Девет месеци по започнувањето на својата истрага по службена должност за субвенционирањето на производството на електрични возила во Кина, Европската комисија денеска донесе одлука за воведување „привремени компензациски царини“ за увоз на кинески електромобили.

Ваквата одлука е донесена врз основа на заклучокот од истрагата дека производството на електрични возила во Кина е поддржано од нефер субвенционирање, што претставува закана за нанесување економски штети на производителите на електромобили во ЕУ.

При носењето на одлуката се водело сметка и за веројатните последици и влијанието на кинеските мерки врз увозниците, корисниците и потрошувачите на електрични возила во ЕУ.

Согласно оваа одлука, за возилата на компанијата Би-Вај-Ди (BYD) е предвидена компензациска царина од 17,4 отсто, за оние на „Џили“ („Geely“) од 19,9, а за електромобилите на САИЦ од 37,6 проценти. За останатите кинески производители на електрични возила што соработувале во истрагата се воведува царина од 20,8 отсто, а за оние кои не соработувале со истражителите на ЕУ – од 37,6 проценти.

Видете и ова:

ЕУ ќе ги објави царините за кинеските електрични возила

Примената на овие привремени царини ќе почне од утре и ќе трае максимално четири месеци, во кој период мора да биде донесена конечна одлука од земјите членки на ЕУ за дефинитивната висина на царината за кинеските електромобили, што ќе важи за период од пет години.

Комисијата информира дека и покрај одлуката, консултациите со кинеската Влада за ова прашење продолжуваат, со нивното интензивирање последните недели по средбата меѓу извршниот потпретседател на ЕК за економија во полза на луѓето Валдис Домбровскис и кинескиот министер за трговија Ванг Вентао.

„Контактите продолжуваат на техничко ниво со цел да се постигне решение во согласност со правилата на Светската трговска организација (СТО), кое адекватно ќе ги земе предвид грижите покренати од Европската Унија. Секој преговарачки исход мора да биде ефикасен во справувањето со идентификуваните штетни форми на субвенционирање“, информира Европската комисија.

Комисијата официјално ја започна истрага за субвенционирање на производството на електрични возила во Кина на 4 октомври 2023 година и има рок од 13 месеци за нејзино завршување.

Македонското Собрание ги откажа сите активности планирани за неделава поради трагедијата што се случи во Кочани.

На координацијата претседателот на Собранието Африм Гаши предложи, а присутните едногласно усвоија заклучок дека сите активности на Собранието закажани и планирани за оваа седмица се откажуваат. Собранието ќе заседава само доколку има потреба од усвојување на акти поврзани со трагедијата во Кочани.

И Уставниот суд на работен состанок одлучи да ја одложи подготвителната седница за Законот за употреба на јазиците, која беше закажана на 20 март.

„Судот ја зема во предвид прогласената седумдневна жалост за жртвите од трагедијата во Кочани и траумата низ која поминува општеството, граѓаните и државата“, информираат од Уставниот суд.

Видете и ова:

Осомничени 23-ца за пожарот во Кочани, се очекуваат нови апсења

Од Уставниот суд додаваат дека датумот за одржување на подготвителната седница на Законот за употреба на јазиците ќе биде дополнително утврден.

Поради трагичниот настан во Кочани, одложен е и состанокот на лидерите од Западен Балкан што требаше да се одржи оваа недела во Скопје.

Ноќта во саботата изби пожар во дискотека во Кочани во кој животот го загубија 59 лица, а над 150 беа повредени. Во критична состојба се 45 пациенти и тие се транспортираат во странство во соодветни здравствени установи. Досега е извршена обдукција на 15 починати лица.

Украина наскоро ќе добие речиси 3,5 милијарди евра откако Советот на ЕУ ја одобри третата исплата на грантови и заеми за земјата во рамките на Инструментот за Украина.

„Со оваа трета исплата, Украина ќе добие близу 20 милијарди евра во рамки на Инструментот за Украина од неговото стапување во сила пред една година“, се вели во соопштението на Советот на ЕУ.

Главната цел на овој инструмент е да ја поддржи макрофинансиската стабилност и закрепнување на Украина, како и реконструкција и модернизација на државата.

Украинскиот план ги утврдува намерите на Украина во врска со обновата и модернизацијата на земјата, како и временскиот распоред на реформите што планира да ги преземе како дел од процесот на пристапување во ЕУ во следните четири години.

