Достапни линкови

Вести

Кацарска згрозена од изјавата на Стефанова, се обрати до Судскиот совет

Архивска фотографија- Обвинителка Лиле Стефанова како сведок во предметот Рекет во Основниот Суд Скопје 1
Архивска фотографија- Обвинителка Лиле Стефанова како сведок во предметот Рекет во Основниот Суд Скопје 1

Судијката во Основен суд Скопје 1 Добрила Кацарска денеска извести дека се обратила до Судскиот совет во врска со сведочењето на обвинителката Лиле Стефанова во случајот „Рекет“ во кое таа го спомена нејзиното име. Таа во писмото објаснува дека и досега имало напади кои„ стоечки, достоинствено“ ги трпела, но она што го кажала Стефанова било „кулминација“.

„Бев згрозена од ваквата изјава, односно од нејзиното сведочење со оглед да се работи за целосна невистина бидејќи во ниту еден момент не само што нејзе не сум и се јавила, а најмалку пак сум и вршела притисок, туку апсолутно неточно е дека сум и пуштила некој нејзин колега обвинител“, пишува Кацарска.

Во своето сведочење во случајот „Рекет“ обвинителката Стефанова која го води случајот „Империја“ во кој е осомничен бизнисменот Јордан Камчев, рече дека судијката Добрила Кацарска, преку колега вршела притисок да не се одреди мерката притвор на осомничениот Камчев.

Кацарска во денешното писмо вели дека фамилијата Камчеви се нивни фамилијарни пријатели, што го кажала и претходно, а дека тоа не требало да се злоупотребува.

„Имајќи во предвид дека на ваков начин се нарушува мојот углед и достоинство, а воедно се нанесува и штета на функцијата судија, барам од вас како надлежен орган да ги утврдите сите факти и да ги прибавите сите докази за утврдување на фактичката состојба со цел јавноста да ја дознае правата вистина“, наведува Кацарска.

Инаку осомничениот бизнисмен во „Империја“ е сведок во случајот „Рекет“. Според обвинението, Јанева, прво осомничениот Бојан Јовановски- Боки 13 и Зоран Милевски се здружиле за да му земаат пари на Камчев во замена за олеснителни околности во предметот кој тогашното СЈО го водеше за него. Милевски на првото рочиште ја прифати вината и доби три години затворска казна.

види ги сите денешни вести

Париз денеска домаќин на уште еден состанок за Украина

Францускиот претседател Емануел Макрон
Францускиот претседател Емануел Макрон

Францускиот претседател Емануел Макрон соопшти дека денеска организира уште еден состанок со претставници на „неколку европски и неевропски држави“ за Украина. Ова следи по средбата во понеделникот, на која учествуваа мал број клучни земји, како и лидерите на Европската Унија (ЕУ) и НАТО.

Според француски дипломатски извори, меѓу учесниците се шефови на држави и влади од Грција, Финска, Романија, Шведска, Белгија, Чешка, балтичките земји, Норвешка и Канада, а некои лидери ќе се приклучат преку видео врска, вклучително и грчкиот премиер. Се очекува Макрон да се консултира со сите лидери на ЕУ до крајот на неделата.

Во интервју за неколку француски регионални медиуми, Макрон оцени дека американскиот претседател Доналд Трамп може „да иницира корисен дијалог со рускиот претседател Владимир Путин, но истовремено создава стратешка двосмисленост, што му овозможува на Путин да ја искористи неизвесноста за вршење притисок“.

Францускиот претседател истакна дека е подготвен да разговара со Путин „кога ќе биде соодветно време во рамките на идните преговори“.

„Во овој момент, Европа не е способна да ја обезбеди својата одбрана без САД. Денес ова е уште поизразено отколку пред три години. Мораме да го забрзаме процесот и во наредните три до пет години да преземеме конкретни чекори. Главен приоритет на САД е Кина, додека Русија претставува егзистенцијална закана за Европа, изјави Макрон за регионалните медиуми, меѓу кои Депеш (La Dépêche) и Паризијен (Le Parisien).

Тој додаде дека Франција не се подготвува да испрати копнени сили на украинскиот фронт.

Како можност за обезбедување безбедносни гаранции за Киев во рамките на потенцијален мировен договор со Москва, Макрон спомена испраќање воени експерти или ограничен број сили кои би биле надвор од зоните на конфликт, со цел да се зајакне довербата кај украинските власти.

