Најмалку 18 лица загинаа откако обилните дождови рано на 4 октомври предизвикаа поплави и лизгање на земјиштето во централните и јужните области на Босна и Херцеговина.
Спасувачките тимови трагаат по 40 лица кои се уште се водат како исчезнати по смртоносните поројни поплави во земјата, кои оставија целосно отсечени некои села и ги натераа властите да прогласат состојба на катастрофа.
Четиринаесет од смртните случаи биле во Херцеговина и три во Босна, а мостовите и патиштата биле уништени во двата ентитета, што било пречка за спасувачките екипи.
Поплавата и одроните ја уништија патната комуникација кон Фојница и ги поплавија селата Баковиќи, Луке, Гојевиќи.
Уште се отсечени 500-те жители на селото Дусина кај Фојница во централна БиХ. Мештаните од околните села чистат и реновираат колку што можат. Немаат вода, струја, телефонските комуникации се лоши. Материјалната штета е огромна.
„Екипата преку шумскиот пат успеа да стигне до Дусина и ја утврди состојбата, а по шумскиот пат над планината е испратена механизација за побрзо да се санира патот“, изјави за РСЕ, Анида Рамиќ, портпарол на општината.
Се проценува дека рехабилитацијата на патот ќе трае со денови, можеби и со недели, бидејќи повторно е забележано издигнување на реката Железница.
Локалните избори закажани за утре (6 октомври) се одложуваат во четирите општини погодени од поплавите: Јабланица, Коњица, Кисељак и Крешево.
Во Фојница изборите се одложени на три избирачки места. Ваква одлука донесе Централната изборна комисија (ЦИК) на Босна и Херцеговина на денешната седница (5 октомври).
Одлуката за датумот на одржување на одложените избори во четирите општини ќе биде донесена кога ќе се исполнат условите за нивно одржување.
„Не верувам дека одроните се предизвикани од обилни дождови. Поради големите суши, карпите пукнаа. Обилните дождови и поројните дождови само направија сето тоа побрзо да се распадне“ вели за РСЕ, Мартин Таис, експерт за климатски промени, коментирајќи ги бројните свлечишта и одрони на југот на Босна и Херцеговина.
Ненадејните дождови се случиле додека жителите спиеле, а водата се кренала над покривите на куќите и остави цели села затрупани во кал.
Екипите во Јабланица работеа на отстранување на купишта камења и шут.
Општината, главна туристичка дестинација лоцирана покрај реката Неретва и езерото Јабланица во Херцеговско-неретванскиот кантон, беше уништена од поплави. Патиштата и железничките врски се уништени, отсекувајќи ја областа. Во селото Долна Јабланица, карпите од блискиот каменолом наводно затрупале домови.
Поројни поплави предизвикани од обилните дождови се забележани и во Црна Гора, јужно од Босна, додека во Хрватска силниот ветер и поројните дождови затворија неколку патишта.
