Што да се каже или што да се одбере од стотиците постови на Фејсбук страницата на РСЕ што веќе не е кажано и што веќе не се гледа и од небо, што би рекле повозрасните наши. Изблик на национализам од двете страни, да се праша човек тлеела ли таа етничка нетрпеливост или се нахрани од актуелната политичка ситуација и од постапките на партиските челници. Македонците се чувствуваат загрозени, Албанците исто така. Каде е разумот? Дали некој размислува каков ќе биде крајниот резултат за сите во Република Македонија од „ѕвечкањето“, не со оружје туку со подбуцнувачките изјави и спинови по медиумите. Да се каже вистината, ќе се најде по некој коментар напишан со студена глава, како оној на Билјана Бици Величкова, по ората и музиките во Паркот „Жена борец“ на дел од учесниците на хепенингот „За заедничка Македонија“:
„И после Грујо бил крив, Заев бил крив... О,о Господе боже... просветли го овој народ...“
Даниел Јошески ѝ порачува да го преведе напишаното на албански (професионалноста не ни дозволува да цитираме недолични изрази), а Билјана му одговара: „Со задоволство ќе го преведам, бидејќи човек колку јазици знае толку повеќе вреди...“ Сузана Карапанчева, очигледно поттикната од орото на мажи и жени со бели коси, потсетува на илјадниците млади што си заминаа од Македонија и вели:
„Сета младина што избега оти нема живот за нив тука ич не ви е гајле“. Гордана Наумовска за протестите на граѓанската иницијатива „За заедничка Македонија“ извикува: „За Македонија напред... една ни е и најмила!“, а Тони Пешевски коментирал: „Бранат диктатура и криминалци“.
Марија Павлеска, активистка, во младинската он-лајн колумна на РСЕ, под наслов: „Двојазична инфлација“ реагира на актуелните политички и економски состојби меѓу студентската популација:
„Избиравме пратеници за да комуницираат со рајата преку ФБ статуси додека седат дома во пиџами?“, на што Торбеш од Лабуништа постирал: „Нека биде ако сака и 150- јазично само народот да е весел, а не како сега“.
Има и коментари на реакциите на руското МНР по недавањето на мандатот на Заев од страна на Ѓорѓе Иванов. Гордана Илче Стојковски напишала: „Тешко на оној што го брани Русија. Од цела Србија само синот и жената на Милошевиќ ги одбранија зашто им однесоа милијарди украдени од српскиот народ“.