Исто така, откри дека Франција и Велика Британија разгледуваат договор за солидарност со Украина, кој би овозможил испраќање експерти или ограничени контингенти сили. Друга можност што ја спомена е воспоставување мировна мисија под мандат на ОН долж линијата на фронтот.

Стармер ќе се сретне со Трамп следната недела

Британскиот премиер Кир Стармер
Британскиот премиер Кир Стармер

Американскиот претседател Доналд Трамп следната недела ќе го прими британскиот премиер Кир Стармер во Белата куќа, со што тој ќе стане првиот европски лидер кој ќе оствари официјална посета во Вашингтон за време на вториот мандат на Трамп.

Точниот датум сè уште не е објавен од ниту една страна.

„Следната недела премиерот на Обединетото Кралство ќе биде тука во Белата куќа, изјави портпаролката на Белата куќа, Каролина Левит, за „Фокс њуз“.

Овој состанок се одржува во период на високи тензии меѓу Трамп и европските лидери, особено по неговиот телефонски разговор со рускиот претседател Владимир Путин, кого поголемиот дел од Западот го смета за изолиран меѓународен актер.

По разговорот, Трамп го испрати државниот секретар Марко Рубио на средба со рускиот министер за надворешни работи Сергеј Лавров во Саудиска Арабија. Разговорите за Украина повторно се одвиваа без присуство на претставници од Украина или од Европа.

„Обезбедуваме сите страни да бидат слушнати, но мора да се разговара со двете завојувани страни за да се постигне договор и да се реши проблемот. Ова е значаен прв чекор кон мирот“, додаде Левит.

Во меѓувреме, британскиот премиер Стармер во понеделникот учествуваше на вонредните европски разговори во Париз, посветени на ситуацијата во Украина.

Од болница се пуштени 19 повредени во авионската несреќа во Торонто

Торонто - Авион на „Делта ерлајнс“ се преврте при слетувањето на аеродромот Пирсон, 18 февруари 2025 година.
Торонто - Авион на „Делта ерлајнс“ се преврте при слетувањето на аеродромот Пирсон, 18 февруари 2025 година.

Од болница се пуштени 19 од вкупно 21 повредено лице во инцидентот на 18 февруари на меѓународниот аеродром Пирсон во Торонто, Канада, кога авион на „Делта ерлајнс“ се преврте при слетувањето.

Извршниот директор на аеродромот во Торонто рече дека се задржани уште двајца патници, но не кажа детали за нивната состојба.

Повеќето од повредените си заминале со полесни повреди, изјави извршниот директор на аеродромот.

Властите соопштија дека се истражува причината за несреќата. Комуникацијата помеѓу кулата и пилотот била нормална при приближувањето и не е јасно што тргнало наопаку кога авионот се превртел.

Во моментот на пристигнувањето на авионот, на аеродромот Пирсон дувале ветрови со брзина од 51 км на час до 65 км на час, според Метеоролошката служба на Канада.

„Наеднаш сè едноставно тргна настрана и следното нешто што го знам, тоа е вид на трепкање и јас сум сè уште прицврстен наопаку“, изјави патникот Питер Карсон за CBC News.

Канадските власти одржаа две кратки прес-конференции во понеделникот, но дадоа неколку детали. Авионот бил Mitsubishi CRJ-900 направен од канадската компанија „Бомбардиер“.

Сите 80 патници и членови на екипажот во авионот, кој летал од Минеаполис, ја преживеале несреќата, но се уште не е јасно како се превртел авионот. Патниците, кои носеле појаси, останале да висат на седиштата.

Ова беше четврта голема авионска несреќа во Северна Америка во последните недели. Претходно, комерцијален авион и армиски хеликоптер се судрија во близина на Националниот аеродром „Реган“ во Вашингтон, на 29 јануари, при што загинаа 67 луѓе. Медицински транспортен авион се урна во Филаделфија на 31 јануари, при што загинаа шесте лица на бродот и уште едно лице на земја. На 6 февруари, уште 10 луѓе загинаа во авионска несреќа на Алјаска.

