Вести
Македонија ги олеснува условите за влез за украинските бегалци
Владата ги задолжи надлежните институции во најскоро време да достават информации за расположливите државни сместувачки капацитети со цел подготвување за евентуална бегалска криза. Ова ќе се однесува дополнително и за украинските државјани кои се затекнати во Македонија и не можат да се вратат во Украина заради безбедносни причини. Нив ќе им биде овозможено продолжување на престојот во земјава.
Владините портпароли соопштија дека за тие граѓани кои што ќе бидат приморани да ја напуштат земјата, Македонија ќе им го олесни влезот и нема да мора да се прикажува негативен ПЦР тест поради хуманитарни причини. Ова е еден од заклучоците од денешната седница на Владата, соопштија владините потпароли на прес конференцијата.
Владиниот портпарол Душко Арсовски испрати порака до граѓаните поради се позачестениот говор на омраза во врска со руско-украинскиот конфликт. Тој истакна дека „треба да се осуди она што се случува во Украина со пораката дека Северна Македонија силно го осудува чинот на отворена воена агресија од страна на Русија врз Украина“.
„Оваа воена агресија е несомнено кршење на меѓународното право и закана за евроатланската безбедност. За ова треба да бидат сите свесни и така да се однесуваат“, изјави Арсовски.
Повеќе од половина милион луѓе ја напуштија Украина откако Русија ја започна својата инвазија минатата недела, соопштија вчера од Агенцијата за бегалци на ОН (УНХЦР). Километарски редици беа формирани на граничните премини со соседна Полска, Молдавија, Унгарија, Романија, Словачка. Пребегани има и во Белорусија.
Од Амбасадата на Украина во Република Северна Македонија за Радио Слободна Европа потврдуваат дека заклучно со 28 февруари, немало искажано интерес кај украински државјани, бегалци од руската инвазија, за доаѓање во земјава. За оние кои сакаат да им помогнат од Амбасадата отворија сметка за собирање средства за поддршка на Украина, со назнака дека парите ќе бидат искористени за хуманитарни потреби.
Капацитети за сместување бегалци има и во прифатно-транзитните центри „Винојуг“, на јужната и „Табановце“ на северната граница кои беа најактуелни за време на бегалско-мигрантската криза во 2015 година. Центрите можат да обезбедат краткорочно сместување за вкупно 971 лице.
Русија на 24 февруари ја нападна Украина што предизвика остри осуди во целиот западен свет.
види ги сите денешни вести
Гренланд гласаше за промени, победи десниот центар
Парламентарните избори на Гренланд на 11 март донесоа изненадувачки победник и две јасни пораки: отфрлање на желбата на американскиот претседател Доналд Трамп за оваа артичка територија и сигнал дека независноста од Данска може да дојде – но со побавно темпо.
Опозициските Демократи, централно-десничарска либерална партија, завршија на првото место со речиси 30 отсто од гласовите, пред партијата која цврсто се залага за независност, која освои 24 отсто.
Изненадувачки, партиите од владејачката коалиција – Народниот сојуз на премиерот Муте Егеде и партијата Напред – двете поддржувачи на независноста, но со побавно темпо од она што го бара партијата Ориентациона точка, завршија на разочарувачкото трето и четврто место, без шанси да продолжат да владеат како констелација.
Најверојатно нов премиер ќе биде лидерот на Демократската партија Јенс-Фредерик Нилсен, кој беше еден од најгласните критичари на желбата на претседателот Трамп да го направи Гренланд американски најголем остров на светот.
Откако влезе во Белата куќа, американскиот претседател изрази интерес да ја преземе контролата врз оваа стратешки лоцирана и богата со ресурси територија, што предизвика вознемиреност, особено во Данска, сојузник на САД во НАТО.
Демократите претходно беа скептични за прекинување на врските со Копенхаген, кој сè уште ја контролира надворешната и монетарната политика на Гренланд.
Меѓутоа, во последниве години тие го променија својот став, сметајќи ја независноста за долгорочна цел, под услов островот да стане економски посамостоен. Во моментов, речиси половина од населението работи во јавниот сектор, кој во голема мера е финансиран од грантови од Данска.
Нилсен се надева дека ќе ги смени политичките одлуки кои го ограничија истражувањето за нафта и гас и го забранија ископувањето ураниум на Гренланд.
Сепак, тоа ги отежнува и коалициските преговори.
