Вести
ДСЗИ: Забрана за пристап на Токсикологија за здравствените работници без договор за работа
Државниот санитарен и здравствен инспекторат ќе издаде решение со кое на здравствените работници кои немаат договор за работа на Клиниката за токсикологија ќе им биде забранет пристап на Клиниката. Ваквиот чекор на ДСЗИ следува откако менаџментот на Клиниката не постапил по издаденото решение за опомена со наложени инспекциски мерки.
Како што денеска (2 мај) информираше директорката на ДСЗИ Рената Младеновска менаџментот на Клиниката не постапил по мерките што ги издал ДЗСИ, освен по една точка да се свика Управниот одбор.
„ДСЗИ изврши контролен инспекциски надзор на Клиниката за токсикологија по издадено решение за опомена со наложени инспекциски мерки кои истото беа должни во рок од три дена да испратат писмено известување дали е постапено по истото решение, меѓутоа такво писмено известување не добивме. Со оглед на фактот дека на самиот надзор присуствуваа двајцата директори и медицинскиот и организацискиот беше доставена документација во однос на листи од електронска евиденција на работно време и контрола на пристап во просториите од истите документи ДСЗИ го констатираше следново: По точка 1 и 2 од решението издадено за опомена не се постапува, односно здравствените работници соработници коишто немаат договор за вработување, односно договорот им истекол на 31.12.2023 година истите се евидентираат и понатаму на Клиниката за токсикологија што значи дека не е постапено од решението под точка 1 и 2“, рече Младеновска.
Доколку не се постапи и по ова решение, Младеновска рече дека следуваат парични казни за организацискиот и за медицинскиот директор, како и за самата Клиника.
Прашана како е можно да се појавуваат на работа лица кои немаат договор за работа, Младеновска упати одговорот да се бара кај менаџментот на Клиниката и кај Министерството за здравство.
Инаку доктори од Клиниката за токсикологија неодамна на прес-конференција алармираа дека во оваа здравствена установа се случува хаос особено, како што велат, од назначувањето на организациската директорка Бесија Иљази на средината на февруари.
Наспроти нив, пак, министерот за здравство Илир Демири најави дека ќе го разреши медицинскиот директор на Клиниката за токсикологија, Данил Петровски, додека кај организациската директорка вели „нема констатирано ниту едно прекршување на правото“.
Досега, не е разрешен ниту Петровски, ниту Илјази.
Државниот здравствен и санитарен инспекторат (ДЗСИ) кој изврши вонреден надзор на Клиниката за токсикологија утврди дека вкупно 11 лица бесправно работеле со пациенти и давале здравствени услуги, иако немале договори за ангажман.
види ги сите денешни вести
Секое трето дете во Северна Македонија живее во сиромаштија
Европската гаранција за деца како механизам на ЕУ за спречување на сиромаштијата и социјалната исклученост е особено важна за Северна Македонија, каде што секое трето дете живее во сиромаштија, апелираше денеска (14 мај) министерот за социјална политика, демографија и млади Фатмир Лимани.
„Ова е значително повисока стапка од општата стапка на сиромаштија кај вкупното население. Особено ранливи се Ромите, децата што живеат со еден родител и оние што живеат во семејства со три и повеќе деца. Податоците за сиромаштијата кај децата се алармантни и укажуваат на потребата од итни и ефективни мерки“, изјави Лимани во обраќањето на конференцијата „Гаранција за деца - инструмент за искоренување на сиромаштијата и исклученоста на децата“.
Осврнувајќи се на Националниот акциски план за правата на децата 2025 - 2029, министерот потенцираше дека еден од приоритетите е зголемување за 15 отсто на паричните додатоци наменети за децата. Тој вели дека се работи на проширување на капацитетите за предучилишно обазование за повеќе деца да имаат можност да посетуваат градинка и на тој начин да обезбедат подобри шанси за успех во следните нивоа на образование.