Владата го задолжи Министерството за правда да достави предлог за разрешување на Коцевски

Љупчо Коцевски, државен јавен обвинител
Љупчо Коцевски, државен јавен обвинител

Владата на седницата на 18 февруари го задолжи Министерството за правда да достави предлог за разрешување на републичкиот јавен обвинител Љупчо Коцевски пред истекот на неговиот мандат, кое потоа ќе го достави до Советот на јавните обвинители.

„Министерство за правда го достави мислење во кое се нотирани следниве состојби: како прво нарушениот углед на институцијата со која раководи јавниот обвинител, затоа што чувањето на угледот на институцијата е должност која потекнува од Законот за јавно обвинителство. Понатаму, јавноста во изминатиов период беше сведок на низа скандали, нарушена функционалност на ЈО, незаконски постапувања и корупција, неефикасност и повреда на принципите и самостојноста во вршењето на функциите на обвинителите“ рече Марија Митева, портпаролка на Владата.

Претходно, Коцевски изјави дека ќе се произнесе по предлогот за негово разрешување откако Владата ќе го достави до Советот на јавни обвинители. Доколку се утврди дека навистина има тешка дисциплинска повреда, Коцевски сам ќе се повлече од функцијата.

Мандатот на републичкиот обвинител трае шест години, а Коцевски беше избран на оваа позиција пред една година. Владата сака предвреме да биде прекинат мандатот на Коцевски, а причината за тоа е, како што велат оттаму, разочараноста од постапувањето надвор од законските надлежности, посочувајќи дека Коцевски незаконски именувал, вршител на должност на Вишото јавно обвинителство на местото на суспендираниот Мустафа Хајрлухаи.

Републичкиот обвинител Коцевски го демантира тврдењето дека незаконски постапил посочувајќи дека го следел законот и роковите во него.

Вкупно 102 групи производи ќе имаат ограничени маржи

Илустрација
Илустрација

Владата на денешната седница донесе одлука за ограничување на бруто профитната маржа на 102 групи производи или на повеќе од 1.000 прехранбени и непрехранбени производи.

На 5 отсто се ограничува бруто профитната маржа на основните осум прехранбени производи: млеко, леб, брашно тип 400 и 500, јајца, масло за јадење, јогурт и кисело млеко.

На 10 отсто е ограничена маржата на месо и преработки од месо, шеќер, млечни производи, маргарин, путер, конзервиран зеленчук и овошје, грав, ориз и тестенини.

На 15 отсто е ограничена маржата на свежо овошје и зеленчук, детергенти, бебешка храна, пелени, сапун, тоалетна хартија и слично.

Марјан Ристески, заменик-министер за економија и труд, рече дека со оваа одлука се задолжуваат сите трговци на рафт да имаат најмалку 70 отсто од овие 102 групи производи.

Дополнително, донесена е и одлука за утврдување на највисоки цени на осум групи основни прехранбени производи при што како највисока цена се утврдени цените од 1 февруари 2025 година.

„Нашите очекувањата се дека со овие две одлуки цените на основите прехранбени производи ќе се намалат во просек за околу 10 отсто, освен осумте основни прехранбени производи - млеко, леб, брашно тип 400 и 500, јајца, масло за јадење, јогурт и кисело млеко за кои се очекува да останат на исто ниво, односно да не се зголемуваат или да има минимално намалување“, рече Ристески на прес конференција на 18 февруари.

Двете одлуки ќе стапат во сила следниот ден откако ќе бидат објавени во Службен весник и ќе траат до 30 април.

Откако граѓани два пати бојкотираа маркети поради високи цени на храната, Владата го задолжи Министерството за економија и труд да подготви Предлог-одлука за ограничување на бруто профитната маржа на 10 проценти на дел од основните прехранбени производи, средствата за хигиена и бебешката храна.

Ваквата одлука се темелеше на шестмесечниот извештај од Државниот пазарен инспекторат, според кој кај трговците на мало беше утврдено дека има над 20 отсто маржа на основните прехранбени производи и над 30 отсто маржа кај средствата за лична хигиена, додека кај увозниците и дистрибутерите се евидентирани повисоки маржи и до 50 отсто.

Гаши добил заканувачка порака

Северна Македонија - Африм Гаши, претседател на Собранието, Скопје, 28 мај 2024 година.
Северна Македонија - Африм Гаши, претседател на Собранието, Скопје, 28 мај 2024 година.