Најверојатниот партнер во владата, партијата Сојуз на народите, силно се залага за заштита на животната средина и цврсто се спротивставува на ваквите потези, поради што ваквите политики станаа заштитен знак на оваа партија во последните години.
Сепак, со тесно мнозинство во 31-члениот парламент, се очекува двете партии да се согласат да го држат Вашингтон на дистанца, а да одржуваат поблиски врски со Данска – барем засега.
Ерменија и Азербејџан го финализираа мировниот договор, но пречките остануваат
Ерменија и Азербејџан, кои од доцните 1980-ти водеа низа војни, го финализираа текстот на долгоочекуваниот мировен договор чија цел е воспоставување формални односи. Тоа е значаен чекор кон ставање крај на децениските непријателства.
Ерменското Министерство за надворешни работи (МНР) на 13 март потврди дека Ереван ги прифатил предлозите на Азербејџан за двата преостанати члена од договорот кои беа неусогласени. Со тоа практично се завршуваат преговорите за текстот на документот.
Официјален Ереван предложи консултации со Азербејџан за датумот и местото на потпишување.
Ерменскиот премиер Никол Пашинјан веднаш по објавата на МНР изјави дека нацрт-мировниот договор е компромис и оти неговата земја е подготвена да започне консултации за времето на потпишување на договорот.
„Немаме никакви тајни од нашето општество во тој текст, кој всушност беше објавен одделно, член по член. Мислам дека не може да се каже дека јавноста не е запознаена со содржината“, рече Пашинјан, нагласувајќи дека Ерменија и Азербејџан нема да распоредуваат странски сили долж границата по потпишувањето на договорот.
Азербејџанскиот министер за надворешни работи Џејхун Бајрамов, исто така, на 13 март, изјави дека „преговарачкиот процес за текстот на мировниот договор е официјално завршен“, додавајќи дека „последните две отворени клаузули се решени, а Ерменија ги прифатила предлозите на Азербејџан“.
И покрај напредокот, Азербејџан тврди дека договорот не може да се потпише додека Ерменија не ги ревидира Уставот и правната рамка за да ги отстрани сите референци за територијални претензии кон регионите во Азербејџан, главно кон Нагорно-Карабах.
„Ова е неопходен предуслов за потпишување мировен договор“, рече Бајрамов.
Ваквиот развој на настаните дојде по повеќегодишни преговори за постојан мировен договор.
Нагорно-Карабах, дом на значително ерменско население, е под контрола на етничките ерменски власти од раните 1990-ти односно по разорната војна меѓу двата соседа која следуваше по распадот на Советскиот Сојуз.
По кратката, но интензивна азербејџанска воена офанзива во септември 2023 година, сепаратистичкото раководство се предаде и регионот, сега официјално наречен Карабах, беше реинтегриран во Азербејџан.
Војната доведе до масовен егзодус на повеќе од 100.000 Ерменци од регионот, што практично стави крај на една деценија сепаратистичко владеење.
По последната војна во регионот, Ерменија и Азербејџан ги продолжија преговорите за мировен договор за формално меѓусебно признавање на територијалниот интегритет и за воспоставување дипломатски односи.
Една од клучните пречки во преговорите беше правната позиција на Ерменија во однос на статусот на Нагорно-Карабах како азербејџанска територија.
Баку долго време тврди дека Уставот на Ерменија вклучува имплицитни територијални претензии кон Нагорно-Карабах и азербејџанските власти инсистираат на тоа дека ова мора да се измени пред да се потпише договорот.
Вајц реагира за „притисок од владината коалиција кон членовите на Судскиот совет“
Во писмена изјава до медиумите, известувачот на Европскиот парламент (ЕП) за Северна Македонија Томас Вајц денеска (13 март) реагираше за „притисокот на владината коалиција членовите на Судскиот совет да поднесат оставки или да бидат разрешени поради нивната наводна политичка припадност“.
„Овој повик од страна на Владата е загрижувачки знак за политичко мешање во судството. Независноста на судскиот систем е клучна за владеењето на правото и поделбата на власта, коишто се темелни вредности на патот на Северна Македонија кон ЕУ“, наведува Вајц во пишаната изјава, пренесе МИА.
Реакцијата на австрискиот европратеник, кој од октомври 2024 е известувач на ЕП за Северна Македонија, слетува откако на 11 март Собранието им изгласа недоверба односно интерпелација на петмината членови на Судскиот совет кои се избираат во парламентот – Весна Дамева, Павлина Црвенковска, Миљазим Мустафа, Тања Чачарова-Илиевска и Селим Адеми.
