НАТО за утре закажа состанок во Брисел за украинско-руската криза
НАТО за утре закажа состанок на лидерите на земјите членки во Брисел за да ги разгледа наредните чекори по руската инвазија врз Украина, информираат дипломати.
Засега не е познато кои лидери ќе учествуваат на состанокот.
Северна Македонија се приклучува кон санкциите на ЕУ против Русија
Македонската Влада на денешна седница ја разгледа и усвои Информацијата за новиот пакет рестриктивни мерки на Европската унија во однос на ситуацијата во Украина, а дадена е препорака Северна Македонија да се придружи кон сите одлуки на ЕУ за овој вид рестриктивни мерки, соопшти владината прес-служба.
Две македонски семејства побарале помош во Амбасадата во Киев
Министерот за надворешни работи Бујар Османи информира дека се следи состојбата во Украина и дека нашата Амбасада е во контакт со македонските граѓани кои се наоѓаат во земјата, со цел да им се помогне да ја напуштат.
Тој информира дека две семејства денеска се обратиле во нашата Амбасада во Киев коишто бараат одредени документи со цел да ја напуштат земјата. Османи порачува дека нашите дипломати се таму и ќе најдат начин да им се помогне сè додека имаат можност, а потоа ќе донесеме евентуално и одлука за евакуација на нашите дипломати од Амбасадата.
Зеленски - Украина претрпе „сериозни загуби“ по руските воздушни напади
Украинскиот претседател Володимир Зеленски ѝ кажа на својата нација дека Украина претрпела „сериозни загуби“ во почетните фази од долго стравуваниот руски напад на почетокот на 24 февруари, а негов советник рече дека во нападите биле убиени најмалку 40 луѓе.
Зеленски, исто така, рече дека ги прекинува дипломатските односи со Москва и ги повика Русите „кои не ја изгубиле честа“ да протестираат против постапките на нивната влада.