Вести
Не е откриено истекување по нападот на нуклеарната централа во Украина од руски трупи
Не е забележано истекување од нуклеарната централа во Запорожје, која синоќа беше во пламен, што украинските служби за итни интервенции го изгасија, соопштија надлежните од Украинската нуклеарна агенција.
Украинската нуклеарна централа синоќа беше мета на руските сили кои еден час ја гранатирале. Биле запалени просториите на третиот и четвртиот кат, и засега нема повредени при пожарот, се вели во соопштението.
Инцидентот ги поттикна ОН и меѓународните нуклеарни институции да усвојат итни мерки, а канцеларијата на британскиот премиер Борис Џонсон соопшти дека тој ќе побара итен состанок на Советот за безбедност на ОН за да се разговара за ситуацијата.
„Не се регистрирани промени во ситуацијата со радијацијата“, соопшти утрово Украинскиот државен нуклеарен регулаторен инспекторат.
Нуклеарната централа во Запорожје, во близина на реката Днепар, е најголема во Европа и произведува повеќе од една петтина од домашната електрична енергија во Украина.
Нуклеарната агенција на ОН утрово соопшти дека го става својот центар за инциденти и итни случаи во режим на целосна и итна реакција поради ситуацијата.
Американскиот секретар за енергетика Џенифер Гранхолм доцна синоќа изјави дека нема првични знаци за зголемено ниво на радијација во централата.
Во видеото објавена на социјаните мрежи се гледа како годи петкатна зграда, во Запорожје.
Градоначалникот на Запорожје, Дмитро Орлов, изјави дека руските сили отвориле оган врз контролен пункт на неколку километри од нуклеарната централа врз тамошните цивили, гранатирајќи ја областа најмалку еден час. Тој рече дека градот нема водоснабдување и прекин на електричната енергија.
Регионалната украинска администрација во Запорожје подоцна соопшти дека руските војници ја зазеле централата и „оперативниот персонал ја следи состојбата на енергетските единици“.
Киев потврди дека руските сили влегле во комплексот. Протоколот на Женевската конвенција ги ограничува воените напади врз нуклеарни постројки.
Претседателот Володимир Зеленски објави видео обраќање откако почна пожарот и ги повика Европјаните да се разбудат.
„Кажете им на вашите политичари - руските војници пукаат во нуклеарна централа во Украина“, изјави Зеленски.
Зеленски разговараше со американскиот претседател Џо Бајден и британскиот премиер Борис Џонсон за да ги информира за ситуацијата во Запорожје.
Белата куќа соопшти дека „претседателот Бајден му се придружи на претседателот Зеленски во повикувањето на Русија да ги прекине своите воени активности во областа и да им дозволи на пожарникарите и на итните служби да пристапат до локацијата“.
Претходно генералниот директор на националната компанија за атомска енергија, Енергоатом, рече дека на пожарникарите првично „не им било дозволено“ да стигнат до запалената структура.
„Има огромни ризици. Борба на станицата. Реакторите се во опасност“, рече Ихор Мурашов преку социјалната мрежа Телеграм.
Кабинетот на британскиот премиер Џонсон соопшти дека „непромислените постапки на рускиот претседател Владимир Путин сега може директно да ја загрозат безбедноста на цела Европа“.
Интензивните руски напори за бомбардирање и опкружување, исто така, продолжуваат во градовите во јужна Украина, каде што Русија, наводно, го окупирала својот прв голем град, Херсон, а руските сили очигледно се обидуваат да добијат контрола над стратешкиот брег на Црното Море.
Се смета дека илјадници луѓе се убиени, а повеќе од 1 милион Украинци побегнале на запад поради растечката бегалска криза откако Путин ја започна својата сеопфатна инвазија на Украина на 24 февруари.
Русија веќе ја презема контролата врз нефункционалната нуклеарна централа во Чернобил, околу 100 километри северно од главниот град на Украина Киев.
Руската инвазија на Украина влезе во втората недела. Напади има во повеќе градови меѓу кои Киев, Суми, Мариупол, Одеса и Харков.
види ги сите денешни вести
Случај „Онкологија“: Обвинети онколози за несовесно лекување на пациенти и финансиски злоупотреби
Дваесет и девет болни од канцер примиле несоодветни дози терапија и биле несоодветно лекувани на Клиниката за радиотерапија и онологија, утврдено е со медицинските вештачења во истрагата за случајот „Онкологија“.
