Превирањата во ИВЗ продолжуваат

Меџитлисот на џематот при Муфтиството на исламската верска заедница во Скопје испрати предупредување до разрешениот оџа Рамадан Рамадани да стои што подалеку од Иса-бег џамијата, затоа што тој од неговото суспендирање не е веќе верски службеник. Му порачуваме да не го манипулира џематот и верниците, да не се повикува во име на џематот на Скопје, затоа што џамиите се места за молитва, а не места преку кои тој се обидува да инсталира политички и вахабистички движења, вели верскот службеник Невзат Амети.

„Лица како Рамадан Рамадани сакаат да го искоренат традиционалниот ислам. Овие вахабистички струи имаат за намера од нашите огништа да ја искоренат секоја трага на нашиот идентитет, јазик, на нашата култура и традиција.“

Џематот Касам Шабани од Исабеговата џамија вели дека Рамадани со неговата вахабистичка група го протерал од џамијата, бидејќи не бил негов истомисленик.

„Него местото му е во Авганистан, нека си се врати таму, нема што да бара тука.“


Рамадани, пак, ги негира обвинувањата:

„Нема никаква вистина во тоа, нашата џамија е отворена. Нема ниту еден единствен таков случај и треба да престанат со такви инсинуации и лаги и ова е симбол на нивниот крај.“

Тој продолжува со собирање на потписи за петиција за смена на поглаварот на ИВЗ, Сулејман Реџепи.

„Ова не е работа само на Рамадан Рамадани, или само на некои верници, ова е широка коалиција од оџи и високи верски службеници внатре во ИВЗ кои не се задоволни од ваквото нелегитимно претставување на актуелниот поглавар.“

Рамадани вели ваквите случувања негативно се одразуваат вра верниците пред празникот Рамазан, но само со смена на Реџепи, според него, ќе престанат неволјите за муслиманите во Македонија. Пред еден месец, приврзаниците на Рамадани на петочната молитва го истуркаа скопскиот муфтија од местото за оџата и се степаа со поранешниот пратеник Ештреф Алиу.