Поранешниот сенатор Хидајатула Кан и четири лица во неговата придружба беа убиени на 3 јули во експлозија во северозападната пакистанска провинција Хајбер Пахтунхва.

Полицијата во областа Баџаур изјави за Радио Машаал, сервис на Радио Слободна Европа дека возилото на поранешниот сенатор Хидајатула Кан било нападнато во нестабилната област Дамадола.

Тој беше придружуван од неговите двајца чувари и двајца членови на семејството, кои беа убиени во нападот.

Видете и ова:

Четворица загинати во бомбашки напад во северозападен дел на Пакистан

Поранешниот сенатор Хидајатула Кан бил на патување во кампањата кога неговото возило било цел на напад со бомба на далечинско управување.

Засега нема преземено одговорност за нападот.

Хидајатула Кан се приклучи на Пакистан Техрик-е Инсаф (ПТИ) во 2018 година, откако беше избран во Сенатот. Тој припаѓа на влијателно политичко семејство, а неговиот брат Шаукатула Кан е поранешен гувернер на провинцијата Хајбер Пахтунхва.

Обвинителството на Босна и Херцеговина на 3 јули поднесе обвинение против 15 луѓе меѓу кои ректори, декани и професори на универзитети и шест приватни високообразовни институции.

Тие се обвинети дека тргувале со најмалку 49 дипломи за високо образование, најмногу од стопанска, правна, техничко-инженерска и здравствена струка, како и од менаџмент.

Обвинителството на БиХ наведува дека заедно со Полициската агенција за истраги и заштита (СИПА) собрале докази дека лицата кои незаконски купиле дипломи, не студирале, односно во мала мера, а некои и воопшто не учествувале во процесот на образование на високообразовните институции.

„За набавка на незаконски дипломи најчесто плаќале суми од неколку илјади евра“, соопшти Обвинителството на БиХ.

Видете и ова:

Синот на Мерко, Генц кој е на американската црна листа доби лиценца за нов медицински Факултет

Од Обвинителството наведуваат дека ќе бараат поништување на тие дипломи и на обвинетите да им биде изречена забрана за работа во високообразовните институции во Босна и Херцеговина.

„Извршувањето на кривични дела нанесе голема штета на системот на високото образование во БиХ, како и загрозување на сите граѓани со работата и активностите на лица со незаконски стекнати универзитетски дипломи“, соопшти Обвинителството на БиХ.

Сите обвинети се товарат за кривичните дела „здружување заради извршување кривични дела, злоупотреба на службената положба или овластување, недозволена трговија, фалсификување исправа и други сродни дела“.

Истрагата во оваа операција, која беше наречена „Кластер“, траеше две години.

Моќниот ураган Берил во средата се префрли кон Јамајка со опасни ветрови, при што жителите на островот се обидуваа да се подготват, откако силната бура од 4-та категорија претходно уби најмалку шест лица и предизвика значителна штета на југоисточниот дел на Карибите.

Ураганот кој е невообичаено силен толку рано во сезоната на Атлантикот, се очекуваше да помине во близина или над Јамајка до пладне како бура од 4-та категорија опасна по живот, велат метеоролозите.

Се прогнозира дека Берил малку ќе ослабне во текот на следниот ден или два, но сепак ќе биде блиску до јачината на големи ураган кога ќе помине близу или над Јамајка, се вели во прогнозата на американскиот Национален центар за урагани.

Доцна во понеделникот, Берил стана најраната бура која се разви во ураган од петта категорија на Атлантикот и достигна максимални ветрови од 270 км/ч во вторникот, пред да ослабне до сè уште деструктивна категорија 4.

Видете и ова:

Ураганот Најџел над Атлантскиот Океан се засилува

Се очекуваше Берил да донесе опасни по живот ветрови и бури на Јамајка, каде што властите ги предупредија жителите во областите подложни на поплави да се подготват за евакуација.

„Ги охрабрувам сите Јамајканци да го сфатат ураганот како сериозна закана“, рече премиерот Ендрју Холнес во обраќањето до јавноста во вторникот.

„Сепак, сега не е време за паника“, додаде тој.

