Вести
Бајден го потпиша законот за 61 милијарда долари воена помош за Украина
Претседателот на Соединетите Американски Држави (САД), Џо Бајден, денеска, 24 април, го потпиша законот за воена помош во вредност од 61 милијарда долари за Украина.
Тој рече дека испораките на оружје ќе почнат „во наредните часови“.
Бајден, говорејќи од Белата куќа по потпишувањето на нацрт-законот, рече дека пакетот покажува дека САД и сојузниците целосно ја поддржуваат Украина во нејзината борба против инвазивните руски сили и дека одобрението за помош е важно да покаже дека „ние се спротивставуваме на Путин (Владимир Путин, претседател на Русија)“.
Претходно, Сенатот одобри четири нацрт-закони усвоени од Домот во саботата, откако републиканските лидери ненадејно го сменија курсот минатата недела и дозволија гласање за 95 милијарди долари главно воена помош за Украина, Израел, Тајван и американските индо-пацифички партнери.
Четири закони беа комбинирани во еден пакет во Сенатот.
Најголемиот пакет обезбедува 61 милијарда долари критично потребни средства за Украина, вториот обезбедува 26 милијарди долари за Израел и хуманитарна помош за цивилите во конфликтните зони ширум светот, а третиот обезбедува 8,1 милијарди долари за „спротивставување на комунистичка Кина“ во Индо-Пацификот.
Четвртиот, кој Домот го додаде во пакетот минатата недела, вклучува потенцијална забрана за апликацијата за социјални медиуми, под контрола на Кина, ТикТок, мерки за пренос на запленетите руски средства во Украина и нови санкции кон Иран.
Водачот на демократското мнозинство, Чак Шумер, ги повика своите колеги од Сенатот за време на дебатата да го усвојат нацрт-законот додека Киев се бори да ја задржи својата територија поради недостигот на оружје и муниција предизвикан во голем дел од доцнењето на американската помош.
Шумер на прес-конференцијата, откако беше изгласана помошта за Украина, рече дека тоа е „една од најважните мерки што Конгресот ги усвоил во многу долго време за да ја заштити американската безбедност и безбедноста на западната демократија“.
Тој рече дека му оставил порака на украинскиот претседател Володимир Зеленски на 23 април во која му кажал: „Во ред, го направивме тоа. Сега победи во борбата“.
Многу од гласовите против законот дојдоа од републиканците тесно поврзани со поранешниот американски претседател Доналд Трамп. Републиканците рекоа дека се противат на нацрт-законот делумно затоа што не се однесува на никакви безбедносни прашања на САД, особено зајакнување на границата меѓу САД и Мексико.
Пакетот вклучува противвоздушна муниција и големо количество артилериски куршуми, како и оклопни возила и друго оружје. Американските власти велат дека дел од оружјето брзо ќе биде доставено на бојното поле.
Во телефонскиот разговор со Зеленски на 22 април, Бајден вети дека Вашингтон „брзо ќе обезбеди значителни нови пакети безбедносна помош за да се задоволат итните потреби на Украина на бојното поле и во воздушната одбрана“.
Соочен со очекуваната испорака на оружје од САД и другите сојузници на Украина, рускиот министер за одбрана Сергеј Шојгу рече дека неговите сили ќе го зголемат воздушното бомбардирање на Украина.
Интензивните руски напади врз украинските градови однесоа голем број човечки животи и предизвикаа огромна штета на веќе оштетената енергетска инфраструктура во земјата по повеќе од две години војна.
види ги сите денешни вести
Италијанскиот фудбал пред нов финансиски предизвик
Италијанската влада планира да формира регулаторно тело кое ќе ги надгледува финансиите на професионалните спортски клубови. Овој план во понеделникот (на 6 мај) предизвика јавен спор со шефот на италијанскиот олимписки комитет (CONI) и други спортски работници.
