Благојче Котевски, советник од НСДП, од советничката говорница во Битола покажа фотографии со непрописно паркирани возила, иако во градот околу една година постојат зонски паркиралишта. Тој јавно го запраша битолскиот градоначалник Владимир Талески дали се тоа неговиот приватен и службен автомобил?
Дали се сите еднакви пред законот или е некој над законот?Благојче Котевски, советник од НСДП во Советот на Општина Битола.
„Дали е ова неговото приватно возило паркирано несоодветно? Дали е ова Талески кој влегува во несоодветно паркирано возило? Дали ова е службеното возило на градоначалникот исто така паркирано непрописно? Дали се сите еднакви пред законот или е некој над законот? И дали со неговото однесување не мисли дека дава пример на граѓаните на општината?“, праша Котевски.
Талески рече дека опозицијата наместо да се занимава со сериозни работи, времето го троши следејќи ги приватните активности на функционерите.
Ако не било соодветно ќе платам казна како секој граѓанин.Владимир Талески, градоначалник на Битола.
„Просто не можам да верувам со што се занимавате. Дали е моето возило е моја работа, а не ваша, каде сум паркирал е моја работа, ако не било соодветно ќе платам казна како секој граѓанин. Ако возачот се паркирал непрописно ќе биде казнет. Доколку имате забелешки слободно сте можеле да го пријавите возилото ако било непрописно паркирано, а не да им го злоупотребувате времето на Советот, медиумите и граѓаните со вашата потполна заблуда“, возврати Талески.
Тој додаде дека не е првпат опозиционери да го фотографираат.
„Можеби имате и други фотографии кои веројатно ќе ги покажувате како пред неколку години, кога добив цел комплет фотографии каде сум одел, со кого сум разговарал. Имаше еден куп пријавувања. Ете со тоа се занимавате“, возврати Талески.
