Вести
Оштетени куќи и возила од пожарите во Кочани, најавена помош од Србија и Бугарија
Пожарите во Кочани оштетија куќи и возила, а десетина граѓани побарале помош поради отежнато дишење од чадот. Тешко повредени нема, но оштетено е и едно противпожарно возило. Пожарот што попладнево избувна на две локации во Кочани и се доближи до станбените домови над градот во Белско Маало, беше само еден од десетиците кои избуваа низ територијата на цела Македонија.
Претседателот на државата Стево Пендаровски вечерва на Фејсбук соопшти дека во телефонски разговор со бугарскиот претседател Румен Радев било договорена помош од Бугарија во гаснењето на пожарите низ земјава.
„Договорено е во најкус можен рок Бугарија да испрати противпожарни единици кои ќе помогнат на нашите екипи во гасење на пожарите“, соопшти Пендаровски.
Помош за гаснењето на пожарите е најавена и од Србија, како што соопшти премиерот Зоран Заев.
„Јас разговарав со претседателот Вучиќ, тие ги потврдија своите хеликоптери, два, три, четири или колку и да се потребни да дејствуваат утре“, изјави Заев од Кочани.
Според противпожарните екипи на терен во Кочани, пожарот во моментов се шири во правец на селото Тркање, а луѓето кои интервенираат таму се сконцентрирани да го спречат огнот да се доближи кон склад на „Макпетрол“ и кон друга приватна бензиска пумпа. Сепак, според последните информации од Центарот за управување со кризи, складот на „Макпетрол“ во Кочани веќе не е во опасност од пожарот.
Градоначалникот на Општина Кочани Николајчо Илијев вечерва изјави дека во моментов состојбата во градот е под контрола и дека помош пристигнала од повеќе страни, но дека е зафатена голема линија каде гори сува трева и нискостеблеста шума на непристапен терен.
„Со директорот на ЦУК ги координираме сите сили. Имаме дополнителни возила дојдени од Квадарци, Свети Николе и Велес“, вели Илијев.
Илијев вечерва наведе дека во денешниот пожар оштетени се две куќи во Кочани, откако оганот влегол во градот и се ширел во ралични правци од силниот ветер, но бил спречен да влезе во централното градско подрачје. Тој додаде дека во текот на ноќта ќе има дежурни екипи за да се ликвидираат пожарите во планинскиот дел.
Центарот за управување со кризи (ЦУК) информира дека на теторијата на цела држава има неколку огнени жаришта, но дека пожарот во Кочани е сосема до куќите. Од ЦУК велат дека Територијалните противпожарни единици на Кочани се наоѓаат на терен како и екипа од Виница.
„Барања од граѓани за дополнителни сили се бидејќи постоечките не можат да задоволат. Во Кочани има уште еден активен пожар, предизвикан од паднат далекувод кај мв Костин Дол и истиот за кратко време се има проширено кон шумски предел и е вон контрола. За истиот е побарана интервенција од воздух“, наведуваат од ЦУК од каде додаваат дека пожари има низ целата држава.
Претседателот Стево Пендаровски претходно вечерва на Фејсбук соопшти дека хеликоптерите на македонската Армија немаат техничка можност да летаат во ноќни услови, додавајќи дека тоа е причината поради која во гаснењето на пожарите ќе се вклучат во раните утрински часови.
Пендаровски претходно денеска соопшти дека во 16:30 часот дал наредба Армијата да се вклучи во гаснењето на пожарот во Кочани.
„Одобрена е и употреба на воздухопловите, кои денеска веќе интервенираа во Старо Нагоричане, а утре наутро одат на помош во Кочани. Во текот на денот беа ангажирани над 170 припадници на армијата, а во текот на ноќта ќе се следи состојбата на терен и ќе се ангажираат дополнителни сили, како и средства за справување со состојбите и помош на населението насекаде каде што има потреба“, наведе Пендаровски.
Во однос на другите пожари низ Македонија, Територијалната противпожарна единица од Крива Паланка денеска соопшти дека интервенирала на пет пожари, од нив три на отворено, два на објекти.
Од единицата наведуваат дека пожарникарите сѐ уште се на терен за интервенција по последната дојава примена околу деветнаесет часот, за запалена куќа во населба Маневци. Жители близу месноста Пасјак во пехчевско-делчевскиот регион информираат дека ситуацијата со пожарот кој утрово избувна кај планината Средна е алармантна.
