Собраниската Комисија за прашања на изборите и именувањата денеска, во рамки на третата седница, со 10 гласови „за“ и еден „против“ ги поддржа барањата на Бојан Маричиќ, Јетон Шаќири и Наим Бајрами да добиваат апанажа по престанок на нивниот работен однос.

Одлука дали ќе побараат апанажа се уште не донеле Фатмир Бесими, Кренар Лога и Крешник Бектеши.

Екс министрите за политички систем и за надворешни работи , Артан Груби и Бујар Османи од ДУИ се враќаат на своите поранешни работни места. Груби на тетовскиот универзитет ќе предава новинарство, додека Османи се враќа во медицината.

Никој од членовите на Комисијата не побара збор, поради што точката беше веднаш ставена на гласање и усвоена.

Видете и ова:

Уште седум поранешни пратеници добија апанажа

Претседателот на Комисијата Ѓорѓија Сајковски, пред да ја затвори седницата, соопшти дека ги потпишал решенијата за плата на пратениците на кои Собранието им го верификуваше мандатот.

Потпишани се, рече, и решенијата за неспоивост на функцијата пратеник со функцијата претседател на Владата или министер, решенијата за престанок на право на плата по престанок на функцијата пратеник на Игор Јанушев, Христијан Мицкоски и на избраните министри, како и решенијата за плати на замениците на претседателот на Владата, Изет Меџити, Александар Николовски, Љупчо Димовски, Иван Стоиљковиќ и Арбен Фетаи.

Судот во Осло осуди маж роден во Итан, Норвешка за убиство и тероризам за смртоносно пукање во геј бар во 2022 година за време на парада на гордоста.

Две лица загинаа, девет се здобија со прострелни рани, а 25 се повредени во напад во лондонскиот паб, собирно место на поддржувачите на ЛГБТК+ во Осло, како и во блиското кафуле во централниот дел на норвешката престолнина.

Полицијата го опиша 45-годишниот Заниар Матапур, норвешки државјанин роден во Иран, како радикализиран исламист со историја на ментална болест.

Тој ќе одлежи 30 години затвор, која би можела да биде продолжена на неодредено време доколку се оцени дека е закана за општеството. Казната е најдолга можна според норвешкиот закон и е во согласност со она што беше побарано од обвинителството.

Видете и ова:

Осло тагува по жртвите од „исламистичкиот“ напад

„Судот смета дека дејствијата се толку сериозни што треба да се примени највисока казна“, се вели во пресудата.

На осудениот му е наложено да им исплати отштета во износ од околу 10,6 милиони долари на преживеаните и семејствата на жртвите.

Се уште не е познато дали Матапур ќе поднесе жалба. Неговиот адвокат Мариус Ритрихсон рече дека морал да ја помине пресудата со својот клиент.

„Мојот совет е да размислите за жалба на пресудата“, изјави тој за Ројтерс.

Изрекувањето на пресудата доаѓа само неколку дена по овогодинешната парада на гордоста во Осло, на која се оддаде почит на жртвите од пукањето.

Се проценува дека на овогодинешната парада учествувале околу 70.000 луѓе.

Девет месеци по започнувањето на својата истрага по службена должност за субвенционирањето на производството на електрични возила во Кина, Европската комисија денеска донесе одлука за воведување „привремени компензациски царини“ за увоз на кинески електромобили.

Ваквата одлука е донесена врз основа на заклучокот од истрагата дека производството на електрични возила во Кина е поддржано од нефер субвенционирање, што претставува закана за нанесување економски штети на производителите на електромобили во ЕУ.

При носењето на одлуката се водело сметка и за веројатните последици и влијанието на кинеските мерки врз увозниците, корисниците и потрошувачите на електрични возила во ЕУ.