Видете и ова:

Украина, Блискиот Исток и односите ЕУ-САД, главни теми на Советот за надворешни работи на ЕУ

„Украина успешно покажа дека има имплементирано 13 различни чекори. Тоа вклучува, меѓу другото, донесување реформи за зголемување на употребата на обновливи извори на енергија, зголемување на автономијата на регулаторите за енергија, поедноставување на процедурите за преминување на границите во согласност со стандардите на ЕУ, усвојување стратегија за земјоделство и рурален развој(вклучувајќи отстранување на нагазни мини од земјоделски површини)и продолжување на работата на пописот на неговите стратешки и критични суровини“, се додава во соопштението.

Советот на ЕУ заклучи дека Украина ги исполнила неопходните услови наведени во Планот за Украина за да ја добие третата исплата од Инструментот за Украина.

Градоначалникот на Кочани Љупчо Папазов поднесе неотповиклива оставка од функцијата по трагичната несреќа во Кочани во која загинаа 59 лица.

„Оваа загуба е огромна! Не постојат зборови што можат да ја опишат болката што ја чувствуваме сите. Тие деца беа наши деца. Ги познавав повеќето од нив, ги познавав и нивните семејства, а со дел од нив и семејни пријатели. Шокот и скршеноста што ги чувствувам ќе траат целиот мој живот. Оваа трагедија ги остави Кочани и Македонија во црнина, а празнината што остана е непреболна“, напиша Папазов на Фејсбук.

Бара од надлежните институции да ја испитаат одговорноста на сите инволвирани додавајќи дека целосно им стои на располагање на институциите.

„Непостапувањето е исто така одговорност. Мора да се истражат сите детали, да се најдат сите пропусти, а сите лица што придонеле кон оваа трагедија мора да одговараат. Јас се ставам целосно на располагање на институциите. Иако според закон немав директни надлежности во овој случај, подготвен сум да одговорам на сите прашања за се, како и за моите лични постапки“, пишува Папазов.

Видете и ова:

Таравари: Пациентите од пожарот во Кочани во генерално стабилна состојба

Доколку постои било каков основ за одговорност кај мене, вели Папазов, го повикувам Обвинителството да го испита тоа и да постапи согласно законите.

Бројот на загинати лица во пожарот во дискотеката „Пулс“ во Кочани се искачи на најмалку 59 лица, а бројот на повредени кои се хоспитализирани низ болниците низ Северна Македонија е 155.

Во критична состојба се 45 пациенти и тие се транспортираат во странство во соодветни здравствени установи. Досега е извршена обдукција на 15 починати.

Српскиот претседател Александар Вучиќ изјави дека српската војска и одредот на воената полиција „Кобра“ немаат звучен топ, за кој некои тврдат дека бил употребен на саботниот протест во Белград, најавувајќи дека истрагата за оние кои, како што тврди, ширеле невистини за тоа, ќе биде завршена во следните 48 часа.

„Истрагата ќе биде целосно завршена во рок од 48 часа, а потоа сите одговорни за таквите измислици и лаги ќе одговараат пред правдата“, рече Вучиќ во видео обраќање на Инстаграм.

Тој тврди дека звучниот топ не бил на улица бидејќи, како што рече, „не може да не се види и да не се слушне“.

Тој додаде дека некои луѓе по грешка мислеле дека членовите на Кобра го држат тоа оружје во зградата на Претседателството, но дека тоа било пушка против дронови.

Претседателот, исто така, тврди дека на денот на протестот никој не пријавил дека се чувствува лошо, туку дека „тие ги испратиле своите активисти следниот ден“.

Тој оцени и дека слични приказни се ширеле и за време на украинските демонстрации на „Мајдан“.

„Се сеќавате на обвинувањата дека Јанукович донел снајперисти кои пукале во народот... Па, така почнаа и овде“, рече Вучиќ.

Видете и ова:

Масовен протест во Белград - „Ние сме државата“, порака од студентите

На видеата објавени на социјалните мрежи се гледаат граѓани собрани на саботниот протест кај плоштадот Славија, оддавајќи им почит на загинатите во уривањето на настрешница во Нови Сад, кои откако ја слушнаа вревата, масовно се тргнаа настрана.

Настанот предизвика паника кај граѓаните, а засега нема официјални информации што предизвика ваква реакција кај толпата.

Студентите на блокадата, кои повикаа на протест во сабота, инсистирајќи на утврдување на одговорноста за уривањето на бетонска настрешница во Нови Сад, ги обвинија властите за употреба на звучен топ за време на 15-минутниот молк за 15-те загинати.