„Пожарот започна од утринава негде околу пладне. Гори Чуката, дел од Средна и поголем дел од пожарот се движи во правец кон селото Нов Истевник. Ситуацијата е навистина алармантна, бидејќи голема е опасноста да изгори цел Нов Истевник“, според жител на соседното село. Граѓани од кумановско исто така аламираат дека имало многу силен пожар во Мургаш каде била нанесена штета на неколку куќи, а изгоела и стока.
Претходно вечерва надлежните служби во државата информираа дека шумски пожари беснеат на над десетина локации низ Македонија: пожари има во Ранковце каде се изгорени и куќи, борова шума гореше во Делчево и во Пехчево, а гори кај локалитетот Кокино, во Старо Нагоричане кумановско.
Премиерот Зоран Заев и министерот за внатрешни работи Оливер Спасовски денеска ја напуштија централната манифестација на Мечкин Камен во Крушево и се упатија кон Кочани, каде пристигна и лидерот на опозицијата Христијан Мицкоски кој апелираше власта итно да реагира.
Пожари денеска има и во села во Македонски Брод, во општина Липково околу Белановце и во скопско.
Инаку, надлежните од Центарот за управување со кризи (ЦУК) информираат дека во државата денеска имало вкупно 13 пожари и дека „скоро сите се предизвикани од човеков фактор“, како што наведе директорот на институцијата Стојнче Ангелов.
види ги сите денешни вести
Иран планира да инсталира „нови напредни“ центрифуги како одговор на резолуцијата на МААЕ
Иран на 22 ноември соопшти дека ќе започне со инсталирање на голем број „нови и напредни“ центрифуги како одговор на резолуцијата усвоена од Меѓународната агенција за атомска енергија (МААЕ) на Обединетите Нации, која ја критикува Исламската република за, како што вели, лошата соработка.
Резолуцијата, која доаѓа веднаш по враќањето на шефот на МААЕ, Рафаел Гроси од патувањето во Иран, наводно апелира дека е „суштинско и итно“ Техеран „да дејствува за да ги исполни своите законски обврски“.
Во заедничкото соопштение на иранското Министерство за надворешни работи и Агенцијата за атомска енергија се вели дека шефот за нуклеарна енергија Мохамад Ислами „издал наредба за преземање ефективни мерки, вклучително и лансирање на значителна серија нови и напредни центрифуги од различни типови“.
Иранското соопштение доаѓа откако одборот на МААЕ на 21 ноември издаде втора резолуција со која се осудува соработката на Техеран со агенцијата по слично предупредување во јуни.
Резолуцијата на МААЕ, поднесена од Франција, Германија и Велика Британија и поддржана од Соединетите Држави, доаѓа во критичен момент кога новоизбраниот претседател Доналд Трамп се подготвува да се врати во Белата куќа во јануари.
Трамп за време на неговиот прв мандат започна кампања за „максимален притисок“ за засилени санкции врз Иран и еднострано ги повлече Соединетите Држави во 2018 година од историскиот договор од 2015 година со кој беа укнати некои санкции кон Иран во замена за ограничување на неговата нуклеарна програма, за која Западот се сомнева дека е насочена кон развивање на нуклеарно оружје. Иран тврди дека неговата нуклеарна програма е мирна.
Резолуцијата донесена на 21 ноември, исто така, го повика Иран да соработува во истрагата која започна откако беа пронајдени честички од ураниум на две локации кои иранските власти не ги прогласија за нуклеарни локации.
За резолуцијата гласаа 19 од 35-те членки на одборот на МААЕ. Русија, Кина и Буркина Фасо се спротивставија, 12 членки беа воздржани, додека еден не гласаше, изјавија за АП дипломати кои сакаа да останат анонимни.
Исто така, Резолуцијата ја повикува МААЕ да излезе со „сеопфатен извештај“ за иранските нуклеарни активности до пролет.
За време на посетата на Гроси, Иран се согласи со барањето на МААЕ да ги ограничи залихите на ураниум. Сепак, иранскиот министер за надворешни работи Абас Аракчи, кој беше главен преговарач на Техеран за договорот од 2015 година, предупреди дека Иран нема да преговара „под притисок“.
Двајца загинати, 12 ранети во руските напади на Суми
Две лица загинаа, а 12 се ранети во руските напади врз Суми рано утрината на 22 ноември, објави Артем Кобзар, градоначалник на градот во североисточна Украина во видео изјава на каналот Телеграм.