„За да ги надминеме предизвиците, Владата со поддршка на ЕУ и УНИЦЕФ изработи Национален акциски план за правата на децата 2025 - 2029 кој е во завршна фаза на усвојување. Еден од приоритетите на Планот е намалување на детската сиромаштија, вклучително и воведување на Европската детска гаранција, како и зголемување за 15 отсто на паричните додатоци наменети за децата“, додаде Лимани.
Друга важна мерка предвидена со Националниот акциски план е формирање комисија за координирање на сите активности и политики која ќе го следи исполнувањето на обврските од Конвенцијата за правата на детето и ќе подготвува извештаи до меѓународните и регионалните механизми за човекови права.
Се очекува Комисијата да ја подобри меѓусекторската соработка која е неопходна за справување со комплексните потреби на децата и за развивање интегрирани услуги за нив како составен дел на гаранцијата за деца.
Мицкоски: Бидете трпеливи, наскоро ќе номинираме нови имиња по излегувањето на крилото на Таравари
Премиерот Христијан Мицкоски рече дека во периодот што следува ќе бидат номинирани нови имиња на местото на Алијанса за Албанците, крилото на Арбен Таравари, откако излегоа од владината коалиција.
„На редовниот Извршен комитет синоќа разговаравме за актуелната економска и политичка состојба во државата. Членовите на ИК ме овластија во периодот којшто следи да номинираме нови имиња кои ќе ги заменат имињата на оние коишто одлучија да одат во прегратките на Али Ахмети и на ДУИ односно од партијата на Арбен Таравари“, рече Мицкоски по поставувањето камен-темелник на училишна спортска сала во село Долно Лисиче, Општина Аеродром.
Мицкоски, одговарајќи на новинарско пршање дали ресорите што ги напушти Таравари ќе останат во Вреди или ќе се поделат, рече дека во наредниот период ќе бидат појасни многу работи, повика на трпеливост и изрази уверување дека ќе биде постигнат договор.
Синоќа на седницата Извршниот комитет на ВМРО-ДПМНЕ, на која се дискутираше за актуелната економска и политичка состојба во државата, го овласти лидерот на партијата и претседател на Владата Христијан Мицкоски, да предложи нови кадровски решенија на позициите што досега ѝ припаѓаа на Алијансата за Албанците, по одлуката на Арбен Таравари да ја напушти владината коалиција.
„Овој чекор на Таравари беше оценето дека претставува уште еден доказ дека групата на заштитници на криминалот и корупцијата добива нови редови – уште една маска падна, уште една илузија беше разоткриена. На политичката сцена се појави нов, добро координиран марионетски квартет: СДС, Алијанса, ДУИ и Левица – различни имиња, но ист газда. Различни маски, но ист сценарист“, информираа вчеравечер од партијата.
Вчера министерот за надворешни работи и надворешна трговија Тимчо Муцунски истакна дека доколку Арбен Таравари има намера да соработува со ДУИ, тогаш ВМРО-ДПМНЕ нема да соработува со него, додавајќи дека владиното мнозинство е стабилно.
Во понеделникот вечерта, по состанокот на Алијансата на Албанците, Арбен Таравари на прес-конференција изјави дека ја напуштаат владината коалицијата и дека одат во опозиција.
Според него, едногласна била одлуката во партијата на оваа средба на која беа партиските функционери и претседателите на ограноците. Тој тогаш рече дека се горди на промената во албанскиот политички блок која ја направиле после две децении, но оти промените не биле доволни.
Таравари најави дека ќе има уште една средба со премиерот Христијан Мицкоски.
Трамп се сретна со новиот лидер на Сирија откако вети укинување на санкциите
Претседателот на Соединетите Држави, Доналд Трамп, се сретна со новиот привремен претседател на Сирија, Ахмад ал-Шара, поранешен бунтовнички лидер кој помина години во затвор на американските сили откако беше заробен во Ирак.
Средбата се одржа пред Трамп да го заврши престојот во Саудиска Арабија и да отпатува за Катар, како дел од турнејата на Блискиот Исток, која ќе вклучува и посета на Обединетите Арапски Емирати.
