Оптимизам кај владата и поумерени очекувања кај граѓанскиот сектор за извесноста дека Македонија годинава ќе добие датум за преговори со Европската унија.
Без да навлегуваме во шпекулации за датумот, може да се каже дека во голема мера тоа зависи од нас, вели Зоран Нечев од Институтот за демократија.
„Пред сè тоа зависи од спроведувањето на Договорот од Преспа, а понатаму и од спроведувањето на реформскиот пакет”, вели Нечев.
Според вицепремиерот за евроинтеграции Бујар Османи, пак, досега се реализирани 66 отсто од зацртаните мерки од реформскиот пакет. Владата е фокусирана на реформите во судството, безбедносните служби, јавната администрација и борбата против организираниот криминал и корупцијата, тврдат од таму. Рокот на завршување на Планот 18 е до донесување на новиот Извештај на Европската комисија кој вообичаено за земјите кандидатки се објавува во април.
Нечев, пак, прецизира дека Планот 18 содржи сегменти од четирите области кои се провлекуваат во заклучоците на Европскиот совет од јуни, 2018 година.
„Сè уште е рано, немаме некој прелиминарен пресек до каде е исполнувањето на сите овие активности. Но, она што можеме да кажеме дека недостига во овој момент е еден пресек на темпото на спроведување на реформите поврзани со Планот од Владата, иако овој План беше објавен пред неколку месеци, за да видиме кој е степенот на реализација на активностите и што се предвидува во периодот што претстои”, вели Нечев.
До април ни останува многу работа смета Симонида Кацараска од Институтот за европска политика. Таа како важни меѓу другите ги набројува и измените во Законот за судовите и во статутот на Управата за безбедност и контраразузнавање.
„Мислам дека ако сите тие реформски закони се успее да поминат во Собранието и да се стават на здрава основа тогаш ќе има во голема мера аргументи со кои владата ќе може да бара почеток на преговорите следната година”, вели Кацарска.
Сепак сите ги истакнуваат и случувањата во самата Европска унија. Земјите членки годинава се очекува да бидат оптоварени со излегувањето на Велика Британија од Европската унија, а ќе се одржат и избори за Европскиот парламент.