„Во Суми се слушнаа неколку силни експлозии“, вели тој на видеото, додавајќи дека на местото на експлозиите работат спасувачки екипи, полиција и брза помош.
Кобзар ги повика жителите да се засолнат.
Украинското воено воздухопловство соопшти дека во тек се напади со руски беспилотни летала во четири региони - Суми, Киев, Чернихив и Житомир.
Трамп ја номинираше Пем Бонди за јавна обвинителка
Новоизбраниот американски претседател Доналд Трамп ја номинираше ветеранската обвинителка Пем Бонди за нов јавен обвинител, неколку часа откако Мет Геjц се повлече од можен кандидат.
Бонди има долгогодишно искуство во спроведувањето на законот и претходно служеше како јавен обвинител на Флорида, јавија американските медиуми.
Долгогодишниот сојузник на Трамп, Бонди беше дел од неговиот правен тим за време на неговото прво судење за импичмент во Сенатот, а исто така јавно го поддржа појавувајќи се на суд за време на неговото судење за давање мито во Њујорк.
„Пем беше обвинителка скоро 20 години, беше многу строга кон насилните криминалци и ги направи улиците безбедни за семејствата од Флорида“, рече Трамп во објава на социјалните мрежи сооштувајќи го својот избор.
Бонди е блиска со Трамп од неговата кампања во 2016 година, а пред гласачите на неодамнешниот митинг на Трамп рече дека го смета за „пријател“.
Ким Џонг-Ун ги обвини САД за засилување на тензиите
Севернокорејскиот лидер Ким Џонг Ун ги обвини САД за провокации и засилени тензии, тврдејќи дека Корејскиот полуостров никогаш не се соочил со такви ризици од нуклеарна војна како сега, објави државниот медиум КЦНА.
„Никогаш досега завојуваните страни на Корејскиот полуостров не се соочиле со толку опасен и акутен конфликт што може да ескалира во најразорна термонуклеарна војна“, изјави Ким во говорот на изложбата на оружје во Пјонгјанг.
Тој рече дека од неговото претходно искуство во преговорите со Вашингтон, добил само дополнителна потврда за неговата агресивна и непријателска политика кон Пјонгјанг.
„Во преговорите со САД веќе отидовме колку што можевме, но она во што се уверивме од резултатите не е подготвеноста на суперсилата за соживот, туку нејзината основна позиција на моќ и нејзината агресивна и непријателска политика кон нас, што никогаш не може да се промени“, рече Ким.
За време на првиот мандат на новоизбраниот американски претседател Доналд Трамп, тој и Ким одржаа три средби во Сингапур, Ханој и на корејската граница во 2018 и 2019 година. Но, нивните дипломатски напори не постигнаа конкретен исход поради разликите меѓу американските повици за Северна Кореја да се откаже од своето нуклеарно оружје и барањата на Ким за укинување на санкциите.
Трамп долго време ги промовираше своите односи со Ким, велејќи минатиот месец дека двете земји ќе имаа нуклеарна војна со милиони убиени, но ја прекинаа благодарение на нивните односи.
Севернокорејските државни медиуми сè уште јавно не го спомнаа реизборот на Трамп за претседател на САД.
Последниот говор на Ким доaѓа во време на меѓународна критика за продлабочување на воената соработка меѓу Пјонгјанг и Москва, при што Северна Кореја испрати повеќе од 10 000 војници во Русија за да ја поддржи нејзината војна против Украина.
Зеленски до сојузниците: Путин ве тестира, мора силно да одговорите
Украинскиот претседател Володимир Зеленски изјави дека рускиот напад врз Украина со нов тип балистичка ракета е „јасна и сериозна ескалација“ во војната и повика на силна осуда од меѓународната заедница.
„Ова е јасна и сериозна ескалација на големината и бруталноста на оваа војна“, наведе Зеленски на платформата Х, по нападот на градот Днипро во центарот на земјата.
„Употребата на балистичка ракета против Украина денеска е уште еден доказ дека Русија не е заинтересирана за мир“, рече тој и додаде дека Путин „го тестира светот“, дека тоа е она што го прави и дека само решителна реакција од Западот може да го спречи.
„Светот мора да одговори“, рече тој.
Рускиот претседател Владимир Путин во синоќешното телевизиско обраќање до нацијата рече дека Русија вчера истрелала хиперсонична балистичка ракета со среден дострел врз украински воен објект како одговор на употребата на американски и британски ракети од страна на Киев.