Трамп и ал-Шара се сретнаа зад затворени врати, додека на новинарите не им беше дозволено да присуствуваат, објави Асошиејтед Прес.
Ал-Шара беше прогласен за претседател на Сирија во јануари, еден месец по ненадејната офанзива на бунтовничките групи предводени од Хајат Тахрир ал-Шам (ХТС), која тој ја водеше. Оваа организација е прогласена за терористичка организација од страна на САД. Тие сили го освоија Дамаск и го завршија 54-годишното владеење на семејството Асад.
Трамп, пред состанокот, изјави дека донел одлука да се сретне со ал-Шара по охрабрувањето од саудискиот принц Мохамед бин Салман и турскиот претседател Реџеп Таип Ердоган. Тој, исто така, вети дека ќе ги укине долгогодишните санкции против Сирија.
„Во Сирија има нова влада која се надеваме дека ќе може да ја стабилизира земјата и да го одржи мирот“, рече Трамп во говор посветен на надворешна политика, каде што објави укинување на санкциите што беа во сила од 2011 година.
„Тоа е она што сакаме да го видиме во Сирија“, додаде Трамп.
Порано познат под псевдонимот Абу Мохамед ал-Голани, ал-Шара беше со Ал Каеда против американските сили во Ирак по инвазијата предводена од САД.
Тој сè уште се соочува со потерница за обвиненија за тероризам во Ирак. САД еднаш понудија награда од 10 милиони долари за информации за неговата локација, поради неговите врски со Ал Каеда.
Ал-Шара се врати во Сирија по избувнувањето на конфликтот во 2011 година и го презеде водството на огранокот на Ал Каеда познат како Фронт Нусра. Подоцна тој ја преименуваше групата во Хајат Тахрир ал-Шам и формално ги прекина врските со Ал Каеда.
Санкциите против Сирија датираат од времето на Башар ал-Асад, кој беше соборен од власт во декември. Тие имааа намера сериозно да ја оштетат економијата на неговиот режим.
Двете американски администрации - претходната администрација на претседателот Џо Бајден и сегашната администрација на претседателот Трамп - ги задржаа овие санкции дури и по соборувањето на Асад, додека ја оценуваа позицијата на Ал-Шара, која негираше понатамошни врски со Ал Каеда.
ЕУ го одобри 17-тиот пакет санкции против Русија
ЕУ во среда (14 мај) одобри нов пакет санкции за Русија, со кои се ограничува „нафтената флота во сенка“, додека Европа се заканува со понатамошни казни ако Москва не се согласи на примирје во Украина.
Новите мерки против Кремљ, или 17-тиот круг санкции од ЕУ од целосната инвазија на Русија во Украина во 2022 година, беа во подготовка пред европските лидери да го издадат својот последен ултиматум до Москва во врска со мировните напори предводени од САД.
Дипломатите што ги претставуваат 27-те земји-членки на ЕУ го одобрија пакетот на состанок во Брисел.
Пакетот - кој треба официјално да биде усвоен во вторник - вклучува ставање на црна листа на околу 200 танкери за нафта што се користат за заобиколување на ограничувањата за извоз на руска нафта.
Компаниите и во земјите како Виетнам, Србија и Турција, обвинети за помагање во снабдувањето со стока на руската војска, исто така, ќе се соочат со ограничувања.
Десетици руски функционери ќе бидат додадени на речиси 2400 лица и субјекти кои веќе се соочуваат со забрани за визи и замрзнување на средства.
Пакетот, исто така, носи санкции за руски поединци поради кибер напади, злоупотреба на човекови права и саботажи во Европа.
Службениците признаваат дека најновата рунда санкции против Москва е релативно ограничена во споредба со претходните пакети, бидејќи на ЕУ ѝ е потешко да се договори за целите.
