„Бомба“ 11 на СДСМ: Струмица рак-рана на Груевски

Рекет врз фирми, притисоци врз гласачи, забошотување инциденти, штанцање лични карти, да не се потпишуваат записници, да се кријат гласачки ливчиња, и други изборни манипулации кои се случувале во Струмица за време на локалните избори во 2013 објави денеска пратеникот Панче Орцев од СДСМ, во таканаречната 11 – та бомба. Од СДСМ велат дека го децентрализирале проектот „Вистината за Македонија“, за да може, вистината да допре насекаде и до секого.

„По општина Центар, денеска сме во Струмица, рак-раната на Никола Груевски и ВМРО-ДПМНЕ, градот којшто и покрај многуте валкани и недемократски криминални дејствија, никогаш не успеаја да го освојат“, рече пратеникот Панче Орцев.

Во разговорот, како што велат од СДСМ, меѓу Силвана Бонева и Никола Груевски, женскиот глас објаснува дека за време на изборите во Струмица, се вршело рекет од страна на пратеникот Славе Гошев.

СДСМ: Силвана Бонева и Никола Груевски

Женски глас: Нема фирма што не е изрекетирана во Струмица. И многу лошо тоа се одрази на...

Митинг на ВМРО-ДПМНЕ во Струмица.

Машки глас: Кој рекетирал?

Женски глас: ...на самата кампања. Славе Гошев.

Машки глас: Од кого?

Женски глас: Славе Гошев. Фирма нема што не е изрекетирана во Струмица...

Машки глас:Чекај, ама рекет, што е рекет?

Женски глас: И веќе е сосопственик на Вега...

Машки глас: Дали они барале спонзорство? Рекет е уцена, ако не ми дадеш, ќе те затворам. А, спонзорство е спонзорство. Му викаш ако можеш помогни ми.

Женски глас: Со се. Со закани, со закани и со таксување на најневозможни нешта за зимање пари. Со се и сешто. Немаше човек што....

Машки глас: Немам таква информација од никого јас таму, да ти кажам.

Женски глас: Е па не Ви кажале. Ама Миле го подбра после Славе Гошев, и излезе така бел како крпа од состанокот, оти отворено го кажаа и од другите комитети слушнале исто, околните. Нели регионална имавме средби, и отворено кажаа оти рекетот е тргнат. И плус и тоа од УМС си беше дозволил, како го викаат, тој јас се што ви викав дека не гласам за него, се потврди на тие избори оти не треба да постои. И тоа беше тргнат од царинарник, да дипли пари од фирма на фирма и викале прво 50.000 и не кажувале што, и луѓето почнале да се жалат. Терале евра прво, па после ако не даде, на третиот пат му викале, а бе ајде за 50.000 денари ли си? И да ми викаат луѓето, а бе што не кажуваат оти 50.000 терат, нека станат, ја им ги 50.000.

Понатаму, велат од СДСМ, министрите Гордана Јанкулоска и Миле Јанакиески разговараат за тоа што треба да се преземе во Струмица за да го добијат градот во вториот круг од гласањето.

СДСМ: Гордана Јанкулоска и Миле Јанакиески за Струмица

Женски глас: Па тоа е супер. Таму треба јако да нагазиме.

Машки глас: Треба прегласување и после знаеш што е добро? Сега не знам како е, Срцев го барав, а го прочитав сеа. Прво се прегласува, па после има втор круг? Логично е така?

Женски глас: Да, да. Оти знаеш, таму зависи дали ќе има втор круг од самото прегласување. Зошто може да падне цензусот...
Машки глас: А ако остане само Струмица, сите у Струмица тогаш топтан.

Женски глас: Еее, тогаш комплет.

Машки глас: Цела Влада у Струмица, претседатели на месни комитети да бидиме.

Женски глас: Да, да.

Машки глас: После лесно е да имаш една...

Женски глас: Е многу ми е мерак...

Машки глас: Една општина да имаш...оооо, Струмица

Женски глас: Многу ми е мерак да ти кажам.

А Гордана Јанкулоска и Кирил Божиновски, како што велат од СДСМ, зборуваат за тоа како се поткупувале гласачи во Струмица.

СДСМ: Гордана Јанкулоска и Кирил Божиновски

Женски глас: Е како делел Заев пари? Пошто нели ние да видиме како ги делел нели париве? Заев идел од куќа на куќа и колата на жена му поминала низ ромското маало. Па тоа не е делење пари. Така и Васе Пишев оди од врата на врата.

Машки глас: Да, да, да.

Женски глас: Не можеш да му забраниш. Замисли кој скандал е полиција да го приведе, него или жена му, или брат му, зошто одат од врата на врата.

Меѓу 19-те разговори објавени денеска на прес конференцијата во Струмица, има и еден од 2011 кој излегува од темата изборни манипулации, за кој од СДСМ велат дека е меѓу министерот Миле Јанакиески и тогашниот претседател на Врховен суд Јово Вангеловски. Соговорниците зборуваат за предметот Глобал, во кој лидерот на СДСМ, Зоран Заев, беше обвинет, а потоа аболициран.

СДСМ: Миле Јанакиески и Јово Вангеловски

Машки глас 1: Е добро. Значи за предметот Глобал..

Машки глас 2: Добро..

Машки глас 1: ..има они нели водат постапка, сега е кај мене тука

Машки глас 2: Добро...

Машки глас 1: аа ми прави проблем едниот од судиите затоа што на решението коешто е донесено од моја страна го нема твојот потпис...значи во списите на предметот...

Машки глас 2: А чиј потпис има?

Машки глас 1: Па нема ничиј празно е, ја не знам од кои причини веројатно е таков примерокот, невозможно е да нема затоа што има печат...

Машки глас 2: Може да го пушти некој на смс бројот на судијата..

Машки глас 1: Е сеа на смс ќе ти го пуштам бројчето и ако е изводливо да изорганизираш да ми пратат...

Машки глас 2: Утре ќе ти го дам на рака ќе ти го дам

Пратеникот Орцев вели дека материјалите што денеска ги објавуваат, а што е мал дел од доказите што постојат, докажува и покажува дека во Македонија нема Д од демократијата, П од правдата и С од слобода.

СДСМ: Гордана Јанкулоска и Зоран Ставрески за избори

СДСМ: Миле Јанакиески и соговорник за Струмица

Реакција од ВМРО-ДПМНЕ

На прес конференцијата на СДСМ, реагираа од владејачката ВМРО-ДПМНЕ, повторувајќи дека СДСМ објавува креирани, монитрани, лепени и прелепувани телефонски разговори. Во соопштението наведуваат дека Зоран Заев вршел изборно поткупување со простување долгови, закани, притисоци, со искористување на иселеници и граѓани од ромска националност за да остане на власт.

„Деструктивното сценарио на СДСМ не им поминува кај граѓаните. На сите им е јасно дека СДСМ се обидува без поддршка од народот со директна помош од странски центри да се доберат до власт“, стои во соопштението.