Зад иницијативата за интерпелациите, која беше поднесена на 7 февруари, застанаа 67 пратеници од владејачкото мнозинство на ВМРО-ДПМНЕ, ЗНАМ и ВРЕДИ (ВЛЕН).
Интерпелациите не се правно обврзувачки односно останува на самите членови да одлучат дали ќе се повлечат, на што повикуваа претставници од власта. Меѓу нив, и премиерот Христијан Мицкоски кој порача дека очекува петмината членови, од кои на тројца секако годинава им истекуваат мандатите, да ги напуштат функциите затоа што немаат кредибилитет.
Претходно денеска (13 март) на оваа тема зборуваше и американската амбасадорка Анџела Агелер порачувајќи дека внимателно ги следат случувањата и изјавите.
„Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат“, изјави Агелер.
Уште откако беа најавени интерпелациите, а власта ја наметнуваше идејата и за целосно распуштање и на Судскиот и на Советот на јавни обвинители, од Судскиот совет порачаа дека единственото место каде може да се разреши член на ова тело е во самиот Совет.
Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.
Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.
Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.
Минатата недела пријавени еден смртен случај поврзан со грип и 2347 заболени
Во текот на минатата недела (до 9 март) биле пријавени еден смртен случај поврзан со грип и 2347 заболени лица, соопшти Институтот за јавно здравје (ИЈЗ).
Бројот на нови пријавени случаи е помал за 8,6 проценти во споредба со неделата претходно, но во споредба со истиот период лани е зголемен за дури 5,5 пати.
Од новозаболените, 1.454 се во возрасната група од 15 до 16 години. 516 се деца на возраст од 5 до 14 години, а 198 се лица на 65-годишна возраст.
Меѓу заболените се и 179 деца под 4 години.
Најголем дел од случаите се на подрачјето на Центарот за јавно здравје (ЦЈЗ) во Скопје – 931, потоа во ЦЈЗ Битола – 202, ЦЈЗ Куманово – 176, ЦЈЗ Струмица – 112, ЦЈЗ Тетово – 105 и др.
Починатото лице, кое е случај поврзан со грип, како што соопштија од ИЈЗ, било на 82-годишна возраст од Радовиш, кое било хоспитализирано во Клиничката болница Штип.
„Кај починатото лице е утврдено присуство на коморбидитети и не било вакцинирано со вакцина против сезонски грип“, велат од ИЈЗ.
Според податоците на здравствените власти, во сезоната 2024-2025 вкупниот број на случаи со грип изнесува 22 291. Досега регистрирани се четири починати лица.
Се разотидоа демонстрантите пред телевизијата Н1 во Белград
Стотината демонстранти кои претходно во текот на денот (13 март) се собраа пред телевизијата Н1 во Белград се разотидоа попладнето околу 13:30 часот.
Полицајци со штитови дојдоа пред телевизијата, дваесетина минути откако се собра групата демонстранти.
Насобраните лица носеа транспаренти на кои пишуваше „Каде ви е шефот“, скандираа „Не ја даваме Србија“ и не дозволуваа никој да влезе или излезе од дворот.
Телевизијата Н1 објави дека не се знае зошто се собрале.
За време на блокадата, репортерката на Н1 се обиде да открие кои се луѓето пред капијата на телевизијата. Тие не сакаа да одговорат, а еден од присутните рече дека ќе кажат кои се тие ако им дозволат да влезат во студиото да дадат изјава.
Н1 објави дека меѓу демонстрантите биле Иван Силер, помошник градоначалник на Нови Сад и Предраг Вулетиќ, секретар за социјална политика, демографија и родова еднаквост на автономната покраина Војводина, како и Мирослав Родиќ, член на Собранието на Војводина.
Радио Слободна Европа засега не може да ја потврди оваа информација.
Станува збор за функционери на Социјалистичкото движење, основано од прорускиот вицепремиер на Србија Александар Вулин, кој се наоѓа на црната американска листа, меѓу другото, и поради неговите врски со Русија. Социјалистичкото движење е малцински коалициски партнер на владејачката Српска напредна партија (СНС).
Српскиот вицепремиер Александар Вулин на седница на српскиот парламент изјави дека не е поддржувач на блокади, но...