Согласно оваа одлука, за возилата на компанијата Би-Вај-Ди (BYD) е предвидена компензациска царина од 17,4 отсто, за оние на „Џили“ („Geely“) од 19,9, а за електромобилите на САИЦ од 37,6 проценти. За останатите кинески производители на електрични возила што соработувале во истрагата се воведува царина од 20,8 отсто, а за оние кои не соработувале со истражителите на ЕУ – од 37,6 проценти.

Видете и ова:

ЕУ ќе ги објави царините за кинеските електрични возила

Примената на овие привремени царини ќе почне од утре и ќе трае максимално четири месеци, во кој период мора да биде донесена конечна одлука од земјите членки на ЕУ за дефинитивната висина на царината за кинеските електромобили, што ќе важи за период од пет години.

Комисијата информира дека и покрај одлуката, консултациите со кинеската Влада за ова прашење продолжуваат, со нивното интензивирање последните недели по средбата меѓу извршниот потпретседател на ЕК за економија во полза на луѓето Валдис Домбровскис и кинескиот министер за трговија Ванг Вентао.

„Контактите продолжуваат на техничко ниво со цел да се постигне решение во согласност со правилата на Светската трговска организација (СТО), кое адекватно ќе ги земе предвид грижите покренати од Европската Унија. Секој преговарачки исход мора да биде ефикасен во справувањето со идентификуваните штетни форми на субвенционирање“, информира Европската комисија.

Комисијата официјално ја започна истрага за субвенционирање на производството на електрични возила во Кина на 4 октомври 2023 година и има рок од 13 месеци за нејзино завршување.

Во Франција в недела (7 јули) ќе бидат распоредени 30 000 полицајци и жандарми, за време на вториот круг од парламентарните избори, од кои 5000 ќе бидат во Париз, поради опасност од немири, изјави министерот за внатрешни работи Жералд Дарманен.

Дарманен рече дека стравува дека на денот на изборите, „ултралевите“ или „ултрадесничарите“ би можеле да создадат „нереди“.

Распоредувањето на „исклучително голем број“ полицајци треба да ја спречи силата „да ги искористи предностите од (изборните) резултати за да создаде неред“, изјави Дарманен.

Видете и ова:

Сè што треба да знаете за изборите во Франција

Француската крајнодесничарска партија Национален собир, предводена од Марин Ле Пен, обезбеди јасна победа во првиот круг од парламентарните избори во таа земја. Доколку партијата освои апсолутно мнозинство во вториот круг од 7 јули, за прв пат по Втората светска војна, Франција ќе има екстремно десничарска влада.

Овој резултат означува уште еден голем неуспех за францускиот претседател Емануел Макрон, кој го распушти парламентот и повика на предвремени избори во обид да го запре напредокот на екстремната десница по рекордните гласови на Национален собир на изборите за Европскиот парламент кои се одржаа од 6 до 9 јуни.

Србија не се усогласи со последниот пакет санкции на Европската Унија против Русија како одговор на агресијата врз Украина.

Тоа е четиринаесеттиот пакет санкции, усвоен на 24 јуни, што Европската Унија го воведе од почетокот на војната во Украина.

Шефот на европската дипломатија, Жозеп Борел, го објави списокот на таканаречените трети земји кои ја испочитувале најновата одлука на Брисел, во која се вклучени сите останати земји од Западен Балкан.

На оваа одлука на Советот на ЕУ се приклучуваат и Северна Македонија, Црна Гора, Албанија, Украина и Босна и Херцеговина, како и Исланд и Лихтенштајн, членки на Европската економска зона, објави Борел.

„Тие ќе се погрижат нивните национални политики да бидат во согласност со оваа одлука на Советот. Европската Унија ја забележува оваа посветеност и ја поздравува“, се вели во соопштението.

Видете и ова:

Советот на ЕУ го усвои 14-тиот пакет санкции против Русија

Србија не ги почитуваше ниту рестриктивните мерки како одговор на нелегалната анексија на Крим и Севастопол, кои беа усвоени на ниво на ЕУ на 17 јуни. Не ги почитуваше ниту санкциите против Северна Кореја.