Се набавувале лекови на реверс без да постои правна основа за тоа, се правеле постапки за јавни набавки, кои биле беспредметни, бидејќи добавувачите ги фактурирале претходно добавените лекови, нанесувајќи му на тој начин штета на Буџетот.
Основното јавно обвинителство денеска (22 мај) поднесе две обвиненија за случајот „Онкологија“. Првото се однесува на финансиски злоупотреби, а второто за третманот на пациентите.
„Предметот е поделен на два дела, првото обвинение се однесува на економското работење на клиниката – опфаќа две лица. Првиот медицински директор, вториот економски директор. Тие се гонат за злоупотреба на службената положба, измама и проневера во службата. Делата ги сториле од 2018 до 2022 година. Тие со дејствијата прибавиле значителна имотна корист за друг и нанеле штета на Буџетот. Исто така, двата се обвинети за измама, па во вршење на службена должност, го довеле до заблуда Фондот за здравствено осигурување да изврши незаконита исплата. Набавувале лекови на реверс, без да постои правен основ на тоа. Потоа правеле постапки за јавни набавки, кои биле беспредметни, бидејќи добавувачите ги фактурирале претходно добавените лекови. Со вакви противзаконити дејствија, креирале противправни обврски на Фондот“, образложи Ана Гоговска-Јакимовска, обвинителка во случајот „Онкологија“.
Поранешниот директор на Клиниката за онкологија, Нино Васев е обвинет дека прибавил имотна корист од 13 милиони денари со присвојување на дел од лековите.
„Откако со свој потпис ќе го потпишел и одобрел лековите, фиктивно ги раздолжувал, не ги аплицирал на пациентите во чие име биле требувани. И така постои разлика помеѓу требована разлика и раздолжена количина на пациенти од 2 милиони денари. Ова е констатирано кај девет пациенти. Медицинскиот директор користејќи ја неусогласеноста на издадените лекови од аптека и примени лекови во организационите едници на клиниката, каде бил одговорен организацискиот директор – присвоил дел од лековите кои Клиниката требало да ги има на залиха. Станува збор за девет лекови – авастин, херцептин ербитукс, фубрестан… Прибавил противправна имотна корист од најмалку 13 милиони денари“, рече Гоговска-Јакимовска.
Второто обвинение се однесува на третманот на пациентите. Опфаќа четворица лекари онколози. Прв обвинет е поранешниот директор на Клиниката, се товари дека извршил тешки дела против здравјето на луѓето и несовесно лекување на болни. Другите се товарат за несовесно лекување на болни.
„Со медицинските вештачења е утврдено дека кај 29 пациенти првообвинетиот применил неподобен начин на лекување, со што, тешко го нарушил здравјето на пациентите. Во дел од случаите му било ова овозможено од вториот обвинет кој му дал факсимил и податоци за влез во системот. Другите двајца лекари се обвинети за несовесно лекување болни, бидејќи врз основа на медицинските истории, се утврдува дека одредувале лекови од новите генерации, во фаза кога било очигледно дека пациентот нема да има корист поради лошиот статус, без да се наведе висината и тежината на пациентот, со отстапување од дозирањето, со што дополнително ја влошиле нивната состојба“, образложи обвинителката Гоговска-Јакимовска.
Инаку истрагата за случајот „Онкологија“ започна по медиумските написи за злоупотреби во лекувањето на пациентите болни од рак, а меѓудругото беше објавено и дека скапа биолошка терапија завршувала на црн пазар во Косово.
Информациите предизвикаа остри реакции во јавноста, како и протести пред Владата и Јавното обвинителство со барања случајот веднаш да биде расчистен.
Поранешните директори на Клиниката за онкологија, но и ексминистри и други функционери во здравството, за случувањата во оваа здравствена установа зборуваа јавно пред пратениците на седници на Анкетната комисија- ад хок тело кое беше формирано за овој случај.
Со него претседаваше пратеничката од ВМРО-ДПМНЕ, Рашела Мизрахи. Комисијата заврши неславно на крајот на ноември лани, со изнесување заклучоци од страна на Мизрахи и од пратеници од владејачкото мнозинство, без да се изгласаат некои од нив.
Заклучоците се однесуваа на имиња од кои треба да се бара одговорност, но пратениците од СДСМ не се согласија со тие заклучоци кои, како што рекоа, се заклучоци само од членовите на ВМРО-ДПМНЕ, а бараа и оставка од Мизрахи.