„Но, ова беше само начин за Социјалистичкото движење да покаже дека сè што им прават на другите може да им се случи и на нив. Не сакаме да бидеме оправдување за какви било конфликти, бевме таму неколку часа, го завршивме тоа“, рече Вулин.
Тој додаде, „но јас само сакам да кажам дека можеме повторно да дојдеме и дека сето ова што го правите на другите, може еден ден да се направи и на вас“.
Јунајтед Медиа, групација од која е дел Н1 ТВ, ги повика полицијата и надлежните институции веднаш да преземат мерки, да ја отстранат блокадата и да обезбедат непречена работа на телевизијата.
„Ова го гледаме како директен притисок врз независното новинарство и резултат на кампањата предводена од највисоки владини функционери и режимски медиуми, која интензивно се води против Н1 во последните денови, поради нејзиното професионално известување за студентските протести во Србија“, се вели во соопштението.
Во него се додава дека „особено е неприфатливо владините функционери, како што се помошникот градоначалник на Нови Сад и покраински секретари, да учествуваат во блокадата на медиумите“.
„Очекуваме ваквото однесување да биде санкционирано, бидејќи во спротивно испраќа јасна порака дека власта директно ги поддржува нападите врз слободата на медиумите“, велат од Јунајтед Медиа.
Програмскиот директор на Н1 Игор Божиќ изјави дека не знае кои се луѓето кои ја блокирале зградата, но дека дошле организирано.
Божиќ рече дека во Н1 не знаеле дека е најавен таков собир, но смета дека полицијата знаела, бидејќи полицајците биле таму пред нивното пристигнување.
Тој изјави дека по блокадата на РТС, „главните лидери“ повикувале кога ќе има блокада пред Н1.
„Ова е очигледно одговорот на режимот на тоа. Очигледно е дека ова е одвраќање од настаните околу студентските протести и режимот се обидува да покаже дека прорежимските медиуми не се единствениот проблем, туку дека за неговите поддржувачи проблем се и независните медиуми“, смета Божиќ.
На 10-ти и 11-ти март во 22 часот, студентите ја блокираа зградата на Радио телевизија на Србија (РТС) во центарот на Белград, барајќи објективно известување за протестите.
Студентите го блокираа Јавниот медиумски сервис среде повеќемесечните протести со кои се бара одговорност за смртта на 15 лица во уривањето на бетонската настрешница на Железничката станица во Нови Сад.
Студентите во блокада најавија голем митинг во Белград на 15 март. Тие од декември ги блокираат државните универзитети и водат мирни протести низ земјата.
Агелер: Внимателно ги следиме изјавите за интерпелациите на Судскиот совет
Американската амбасадорка во Северна Македонија, Анџела Агелер, изјави дека не може да ги коментира интерпелациите во Собранието за петте члена на Судскиот совет, но упати порака дека внимателно ги следат случувањата.
„Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат“, изјави Агелер на 13 март.
На 11 март, пратениците од владејачкото мнозинство изгласаа интерпелации на петте члена на Судскиот совет кои се избрани од Собранието. Интерпелациите не се правно обврзувачки односно останува на самите членови да одлучат дали ќе се повлечат, на што повикуваа претставници од власта.
Уште откако беа најавени интерпелациите во февруари, од Судскиот совет порачаа дека единственото место каде може да се разреши член е во самиот Совет.
На тројца од петте члена на Советот шестгодишните мандати им истекнуваат во јули односно декември 2025 година.
За нови членови кои се избираат од Собранието, според премиерот Христијан Мицкоски, не се дискутирано.
„Ние не влеговме во ова затоа што имаме однапред спремено тефтерчиња во коишто се наоѓаат имиња, како тие што беа во Речица и на Бихаќка. Ние влеговме од принципиелни причини бидејќи вие граѓаните им дадовте доверба помала два проценти, а и последните случувања за избор на вршител на должноста претседател на Врховниот суд, името коешто е избрано, е дополнителен мотив овие членови на Судскиот совет да бидат разрешени“ рече Мицкоски, кој заедно со Агелер присуствуваа на настан во Центарот за обука на полицијата во Идризово на 13 март.
Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.
Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.
Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.
Доживотен затвор за обвинетиот за убиството кај Мавровка
Доживотен затвор доби обвинетиот Елвин Куртовиќ за убиството на едно лице кај трговскиот центар Мавровка на 20 август минатата година.