Претседателот на Собранието, Африм Гаши, на службената електронска пошта добил порака со заканувачка содржина, соопштија од неговиот кабинет. Заканата што Гаши ја добил на електронската пошта е пријавена и во Министерството за внатрешни работи(МВР).

Оттаму за МИА информираат дека во Секторот за компјутерски криминал има пријава за таков случај и по истата соодветно се постапува, без да се посочуваат детали за тоа со каква содржина е заканата.

Медиуми објавија дека претседателот на Собранието добил електронска пошта со заканувачка содржина во врска со уставните измени и внесувањето на Бугарите во Уставот.

Гаши, како што се посочува, оваа порака ја добил по објавеното интервју за „360 степени“ на 17 февруари, каде кажа дека по изборот на нова влада во Бугарија може да се пристапи кон решавање на спорот, но оти не може веднаш да се очекува некој голем успех во разговорите.

Израел го потврди договорот за ослободување шест заложници

Ослободување на заложници кои Хамас ги држи во Појасот Газа, 15 февруари 2025 година.
Ослободување на заложници кои Хамас ги држи во Појасот Газа, 15 февруари 2025 година.

Кабинетот на израелскиот премиер Бенјамин Нетанјаху потврди дека во Каиро е постигнат договор со радикалната палестинска организација Хамас за ослободување на израелските заложници за време на претстојниот викенд, јави агенцијата АП.

Хамас, кого Соединетите Американски Држави(САД) и Европската унија (ЕУ) ја сметаат за терористичка организација, ќе ослободи шест заложници во сабота, на 22 февруари, наместо само тројца како што беше претходно планирано, соопштија од канцеларијата на Нетанјаху.

Четири тела на починати заложници ќе бидат предадени, а потоа уште четири во следните недели, се додава во соопштението.

Шестмината заложници кои ќе бидат ослободени во сабота се последните преостанати живи заложници во заробеништво на Хамас.

Досега беа разменети 19 израелски заложници за ослободување на стотици палестински затвореници.

Предвидено е да бидат вратени уште 14 заложници, од кои шестмина се живи во првата фаза од прекинот на огнот во Газа.

Иран обвини британски брачен пар за шпионажа

Линдзи и Крејг Форман (архивска фотографија)
Линдзи и Крејг Форман (архивска фотографија)

Иран ги обвини британските државјани Крег и Линдзи Форман за шпионажа, објави портпаролот на иранското правосудство на 18 февруари.

Портпаролот Асгар Џахангир рече дека парот „под маската на туристи“ влегле во Иран, „собирајќи разузнавачки информации во неколку провинции во земјата“, објави Радио Фарда, иранскиот сервис на Радио Слободна Европа (РСЕ).

Тој рече дека тие биле уапсени од Разузнавачката организација на Корпусот на Исламската револуционерна гарда (ИРГЦ) во јужната провинција Керман.

Според објавите на Линдзи Форман на социјалните мрежи, парот бил на патување со мотор околу светот. Крајната дестинацијаим била Австралија.

Британски медиуми јавија дека тие на 30 декември влегле во Иран преку Ерменија и имале намера по пет дена да ја напуштат земјата преку пакистанската граница. Тие останале во Табриз, Техеран, Исфахан, но никогаш не се пријавиле во нивниот хотел во Керман.

Ебрахим Хамиди, главниот судија во провинцијата Керман, рече дека „станало јасно“ дека двојката „имала врски со неколку институти поврзани со разузнавачките служби“.

Британското Министерство за надворешни работи не ги коментираше наводите. Но, во моментов ги советува британските граѓани да не патуваат во Иран, наведувајќи „значителен ризик“ од апсење, испрашување или притвор.

Организациите за човекови права го обвинуваат Иран дека води „заложничка дипломатија“ со апсење на странски и двојни државјани како можност за влијание во односите со Западот.

Израелски министер најави преговори за втората фаза од прекинот на огнот во Газа

Појас Газа - Разурнати делови од Џабалија, 11 февруари 2025 година.
Појас Газа - Разурнати делови од Џабалија, 11 февруари 2025 година.

Израел оваа недела ќе почне индиректни разговори со палестинската радикална група Хамас за втората фаза од договорот за прекин на огнот во Појасот Газа и бара целосна демилитаризација на крајбрежната енклава, изјави Гидеон Сар, министер за надворешни работи на Израел.