Понатаму, покрај овие мерки, лидерите на ЕУ ѝ се заканија на Русија со „масовни санкции“, ако не се согласи со предлогот за 30-дневен прекин на огнот поддржан од САД.
Германскиот канцелар Фридрих Мерц во вторник ја предупреди Русија дека ќе се соочи со дополнителни европски санкции ако нема „вистински напредок“ оваа недела кон мирот во Украина.
Мерц го повика рускиот претседател Владимир Путин да разговара за прекин на огнот во Украина и мир со претседателот Володимир Зеленски во четврток (15 мај) во Истанбул.
Американскиот претседател Доналд Трамп изјави дека би можел да присуствува на разговорите во Турција, ако Путин и Зеленски седнат на маса, но досега нема индикации од Кремљ дека Путин ќе присуствува на тие разговори.
Зеленски вели дека ќе се сретне со Путин само ако има договор за прекин на огнот
Претседателот Володимир Зеленски наводно рекол дека ќе се сретне само со својот руски колега, Владимир Путин, а не и со други руски претставници на мировните преговори закажани за Истанбул оваа недела, на кои американскиот претседател Доналд Трамп изјави дека можеби ќе присуствува.
Понудата на Трамп да се придружи на разговорите меѓу Украина и Русија закажани за 15 мај предизвика повик меѓу американски и европски дипломати кои продолжуваат да бараат пат што води кон крај на војната во Украина.
„Не го потценувајте четвртокот во Турција“, им рече Трамп на новинарите во Белата куќа пред да замине во официјална посета на Саудиска Арабија, Обединетите Арапски Емирати и Катар, осврнувајќи се на потенцијалните разговори во Истанбул.
„Размислував да одам. Не знам каде ќе бидам во четврток. Имам толку многу состаноци... Постои можност, претпоставувам, ако мислам дека таму можат да се случат некои работи“, рече Трамп.
Зеленски рече дека е подготвен да се сретне со Путин во Истанбул на 15 мај.
Нема одговор од Кремљ на неговата понуда, а Москва сè уште не го коментирала предлогот на Трамп дека тој може да се приклучи на разговорите, што доведе до шпекулации за тоа кој од Русија всушност ќе биде присутен во Турција.
Ројтерс цитираше советник на украинскиот претседател на 13 мај, кој рече дека Зеленски, кој исто така предложи целосен и безусловен прекин на огнот во обид да се постигне целосен мировен договор, ќе се сретне само со Путин, а не со други членови на руската делегација.
Во минатото, Путин го доведуваше во прашање легитимитетот на Зеленски.
„Ако Путин се појави во Истанбул, тоа веќе би бил пораз. Самото влегување во преговори со Зеленски би сигнализирало пораз за него - особено ако пристигне под притисок, на самит на кој очигледно никогаш не планирал да присуствува“, изјави Александар Фридман, руски политички набљудувач и историчар, за „Курент тајм“ на 13 мај.
„И најверојатно, Русија нема да може да понуди ништо што би ги задоволило Американците, Украинците или Европејците. Тоа би можело да го означи крајот на преговорите во целост“, додаде Фридман.
Во знак на дипломатски притисок за Путин и Зеленски да седнат на преговарачка маса, американскиот државен секретар Марко Рубио доцна на 12 мај разговараше телефонски со министрите за надворешни работи на Франција, Германија, Полска, Велика Британија, Украина и шефицата за надворешна политика на ЕУ, Каја Калас.
„Лидерите разговараа за патот напред кон прекин на огнот и патот кон мир во Украина“, се вели во соопштението на американскиот Стејт департмент.
Претходно на 12 мај, сојузниците на Украина изразија сомневање во врска со изгледите за разговори и околу тоа дали Путин е сериозен во врска со мирот.
Трамп пристигна во Саудиска Арабија на своето прво големо меѓународно патување во вториот мандат
Американскиот претседател Доналд Трамп пристигна во Саудиска Арабија за да ја започне четиридневната посета на регионот на Персискиот Залив, фокусирајќи се повеќе на економските договори, отколку на безбедносните кризи, од војната во Газа до заканата од ескалација на нуклеарната програма на Иран.