Во Мајами, директорот на американскиот Национален центар за урагани Мајкл Бренан изјави дека Јамајка изгледа дека е на директниот пат на Берил. Тој ги повика жителите да најдат безбедно место за засолниште и да останат таму до среда.

Предупредувањето за тропска бура беше во сила за островите што ги делат Хаити и Доминиканската Република.

Иранскиот Врховен водач, ајатолахот Али Хамнеи, се пожали во јавноста за рекордно нискиот одѕив во првиот круг од претседателските избори во Иран минатата недела. Тој во неговото јавно обраќање на 3 јули истакна дека таквата слика не е одраз на популарноста на Исламската република.

Хамнеи рече дека вториот круг од изборите на 5 јули меѓу реформскиот кандидат Масуд Пезешкијан и тврдокорниот кандидат Саид Џалили е „многу важен“ и ја охрабри јавноста да учествува во изборите.

„Оние кои го сакаат исламот и исламската република и напредокот на земјата мора да го покажат тоа со учество на изборите“, рече 85-годишниот Врховен лидер, кој го има последниот збор за сите државни прашања.

Видете и ова:

Иранците во дилема: Дали да гласаат на вториот круг од изборите?

Хамнеи рече дека излезноста од 40 проценти во првиот круг од гласањето на 28 јуни е „не како што се очекуваше“, но додаде дека е „целосно погрешно да се мисли дека оние што не гласале во првиот круг се против системот“.

Меѓутоа, во говорот во 2001 година, Хамнеи го исмеа учеството на гласачите од 40 проценти во западните земји, велејќи дека тоа е „срамно“ и знак дека „луѓето не веруваат, не се грижат и не се надеваат на политичкиот систем“.

Пезешкијан доби околу 42,5 отсто од гласачките ливчиња во првиот круг од гласањето, додека неговиот ривал Џалили заврши на второто место со 38,6 отсто.

Конзервативните гласови беа поделени меѓу Џалили и парламентарниот спикер Мохамад Бакер Калибаф, кој беше трет со околу 13,8 отсто од гласовите. Мостафа Пурмохамади, поранешен министер за правда, заврши на последното место со нешто помалку од 1 процент.

Опозициската ДУИ изрази длабока загриженост во однос на владината одлука за именување на два директора во Фондот за здравствено осигурување кои се од македонска етичка припадност. На вчерашната владина седница беше донесена одлука со која за времен вршител на фунцијата директор на Фондот за здравствено осигурување, е назначен Сашо Клековски. Негов заменик е Бранко Аџигогов. Досегашните директори Магдалена Филиповска Грашкоска и Асаф Абдурамани на денешната средба во ФЗО им ја предадоа должноста на новите в.д директори.

Според опозициската ДУИ, оваа одлука претставува систематски обид за отстранување на Албанците од најчувствителните и витални институции на државата, создавајќи опасен преседан за нивно исклучување од процесите на донесување одлуки на државно ниво.

„Овој чин е во целосна спротивност со духот на Охридскиот договор и заштитните механизми за еднаква претставеност на сите етнички заедници. Ние веруваме дека отстранувањето на Албанците од клучните институции не е само неправда кон нашата заедница, туку и закана за стабилноста и меѓуетничката хармонија во Северна Македонија“, се вели во реакцијата на ДУИ.

Видете и ова:

Државата си плаќа „казни“ за непотрошени кредити

Претходно, на 28 јуни, ДУИ изрази „неверување и длабока загриженост“ за одлуката на власта да го промени фунционирањето на „балансерот“ со измена на пресметкат за правичната застапеност во институциите.

ДУИ обвинува дека оваа Влада врши директен напад на принципот на правична застапеност, еден од главните столбови на Охридскиот договор.

Според Рамковниот договор потпишан во Охрид во 2001 година, со кој се стави крај на конфликтот во Македонија меѓу припадниците на Ослободителната народна армија-ОНА и македонските вооружени сили, една од главните промени беше вработувањето по етнички клуч во јавната администрација.

Воениот окружен суд во Русија ги осуди на над 17 години затворски казни тројцата синови на руски свештеник затоа што, според судот, требало да заминат за Украина и да се борат на страната на украинските вооружени сили.