Финска „се подготвува за најлошото“ додека Русија го проширува военото присуство во близина на границата
По извештаите дека Москва ги зајакнала своите воени бази во близина на границата на НАТО алијансата, Финска изјави дека очекува Русија дополнително да го зголеми бројот на војници по должината на нивната заедничка граница откако ќе заврши војната во Украина.
Генерал-мајор Сами Нурми, шеф на стратегијата на финските одбранбени сили, изјави дека војската ги следи маневрите на Москва „многу внимателно“ и дека нивната работа, како дел од НАТО алијансата, е да се „подготват за најлошото“.
Финската гранична стража во среда (21 мај) објави дека ги завршила првите 35 километри од планираната ограда од 200 километри на нејзината источна граница со Русија, која е затворена повеќе од една година, откако Хелсинки ја обвини Москва за пренасочување на баратели на азил во Финска во „хибридна операција“. Оградата, исто така, користи камери и сензори за да прави разлика помеѓу луѓето и животните што ја преминуваат границата.
Се чини дека сателитските снимки, објавени од „Њујорк тајмс“, ја покажуваат експанзијата на руската воена инфраструктура во близина на финската граница, вклучувајќи редови шатори, воени возила, реновирање на засолништа за борбени авиони и изградба на претходно неискористен хелиодром.
„Тие ги менуваат структурите и гледаме умерени подготовки кога станува збор за изградба на инфраструктура во близина на нашите граници, што значи дека кога војната во Украина, се надеваме, ќе заврши, тие ќе почнат да ги враќаат силите што се бореа во Украина, особено копнените сили“, рече Нуми.
Иако ова не беше неочекувано, бидејќи Финска се приклучи на НАТО со рекордно темпо во 2023 година по руската инвазија на Украина, Нурми рече дека тие „многу внимателно ги следат подготовките“.
„Тие го прават тоа во фази. Би рекол дека бројот на војници е сè уште умерен. Не е голема градба, но на одредени места се гради нова инфраструктура и се прават подготовки, се внесува нова опрема. Исто така, треба да процените дали се подготвуваат да испратат повеќе војници во Украина или се подготвуваат да ги зголемат своите сили во близина на нашата граница. Но, претпоставувам дека ги прават и двете“, истакна тој.
Реагирајќи на промената во активностите на Русија, американскиот претседател Доналд Трамп на новинарите им рече дека „воопшто не е загрижен за тоа“, додавајќи дека Финска и Норвешка „ќе бидат многу безбедни“.
Повторувајќи го мислењето на претседателот, Нурми рече дека „нема непосредна воена закана за Финска или НАТО од таа насока“ додавајќи:
„Она што се случи веднаш по нападот врз Украина беше дека аплициравме за членство во НАТО, а потоа, кога бевме примени, Русија објави дека ќе почне да го менува својот воен став преку границата“.
Финските граѓани се навикнаа на заканата од нивниот источен сосед, но стотици сè уште се запишуваат на курсеви за обука за да се подготват за вонредни ситуации.
Романскиот суд ја отфрли жалбата на ултранационалистичкиот кандидат на изборите
Уставниот суд на Романија денеска (22 мај) објави дека ја отфрлил жалбата на ултранационалистичкиот кандидат Ѓеорѓе Симион по неговиот пораз на претседателските избори во вториот круг за време на викендот.
Симион, кој загуби од центристичкиот градоначалник на Букурешт, Никусор Дан, поднесе жалба до Уставниот суд за поништување на гласањето, наведувајќи странско мешање, вклучително и од Франција.
„На крајот од своите размислувања“, судот „едногласно го отфрли барањето за поништување на изборите, сметајќи го за неосновано“, се вели во соопштението.
Гласањето во недела се случи пет месеци откако Уставниот суд на Романија ги поништи изборите поради наводи за руско мешање и масовната промоција на социјалните медиуми на крајнодесничарскиот фаворит, на кој не му беше дозволено повторно да се кандидира.
„Судот продолжува со својот државен удар. Сè што можеме да направиме е да се бориме! Ве поканувам да ми се придружите, денес и во наредните недели“, реагираше неуспешниот кандидат на Фејсбук.
Претседателот на Романија назначува клучни функции, како што е премиерот и има значително влијание во надворешната политика, вклучително и во претставувањето на земјата на самитите на НАТО и ЕУ.
Изборните превирања ја зголемија економската неизвесност во најзадолжената земја во ЕУ, која се бори со висока инфлација.