Српското Министерство за внатрешни работи (МВП) и Министерството за одбрана претходно негираа употреба на звучен топ на протестот на 15 март.

Видете и ова:

Вучиќ: Безбедносната состојба на Балканот е „сериозно разнишана“

Вишото јавно обвинителство (ВЈТ) во Белград му наложи на Првото основно јавно обвинителство да покрене предмет и да ги идентификува лицата кои во јавноста пренеле информации дека Ургентниот центар во саботата лекувал десетици граѓани со заболувања кои можеле да бидат предизвикани од таканаречен „звучен топ“.

Во соопштението на ВЈТ се наведува дека реагирале откако Ургентниот центар на Универзитетскиот клинички центар на Србија ги демантираше овие наводи кои се појавија на социјалните мрежи.

Невладината организација Белградски центар за човекови права на 16 март соопшти дека биле контактирани од голем број граѓани кои ги почувствувале ефектите од звучниот топ на саботниот протест. Се наведува и дека граѓаните почувствувале силен топлотен бран, татнеж и нешто што наликува на звук на авион или автомобил кој оди со голема брзина и потоа „како некој ветер да се движи и да ги соборува, како да поминала ракета“.

Косовската претседателка Вјоса Османи побара од Европската Унија (ЕУ) да го третира Косово „еднакво“ во дијалогот во Брисел, по средбата на 17 март со Петер Соренсен, претставник на ЕУ за дијалогот Приштина-Белград.

Соренсен е во посета на Косово за прв пат по преземањето на функцијата на почетокот на февруари, за да се сретне со високи претставници од таа земја.

По средбата Османи оцени дека Косово „заслужува еднаков третман во процесот на дијалог и на патот кон ЕУ“.

„Косово веќе се покажа како конструктивна страна во дијалогот, посветена на мирот, демократијата и владеењето на правото, затоа континуираните неправедни мерки на ЕУ против нашата земја не им штетат само на нашите граѓани, туку и на неопходната рамнотежа во дијалогот“, напиша Османи на својот Фејсбук профил.

Видете и ова:

Што може да се очекува од Соренсен новиот ЕУ преставник за дијалогот Србија - Косово?

ЕУ воведе казнени мерки за Косово во јуни 2023 година, бидејќи владата ги игнорираше повиците за деескалација на ситуацијата во северно Косово, каде живее мнозинско српско население.

Протестите, тензиите и немирите траат од крајот на 2022 година, кога Србите ги напуштија косовските институции поради инсистирањето на косовските власти да ги укинат српските регистарски таблички, додека ситуацијата кулминираше во септември 2023 година, кога вооружена група Срби во Бањска ја нападна полицијата и уби полицаец.

Соренсен ќе оствари и одделни средби со премиерот Албин Курти и првиот заменик-премиер задолжен за европски интеграции, развој и дијалог, Бесник Бислими.

Ова е прва посета на Соренсен откако беше именуван за специјален пратеник за дијалог.

Иако официјално не е најавено, се очекува тој да се сретне и со претставници на политичките партии застапени во косовскиот парламент, со претставници на Српска листа, како и со претставници на граѓанскиот сектор и меѓународната заедница на Косово.

Косово и Србија водат дијалог преку Европската Унија од 2011 година. Досега се потпишани десетици договори, од кои многу не се спроведени на терен.

Затоа, на почетокот на 2023 година, ЕУ предложи Договор за патот кон нормализација на односите, кој двете страни го прифатија, а потоа се договорија за план за имплементација. Но, ниту овој Договор не е спроведен, а страните меѓусебно се обвинуваат дека го прекршуваат.

Министерот за здравство Арбен Таравари денеска (17 март) на прес-конференција информира дека пациентите од пожарот во Кочани се во генерално стабилна состојба, но 20 пациенти се во критична состојба.

Тој најави дека можни компликации се очекуваат денеска и утре.

Тој исто така додаде дека има и нови пациенти кои биле дел од трагичниот настан во Кочани, но не се пријавиле вчера, туку се пријавиле денеска.

„Завршивме со состанокот на Кризниот штаб и направивме пресек на состојбата. За среќа, пациентите кои што беа донесени вчера во болниците низ државата се во стабилна состојба. И тие што беа пренесени надвор од државата, вкупно 51 до сега, сите се во генерално стабилна состојба. Но, се појавува еден нов проблем да има пациенти кои вчера не се јавени и денеска се јавуваат. Јас би сакал да упатам порака до сите што биле дел од трагичниот настан во Кочани, а не се пријавиле вчера, ги молам денеска да се пријавуваат“, рече Таравари.

