Македонија надвор од играта на овој Самит, но тоа не е крај

Господине Ховит, кој е одговорен за тоа што Македонија не е на агендата на ЕУ?

Нема да навлезам во тоа да обвинувам. Тоа е погрешниот начин за да се коментира случајот на земјата и сите треба да ја испитаме својата одговорност. Формално, ирското претседателство ја формира агендата, но вистината е дека земјите членки не можеа да обезбедат консензус да дојдат до позитивна одлука во оваа фаза. И се разбира мора луѓето кои дејствуваат во земјата да ја преземат сопствената одговорност. Само заедно можеме да се движиме напред.

Дали Грција и спорот за името се главниот проблем или има и други причини зошто Македонија не е на агендата?

Мислам дека не помага да се каже дека само спорот со името е проблем или не, кога вистината е дека е покомплицирано од тоа. Спорот за името треба да биде решен и континуирано се врши притисок врз двете страни да постигнат фер договор. Но доколку некој во земјата говори и се обидува да ја обвини Грција и спорот за името, ќе го стави во сенка прогресот кој треба да се направи во земјата кој е неуспешен поради настаните од 24 декември и сè што следеше по нив. И мојата порака до сите во земјата е дека го разбирам нивното разочарување и дека ќе го пренесам тоа разочарување во Брисел. Барам од сите да останат трпеливи и да не даваат негативни и потенцијално провокативни коментари во однос на одлуката оваа недела и да ја фокусираат нивната енергија и одлучност да го исполнат договорот од 1 март и да го направат она што може и што треба да се направи во земјата за таа да се движи напред.

Факт е дека Македонија не е на агендата, што мислите како тоа ќе влијае врз евроскептицизмот во земјава?

Државата останува да биде една од земјите кои сакаат да пристапат во Унијата со голема поддршка. Јас немав сомнеж дека оваа недела ќе биде големо разочарување и дека ќе биде искушение за некои локални политичари да го премостат. Мојот апел до политичарите и креаторите на јавното мислење во земјата е да покажат вистинско лидерство и да ја одржат перспективата на земјата и нејзината европска иднина со отворен ум бидејќи ова не е крај на играта. Останува долг пат да се изоди и важно е ние да се обидеме да градиме врз напредокот кој е направен и луѓето и земјата да не нè спречуваат во тоа.

Може ли да направите мала паралела меѓу ситуацијата на Македонија со Грција и состојбата на Србија и Косово? Македонија останува последна на Балканот што не се придвижи напред. Што може да очекуваме од ЕУ во блиска иднина?

Во однос на одлуките на кои што се надеваат Србија и Турција, ќе се знаат неделава и невозможно е во процесот на проширувањето на ЕУ да се спореди случајот на една земја со друга. Секоја треба да се мери според своите заслуги. Јас можам да кажам дека случајот на оваа земја не треба да се прескокне или заборави како и сите другите земји во регионот. Србија и Турција се надеваат дека ќе напредуваат на крајот на годинава и јас се надевам дека тој напредок ќе стане вистина и за Македонија.