Вучиќ по средбата со Калас: Србија останува доверлив партнер на сите кои се стремат кон соработка
Претседателот на Србија, Александар Вучиќ, доцна синоќа (21 мај) во разговор со високата претставничка на Европската Унија за надворешна политика и безбедност, Каја Калас, во Белград изјави дека Србија останува сигурен партнер за сите кои искрено се стремат кон соработка, напредок и заедничка европска иднина.
Во објава на Инстаграм, Вучиќ изјави дека со Калас разговарале за клучни геополитички теми, безбедносната состојба во регионот, европскиот пат на Србија, како и дијалогот меѓу Белград и Приштина.
„Нагласив дека Србија е посветена на конструктивен дијалог, под покровителство на ЕУ, како начин за решавање на отворените прашања, и дека заштитата на српскиот народ на Косово и Метохија е наш апсолутен приоритет. Потсетив дека формирањето на Заедницата на српски општини не е само договорена обврска, туку и предуслов за понатамошен напредок на дијалогот и секоја нормализација на односите“, напиша Вучиќ на Инстаграм.
Тој истакна дека со Калас разговарал за процесот на ускладување на Србија со надворешната и безбедносна политика на ЕУ.
„Убеден сум дека Србија, како земја која се стреми кон членство во Европската Унија, има капацитет да придонесе за зачувување на мирот, стабилноста и заедничките европски вредности, а воедно да ги зачува своите витални национални интереси. Србија останува сигурен партнер на сите кои искрено се стремат кон соработка, напредок и заедничка европска иднина“, нагласи Вучиќ.
Ова е втора посета на Каја Калас на Западен Балкан, во текот на која таа ќе ги посети и Косово и Северна Македонија до 23 мај.
По Белград, таа оди во Косово. Претходно беше најавено дека во Приштина ќе разговара со претставници на политичките партии и граѓанското општество, како и со претставници на ЕУЛЕКС и КФОР.
Во петок во Скопје, Калас ќе се сретне со премиерот на Северна Македонија, Христијан Мицкоски.
За време на нејзината прва посета на регионот на Западен Балкан, на почетокот на април, Каја Калас беше во Црна Гора, Албанија и Босна и Херцеговина.
Двајца службеници на израелската амбасада убиени во близина на Еврејскиот музеј во Вашингтон
Двајца вработени во израелската амбасада во Вашингтон биле убиени во среда вечерта (21 мај) додека си заминувале од настан во Еврејскиот музеј. Полицијата соопшти дека осомничениот, кој е во притвор извикувал: „Слободна, слободна Палестина“ .
„Двете жртви, маж и жена, си заминувале од настан во Еврејскиот музеј во Капитал кога осомничениот се приближил до групата од четворица и отворил оган, изјави началникот на Метрополитенската полиција Памела Смит на прес-конференција.
Осомничениот, идентификуван како Елијас Родригез, 30 години, од Чикаго, бил забележан како шета надвор од музејот пред пукањето, потоа влегол во музејот по пукањето и бил приведен.
Осомничениот не бил на ниеден список за безбедносно следење и немало зголемени безбедносни закани пред пукањето, соопштија официјални лица. Исто така, пронајдено е и огнено оружје.
Израелскиот амбасадор Јехиел Лајтер изјави дека жртвите биле млад пар.
Американскиот државен обвинител Пам Бонди, која беше на местото на настанот со американската обвинителка Џанин Пиро, изјави дека разговарала со американскиот претседател Доналд Трамп неколку пати во текот на ноќта.
Трамп ги осуди убиствата на социјалната мрежа „Truth social“:
„Овие ужасни убиства во Вашингтон, очигледно засновани на антисемитизам, мора да престанат, СЕГА! Омразата и радикализмот немаат место во САД. Сочувство до семејствата на жртвите. Жално е што вакви работи се случуваат! Бог да ве благослови сите!“, напиша Трамп.
Портпаролката на израелската амбасада во Вашингтон, Тал Наим Чоен, изјави дека членовите на персоналот биле застрелани од непосредна близина додека присуствувале на настан во Еврејскиот музеј во Вашингтон.
„Имаме целосна доверба во спроведувањето на законот, и локалните и федералните, дека ќе го уапсат напаѓачот и ќе ги заштитат претставниците на Израел и еврејската заедница низ целите Соединети Држави“, рече таа.
Директорот на ФБИ, Кеш Пател, изјави дека тој и неговиот тим се информирани за пукањето.
„Додека работиме со Метрополитенската полиција за да одговориме и да дознаеме повеќе, ве молиме- молете се за жртвите и за нивните семејства“, напиша тој на платформата X.