Видете и ова:

Осум повредени од пожарот во Кочани примени во „Пирогов“ во Софија, нивната состојба е тешка

Како што рече, сите пациенти кои беа во Кочани и Штип, сега се сместени во Скопје.

Во Кочани и Штип повеќе нема пациенти.

Таравари подвлече дека ситуацијата е под контрола и очекуваат помалку компликации.

Во пожарот загинаа 59 лица, а од повредените во државава се лекуваат 84 пациенти, а во странство 51 пациент.

Украинската противвоздушна одбрана собори 90 од 174 беспилотни летала со кои руските сили синоќа (16 март) ја нападнале украинската територија, јавува Укринформ.

Седумдесет непријателски беспилотни летала се изгубени од радарите, додава украинската новинска агенција, повикувајќи се на украинските воздухопловни сили.

Беспилотни летала „Шахед“ и разни модели на беспилотни летала за мамка беа насочени од Орел, Шаталово, Курск, Брјанск и Приморско-Ахтарск.

Видете и ова:

Трамп гледа „многу добра шанса“за мир по „продуктивни“ разговори со Путин

Воздушниот напад бил одбиен со авиони, противракетни системи, средства за електронско војување и самоодни огнени системи, забележува Укринформ.

Дроновите биле соборени над регионите Киев, Харкив, Полтава, Суми, Чернихив, Черкаси, Кировград, Днепропетровск, Запорожје и Одеса.

Претходно беше објавено дека едно лице е повредено од руски дрон во областа Одеса, а околу 500 домаќинства во предградијата на Одеса останале без струја поради оштетување на електричната мрежа, потсетува Укринформ.

Во меѓувреме, во изјава на каналот Телеграм, руското Министерство за одбрана соопшти дека нивните сили го зазеле селото Степове, во областа Запорожје во Украина.

Обвинителскиот тим кој работи на истрагата за утврдување на причините за катастрофата во Кочани од утрово е проширен и во моментов го сочинуваат двајца јавни обвинители од ОЈО Кочани, двајца јавни обвинители од ОЈО Штип и пет јавни обвинители од ОЈО Скопје.

Како што информираат од Јавното Обвинителство, синоќа се издадени повеќе дополнителни наредби, вклучително наредба за пребарување на серверите и на уште еден компјутер во Министерството за економија и наредба за графолошко вештачење на потписи на одредена документација. Увидот на лице место денеска (17 март) продолжува.

Од Обвиинтелството утрово информираа дека во тек се рочишта за определување притвори за лицата осомничени за случајот со пожарот во дискотеката во Кочани.

Видете и ова:

Во тек се рочишта за определување притвори за случајот со пожарот во Кочани

За случајот досега се сослушани над 20 лица, а за 11 Обвинителството поведе постапка за проверка. Од нив за осум лица веќе е поднесен предлог за краткотраен притвор, додека останатите три сѐ уште се хоспитализирани во потешка здравствена состојба.

Во пожарот што се случи во дискотеката „Пулс“ во Кочани животот го загубија 59 млади лица, а над 140 настрадани се згрижени во земјава и странство.

Според досегашната истрага на институциите, во дискотеката немало хидрантска мрежа и доволно ПП апарати, во неа противзаконски биле користени пиротехнички материјали, немала ниту легална лиценца за работа и не бил склучен писмен договор меѓу организаторот и групата што настапувала

Во тек се рочишта за определување притвори за лицата осомничени за случајот со пожарот во дискотеката во Кочани, информираат изутринава од Јавното обвинителство.

За случајот досега се сослушани над 20 лица, а за 11 Обвинителството поведе постапка за проверка. Од нив за осум лица веќе е поднесен предлог за краткотраен притвор, додека останатите три се уште се хоспитализирани во потешка здравствена состојба.

Во пожарот што се случи вчера животот го загубија 59 млади лица, а над 140 настрадани се згрижени во земјава и странство.

Според досегашната истрага на институциите, во дискотеката немало хидрантска мрежа и доволно ПП апарати, во неа противзаконски биле користени пиротехнички материјали, немала ниту легална лиценца за работа и не бил склучен писмен договор меѓу организаторот и групата што настапувала.