Тој со себе донесе група моќни американски бизнис лидери, вклучувајќи го и извршниот директор на „Тесла“ и советник на Трамп, Елон Маск. Прво ќе го посети Ријад, местото каде што се одржува Саудиско-американскиот инвестициски форум, а потоа во среда (14 мај) ќе ги посети Катар и во четврток (15 мај) Обединетите Арапски Емирати, но нема да го посети Израел.
„Иако енергијата останува камен-темелник на нашите односи, инвестициските и деловните можности во кралството се проширија и се зголемија многу, многу пати“, рече саудискиот министер за инвестиции, Халид ал-Фалих, отворајќи го форумот.
„Како резултат на тоа кога Саудијците и Американците се здружуваат, се случуваат многу добри работи, честопати се случуваат големи работи кога тие заеднички потфати ќе се реализираат“, рече тој пред пристигнувањето на Трамп.
Саудиско-американскиот инвестициски форум се отвори со видео на кое се прикажани орли и соколи, славејќи ја долгата историја меѓу Соединетите Држави и кралството.
Саудиска Арабија и САД одржуваат силни врски со децении, врз основа на цврст договор според кој кралството снабдува нафта, а САД обезбедуваат безбедност.
Саудиски борбени авиони Ф-15 го опкружуваа „Ер Форс Уан“ од двете страни, летајќи во непосредна близина за да се обезбеди безбедно пристигнување на Доналд Трамп во Саудиска Арабија,пишува „Волстрит џурнал“.
Трамп, исто така, рече дека може да отпатува во Турција во четврток за потенцијални разговори лице в лице меѓу рускиот претседател Владимир Путин и украинскиот претседател Володимир Зеленски за војната во Украина.
Второто патување на Трамп во странство откако се врати на претседателската функција (првото беше во Рим за погребот на папата Франциск) доаѓа во време на геополитички тензии.
Покрај притисокот за решавање на ситуацијата во Украина, неговата администрација се залага за нов механизам за помош за Газа по 19 месеци војна и го повикува израелскиот премиер Бенјамин Нетанјаху да прифати нов договор за прекин на огнот.
Во текот на викендот, американските и иранските преговарачи се состанаа во Оман за да разговараат за потенцијален договор за ограничување на нуклеарната програма на Иран. Трамп се закани со воена акција против Иран доколку дипломатските мерки не успеат.
Освен евентуалното патување во Турција, тие теми не се во фокусот на посетата на Трамп на Блискиот Исток, како што е моментално планирано.
Се очекува САД, Саудиска Арабија, Катар и ОАЕ да објават инвестиции што би можеле да достигнат трилиони долари. Саудиска Арабија веќе се обврза да инвестира 600 милијарди долари во Соединетите Држави во текот на следните четири години во јануари, но Трамп рече дека ќе бара трилион.
Државниот секретар и советник за национална безбедност Марко Рубио и министерот за одбрана Пит Хегсет патуваат со претседателот. Се очекува Трамп да ѝ понуди на Саудиска Арабија пакет оружје во вредност од над 100 милијарди долари, изјавија извори за Ројтерс. Ова би можело да вклучува низа напредни оружја, вклучувајќи транспортни авиони C-130.
Се очекува САД и Саудиска Арабија да ја избегнат темата за нормализирање на односите меѓу Ријад и Израел, изјавија изворите за Ројтерс, иако тоа е најтрајната геополитичка цел на Трамп во регионот.
Пратеникот на Трамп за Блискиот Исток, Стив Виткоф, минатата недела изјави дека очекува напредок во претстојното проширување на Абрахамовите договори, серија договори посредувани од Трамп во неговиот прв мандат во кои арапските држави, вклучувајќи ги ОАЕ, Бахреин, Судан и Мароко, го признаа Израел.