Регулаторот ќе има надлежност да го надгледува „економското и финансиското управување“ на клубовите во спортови како што се фудбалот и кошарката за да се осигура дека тие се и здрави и одржливи, се вели во нацрт-владините предлози во кои имаше увид новинската агенција Ројтерс.
Предлозите се слични на британските, каде се планира да се назначи регулатор за англискиот фудбал. Британскиот план се уште го разгледуваат пратениците.
Италијанската фудбалска федерација (ФИГЦ) ќе разговара за тоа како да одговори на предлогот на посебен состанок во понеделник навечер, изјави официјален претставник.
Спортските работници во Италија се загрижени дека мерките би можеле да ги прекршат правилата за да се спречи политичко мешање во спортот.
„Имам сериозни сомневања дека овој предлог ќе биде прифатен од меѓународните спортски тела“, рече претседател на италијанскиот олимпски комитет Џовани Малаго во интервју за весникот La Repubblica.
„Ако не, ризикуваме да се залажуваме на светската сцена и, за жал, тоа не би било првпат една италијанска влада да се најде во таква позиција“, додаде тој.
Министерот за спорт Андреа Абоди возврати, велејќи дека има јасен простор за подобрување во начинот на кој се управуваат особено фудбалските клубови.
„Штета е што не се крена истата врева кога даночните долгови за над 100 милиони евра за професионалните клубови во првите три дивизии беа отпишани само во последните две години“, изјави тој за италијанското радио Раи.
Мерките се очекува да бидат дел од поширокиот спортски декрет што ќе го претстави владата кон крајот на овој месец.
Русија најави вежба за тактичка нуклеарна подготвеност
Руското министерството за одбрана на 6 мај објави дека планира вежби со тактичко нуклеарно оружје. Ова соопштение доаѓа откако Велика Британија и Франција излегоа со изјави кои се чини дека покажуваат зголемена вклученост во повеќе од 2-годишниот конфликт со Украина.
Русија, лута поради, како што вели, „провокативните изјави“ од Западот, планира да спроведе воени вежби за да се осигура дека е подготвена да користи тактичко нуклеарно оружје.
Откако Москва ја започна својата целосна инвазија на Украина во февруари 2022 година, односите меѓу Русија и Западот се влошија на најниско ниво од крајот на Студената војна, при што западните сојузници на Киев ја дадоа својата поддршка зад борбата на Украина за одбивање на убедливо супериорните руски сили.
„Со цел да се зголеми подготвеноста на нестратегиските нуклеарни сили за извршување борбени мисии, Генералштабот започна со подготовки за одржување вежби во блиска иднина со ракетни формации на Јужниот воен округ со вклучување на авијацијата, како и силите на морнарицата“, се вели во соопштението на руското Министерство за одбрана на Телеграм.
Во соопштението не се наведува дали проектилите ќе бидат опремени со нуклеарни боеви глави.
„За време на вежбата ќе се спроведат сет активности за вежбање на подготовка и употреба на нестратешко нуклеарно оружје“, се вели во соопштението и се додава дека вежбата ќе се спроведе по наредба на рускиот претседател Владимир Путин.
Улогата на стратешкото нуклеарно оружје е да ги погоди непријателските цели далеку од линијата на фронтот, додека тактичкото нуклеарно оружје е дизајнирано да се користи на боиштата.
Вежбата има за цел да ја зголеми способноста на руската војска „да го обезбеди територијалниот интегритет и суверенитет на руската држава како одговор на провокативните изјави и заканите на одделни западни функционери против Руската Федерација“, се вели во соопштението, без да се наведат повеќе детали.
Минатата недела францускиот претседател Емануел Макрон ја повтори изјавата дека неговата земја не може да ја исклучи можноста за испраќање војници во Украина за да и помогнат во војната.
Во меѓувреме, минатата недела властите во Обединетото Кралство се чини дека му дадоа зелено светло на Киев да користи оружје со долг дострел испратено во Украина за да напаѓа цели во Русија.
