Специјалниот претставник на Европската унија (ЕУ) за дијалог меѓу Србија и Косово, Мирослав Лајчак, ја подвлече неопходноста дека покрај Заедницата на општини со српско мнозинство, што е обврска на Косово и Србија мора да ги спроведе обврските од Договорот за нормализација на односите.
„Заедницата не е единствениот елемент што треба да се имплементира. Србија, исто така, има многу неподмирени обврски од Договорот и мораме да видиме дека имплементацијата напредува паралелно, така што и Косово и Србија ќе го добијат она за што се договорија“, напиша Лајчак на социјалните мрежи.
Осврнувајќи се на последниот предлог за статутот на Заедницата, кој беше претставен пред партиите на 21 октомври при посетата на таканаречената „голема петорка“, Лајчак истакна дека тоа е модерен европски начин за решавање на чувствителното прашање за заштитата на малцинствата во согласност со најдобрите европски практики и стандарди кој „не ги преминува црвените линии на претходно дефинираните страни“.
Тој потврди дека двете страни имале коментари и прашања во врска со овој европски предлог и изрази надеж дека во наредните недели ќе се расчистат отворените прашања и сомнежи.
Тој најави средба меѓу главните преговарачи на Приштина и Белград со цел да се разговара за следните чекори во имплементацијата на Договорот за нормализирање на односите.
„Сега фокусот треба да биде на подобрување на имплементацијата на Договорот без предуслови или одложувања. Како што јасно истакнаа тројцата европски лидери, формалностите не треба да застанат на патот на овој важен процес“, напиша Лајчак.
Во четврток, на 26 октомври, лидерите на трите клучни земји на Европската Унија заедно со претставниците на институциите на ЕУ одделно разговараа со премиерот на Косово Албин Курти и со претседателот на Србија Александар Вучиќ.
Видете и ова: Кристофер Хил за РСЕ: Прерано е да се каже дека дијалогот меѓу Србија и Косово е неуспешен
Без разлика на инволвираноста на највисокото политичко ниво во обидите за излез од ќорсокакот во дијалогот, партиите не успеаја да најдат заеднички јазик за прашањето за имплементација на договорените договори.
Косовскиот премиер изрази подготвеност да потпише договор за патот кон нормализација на односите, вклучувајќи го и европскиот предлог за формирање Заедница на општини со српско мнозинство, но додаде дека српскиот претседател Александар Вучиќ не е подготвен за тоа.
Вучиќ потврди дека е подготвен да ги спроведе членовите од договорот освен оние кои се однесуваат на приемот на Косово во Обединетите Нации и почитувањето на територијалниот интегритет на земјата.
На 27 февруари Вучиќ и Курти во Брисел постигнаа договор за патот кон нормализација на односите, а на 18 март во Охрид беше договорен анекс за имплементација на овој договор. Но, договорите не се потпишани бидејќи претседателот на Србија одбил, бидејќи според него „Србија е меѓународно призната држава, но Косово не е“.
Ден по одвоените средби со лидерите на Србија и Косово во Брисел, односно на 27 октомври, Германија, Франција и Италија официјално побараа Србија „де факто да го признае Косово“, а Косово да формира Заедница на општини со српско мнозинство.