Станува збор за синовите на православниот свештеник Игор Ашчеулов кои се прогласени за обид за велепредавство, обид за илегално преминување на границата и обид за влез во терористичка организација.

Јоан Ашчеулов доби 17 и пол години затвор, додека неговите браќа, Алексеј и Тимофеи беа осудени на по 17 години затвор под обвинение за обид за предавство и намера да се приклучат на терористичка група.

Видете и ова:

Русија го додаде францускиот бизнисмен Филип Делпале на листата на барани

Браќата во судот тврдеа дека се невини.

Во своите завршни зборови во судницата, Јоан Ашчеулов истакнал дека пресудата и затворската казна ги доживува „како плаќање за тоа што не бил соучесник во злосторствата што ги прави владата на нашата земја, за задржување на слободата на својата личност“.

Тие беа приведени во јули 2023 година во близина на украинската граница додека се обидуваа да се приклучат на таканаречената легија на „Слободата на Русија“, составена главно од руски државјани, која се борат заедно со украинските вооружени сили против инвазијата на руските трупи.

Земјите членки на НАТО се согласиле да обезбедат воена помош во вредност од 40 милијарди евра (43 милијарди долари) за Украина до 2025 година, јавуваат светските новински агенции.Според нинвите извештаи до сега не успеале да се обврзат на повеќегодишен воен финансиски пакет за земјата погодена од војна.

Дипломати изјавија за Ројтерс и германската новинска агенција ДПА дека генералниот секретар на НАТО Јенс Столтенберг побарал од сојузниците да направат повеќегодишна обврска од 43 милијарди долари пред самитот на Алијансата следната недела во Вашингтон. Но како што тврдат дипломатите, земјите-членки не го поддржале неговото барање.

Сепак, дипломатски извор тврди дека договорот вклучува одредба за реевалуација на придонесите на сојузниците на идните самити на НАТО.

Видете и ова:

Средба на Путин и Си на безбедносниот самит во Казахстан

Претходно, членките на НАТО одлучија да испратат специјален пратеник во Киев, со што ќе го прошират цивилното присуство на западната одбранбена алијанса во Украина, потврди портпаролот на НАТО за агенцијата ДПА.

Високиот функционер ќе има задача да ја координира политичката и практичната поддршка на алијансата на терен додека Украина продолжува да се брани од руска инвазија.

Одлуката доаѓа пред самитот на НАТО кој треба да се одржи од 9 до 11 јули во Вашингтон, каде што се очекува лидерите официјално да го усвојат планот на Алијансата за воена координација на помошта за Украина во рамките на формалната мисија наречена НАТО безбедносна помош и обука за Украина.

Најавеното распуштање на Судскиот совет и Советот на јавни обвинители е дикретно мешање во независноста на судската власт, изјави на 3 јуни евроамбасадорот Дејвид Гир на Конференција за напредокот во спроведувањето на препораките од Оценската мисија на ЕУ од страна на Судскиот совет.

Тој посочи дека доколку тоа се случи ќе предизвика сериозна загриженост кај Европската унија. Гир истакна напорите за засилување на владеењето на правото не треба да бидат направени на начин, на кој, како што вели, би ги нарушил принципите на поделба на властите.

„На пример, распуштањето на Судскиот совет и на Советот на јавни обвинители, ќе значи мешање во независноста на судската власт и ќе биде прашање за сериозна загриженост. Исто и за идејата за раздвојување на Академијата за судии и обвинители, институција која сметаме дека треба да служи како гарант за меритократија и непристрасност во судството“, рече Гир.

Евроамбасадорот во своето обраќање истакна дека потребно е да се продолжи со брзи внатрешни реформи, како и да се потиснат обидите за мешање од страна на политичките структури. Тој бара целосно спроведување во пракса на препораките на Оценската мисија.

„Ова значи надградба на некои од позитивните колективни чекори на кои бевме сведоци во последните шест месеци и значи потиснување на обидите за мешање од политички или деловни интереси“, изјави Гир.