Се работи за одлуката на Европската Унија од 31 мај со која се додаваат уште шест имиња на списокот со санкции на лица или субјекти кои се сметаат за одговорни за програмите на Северна Кореја поврзани со нуклеарно оружје, балистички проектили или друго оружје за масовно уништување, или лица или субјекти кои дејствуваат во нивно име или по нивен налог или субјекти во нивна сопственост или контролира.

Видете и ова:

ЕУ со нови санкции го таргетира рускиот гасен сектор

Од почетокот на војната во Украина, Србија не воведе никакви санкции против Русија. Заедно со Црна Гора, Србија важи за лидер во евроинтеграцискиот процес. Сепак, пристапните преговори се замрзнати поради одбивањето на официјален Белград да ги почитува рестриктивните мерки на Брисел против Москва.

Европската Унија очекува земјите кандидати да ги усогласат своите политики со политиките на ЕУ. Во моментот на пристапувањето, усогласувањето со надворешната политика треба да биде завршено.

Премиерот Христијан Мицкоски вели дека е подготвен да разговара со експерти, но и со амбасадорите за најавената реформа поврзана со Судскиот совет и со Советот на јавни обвинители. Неговата изјава селедува откако дел од амбасадорите вчера искажаа забелешки за најавата за нивно распуштање.

„Подготвен сум цел ден да седнеме, да разговараме, да работиме додека не најдеме решение како да биде подобро, само да не биде како досега. Затоа што како што е досега, не е добро“, рече Мицкоски во изјава за медиумите дадена при денешната посета на Гевгелија.

Зборувајќи за вчерашните изјави на дел од амбасадорите, Мицкоски рече дека ја слушнал таа изјава, но и дека за политиките на оваа коалиција гласале 600.000 граѓани.

„Некако стана пракса амбасадорите да се мешаат во внатрешните работи во државата. Во ред, и да е така, 600.000 граѓани гласаа за оваа коалиција. Очигледно тоа за нив не значи ништо и за политиките на оваа Влада. Истовремено тие велат дека е катастрофална состојбата со владеењето на правото, во нивните извештаи велат дека цвета криминалот и корупцијата, довербата во Судскиот совет и во Советот на јавни обвинители е на два-три проценти кај граѓаните, рече Мицкоски.

Видете и ова:

Агелер: Судски совет треба да ги казнува оние кои мислат дека се над законот

Премиерот додаде дека е подготвен да разговара со нив и доколку тоа решение е подобро, веднаш ќе го прифати и примени.

„Видете кои се членови на Судскиот совет и се ви е јасно. Сите бевме сведоци на сите оние драмолетки коишто се случуваа изминатиов период, а поврзани со Судскиот совет, со Советот на јавните обвинители“, рече Мицкоски.

Инаку евроамбасадорот Дејвид Гир на вчерашната конференција за напредокот во спроведувањето на препораките од Оценската мисија на ЕУ од страна на Судскиот совет, изјави дека најавеното распуштање на Судскиот совет и Советот на јавни обвинители е дикретно мешање во независноста на судската власт.

Американската амбасадорка Анџела Агелер смета дека Судскиот совет треба да ги казнува оние коишто се сметаат над законот, а холандскиот амбасадор Дирк Јан Коп повтори дека довербата на македонските граѓани во правосудството е алармантно ниска.

Основното јавно обвинителство Скопје до Основниот кривичен суд Скопје денеска достави Обвинителен предлог против 31-годишен жител на селото Грчец за кривично дело Загрозување на сигурноста од член 144 став 5 во врска со став 4, како и ставовите 1 и 2 од Кривичниот законик.