Видете и ова:

Осум повредени од пожарот во Кочани примени во „Пирогов“ во Софија, нивната состојба е тешка

Како што соопшти синоќа државниот јавен обвинител Љупчо Коцевски, досега се сослушани над 20 лица, меѓу кои и еден од организаторите на настанот, а потврди дека на информативен разговор е повикан и поранешниот министер за економија, Крешник Бектеши.

Според Коцевски, се работи за сложен предмет и има многу работи што треба да се испитуваат. Досега се преземени низа активности-наредби за обдукција на жртвите, наредби за преземање мерки до МВР и БЈБ за апсење на секое лице кое со своето постапување или непостапување придонело за настанот и да се испита неговата улога, наредба за анализа на одземени предмети, предлог за издавање наредба за одземање видео снимки од безбедносни камери, предлог за издавање наредба за привремено одземање документација на правниот субјект, барање за претрес во дом и други простори и барање за меѓу институционална соработка до ОЈО ГОКК.

Најновиот развој на настаните поврзани со руската агресија врз Украина, ситуацијата на Блискиот Исток, со посебен осврт на случувањата во Сирија и на улогата Иран, како и односите меѓу ЕУ и САД ќе бидат главни теми на денешното заседание (17 март) на Советот за надворешни работи на Унијата (ФАЦ) во Брисел.

Состанокот, со кој ќе претседава високата претставничка на ЕУ за надворешни работи и безбедносна политика Каја Калас, ќе започне со дебата за Украина на чиј старт на европските шефови на дипломатии преку видео конференциска врска ќе им се обрати нивниот украински колега Андриј Сибиха, кој ќе ги информира за најновите политички случувања и ситуацијата на теренот, како и за најитните приоритети на Киев.

Се очекува дискусијата на европските министри да биде посветена на актуелните американски и европски иницијативи, на резултатите од средбата на претставници на Украина и САД во Саудиска Арабија и од специјалниот Европски совет од 6 март, како и на подготовките на Самитот на ЕУ закажан за 20 март.

Во овој дел предвидено е Калас да ја презентира својата иницијатива за засилена воена поддршка за Украина во 2025 година, преку обезбедување безбедносни гаранции и зајакнување на одбранбените потенцијали на земјата, како и да ја нагласи важноста од одржување максимален притисок врз Русија.

Во продолжение на Советот ќе се разговара за најновите случувања на Блискиот Исток, со посебен фокус на состојбата во Газа и на ситуацијата на Западниот Брег. Се очекува министрите да го поздрават План за обнова на Газа претставен на Самитот на Арапската лига во Каиро на 4 март, како и да се реафирмира поддршката на ЕУ за Палестинската автономна управа, за мировното решение за две држави, како и на работата на УНРВА. Предвидено е и Калас да ги информира министрите за активностите мисијата на ЕУ на граничниот премин Рафа во Газа.

Видете и ова:

Берлин, Париз, Лондон и Рим го поздравија арапскиот план за обнова на Газа

Шефовите на дипломатиите на членките на ЕУ ќе расправаат и за последниот развој на настаните во Сирија, особено за зачестеното насилство во крајбрежните сириски области и да ја потврдат поддршката на ЕУ за земјата и за мирна и инклузивна транзиција со цел создавање политичка и економска стабилност.

Во делот на расправата за Блискиот Исток, ќе стане збор и за политиката на ЕУ кон Иран, во контекст на неговата поддршка на Русија, произволните притворања на европски граѓани, хибридните операции против членките на Унијата, иранската нуклеарна програма и дестабилизирачка улога на Техеран во регионот.

На заседанието министрите ќе разменат мислења и за односите меѓу ЕУ и САД и за влијанието на надворешно-политичките одлуки на САД и европскиот одговор на нив. На крајот е предвидено Калас да ги информира шефовите на дипломатиите за резултатите од минатонеделниот состанок на надворешни работи на Г7 во Канада.

Видете и ова:

Украина и европската одбрана главни теми на мартовскиот Самит на ЕУ

Покрај состанокот на Советот за надворешни работи, денеска во Брисел ќе се одржи и заседание на Советот за транспорт, телекомуникации и енергија на ниво на министри задолжени за енергија, на кое ќе се расправа за Акцискиот план за прифатлива енергија, чија цел е намалување на цените за енергијата на краток рок, комплетирање на Енергетската Унија, привлекување инвестиции и подготовка за потенцијални енергетски кризи, потоа за енергетската безбедносна архитектурата на ЕУ, за енергетската ситуација во Украина, како и за заштитата на критична инфраструктура.