Откажана трката на Формула 1 во Сочи, финалето на Лигата на шампиони преселено од Санкт Петерсбург во Париз
Формула 1 ја откажа својата трка во Русија, а финалето на фудбалската Лига на шампиони, наместо во Санкт Петерсбург ќе се игра во Париз поради руската инвазија на Украина.
Меѓународниот олимписки комитет (МОК) претходно соопшти дека меѓународните спортски федерации треба или да ги преместат или да ги откажат спортските настани планирани за во Русија и Белорусија.
Претходно, Европската фудбалска федерација УЕФА одлучи да го премести финалето на Лигата на шампиони од Санкт Петерсбург во Париз.
Руски воен брод погодил брод што пловел под молдавско знаме во Црното Море
Командантот на вооружените сили на Украина Валериј Залужниј соопшти дека брод што пловел под молдавско знаме бил погоден од проектил истрелан од руски воен брод во Црното Море, додека руските вооружени сили продолжуваат со својот напад врз Украина.
Советот на Европа ја суспендираше Русија поради инвазијата во Украина
Советот на Европа соопшти дека ги суспендира сите претставници на Русија од учеството во паневропското правно тело поради инвазијата на Москва против Украина.
Постојаните претставници на нејзините 47 земји-членки „се согласија да ја суспендираат Руската Федерација од нејзините права на претставување во Советот на Европа“, повикувајќи се на членот 8 од статутот, се наведува во соопштението.
Руските сили во предградијата на Киев, Украинците спремни за одбрана
Киев денеска се спрема за непосреден руски напад, откако напаѓачките сили стигнаа до периферијата на главниот град на Украина. Украинското Министерство за одбрана им порача на жителите да прават молотови коктели за да ѝ помогнат на армијата да ги „неутрализира“ руските напаѓачи.