Во коментарите на X, Зеленски рече дека признавањето на Путин за употребата на новото оружје е уште една ескалација во војната, која сега трае повеќе од 1000 дена, по распоредувањето на севернокорејските трупи на руска територија.
„Путин не само што ја продолжува војната, тој им плука во лице на оние во светот кои навистина сакаат да го вратат мирот. Светот мора да одговори. Во моментов нема силна реакција од светот...Недостигот на остри реакции на постапките на Русија испраќа порака дека таквото однесување е прифатливо“, напиша Зеленски.
Рускиот напад доаѓа само неколку дена по извештаите дека Украина користела проектили „Storm Shadow“ испорачувани од Британија и системите ATACMS произведени од САД за да напаѓа воени цели подлабоко во Русија по долго бараното одобрение од претседателот Џо Бајден.
Русија ја почна инвазијата на Украина на 24 февруари 2022 година.
Путин:Русија истрела нова ракета со среден дострел, а не балистичка
Рускиот претседател Владимир Путин изјави дека неговата војска истрелала нова ракета со среден дострел во Украина, по обвинувањата од Киев дека станува збор за интерконтинентална балистичка ракета (ICBM).
Во видео-обраќање кон нацијата денеска (21 ноември), Путин рече дека употребата на новото оружје е одговор на тоа што Соединетите Држави и Обединетото Кралство му дадоа дозвола на Киев да ги истрела нивните ракети со долг дострел кон Русија.
„Во борбени услови беше тестиран еден од најновите руски ракетни системи со среден дострел“, рече Путин, додавајќи дека станува збор за хиперсонична ракета способна да носи нуклеарна боева глава.
Претходно истиот ден, Киев рече дека Русија истрелала нешто што изгледа како ICBM во Украина како дел од масовниот ракетен напад врз Днипропетровск, каде има важни воено-индустриски погони. Ракетите ICBM, кои се дизајнирани да изведуваат нуклеарни удари на долги растојанија, никогаш порано не биле користени во војна.
„Утрото на 21 ноември 2024 година...руските трупи го нападнаа градот Днипро (објекти и критична инфраструктура) со проектили од различен тип. Особено, интерконтинентална балистичка ракета беше лансирана од Астраханската област на Руската Федерација“, се вели во соопштението на украинските воздухопловни сили на Телеграм.
Украинскиот претседател Володимир Зеленски на Телеграм рече дека новото руско оружје ги има „сите карактеристики, како брзина и висина на интерконтинентална балистичка ракета“.
Рускиот напад доаѓа само неколку дена по извештаите дека Украина користела проектили „Storm Shadow“ испорачувани од Британија и системите ATACMS произведени од САД за да напаѓа воени цели подлабоко во Русија по долго бараното одобрение од претседателот Џо Бајден.
Од утре редовен возен ред на ЈСП, Владата ќе позајми нафта за седум дена
Од утре ќе биде нормализиран автобускиот превоз во Град Скопје, а по интервенцијата на Владата, ќе има нафта од државните резерви за следните седум дена. Ова беше најавено на вонредната седница на Советот на Градот Скопје, по кризата во Јавното сообраќајно претпријатие (ЈСП) кое од синоќа остана без нафта.
Градоначалничката Арсовска вели дека кризата во ЈСП не е резултат на несоодветното менаџирање на претпријатието, туку поради тоа што редовната јавна набавка била предмет на управна контрола од страна на Бирото за јавни набавки.
„Доколку не беше оваа јавна набавка поништена, ние денес овој проблем немаше да го имаме“, тврди Арсовска.
Таа посочи дека денеска во рекордно време од Бирото за јавни набавки успеале да добијат одобрение за директна спогодба за да може ЈСП во вакви услови да испреговара и да се снабди со овој енергенс.
„Сè што треба градот Скопје да направи во рок од тие седум дена е да направи постапка за јавна набавка за гориво до Бирото за јавни набавки. Секако Бирото тоа би го одобрило доколку е сè во ред за да нема проблем како што настана овие неколку денови“, изјави советникот од ВМРО-ДПМНЕ, Мартин Стојановски, пред седницата.
Претходно, ЈСП се снабдуваше со гориво од нафтената компанија Пуцко петрол, но оттаму за Телма велат дека немаат повеќе обврска да го прават тоа и дека долгот кон нив достигнал 10 милиони евра. Договорот со оваа компанија беше склучен во 2022 година, и тогаш во јавноста се крена „прашина“ затоа што ЈСП потпиша двегодишен договор со кој требаше да да набави гориво од нив во вредност од 27 милиони евра, по 118 денари за литар, иако цената во мало продажба тогаш изнесуваше по 90 денари за литар.
