украина што ги исцрпи војниците и ресурсите на двете страни.
Руската државна новинска агенција ТАСС го цитираше портпаролот на Кремљ, Дмитриј Песков, кој потврдил дека двајцата лидери го завршиле разговорот.
Не беа дадени детали за содржината или исходот од повикот, но Песков пред новинарите во Москва претходно во текот на денот изјави дека разговорот ќе опфати „голем број прашања“ во врска со односите меѓу САД и Русија, како и војната во Украина.
„Сакаме да видиме дали можеме да ја завршиме таа војна. Можеби можеме, можеби не можеме, но мислам дека имаме многу добри шанси“, рече Трамп на 16 март кога првпат објави дека ќе се одржи повикот.
На прашањето за можните отстапки кои би можеле да бидат потребни за да се обезбеди прекин на огнот, Трамп рече дека „ќе зборуваме за земјиште. Ќе зборуваме за електрани“.
„Мислам дека имаме многу за тоа веќе дискутирано од двете страни, Украина и Русија“, изјави Трамп.
Трамп го постави приоритет во првите месеци од неговиот втор мандат да постигне договор за прекин на огнот во тригодишната војна во Украина.
По одржувањето на разговорите во Саудиска Арабија, украинските и американските власти на 11 март објавија дека Киев се согласил на 30-дневен предлог за прекин на огнот, во зависност од договорот на Русија.
Москва досега реагираше ладнокрвно на идејата, при што Путин предложи дополнителни услови, вклучително и замрзнување на испораките на американско оружје за Киев.
Во меѓувреме, висок руски функционер рече дека Москва ќе инсистира на Украина да не и се приклучи на НАТО и да остане „неутрална“ во каков било мировен договор, услови кои Киев долго време ги отфрла.
Една од првичните поплаки на Кремљ во оправдувањето на инвазијата во февруари 2022 година продолжува да биде едно од централните барања на Киев, а тоа е проширувањето на НАТО.
На 14 март, Путин рече дека секој договор треба да доведе до долгорочен мир кој се однесува на „основните“ причини за војната, очигледно повикување на проширувањето на НАТО и други случувања, за кои Путин тврди дека ја загрозиле безбедноста на Русија.
Во забелешките објавени на 17 март, рускиот заменик-министер за надворешни работи Александар Грушко изјави за рускиот весник „Известија“ дека „ ќе бараат безбедносните гаранции да станат дел од овој договор“.
„Дел од овие гаранции треба да биде неутралниот статус на Украина, одбивањето на земјите од НАТО да ја прифатат во алијансата“, рече тој.
Украинскиот претседател Володимир Зеленски честопати нагласуваше дека за Киев да прифати каков било мировен договор, тој мора да има безбедносни гаранции за Украина од нејзините западни партнери, вклучително и евентуално членство во НАТО.
„Инсистирав [на членството на Украина во] НАТО, но знаете кои беа одговорите“, рече тој во февруари, сугерирајќи дека патот кон приклучување кон западната воена алијанса останува попречен.
На 16 март, американскиот државен секретар Марко Рубио во интервју за Си-Би-Ес рече дека конечниот мировен договор „ќе вклучува многу напорна работа, отстапки и од Русија и од Украина“, додавајќи дека би било тешко дури и да се започнат такви разговори „додека тие пукаат еден кон друг“.
Исто така, на 17 март, францускиот претседател Емануел Макрон и новиот канадски премиер Марк Карни се состанаа во Париз и „ја потврдија својата непоколеблива поддршка за Украина додека таа продолжува да се спротивставува на неоправданата руска војна за агресија“, се вели во заедничката изјава.
Во меѓувреме, Зеленски на 16 март го разниша своето воено раководство, назначувајќи го генерал-мајор Андриј Хнатов за нов началник на Генералштабот на Украина, на местото на генерал-полковник Анатолиј Бархилевич, додека Киев сака да го забрза темпото на реформи и реорганизација.
„Ние постојано ги менуваме вооружените сили за да ги направиме уште поборбено подготвени. За да го постигнеме тоа, го менуваме системот за управување и воведуваме јасни стандарди“, рече министерот за одбрана Рустем Умеров.
Во соопштението се вели дека Бархилевич, кој беше назначен на функцијата во февруари 2024 година, сега ќе биде генерален инспектор на Министерството за одбрана. Бархилевич го замени генерал-полковник Серхи Шаптала кога ја презеде функцијата во Генералштабот во 2024 година.
Мултимедија
Најпосетени
Што треба да знаете