Преговорите меѓу Израел и Хамас, кого САД и ЕУ го сметаат за терористичка организација, за втората фаза од договорот требаше да почнат на 2 февруари.

Но, Катар, кој посредува заедно со Египет и САД, кажа дека разговорите сè уште не се официјално започнати.

„Тоа ќе се случи оваа недела“, рече Сар на прес-конференција во Ерусалим на 18 февруари.

Од друга страна, вонредниот состанок на Арапската лига за Појасот Газа, првично закажан за следната недела, е одложен за 4 март, соопшти египетското Министерство за надворешни работи.

Египет, како домаќин на состанокот, соопшти дека новиот датум е договорен со членките на Арапската лига како дел од „суштинските и логистички подготовки“ за самитот.

Состанокот беше свикан како одговор на предлогот на американскиот претседател Доналд Трамп да го преземе воено разурнатиот Појас Газа и да ги премести палестинските жители на други локации, вклучувајќи ги Египет и Јордан.

Саудиска Арабија ќе биде домаќин на лидерите на Египет, Јордан, Катар и Обединетите Арапски Емирати за да ги изложат нивните планови за обнова на Газа, а истовремено да се осигураат дека Палестинците ќе останат на нивната земја.

Договорот за прекин на огнот, кој вклучува враќање на 33 израелски заложници во замена за стотици палестински затвореници и притвореници, се одржа и покрај низата проблеми и наводи за прекршувања кои се заканија да го исфрлат од колосек.

Сепак, преговорите за втората фаза се очекува да бидат тешки, бидејќи вклучуваат прашања како што е управувањето со Појасот Газа, за кое се чини дека постои голем јаз меѓу страните.

„Нема да прифатиме континуирано присуство на Хамас или која било друга терористичка организација во Газа“, рече Сар.

Тој додаде дека доколку преговорите бидат конструктивни, Израел ќе остане ангажиран и може да ја продолжи првата фаза од прекинот на огнот, кој треба да трае шест недели.

Досега се вратени 19 израелски заложници во замена за ослободување на стотици палестински затвореници.

Заложниците беа заробени во напад предводен од Хамас врз јужен Израел на 7 октомври 2023 година, во кој според израелските податоци загинаа околу 1.200 луѓе.

Повеќе од 48.000 Палестинци се убиени во следните израелски операции во Појасот Газа, според здравствените власти на територијата под контрола на Хамас.

Украинскиот напад врз рускиот гасовод го намалува извозот на казахстанска нафта

илустрација
илустрација

Украинскиот напад со беспилотно летало врз главниот нафтовод што минува низ јужна Русија би можел да го намали обемот на извозот на нафта за речиси една третина во следните два месеци, соопшти во вторник (18 февруари) руската државна компанија „Транснефт“.

Седум беспилотни летала со експлозив удриле во понеделникот во пумпна станица на конзорциумот на Каспискиот нафтовод, кој транспортира казахстанска нафта низ јужна Русија за извоз преку Црното Море, вклучително и во Западна Европа.

„Последиците од овој напад ќе бидат елиминирани во рок од месец и пол до два месеци, што може да доведе до пад од 30 отсто на количината на нафта испумпана од Казахстан“, соопшти Транснефт.

Гасоводот долг 1500 километри е во сопственост на конзорциум кој ги вклучува руската и казахстанската влада, како и западните енергетски компании Шеврон, Ексон Мобил и Шел.

Околу 80 отсто од извозот на сурова нафта на Казахстан и околу еден отсто од вкупната глобална понуда минуваат низ него. Три четвртини од 63 милиони тони што поминаа низ гасоводот минатата година беа испумпувани од западни енергетски компании, соопшти во вторникот Транснефт.

На прашањето на АФП како ќе ја пренасочи нафтата и какво влијание може да има врз економијата на Казахстан, Министерството за енергетика на земјата рече дека „во моментов ги утврдува сите детали за ова прашање“.

Казахстан, кој во голема мера се потпира на руската инфраструктура, ги засили напорите да ги диверзифицира своите патишта за извоз на енергија во времето на руската инвазија на Украина.

Киев ја напаѓа руската енергетска инфраструктура за време на тригодишниот конфликт, сакајќи да ги погоди локациите за кои вели дека ја снабдувааат со гориво руската војска или обезбедуваат ресурси за поддршка на нејзината инвазија.

Вчитај повеќе

XS
SM
MD
LG