Израелскиот претседател Исак Херцог изјави дека е „скршен“ од инцидентот во Вашингтон.
Минатата недела, Еврејскиот музеј на Америка беше една од локалните непрофитни организации во Вашингтон на кои им беа доделени 500000 долари во грантовска програма за зголемување на безбедносните мерки.
Трајко Славески е кандидат за гувернер на Народната банка
Претседателката Гордана Сиљановска Давкова го предложи проф. д-р Трајко Славески за нов гувернер на Народната банка.
Славески, кој е актуелен претседавач на Советот на град Скопје, е универзитетски професор на Економскиот факултет во Скопје и поранешен министер за финансии.
Претседателката својот предлог веќе го доставила до Собранието, кое новиот гувернер на Народната банка треба да го избере на пленарна седница со просто мнозинство.
„При донесувањето на одлуката, Претседателката се водеше од стручноста и компетентноста, дигнитетот и интегритетот, како и реалната можност за именување на кандидатот. Би сакале да потенцираме дека изборот беше тежок, со оглед на докажаниот квалитет на сите кандидати“, соопштија од Кабинетот на претседателот.
Од Собраниската прес-служба потврдуваат дека предлогот е доставен до пријавницата во Собранието.
Сиљановска-Давкова претходно во изјава за медиумите најави дека предлогот ќе го достави денеска пред да замине за Италија.
„Додека сте на функција треба да заборавите на партиски влијанија и да се водите од предизвикот на професијата. Според Законот, функцијата е инкопатибилна со партиско членство. Ние сме имале извонреден гувернер, Петар Гошев, кој беше претседател на партија, значи немало проблем“, рече претседателката на новинарско прашање дали винамавала при изборот на законот со оглед дека некои од кандидатите имаат врска со партиите.
Професорот на Економскиот факултет во Скопје Трајко Славески беше меѓу тројцата најсериозни кандидати кои се спомнуваа, покрај актуелната гувернерка Анита Ангеловска-Бежоска, и поранешниот министер за финансии Зоран Ставрески.
Мандатот на Ангеловска Бежоска истекува денеска (22 мај).
Ангеловска Бежоска стапи на функцијата на 22 мај 2018 година.
Функцијата гувернер на централната банка пред Ангеловска Бежовска ја извршуваше Димитар Богов (2011-2018), а претходно Петар Гошев (2004-2011), Љубе Трпески (1997-2004) и Борко Станоевски (1986-1997).
Папата побара да се дозволи влез на хуманитарна помош во Газа
Папата Лав XIV упати итен апел да се дозволи „пристојна количина хуманитарна помош“ во Газа и да се стави крај на непријателствата, за кои рече дека ужасна цена плаќаат децата, старите лица и болните.
„Ситуацијата во Појасот Газа е сè позагрижувачка и потешка“, рече папата за време на неговата редовна аудиенција на плоштадот „Свети Петар“, пренесува АФП.
Апелот на Папата доаѓа откако невладината организација „Лекари без граници“ го обвини Израел дека дозволил „смешно недоволна“ количина помош во Газа во споредба со потребите на територијата, само за да избегне обвинување дека го изгладнува населението.
Помошта, за која од понеделник е дозволено да влезе во Појасот Газа, околу сто камиони, според израелските власти, е само „завеса од чад“, објавија „Лекари без граници“, додека блокадата на територијата што Израел ја воведе на почетокот на март продолжува да го принудува Хамас (кое САД и Европската Унија го означија како терористичка организација)да ги ослободи заложниците што сè уште ги држи.
На 11 мај, Папата веќе изјави дека е многу тажен поради она што се случува во Газа и повика на итен прекин на непријателствата и на доставување хуманитарна помош до исцрпеното цивилно население и ослободување на сите заложници, пишува АФП.
Војната во Газа започна откако Хамас го нападна Израел на 7 октомври 2023 година, убивајќи околу 1200 луѓе и киднапирајќи околу 250 други. Како резултат на израелската офанзива, повеќе од 47 000 Палестинци беа убиени во Газа, а палестинската енклава претрпе големо уништување.
Земјите на ЕУ се согласија да формираат фонд за одбрана од 150 милијарди евра
Земјите од Европската Унија денеска (21 мај) се согласија да формираат фонд во вредност до 150 милијарди евра (170 милијарди долари) за заедничка набавка на оружје. Кредитите треба да се користат за инвестирање во воздушна и ракетна одбрана, артилериски системи, ракети и муниција, беспилотни летала и системи против беспилотни летала, како и за решавање на други потреби, од сајбер криминал до воена мобилност, појасни претседателката на Европската комисија, Урсула фон дер Лајен, кога ги презентираше плановите во март.
