Четвртиот Фестивал за креативни индустрии подразбира - работилници на македонските креативци Марија Ветеровска, Ласко Џуроски, маркетинг агенцијата Меккен, Сивус, Пакомат, претставување на оригиналниот проект за интервенции во јавен простор „Облици и форми“ од Полска. Потем и оној на еден од најголемите таленти во областа на дизајнот Јан Бајтлик, како и на регионалните лидери во оваа област и маркетингот Борут Вилд, Марко Миладиновиќ и Драган Варагиќ.
Идејата на „Скопје Креатива“ е да се наметне како единствен фестивал за креативни индустрии во Македонија кој што го става Скопје на картата на сите европски фестивали од тој ранг.Лазе Трипков, програмски директор на Фестивалот Скопје колектива.
Згора на тоа, дури 11 изложби, меѓу кои онаа на престижната њујоршка Школа за визуелни уметности со дела од творци како Стефан Загмајстер, Мирко Илиќ и Милтон Глејзер, а потем постановката на логоа на нашиот Костадин Танчев Динка. Тука е и самосвојната понуда на Институтот за мода на Изет Цури и изложбата на инстаграм фотографии на Скопје. И уште увид во проектите како „Недела на архитектурата – Тирана“, „Паквити“ од Белград, оние на македонските „Творница“, „Доминиум“, прочуената Полска школа на анимација и ОХО продукција,Стрип и така уште многу нешта.
Кон ова уште информацијата дека вака телеграфски нафрлените исечоци од богатата програма на „Скопје Креатива 2015“, која, пак, овој пат се одвива под мотото „Скопје – мојот град!“, ќе бидат озвучени од енергијата на српскиот состав КАНДА, КОЏА И НЕБОЈША, Бугарите ДАЗНТ ФРОГС, нашите ПИ-ЕМ-ЏИ КОЛЕКТИВ, диџеите.
„Скопје Креатива“ полека си ја гради позицијата на проект кој што навистина е од големо значење за младите македонски креативци преку кои се обидуваме да ја понудиме одличната можност за промоција.Тања Балаќ, раководителот на Секторот за јавни дејности на Град Скопје.
Сè заедно, ова може да биде подведено под заглавието „една сосема поинаква скопска урбана творечка приказна“.
„Идејата на „Скопје Креатива“ е да се наметне како единствен фестивал за креативни индустрии во Македонија кој што го става Скопје на картата на сите европски фестивали од тој ранг. Самиот факт дека манифестацијата успева на едно место да ги обедини бизнисот и уметноста всушност го рангира како Фестивал на урбаната градска култура каде што ќе имаат можност да се претставуваат сите млади и просперитетни дизајнери во Македонија и ним да им се понуди простор за поврзување со сите гости кои што ги очекуваме да пристигнат на ова издание на манифестацијата“, вели Лазе Трипков, програмски директор на Фестивалот.
Тања Балаќ, раководителот на Секторот за јавни дејности на Град Скопје – потписниците на организацијата на ова случување, истакнува дека од година во година „Скопје Креатива“ расне и дека тие успеале да одговорат на предизвикот што своевремено си го поставиле пред себе.
„Скопје Креатива“ полека си ја гради позицијата на проект кој што навистина е од големо значење за младите македонски креативци преку кои се обидуваме да ја понудиме одличната можност за промоција. Тоа е всушност еден од главните приоритети за нас организаторите. Оваа година ја проширивме програмата со учесници и проекти од странство што на случувањето му дава и меѓународен карактер што е исто така една од целите на која и посветуваме исклучително внимание. Затоа и ги покануваме сите заинтересирани да ни се придружат на уште еден одличен фестивал. Иднината е на страната на оние градови кои што знаат да ги искористат креативните потенцијали на своите млади талентирани сограѓани. Мисијата на „Скопје Креатива“ е да им помогне на тие млади креативци да успеат на тој пат“, вели таа.
Во редот на таквите креативци е и Газменд Ајруловски од ИНС, кои се потписници на мобилната апликација SK2GO. Тој забележува дека станува збор за нова платформа која што ќе можат да ја користат туристите за да се информираат што сè можат да посетат и видат туристите во градов било преку мобилната апликација за „паметни“ телефони кога се веќе присутни овде или, пак, пред да допатуваат во Скопје преку интернет страницата www. SK2GO.info.
„Системот работи со голем податочен сет кој што ние го изработивме. Маркирани се некаде над 2.000 точки за градот, овде зборуваме за ресторани, кафетерии, дискотеки. Тоа што е интересно е дека прв пат предлагаме дефинирани рути кои туристите можат да ги посетат при својот престој на Скопје. Сите рути се тематски распределени како „Уметничко Скопје“, „Историско Скопје“, „Скопје за пазарување“, „Ноќен живот“ итн.“, вели тој.