Вчера и денеска на скопските улици, поради недостигот на нафта, сообраќаа по триесетина автобуси на ЈСП, а граѓаните со часови чекаат автобус.
Ова не е прв пат, скопјани да имаат проблем со јавниот превоз. Во февруари годинава, за прв пат Скопје остана цел ден без јавен превоз, затоа што вработените во ЈСП стапија во штрајк поради неисплатени плати. Претходно во 2022 година неколку дена штрајкуваа и приватните превозници затоа што градот со месеци не им исплаќаше за извршената услуга.
Арсовска стана градоначалничка со поддршка од сега владејачката ВМРО-ДПМНЕ. Оваа партија има има мнозинство во Советот на Град Скопје. Откако им се разидоа патиштата уште во првата година од мандатот на Арсовска поради несогласување за пречистителната станица, сега меѓусебно се обвинуваат кој ги кочи проектите за да се нормализира јавниот превоз во Скопје.
Израел и Хезболах продолжуваат со борби и покрај преговорите
Израел и либански Хезболах разменија смртоносни напади денеска (21 ноември) и покрај знаците за напредок во мировните напори на САД.
Израел изврши воздушни напади врз јужните предградија на Бејрут, а Хезболах лансираше ракети кон северен Израел.
Хезболах, проиранско движење во Либан, САД го сметаат за терористичка организација, додека Европската унија го стави на црната листа само нејзиното вооружено крило, но не и политичката партија која има места во либанскиот парламент.
Американскиот посредник, Амос Хохштајн, беше во Израел за да разговара со израелски официјални претставници за прекин на огнот, за кој за време на посетата на Бејрут претходно оваа недела, рече дека е „на дофат“.
Истакнувајќи дека остануваат разликите во мислењата, висок либански функционер изјави за Ројтерс дека Бејрут бара промени во предлогот на САД за прекин на огнот за да вклучи побрзо повлекување на израелските сили од јужен Либан.
Дипломатските напори се најсериозниот обид досега да се стави крај на конфликтот што се прошири од Појасот Газа.
Три лица загинаа во израелски воздушен напад на југот на Либан во селото Шаитија, на десет километри од границата, соопшти либанското Министерство за здравство.
Во Израел, 30-годишен маж загина од остатоци од ракета што погоди игралиште во северниот град Нахарија, соопшти израелската медицинска служба MDA.
Израелската армија извести дека од Либан кон Нахарија биле истрелани десетина ракети. Повеќето биле пресретнати.
Крајбрежниот град бил погоден од три ракети, јави телевизијата Канал 12.
Телевизиската станица Ал-Манар, која е во сопственост на Хезболах, потврди дека тие истрелале ракети врз Нахарија и неговата околина.
Нападите врз јужните предградија на Бејрут го потресоа градот со најмалку десет силни експлозии.
Од октомври 2023 година, во конфликтот меѓу Израел и Хезболах во Либан загинаа 3.558 луѓе, според податоците на либанското Министерство за здравство. Во вторникот, на 20 ноември, загинаа 14 лица.
Повеќе од 100 луѓе се убиени во нападите на Хезболах врз северен Израел и Голанската висорамнина.
Тоа вклучува повеќе од 70 војници кои ги загубија животите во овие напади и во борбите во јужен Либан, според Израел.
Украинскиот олигарх Фирташ меѓу осумте погодени од санкциите на Велика Британија
Влијателниот украински тајкун Дмитро Фирташ е меѓу осумте луѓе кои се цел на нови британски санкции кои обвинуваат група, во која е вклучена неговата сопруга Лада, за голема меѓународна корупција.
Анголско-руската милијардерка Изабел дос Сантос и летонскиот политичар и бизнисмен Аиварс Лемберг се исто така меѓу погодените од новите санкции објавени денеска (21 ноември).
Британската влада го обвинува Фирташ дека подмитувал функционери за да обезбеди лиценци за рударство за неговите компании и незаконски профитирал од украинскиот систем за транспорт на гас.
Фирташ е поврзан и со финансиерот Денис Хорбуненко, жител на Обединетото Кралство, кој беше додаден на денешниот список со санкции поради неговата поврзаност со Фирташ.
Фирташ се соочи со правна контрола во Украина поради обвиненијата за проневера и перење пари кои вклучуваат измамнички шеми за трговија со гас.