Тековните напори за вооружување во Европа имаат за цел да ја одвратат Русија од евентуален напад врз друга европска земја, по Украина.
Разузнавачките агенции претпоставуваат дека Русија ќе биде во воена позиција да започне уште една војна најдоцна до 2030 година.
Притисокот врз ЕУ значително да ги зголеми трошоците за одбрана и помошта за Украина се интензивираше, откако Вашингтон ја суспендираше американската воена помош за Украина и ја стави во прашање својата посветеност на заштитата на Европа.
„Живееме во најзначајните и најопасни времиња. Ова е моментот на Европа и ние мора да живееме до него“, рече во март, фон дер Лајен.
Таа се надева дека заедно со приватен капитал и дополнително финансирање од Европската инвестициска банка, фондот би можел да собере до 800 милијарди евра за одбрана.
Новиот фонд, кој сè уште треба формално да биде одобрен од министрите на ЕУ следната недела, е дел од низа иницијативи за подобрување на одбранбените капацитети на Европа.
Комисијата, исто така, им овозможува на земјите-членки поголема слобода за трошење за одбрана според вообичаено строгите правила на ЕУ за долг и дефицит.
Претреси на локации во Скопје поврзани со криминалната група „Беланоца-Барон“
Под раководство на предметниот обвинител што постапува во предметот под кодно име „Бункер“, единиците на МВР од рано утрината вршат претреси на пет локации во Скопје.
„Акцијата е резултат на обезбедени докази во рамките на истражната постапка што се спроведува против членовите на криминалната група „Беланоца-Барон“. Со повеќе информации обвинителството ќе излезе во текот на денот“, велат од Обвинителството за гонење организиран криминал и корупција.
Со повеќе информации обвинителството ќе излезе во текот на денот.
Инаку во декември лани Обвинителството отвори истрага против 18 припадници на криминалната банда „Беланоца-Барон“. Осомничените во период од 2020 до 2024 година, организирале убиства на вкупно 8 луѓе, при што тројца други биле ранети, а на три лица им бил загрозен животот.
За 14-мина постои сомневање дека се нарачатели или директни извршители на убиства, а 12 од нив се сомничат и за злосторничко здружување. Останатите Обвинителството ги товари за кривичното дело„ изнуда“.
РСЕ веќе пишуваше дека скопското подземје го „држат“ два криминални сојузи од кои едниот е познат како „Грчец/Дуќанџик“, додека вториот е сојузот составен од неколку помали банди од кои најпознат е кланот „Беланоца“ со база во Сингелиќ и Арачиново.
Во оваа група влегуваат и криминалните банди именувани како Барон, именувани по сега веќе опожареното чаирско кафуле Барон, потоа дел од кланот Бундес и кланот од Кондово познат по Агим Красниќи кој пред неколку години побегна од затвор во Косово, но беше екстрадирани и вратен во Идризово.
Називот „Беланоца“ доаѓа од името на селото Белановце, кое се наоѓа на 25 километри северно од Скопје и во близина на границата со Косово од каде што потекнуваат дел од членовите на оваа криминална група.
Протест на средношколците во Белград поради продолжувањето на учебната година
Учениците од средните училишта во Белград најавија протест пред Министерството за образование попладнево поради планираното продолжување на учебната година, со цел да се надоместат пропуштените часови за време на прекините на работата и блокадите.
„Министерството за образование, кое поради своите постапки е едно од одговорните за прекинот на наставата и блокадата на средните училишта низ цела Србија, се обидува да создаде привид на нормалност со продолжување на учебната година, со цел да надомести за нереалните часови и пополнување формулари“, напишаа учениците на социјалните мрежи.
Тие додадоа дека не се согласуваат да молчат „на притисоците да посетуваат настава во месеци во кои немаат услови за тоа“.
Тие ги поканија сите средношколци, просветни работници, родители, ученици и граѓани на протестот пред Министерството за образование, што ќе трае од 18:30 до 20 часот.
Министерството за образование на Србија објави дека наставата во основните училишта може да се продолжи до 20 јуни, а во средните училишта до 18 јули.
Можноста за продолжување на годината, како што наведува Министерството, се однесува само на оние училишта кои, поради прекинот, не го реализирале наставниот процес во целост и немаат доволно време за надомест и оценување.
Мултимедија
Најпосетени
Што треба да знаете