Видете и ова:

Агелер: Судски совет треба да ги казнува оние кои мислат дека се над законот

На Конференцијата, која е во организирана од Судскиот совет, се обрати и американската амбасадорка Анџела Агелер, која истакна дека Извештајот од Оценската мисија на ЕУ е вреден патоказ за реструктурирање на Судскиот совет и повторно поставување на неговата улога во рамките на правосудството.

„Судскиот совет е едно важно оружје во арсеналот оружје што ќе биде потребен за вистинско трансформирање на правосудството на Северна Македонија, во една институција која што им служи на своите граѓани, која што ги штити невините и ги казнува оние кои што сметаат дека се над законот“, изјави Агелер.

Претседателката на Судскиот совет, Весна Дамева, во изјава за медиумите рече дека Советот веќе има отпочнато со реформскиот процес во насока на имплементација на препораките од Оценската мисија на ЕУ и е решен да успее во процесите кои што се во негова надлежност.

Oценската мисија на ЕУ во декември минатата година го достави Извештајот за функционирањето на Судски совет со 40 краткорочни и среднорочни препораки за подобрување на неговото функционирање.

Препораките, како што информираа тогаш од Делагацијата на Европската унија се групирани во шест сегменти - структура и компетентност на самиот Судски совет, мандатот на неговите членови, процесот на селекција и изборот на судии, дисциплинските постапки, прашањето на транспарентност и комуникација со јавноста и ресурси и финансирање.

Германскиот канцелар Олаф Шолц ќе присуствува на четвртиот натпревар на националниот тим на Европското првенство кое се оддржува на домашен терен. Натпреварот ќе се одигра в петок, на големата четвртфинална пресметка со Шпанија.

Портпаролката на владата на 3 јуни изјави дека Шолц ќе биде присутен на натпреварот во Штутгарт.

“Канцеларот со нетрпение го очекува продолжението на овој европски фестивал, каде луѓето се среќаваат со почит и благодарност“, изјави портпаролката на герамнскиот канцелари.

Видете и ова:

Ново во македонскиот спорт е само ново министерство

Во четвртфиналето, домаќинот на првенството Германија ќе игра против Шпанија, додека два часа подоцна истиот ден Португалија ќе се соочи со Франција. Натпреварите меѓу Холандија и Турција, како и Англија со Швајцарија ќе се одиграат во сабота на 6 јуни.

Четвртфиналните средби ќе се играат во Штутгарт, Хамбург, Берлин и Диселдорф.

Руското Министерство за внатрешни работи на 3 јули го додаде францускиот бизнисмен Филип Делпал, поранешен извршен директор на инвестициската групација „Баринг Восток“, на листата на барани за неодредени обвиненија.

Во август 2021 година, московскиот суд ги осуди Делпало, американскиот инвеститор Мајкл Калви и петмина руски бизнисмени на условни затворски казни под обвинение за финансиска измама.

Калви е основач на руската приватна инвестициска групација Баринг Восток.

Делпал тогаш доби условна затворска казна од четири години и шест месеци, а Калви беше осуден на условна казна од пет години и шест месеци. Сите тие тврдеа дека се невини.

Судот, исто така, им нареди на бизнисмените да не ја напуштаат Русија без дозвола од властите, но забраната беше укината во јануари 2022 година, дозволувајќи им на Делпал и Калви веднаш да се вратат во своите матични земји.

Видете и ова:

Кои се Американците уапсени во Русија?

Калви и неговите соработници беа обвинети во 2019 година за измама од 2,5 милијарди рубљи (28,5 милиони долари) на банката Восточни.

Баринг Восток порано беше главен акционер во банката Восточни. Обвинетите тврдеа дека случајот имал за цел да изврши притисок врз Баринг Восток во рамките на деловниот спор околу контролата на банката Восточни.

Случајот ја потресе инвестициската заедница и поттикна неколку истакнати функционери и бизнисмени да изразат загриженост за третманот на извршните директори.

Баринг Восток е една од најголемите и најстарите приватни компании кои работат во Русија. Основана е на почетокот на 1990-тите и управува со имот од повеќе од 3,7 милијарди долари. Компанијата беше првиот голем инвеститор во Yandex, доминантниот руски пребарувач.