Хамас: Напад врз Рафа е „опасна ескалација што ќе има последици“
Повикот на Израел до цивилите во делови на Рафа да се евакуираат пред очекуваната офанзива е „опасна ескалација што ќе има последици“, изјави за новинската агенција Ројтерес вискиот фунционер на Хамас, која САД и Европската унија ја сметаат за терористичка група, Сами Абу Зухру.
Израелските одбранбени сили (ИДФ) денеска повикаа на евакуација на Рафа пред планираната воена операција во градот.
„Почнуваме операција со ограничен опсег за привремено евакуирање на жителите на источен Рафа“, изјави портпаролот на Израелските одбранбени сили.
Израеската војска ги повикаа жителите на источниот дел на градот на границата со Египет да се преселат во кампот Ал-Маваси на Медитеранот неколку километри северно. Според портпаролот на Израелските одбранбени сили, се проценува дека се погодени околу 100.000 луѓе. Тие биле информирани преку СМС порака, телефон, летоци и преку медиуми на арапски јазик.
Луѓето треба да одат во „проширена хуманитарна област“ во областа Ал-Маваси. Таму има храна, вода и лекови, рече портпаролот на Израелсите одбранбени сили. Армијата постави теренски болници. Портпаролот не посочи колку време имаат луѓето да се евакуираат.
Тој нагласи дека доставувањето хуманитарна помош за населението ќе продолжи непречено за време на операцијата за евакуација.
Седум месеци од војната против Хамас, Израел се заканува дека ќе изврши упад во Рафа, за кој вели дека има илјадници борци на Хамас и потенцијално десетици заложници.
Убиен во бомбашки напад е руски наводен мачител на украински затвореници
Главната разузнавачка управа на украинското Министерство за одбрана соопшти дека вработен во руската поправна колонија во Бердјанск, окупиран од Москва, кој бил вмешан во наводното мачење на Украинците е „елиминиран“.
Без да преземе директна одговорност, Управата за разузнавање соопшти дека автомобилот на Евгениј Ананевски експлодирал утрото на 5 мај.
„Како резултат на експлозијата, Евгениј Ананевски, кој беше вклучен во тортурата на украинските затвореници, беше елиминиран“, е наведено во кусото соопштение од украинската разузнавачка служба.
Според инспекторите, на 5 мај непознато лице подметнало рачно изработена експлозивна направа под неговиот автомобил, каде што експлодирала.
Рускиот истражен комитет ја потврди смртта на вработен во поправната колонија во експлозија на автомобил во Бердјанск во областа Запорожје, без да го именува.
Обиди за убиства на службеници кои соработуваат со Русија на територијата на Украина се пријавени повеќе од еднаш. Украина директно не презема одговорност за нападите. Некои од функционерите назначени од Русија загинаа.
Во март годинава во Бердјанск, како резултат на експлозија на автомобил загина член на изборната комисија формирана од руските власти. Според истрагата, утрото на 6 март под автомобилот на „член на изборна изборна комисија со право на глас била поставена рачно изработена експлозивна направа“. Кога една жена влегла во автомобил паркиран во близина на куќа на улицата Херцен во градот Бердјанск, бомбата експлодирала.
Израелската армија нареди евакуација пред операцијата во Рафа
Израелската војска им наредила на Палестинците кои живеат во населбите во Источен Рафа, во близина на оградата со Израел, да се евакуираат од областа, јавуваат израелските медиуми.
Радиото на израелската армија соопшти дека наредбата дошла пред „воен напад“ и дека на Палестинците им било кажано да се движат кон камповите за раселени лица во областите Кан Јунис и Ал-Маваси.
Според израелските одбранбени сили (ИДФ), станува збор за операција со „ограничен опсег“.
На околу 100.000 луѓе им е наредено да се евакуираат, изјави портпаролот на израелските одбранбени сили. Тој посочи дека војската нема да постави распоред за евакуација на Рафах и дека ќе изврши „оперативни проценки“.
