Власта и опозицијата против избори во време на коронавирус

Лидерите на власта и на опозицијата денеска побараа одложување на предвремените парламентарни избори, закажани за 12 април, поради настанатата состојба со коронавирусот.

Според претседателот на СДСМ, Зоран Заев, доколку се одржат изборите постои ризик од ширење на коронавирусот, имајќи предвид дека граѓаните ќе мора да искачаат на избирачки места за да гласаат.

„Кога здравјето на граѓаните ќе биде обезбедно трајно ќе донесеме одлука кога да се одржат изборите. Се соочуваме со најголемиот светски здравствен предизвик. Драго ми е дека сме на иста линија со опозицијата“, рече претседателот на СДСМ.

Лидерот на опозициската ВМРО-ДПМНЕ, Христјан Мицкоски, вели дека сите препораки на релевантните домашни и светски организации се дека најдобар одговор за справување со вирусот е одбегнување на активности, што значи дека треба да се одложат закажаните избори.

„Јас во овие моменти го одбирам, без трошка колебање интересот на државата и граѓаните, и затоа денес ќе побарам свикување на лидерска средба кај претседателот Стево Пендаровски со точка на дневен ред разговор одлагање на превдремените парламентарни избори со цел заштита на здравјето на граѓаните“, изјави Мицкоски.

По нив, соопштение испрати и лидерот на ДУИ, Али Ахмети, во кое се вели дека неговата партија прифаќа одложување на изборите.

„Апсолутен приоритет на секој од нас, особено ние што сме во јавна служба, е граѓанинот и јавното здравје. Изборите и кампањата се последни во агендата на нашите приоритети, затоа што сите наши човечки, интелектуални и институционални капацитети ги ставивме на располагање на победа во заедничката борба против вирусот“, се вели во соопштението од Ахмети.

Два часа подоцна, претседателот на државата, Стево Пендаровски, преку објава на Фејсбук, ги повика лидерите на парламентарните политички партии во земјава, како и собранискиот спикер Талат Џафери и техничкиот премиер Оливер Спасовски, на средба со една точка на дневен ред - Одложување на изборите.

Денеска попладне, кај претседателот Стево Пендаровски, ќе се одржи и седница на Советот за безбедност заради ситуацијата со корнавирусот.

Парламентарните избори инаку беа закажани за 12 април. Во Македонија има заболени лица, но и луѓе во самоизолација кои се вратија од високи ризичните земји, а има и во карантин поради контакт со заразени од коронавирусот. Ваквата ситуација, следејќи ги тенденциите во другите европски земји веројатно ќе потрае иако здравствените власти засега не дадода конкретни прогнози.

Коронавирусот е нова нормалност – тука е за да остане

Во други европски земји, кои ги очекува гласање, веќе се отвораат дебати и се прават планови како би се одвивало гласањето. Откако во Велика Британија, каде што требаше да има локални избори на седми мај тамошната изборна комисија предлoжи да се одложат тоа и се направи па тие се презакажани за во мај 2021 година. Дилемите таму беа дека иако е можно гласање по пошта дека зголемениот број случаи кои би гласале на тој начин е можно да ги оптоварат другите сервиси. Дополнителни грижи се појавувија и за лицата кои се во самоизолација или карантин и одземањето на нивното право на глас во случај на неможност да одговори системот. Во Израел, пак, се поставени посебни избирачки места за луѓето заболени со коронавирусот на кои тие гласаат со маски, а до нив стигаат со посебна придружба, а не со јавен транспорт.

На седницата викендов членови на ДИК побараа од партиите да се одложат изборите укажувајќи дека не станува збор само за денот на изборите, туку дека во овој процес се вклучени многу луѓе кои меѓусебно треба да комуницираат.

Партиските лидери, пак, по минатонеделната средба за коронавирусот заклучија дека изборите не треба да се одложат, туку дека партиите зависно од ситуацијата ќе ги редизајнираат своите кампањи при што ќе избегнуваат поголеми јавни собири, а очекувањата се дека кампањата повеќе ќе се одвива на социјалните мрежи. Но по зголемениот број заболени сите оставија простор наведувајќи дека здравјето на граѓаните е поважно од се.

Според Дарко Алексов од Граѓанската иницијатива МОСТ државата има капацитет да обезбеди безбедно гласање и во услови на пандемија, но додава дека сепак треба да се почека и да се види како ќе се одвива ситуацијата и кај нас, а и во светот. Напоменува дека владата даде препорака за дезинфекција во училиштата, градинки и универзитетски сали, а тоа се околу 90 отсто од гласачките места во земјава.

Улиците во Скопје празни, граѓаните купуваат намирници

Овие предвремни парламентарни избори инаку беа договорени откако Македонија не доби датум за почнување преговори со ЕУ во октомври мината година иако го смени уставното име со Преспанскиот договор што требаше да ги одблокира преговорите.