Министерот за внатрешни работи Панче Тошковски на прес конференција по затворањето на избирачките места на Претседателските избори 2024 година костатираше дека денот поминал во безбедна, мирна и демократска атмосфера.
Според податоците на МВР во текот на изборниот ден евидентирани се повеќе настани кои се однесуваат на фотографирање на гласачко ливче, пријави за агитирање на гласачко место и други незначителни нерегуларности, но не се евидентирани посериозни инциденти насочени кон нарушување на регуларноста на изборниот процес.
Евидентирани се 12 случаи на фотографирање на гласачко ливче, 2 случаи на кинење на гласачкото ливче, 6 пријави за нудење поткуп, 15 пријави за агитирање.
На подрачјето на СВР Скопје во врска со пријава за испукана димна бомба, од страна на тим на антитероризам извршена е проверка, подигната е направата и објектот е предаден на Претседателот на Избирачки одбор.
Кузеска: Изборите поминаа во фер и демократска атмосфера, ги очекуваме првичните резултати
Изборниот ден помина во фер и демократска атмосфера, а граѓаните својата волја ја изразија слободно и достоинствено, оцени портпаролката на СДСМ, Богданка Кузеска, на прес-конференција по затворањето на гласачките места за денешните претседателски избори во Северна Македонија.
Кузеска рече дека констатирале само неколку мали прекршувања на изборниот процес кои, како што кажа, ги сметаат за исклучоци.
„Изразуваме благодарност до сите граѓани кои денеска излегоа и го дадоа својот глас. Правото на слободно одлучување е највредната придобивка на демократијата, а самото гласање е суштински чин што произлегува од моќта на граѓаните кои одлучуваат за својата иднина и за иднината на државата“, рече Кузеска.
Таравари: Поголемата излезност покажува дека промените доаѓаат
Арбен Таравари, претседателски кандидат на коалицијата на албанската опозиција „Вреди“, на првата прес-конференција по затворањето на гласачките места оцени дека на овие избори има поголема излезност отколку на претходните избори, што, според него, зборува дека промените доаѓаат.
„Како „Вреди“ сме пресреќни дека добивме гласови генерално од Албанците. Сега промените се во кутиите што веќе се отвараат. Се надевам дека нашите комисионери, нашите набљудувачи ќе ги контролираат и нема да дозволат да има злоупотреби и да се гарантира дека секој глас што е даден на демократски начин ќе излезе на површина. Гласот на граѓанинот никако не треба да се злоупотребува“, рече Таравари.
Адеми: Честитки за демократската зрелост, очекуваме победа на Османи
Имавме слободни избори што се одржаа во демократски дух и компетитивна атмосфера, оцени Арбр Адеми, шеф на изборниот штаб на ДУИ, чиј кандидат Бујар Османи беше еден од седумтемина кандидати за претседател на Северна Македонија на претседателските избори што се одржаа денеска.
„Ова е наш заеднички успех за кои сакаме да им честитаме на сите останати учесници. Покажавме демократска зрелост каква што ѝ доликува на земја членка на НАТО и земја преговарач со Европската унија. Секако сакаме да им се заблагодариме на сите граѓани кои гласаа за нашиот кандидат д-р Бујар Османи. Со тоа го доверија својот глас и за Европскиот фронт. Сакаме да знаеме дека вашата волја е запишана и таа ќе биде дел од идните политики на Република Северна Македонија“, рече Адеми.