Од грчката полиција преку соопштение наведуваат дека на протестот во центарот на Атина присуствувале 140 илјади граѓани, а од цела Грција дошле со 283 автобуси. Оваа бројка е помала од најавите и повиците да се соберат милион граѓани на долго најавуваниот и подготвуван протест во Атина, јавува МИА.
„Солун кажа, на ред е Атина да извика: Македонија е една и грчка“, порачаа организаторите на протестот во видео повикот, објавен на социјалните мрежи.
Паролите што ги извикуваа се истите каи беа слушнати и на протестот во Солун, каде се порачуваше дека Македонија е грчка, додека пак според аналитичарите и новинарите во Грција, протестот, добивал и антивладин карактер.
„Ципрас и Каменос ја распродаваат Македонија“, пишува на плакатот што го носат неколку млади Грци, додека пак „Македонија е грчка“ е најчестиот слоган на плакатите на Грците.
Во центарот на Атина, меѓу граѓаните беа и поранешниот грчки премиер Андонис Самарас, пратеници од опозициската Нова демократија, префектот на областа Централна Македонија, како и лидерот на партијата Сојуз на централисти.
На присутните им се обрати познатиот грчки композитор Микис Теодоракис, митрополит од ГПЦ и претставници на организаторите.
Паралелно со протестот на плоштадот Синтагма, на оддалеченост од само 800 метри имаше контра протест на левичарски и анархистички здруженија.
Демонстрантите и покрај обидите на полицијата, се судрија во центарот на Атина за време на големиот протест на плоштадот Синтагма против користењето на името „Македонија“ од страна на нашата држава, јавуваат грчките медиуми.
Според извештаите, полицијата користела солзавец за да ги раздвои групите демонстранти.