„Обвинетиот по пат на информатички систем сериозно и се заканувал на една оштетена дека кон неа ќе изврши кривично дело за кое е пропишана казна затвор од пет години или потешка казна. Заканите ги упатувал поради нејзиниот општествен статус како новинарка, а во врска со вршењето на нејзините професионални задачи кои ги презела во рамките на своите овластувања“, се вели во соопштението од ОЈО.

Видете и ова:

Затвор за напаѓачите на новинари

Со намера да ја вознемири и исплаши, тој упатувал заканувачки пораки кон новинарката преку лажен профил на една социјална мрежа, барајќи од неа да избрише текст што го напишала и објавила, со што кај оштетената предизвикал чувство на загрозување, несигурност и страв.

Од ОЈО додаваат дека по издадени наредби на јавен обвинител, МВР го идентификувал сторителот на кривичното дело, за кое согласно Кривичниот законик е запретена затворска казна од една до пет години.

Со ова, од вкупно пет регистрирани напади врз новинари и медиумски работници во текот на 2023 година за кои алармираше Здружението на новинари на Македонија, во три случаи сторителот е идентификуван и е поведена постапка. Од нив, во два предмети, врз основа на поднесените обвиненија, веќе е изречена и пресуда против сторителите на кривичното дело.

Либанската група Хезболах во четврток (4 јули) соопшти дека лансирала повеќе од 200 ракети врз неколку воени бази во Израел како одмазда за нападот во кој загина еден од нејзините највисоки команданти.

Нападот на милитантната група поддржана од Иран е еден од најголемите во последните неколку месеци долж границата меѓу Либан и Израел, каде во последните недели тензиите се зголемија.

Израелската војска соопшти дека погодила цели во јужен Либан додека Хезболах лансирала ракети и беспилотни летала кон Израел.

Израелските сили „напаѓаат пунктови за лансирање на југот на Либан“, се наведува во соопштението на армијата, во кое се додава дека „бројни проектили и сомнителни воздушни цели преминале од Либан на територијата на Израел“.

Израелската армија соопшти дека повеќето од проектилите биле пресретнати и дека „избувнале пожари во многу области на северот на Израел“.

Израелската војска во средата соопшти дека еден ден претходно го убила Мохамед Нааме Насер, кој бил шеф на една од трите регионални дивизии на Хезболах во јужен Либан.

Видете и ова:

Во израелски напад убиен висок командант на Хезболах во Либан

Неколку часа подоцна, Хезболах лансираше голем број ракети со тешки боеви глави во северен Израел и окупираната сириска Голанска Висорамнина. Во четвртокот лансираше повеќе ракети.

Соединетите Држави и Франција продолжуваат да работат за да спречат конфликтот да ескалира во сеопфатна војна, за која стравуваат дека може да се прелее во арапскиот свет.

Конфликтот на релативно ниско ниво избувна веднаш по избувнувањето на војната во Газа. Хезболах вели дека врши напади врз Израел во знак на солидарност со Хамас, кој САД и ЕУ ја сметаат за терористичка организација и чиј напад врз јужен Израел на 7 октомври предизвика нова војна во Појасот Газа.

Во борбите се раселени десетици илјади луѓе од двете страни на границата. На северот на Израел загинале 16 војници и 11 цивили. Во Либан загинале повеќе од 450 луѓе, главно борци, но и десетици цивили.

Белорусија стана членка на Шангајската организација за соработка (ШОС), а одлуката беше официјализирана на состанокот на Самитот на шефови на држави на ШОС во Астана.

Белорускиот претседател Александар Лукашенко во Астана изјави дека Минск ќе вложи максимални напори за зголемување на нејзиниот авторитет и бројот на сојузници на организацијата и забележа дека многу белоруски идеи презентирани претходно веќе добија меѓународна поддршка.

„Тоа се однесува на трансфер на технологија, безбедност на информации, транспорт и логистика, индустрија, трговија и инвестиции“, објасни белорускиот претседател.