Но, противењето на Нетанјаху на трајно завршување на војната во Газа или создавање палестинска држава го прави малку веројатен напредокот во слични разговори со Ријад.
Втората и третата посета на Трамп, во Катар и ОАЕ, се очекува да се фокусираат и на економски прашања. Исто така се очекува катарското кралско семејство да му подари на Трамп луксузен авион „Боинг 747-8“ кој ќе биде опремен за употреба како „Ер Форс Уан“, аранжман што привлече внимание од експертите за етика.
Се очекува Трамп да го донира авионот на својата претседателска библиотека за употреба по завршувањето на неговиот мандат.
Дванаесет години затвор за возачот кој ја прегази Фросина
Дванаесет години затвор доби Васил Јованов, кој пред пет месеци на булеварот „Партизански одреди“ ја прегази младата Фросина Кулакова. Тој е обвинет за кривичното дело „Тешки дела против безбедноста на луѓето и имотот во сообраќајот“. Јованов доби и забрана за управување возило во траење од пет години.
Видно вознемирен и незадоволен од пресудата, таткото на Фросина, ја напушти судницата извикувајќи „Судот - мафија“. Мајката и сестрата на Фросина останаа во судницата до крајот на читањето на пресудата. Тие носеа маички на кои пишува „Правда за Фросина“.
Родителите на Фросина побараа максимална казна за сторителот, односно 20 години.
Судијката Снежана Марковска образложи дека Судот, ја ценел како отежителна околност при одмерување на казната на обвинетиот, загубата на млад човечки живот, но и поранешното „деликвентно“ однесување на обвинетиот.
Судот исто така утврдил и неколку отворени прекршочни постапки за обвинетиот Јованов.
Адвокатот Сашко Дуковски, бранител на Васил Јованов, рече дека ќе се жалат до Апелација на 12-годишната затворска казна. Според него, сите вакви случаи се казнувале со помали казни, па и тој бара истата да се намали.
„Бидејќи признавме вина, очекувана беше осудителна пресуда. Ваква пресуда не е во согласност со воспоставената пракса. Иста ваква сообраќајка, во 2019 година, на истото место, завршена е со правосилно со 3,5 години затвор. Сетете се на пресудата во Велес, само со еден прекршок повеќе – правосилно заврши со осум години. Само за тоа преговарам. Не може од овој настан да се спроведува нова казнена политика. Сметам дека не е ценето во доволна мера признанието на вина“, рече Дуковски.
Според Обвинителството изречена е казна затвор која што во историјата на овој суд досега не била изречена.
„Денешниот ден за Обвинителството е поголема победа затоа што беше изречена казна затвор која што во историјата на овој суд, за ова кривично дело, и кога станува збор за една жртва, не била досега изречена, а сметајќи на висината од 12 години казна затвор, сепак Обвинителството го задржува правото на жалба и да бара и повисока казна затвор“, изјави обвинителот Александар Марковски по објавувањето на пресудата.
Обвинителот посочи дека станува збор за трагичен настан каде што нема простор ниту за славје, ниту за разочараност.
Како што беше речено во образложението на пресудата „обвинетиот Васил Јованов на 29 јануари 2025 година, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на лице место“.
Во завршен збор пред Судот минатата недела, обвинетиот Васил Јованов, призна вина и изрази каење за случајот.
Инаку Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.
Обвинението се однесува на периодот од 04.11.2022 до 30.01.2025 година, во кој Зоран Јованов дозволувал на својот син Васил Јованов да управува патничко моторно возило „Пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Кулакова.
По трагичната смрт на Фросина, граѓаните се обединија во борба за правда и безбедни улици, а протестите станаа глас на семејствата на сите жртви. Граѓанското движење “Кој е следен“одржа неколку протести и побара конкретни реформи во правосудството.
Само на булеварот „Партизански одреди“ во изминатите години загинаа неколку млади луѓе.
Во 2015 година, на истиот булевар, беше прегазена студентката Фросина Цековска од страна на 26-годишен возач кој управувал под дејство на алкохол и со пречекорена брзина.