Пресудата, која е првостепена, беше изречена денеска (13 март) во Основниот кривичен суд Скопје откако Куртовиќ претходно призна вина.
Жртва на ова убиство беше скопјанецот Васил Ефтимов, а случајот беше во фокусот на јавноста бидејќи обвинетиот од претходно имал кривично досие, а истиот ден по убиството пукаше и кон четворица полицајци.
Судијката Моника Бахчовановска, пред изрекување на пресудата, во судница читаше и психијатриско вештачење за обвинетиот, во кое се наведува дека тој е психички здрава личност со нормална интелигенција.
„Вештачењето покажува дека од увидот во казнената евиденција од 16 години е осудуван за кражби, насилство, сообраќајки, фалсификување …, а, имал и пресуди во странство. Од почетокот на адолесценцијата имал проблеми и асоцијалност, изразено непочитување на социјални норми и невозможно одржување на трајни релации, ниска толеранција и склоност кон насилство. Кога го сторил кривичното дело бил во секој момент пресметлив и со уредно психичко здравје“, рече судијката Бахчовановска.
Покрај за убиството, со обвинението Куртовиќ се гонеше и за убиство во обид и за неовластено изработување, држење, посредување и тргување со оружје и експлозивни материи.
Според Основното јавно обвинителство (ОЈО) Скопје, убиството на Ефтимов на 20 август 2024, обвинетиот го извршил од користољубие, со истрел од пиштол. Исто така, се заканил и на сопругата на жртвата и од неа ја одзел торбата која таа ја носела на рамо и гајба која била во возилото, а во којашто имало различен рачен алат.
Како што наведува и обвинителството, подоцна во текот на истиот ден кога полициски службеници го пресретнале обвинетиот заедно со уште едно лице во автомобил, тој излегол од совозачката врата и кон четворицата полицајци испукал 3 проектили во обид да ги лиши од живот.
Кос: Патувањето на Албанија кон ЕУ е сигурно и вистинито
Еврокомесарката за проширување и соседска политика, Марта Кос, која денеска (13 март) престојува во Албанија, порача дека патувањето на земјата кон ЕУ, е сигурно и вистинито и оти Албанија заслужува да биде дел од ЕУ, зашто е „шампион за регионалната соработка“.
„Геополитиката денес ни покажува дека се е можно и вашиот пат кон ЕУ е безбеден и вистинит. Процесот за членство треба да биде проект на сите албански граѓани. Според мене, важно е пристапниот процес да биде проект на целото албанско општество. Не само владата, туку секој град и село треба да се вклучи, за граѓаните да разберат зошто Албанија ќе стане членка на ЕУ,“ рече таа.
Кос се задржа и на парламентарните избори што ќе се одржат на 11 мај, оценувајќи притоа дека изборниот процес е меѓу најважните процеси во демократијата и оти е убедена дека изборите ќе бидат слободни и демократски.
„Парламентарните избори се еден од најважните процеси во една демократија. Ова е изборот на граѓаните да си ја исполнат должноста да гласаат, се надевам дека ќе гласаат и ќе има голема излезност. Сигурна сум дека ќе бидат слободни и фер и го поздравувам фактот што дијаспората ќе има можност да гласа на овие избори. Да проговорат со своите гласови за тие важни работи, за принципите и основите на демократијата“, порача таа.
Албанскиот премиер Рама пак, изјави дека за да се стигне до крајната дестинација ЕУ, мора да се завршат сите домашни задачи.
„Членството во ЕУ не е возење со автобус или авион, туку создавање услови и стандарди, овде, за да се биде член на тамошното семејство. Албанија 2030 во ЕУ ја гледаме како реализација на програмата што ја имаме. Преговорите се базираат на резултати. За да ги спречите да ве попречуваат колку што сакаат, дури и неправедно, да дадат уште една работа, треба да си ја завршите домашната задача. Ова е ЕУ“, нагласи Рама.
Тој исто така рече дека и Албанија и другите земји од регионот немаат друга алтернатива освен интеграцијата во европското семејство.
Непознати лица го блокираа влезот на телевизија Н1 во Белград
Група од околу стотина непознати лица се собрала пред влезот во дворот на редакцијата на телевизијата Н1 во Белград.
Насобраните носат транспаренти на кои пишува „Каде е вашиот шеф и извикуваат „Нема да се откажеме од Србија“ и не дозволуваат никој да влезе или да излезе од дворот.
Телевизијата Н1 објави дека не се знае зошто се собрале.