Зборувајќи за безбедноста на храната, Лукашенко истакна дека предизвиците во таа област не доаѓаат само од традиционалните фактори, како што се природните катастрофи, туку и од „вештачките бариери“, вклучително и незаконските санкции за минералните ѓубрива, опремата, патиштата за снабдување.

Видете и ова:

Средба на Путин и Си на безбедносниот самит во Казахстан

„Имаме моќ да ги храниме луѓето, елиминирајќи многу противречности и конфликти поради социјалната нееднаквост, недостатокот на храна и ресурси. Ова (ШОС) е исто така взаемно збогатување на културите, што ќе доведе до неизбежно зближување на луѓето“, истакна Лукашенко.

Состанокот на Советот на членките на ШОС почна со церемонијата на потпишување на важни документи, а неколку минути подоцна претседателот на Казахстан Касим-Жомарт Токаев го објави приемот на Минск во ШОС.

Одржувањето на магистралните и регионалните патишта е во опасност поради сериозните финансиски предизвици на Јавното претпријатие, покажува конечниот ревизорски извештај на „Јавното претпријатие за одржување и заштита на магистрални и регионални патишта“ што денеска (4 јули) го објави Државниот завод за ревизија, по извршената ревизија на финансиските извештаи заедно со ревизија на усогласеност на ЈП за одржување и заштита на магистрални и регионални патишта – Скопје, за 2022 година.

Во извештајот се наведува дека ЈП за одржување и заштита на магистрални и регионални патишта, 12 години континуирано работи со блокирана сметка и основната дејност ја извршува во рамки на месечните лимити, што има клучно влијание на квалитетот и континуитетот на извршување на дејноста

„ЈП за одржување и заштита на магистрални и регионални патишта, 12 години, односно од 2012 година до денот на известување за спроведената ревизија, јавната дејност која е од суштинско значење за јавниот интерес и безбедноста на граѓаните, ја врши со сметка која е блокирана поради извршни решенија за наплата на неподмирени обврски. Согласно податоците од носителот на платниот промет, на крајот на 2022 година сметката на ЈП е блокирана за обврски во вкупен износ од 663 милиони денари“, соопштија од ДЗР.

Видете и ова:

Автопатите на „Бехтел и Енка“ заглавуваат и во судови

Во извештајот е констатирано дека ЈП низ годините има тренд на зголемување на обврските кон добавувачи во земјата како резултат на зголемена активност во делот на одржување и заштита на државни патишта, односно поради изградба на нови делници, зголемени трошоци за набавка на нафта и нафтени деривати, како и растот на цените на стоките и услугите.

Обврските кон добавувачи во 2018 година се во вкупен износ од околу 480 милиони денари, додека во 2022 година бележат зголемување и изнесуваат 966 милиони денари. Исто така тренд на зголемување бележат и обврските по извршни решенија кои во 2018 година изнесуваат околу 324 милиони денари, додека во 2022 година нивниот износ е над 467 милиони денари.

Видете и ова:

Километар пруга до Бугарија може да чини 24 милиони евра

Во извештајот, меѓудругото е констатирано дека одговорното лице во претпријатието не ги осигурало градежните објекти и средствата со кои располага, во вредност од приближно 2 милијарди денари, односно 32,4 милиони евра, а кои се изложени на ризици.

Со извршениот увид во документацијата и теренската посета на подружниците, секциите и зимските пунктови утврдено е дека во ЈП не е издвоена расходуваната опрема, од која 90 проценти се возила и градежни машини користени за резервни делови без согласност од Владата. Опремата е уништена како отпад без да се спроведе соодветна законска постапка, а нејзината употреба не е уредена со интерен акт, што создава ризик од неконтролирана и несоодветна употреба, се додава во ревизорскиот извештај.

Со ревизијата, ДЗР утврдила и дека трошоците по основ на надомест на штети, камати и судски трошоци дополнително влијаат на влошување на финансиската состојба на јавното претпријатие.