Исто така, во јануари 2022 година, 24-годишната Викторија Николова од Радовиш беше прегазена на истиот булевар, кај трговскиот центар Сити мол, од 22-годишен возач кој, според Обвинителството, исто така возел со поголема брзина од дозволената.
Според Кривичниот законик, најтешката казна за вакви случаи, кога има тешко повредени или загинати лица, е до 20 години затвор, а минималната казна е четири.
САД ја укинуваат привремената заштита за илјадници Авганистанци
На 12 мај, Министерството за внатрешна безбедност на САД објави крај на привремената заштита за некои Авганистанци кои живеат во Соединетите Држави, наведувајќи ги подобрените безбедносни и економски услови во Авганистан.
„Ги разгледавме условите во Авганистан со нашите меѓуагенциски партнери и тие не ги исполнуваат условите за статус на привремена заштита (TPS)“, изјави министерката за внатрешна безбедност Кристи Ноем.
„Авганистан има подобрена безбедносна ситуација, а стабилизирачката економија повеќе не ги спречува да се вратат во својата татковина“, додаде таа.
Ноем рече дека статусот на привремена заштита за Авганистан ќе истече на 20 мај, а отповикувањето ќе стапи на сила на 12 јули.
Статусот на привремена заштита е наменет за странски државјани кои не можат да се вратат дома поради војна, природни катастрофи или друг „итен“ услов.
Во соопштението се наведува дека Ноем утврдила дека „генерално, има значителни подобрувања во безбедносната и економската состојба, па затоа барањето за враќање на авганистанските граѓани во Авганистан не претставува закана за нивната лична безбедност поради тековниот вооружен конфликт или вонредните и привремените услови“.
Ноем беше цитирана и во изјавата дека укинувањето на статусот на привремена заштита е во национален интерес на Соединетите Држави „бидејќи евиденцијата покажува дека има приматели кои се под истрага за измама и загрозување на нашата јавна безбедност и националната безбедност“.
Според непрофитната организација AfghanEvac, околу 11000 Авганистанци моментално се опфатени со статус на привремена заштита во Соединетите Држави.
„Одлуката за укинување на статусот на привремена заштита за Авганистан не се базира на реалноста - таа се базира на политиката. Не постои функционален систем за азил. Сè уште има убиства, произволни апсења и континуирани кршења на човековите права, особено врз жените и етничките малцинства“, рече Шон ВанДајвер, претседател на AfghanEvac и додаде:
„Она што администрацијата го направи денес е предавство на луѓето кои ги ризикуваа своите животи за Америка, градеа животи тука и веруваа во нашите ветувања.“
Поранешниот претседател Џо Бајден ја продолжи заштитата за граѓаните на неколку земји во јануари. Претседателот Доналд Трамп презеде чекори за укинување на статусот на привремена заштита за граѓаните на други земји, вклучувајќи ги Хаити и Венецуела, како дел од пошироката акција против имиграцијата.
Алијансата за Албанците на Таравари оди во опозиција
Лидерот на Алијанса за Албанците, Арбен Таравари, објави дека највисоките раководни органи вечерва донеле одлука партијата да излезе од владината коалиција.
Централното претседателство и претседателите на ограноците, одлучија да одат во опозиција, објави Таравари по состанокот.
„Се враќаме меѓу граѓаните, на локалните избори во октомври ќе имаме многу подобар резултат“, рече Таравари и додаде дека промените што ги ветивме не ги испорачавме за што граѓаните не критикуваат.
"Промените што ги ветивме не ги испорачавме за што граѓаните не критикуваат. Затоа решивме да се вратиме кај граѓанинот. Да побараме од нив доверба во октомври за локалните избори. Денеска констатиравме дека доколку има недоверба меѓу членовите на Владата, тогаш треба да излеземе", рече Таравари.