Полицијата со штитови пристигнала дваесетина минути откако се собрала групата луѓе.
Репортерот на Н1 се обиде да открие кои се луѓето кои се собрани пред капијата на телевизијата.
Тие не сакаа да одговорат, а еден од насобраните рече дека ќе кажат кои се тие ако им дозволат да влезат во студио и да дадат изјава.
Како што јави телевизијата Н1, откако група непознати мажи дошле пред нивната зграда, дел од вработените во канцелариите на соседната бизнис зграда излегле надвор или од прозорците им довикувале „одете си на Косово“.
Програмскиот директор на Н1 Игор Божиќ изјави дека не знае кои се луѓето кои ја блокирале зградата, но дека дошле организирано.
Божиќ рече дека во Н1 не знаеле дека е најавен таков собир, но смета дека полицијата знаела, бидејќи полицајците биле таму пред нивното пристигнување.
Тој изјави дека по блокадата на РТС, „главните лидери“ повикувале кога ќе има блокада пред Н1.
„Ова е очигледно одговорот на режимот на тоа. Очигледно е дека ова е одвраќање од настаните околу студентските протести и режимот се обидува да покаже дека прорежимските медиуми не се единствениот проблем, туку дека за неговите поддржувачи проблем се и независните медиуми“, смета Божиќ.
На 10-ти и 11-ти март во 22 часот, студентите ја блокираа зградата на Радио телевизија на Србија (РТС) во центарот на Белград, барајќи објективно известување за протестите.
Студентите го блокираа Јавниот медиумски сервис среде повеќемесечните протести со кои се бара одговорност за смртта на 15 лица во уривањето на бетонската настрешница на Железничката станица во Нови Сад.
Студентите во блокада најавија голем митинг во Белград на 15 март. Тие од декември ги блокираат државните универзитети и водат мирни протести низ земјата.
Кремљ отфрла каков било привремен прекин на огнот, американските преговарачи во Москва
Високиот помошник на претседателот Владимир Путин отфрли каков било привремен прекин на огнот со Украина, непосредно пред пристигнувањето на американска делегација на разговори во Москва, за да го натера Кремљ или да се согласи на 30-дневниот предлог за прекин на огнот или ќе се соочи со санкции.
Помошникот на Кремљ, Јуриј Ушаков, во интервју емитувано на државната телевизија на 13 март рече дека предложениот прекин на огнот на американскиот претседател Доналд Трамп, на кој Киев се согласи, само ќе и даде на Украина време да се опорави од притисокот што Русија го врши врз нејзините војници.
„Го кажав нашиот став дека ова не е ништо друго освен привремен одмор за украинската војска, ништо повеќе“, рече Ушаков, кој е повеќе од половина век во дипломатијата и се смета за главен советник за надворешна политика на Кремљ.
Тој додаде дека ја кажал позицијата на Москва во телефонскиот разговор со американскиот советник за национална безбедност Мајк Валц, еден ден претходно.
„Ми се чини дека никому не му требаат никакви чекори кои само имитираат мирни дејствија во оваа ситуација“, рече тој, истакнувајќи дека Русија сака долгорочно решение што ќе ги земе предвид нејзините интереси и грижи.
За време на состанокот во Белата куќа на 12 март со ирскиот премиер Мајкл Мартин, Трамп изрази уверување за обезбедување на прекин на огнот за Украина и рече дека американските преговарачи „во моментов патуваат во Русија“.
На 13 март, портпаролот на Кремљ, Дмитриј Песков, потврди дека американскиот тим, наводно, предводен од специјалниот пратеник на Трамп, Стив Виткоф, патува кон Москва.
Трамп претходно им изјави на новинарите дека Русија „нема излез освен прекин на огнот“.
„Доколку е потребно, ќе го санкционираме, но се надевам дека нема да ни треба“, рече Трамп.
Ставањето крај на повеќе од тригодишната целосна инвазија на Русија на Украина засега е главен приоритет на Трамп, откако ја презеде функцијата по втор пат пред помалку од два месеци. Тој брзо ги испрати своите највисоки функционери во Москва и Киев за да ја подготват основата за мировни преговори.
Неговите последни коментари за војната доаѓаат откако Киев се согласи со планот за привремен прекин на огнот по деветчасовните разговори со претставници на администрацијата на Трамп во Џеда, Саудиска Арабија.
Мултимедија
Најпосетени
Што треба да знаете