Соединетите Држави бараат негова екстрадиција од Австрија под обвинение за поткупување индиски функционери.
Фирташ, кој доби на влијателност во 2000-тите преку неговото заедничко вложување во компанијата RosUkrEnergo со рускиот енергетски гигант Газпром, ги отфрли обвинувањата дека работи во интерес на Русија.
Дос Сантос, ќерка на поранешниот претседател на Ангола, Хозе Едуардо дос Сантос, е првата жена милијардер во Африка. Таа е обвинета за корупција во Ангола, каде што наводно ги искористила нејзините политички врски за лична корист.
Дос Сантос тврди дека има руско државјанство од раѓање, бидејќи е родена во Баку, Азербејџан, во 1973 година во поранешниот Советски Сојуз.
Лембергс, поранешен популистички градоначалник на летонскиот град Вентспилс, е осуден на пет години затвор во Летонија, за корупција. Тој тврди дека обвиненијата против него се политички мотивирани.
Санкциите се дел од британските напори за борба против меѓународната корупција и нарушување на финансиските мрежи на поединци обвинети за злоупотреба на нивната моќ за лично богатење.
Мерките вклучуваат замрзнување на имотот, забрани за патување и ограничување на овие лица да пристапат до финансискиот систем на Обединетото Кралство или да влезат во земјата.
Вучиќ и Фицо заедно на воена парада во Москва, најави словачкиот премиер
Премиерот на Словачка, Роберт Фицо, денеска (21 ноември) изјави дека заедно со претседателот на Србија, Александар Вучиќ, ќе присуствува на воената парада во Москва по повод Денот на победата над фашизмот, во мај 2025 година.
„Се договоривме заедно да одиме во Москва, бидејќи го делиме истото мислење за тоа како да се бориме против фашизмот и ги почитуваме земјите кои учествуваа во ослободувањето на нашите земји на крајот на Втората светска војна“, рече Фицо во Белград, каде е во официјална посета.
Рускиот претседател Владимир Путин на 18 ноември го покани српскиот претседател Александар Вучиќ да ја посети Москва на 25 мај следната година, кога ќе се одбележи 80-годишнината од победата во Втората светска војна.
Фицо и Вучиќ се сретнаа во палатата „Србија“, по што беше одржан состанок на делегациите на двете земји.
По средбата, двајцата функционери не штедеа комплименти за време на прес-конференцијата.
Фицо рече дека претседателот на Србија е „предмет на ненормална пропаганда“, како и самиот тој, додека Вучиќ за словачкиот државник рече дека тој е „еден од најважните и најголемите светски лидери“.
Словачкиот премиер, познат по контроверзните повици Киев да и отстапи територија на Русија за да се стави крај на војната и противењето на санкциите кон Кремљ, ја осуди одлуката на американската администрација да и дозволи на Украина да користи американски ракети со долг дострел за да погоди цели во Русија.
„Тоа е ескалација на тензиите и доказ дека нема интерес што поскоро да заврши воениот конфликт во Украина. Мислам дека тактиката на Украина да се бори со Русија до последниот човек ќе биде болна за Украина“, рече Фицо.
Српскиот претседател Вучиќ, изјави дека не е изненаден од одговорот на Русија, која денеска (21 ноември) наводно првпат истрелала интерконтинентална балистичка ракета кон Украина.
„Ако некој мисли дека ќе пукате што сакате на територијата на Руската Федерација со оружје на западните земји, а Путин нема да одговори, тогаш или не го познавате или не сте нормални“, рече Вучиќ.
Тој додаде и дека Србија презема мерки кога е во прашање развојот на ситуацијата на украинското бојно поле.
Србија е една од ретките земји во Европа кои не се приклучија на западните санкции против Москва, откако Русија започна воена инвазија на Украина во февруари 2022 година. Сепак, официјален Белград во неколку наврати го осуди нарушувањето на територијалниот интегритет на Украина, но одржува редовни контакти со руските претставници.
Русија изврши голем ракетен напад врз Украина рано денеска, што предизвика штета во најмалку две области, објавија украинските воздухопловни сили и регионалните лидери.
Овој напад, доаѓа само неколку дена по извештаите дека Украина користела британски ракети „Сенка на бурата“ и системите АТАКМС произведени од САД за да нападне воени цели длабоко во Русија по долго бараното одобрение од претседателот Џо Бајден.
Мултимедија
Најпосетени
Што треба да знаете