Тој истакна дека незадоволството кај албанскиот електорат е големо посебно поради Балансерот и европскиот пат. Таравари рече дека Албанците се жалат дека третманот бил полош од порано.
Неодамна министерот за животна средина и вицепремиер Изет Меџити и лидерот на Демократското движење од коалицијата Вреди изјави дека очекува Таравари исто како што ја напушти коалицијата „Влен“ за претстојните локални избори, така да ја напушти и Владата и му порача дека „не може и да соработува со ДУИ и да биде дел од Владата“.
Алијансата за Албанците предводена од Таравари реши на претстојните локални избори да настапат со свои листи за советници. По оваа одлука неговите коалициските партии во ВРЕДИ одлучија коалицијата да стане партија, но без Алијансата.
Таравари се состана и со премиерот Христијан Мицковски, а најавена е и нова средба.
Премиерот додаде дека со или без Таравари во Владата, таа е стабилна, цврста и со големо мнозинство.
Македонија 2025: Нулта толеранција на корупцијата, пет отсто економски раст и ефикасна администрација
Врз основа на првичните индикатори, реални се шансите во првиот квартал економскиот раст на државата да биде меѓу 3,5 и 4 отсто и да бидеме еден од најдобрите во Европа, истакна премиерот Христијан Мицкоски на првиот панел од Самитот Македонија 2025, што се одржува од денеска (12 мај) во Скопје.
Според него, ако состојбата во европската економија, особено во автомобилската индустрија се подобри, тогаш има шанси за уште повисоки перформанси што ќе се движат меѓу пет и шест проценти.
Премиерот типува на Македонија како голема крстосница во која, како што рече, се испреплетуваат коридорите 8, 10 и 11 што е, дополни, многу важно за јужното крило на НАТО и затоа нашите идни напори ќе бидат насочени кон интензивен развој на инфраструктурата.
„Имаме потенцијал и со перформансите сме пред сите други. Првата година од мандатот беше многу тешка и полна со предизвици зашто ни требаше да го сопреме слободниот пад со кои се соочуваше државата и нереално е да почнуваме со реформи кога се уште решаваме на основни, суштествени проблеми“, нагласи Мицкоски.
Во априлскиот извештај на Светска Банка пак се предвидува раст од 2,6 проценти на македонската економија годинава, 2,7 отсто во 2026, и 2,8 проценти во 2027 година.
Извршната директорка Никица Мојсоска-Блажески во воведното обраќање на Самитот рече дека корупцијата е најголем проблем во државата, но земјава се уште нема консензус каква економија сака. Бизнисмените и натаму се перцепираат како профитери, а не како креатори на работни места.
„Има прогрес во Македонија, но другите растат побрзо од нас. Сакаме пазарна економија, а бараме државен интервенционизам, работниците бараат повисоки плати, но не зборуваат за подобрување на нивните вештини. Лесно е да се обвинуваат соседите, Владата, но сите придинесуваме за тоа колку ќе просперира државата. Оваа Влада почна болни реформи, верувам дека гледа малку подалеку од изборниот циклус“, истакна Мојсоска-Блажески.
Таа додаде дека нулта толеранција на корупцијата, пет отсто економски раст годишно, пристап до ЕУ и ефикасна јавна администрација е визијата на Македонија 2025 за домашната економија.
На Самитот Македонија 2025 присуствуваат преку 500 гости - економски експерти, директори на тинк-тенкови, поранешни и сегашни премиери и министри од земјава и од странство, како и експерти од научната заедница од повеќе држави.
Во фокусот се забрзување на економскиот раст, дигитализација, вештачка интелигенција, иновации за економија подготвена за иднината, усогласување на економскиот потенцијал со паметни инвестиции, улогата на дијаспората во националниот раст.
Учесниците ќе дискутираат и за децентрализација на моќта - иднината на парите, медиумите и дигиталната слобода, за редефинирање стратегии, за странски директни инвестиции, како и за образование на иднината - обликување лидери, мислители и иноватори.
Мултимедија
Најпосетени
Што треба да знаете