Канцеларијата на ОН за координација на хуманитарни прашања (OCHA) претходно соопшти дека израелскиот копнен напад врз Рафа ќе ги доведе во опасност животите на стотици илјади жители на Газа и ќе им нанесе голем удар на хуманитарните активности на целата палестинска територија.
Израел се заканува дека ќе изврши копнен напад врз Хамас во Рафа, каде што се засолниле речиси милион луѓе.
„Тоа би можело да биде масакр на цивили и неверојатен удар за хуманитарните операции во целиот Појас, бидејќи тие се управуваат главно од Рафа“, рече портпаролот на OCHA, Јенс Лаерке.
Претставник на Светската здравствена организација (СЗО) истакна дека е подготвен план во случај на копнен напад, кој вклучува нова полска болница, но предупреди и дека нема да биде доволно за да се спречат голем број жртви.
Украина приоритет во разговорите меѓу Макрон и Џинпинг
Францускиот претседател Емануел Макрон ќе се побара од кинескиот лидер Си Џинпинг да го искористи своето влијание за да ја придвижи Русија кон ставање крај на војната во Украина за време на дводневната државна посета на Франција.
Се очекува и двајцата лидери да разговараат за трговските спорови околу електричните автомобили, коњакот и козметиката.
Од кабинетот на Макрон соопшти дека разговорите за дипломатските напори за поддршка на Украина и притисокот врз Русија се главен приоритет за Франција.
Дискусиите ќе ги опфатат и Блискиот Исток, трговските прашања и глобалните предизвици, вклучително и климатските промени. Претседателот на Европската комисија ќе се приклучи на дел од состаноците за да се подигне пошироката загриженост на ЕУ.
Франција е првата станица на европското патување на Џинпинг со цел обнова на односите во време на глобални тензии. По Франција во понеделник и вторник, кинескиот лидер ќе се упати во Србија и Унгарија.
Рускиот претседател Владимир Путин неодамна објави дека планира да ја посети Кина овој месец.
Кина ќе присуствува на меѓународната конференција поддржана од Киев, закажана за средината на јуни во Швајцарија, на која ќе се разговара за изгледите за ставање крај на војната во Украина.
Изборен молк од полноќ
Изборната кампања завршува вечерва, на полноќ. Од вечерва е забрането политичко рекламирање за двојните избори- вториот круг од претседателските и изборите за пратеници кои ќе се одржат на 8 мај.
Денеска ќе се одржи и последниот ТВ дуел на двајцата претседателски кандидати Гордана Сиљановска Давкова и Стево Пендаровски, како и последните митинзи на политичките партии кои се во трка за пратенички места во Собранието. Молкот ќе трае до затворање на избирачките места на 8 мај во 19 часот.
Гласањето на седмите претседателски избори и единаесеттите парламентарни избори треба да се спроведе на 3.480 избирачки места во државата.
Во привиот круг од претседателските избори Гордана Сиљановска Давкова поддржана од коалицијата на ВМРО-ДПМНЕ освои 363. 085 гласови, додека нејзиниот противник Стево Пендаровски, освои 180.499 гласа.
Руски напад со беспилотни летала и артилерија врз украинскиот Суми
Русија го нападна украинскиот регион Суми со беспилотни летала и артилерија во текот на ноќта. Оваа информација ја соопштија украинските воздухопловни сили и воената администрација на североисточниот регион рано на 6 мај.
Според нивното соопштение регионот бил гранатиран осум пати, но нема жртви.
Воздухопловните сили соопштија дека собориле 12 од 13 беспилотни летала лансирани од Русија врз цели на енергетската инфраструктура во Суми.
Регионалната администрација соопшти дека снабдувањето со електрична енергија е привремено прекинато во Суми, Ромни и Охтирка.
Претходниот ден руските сили презедоа контрола над источниот украински град чија одбрана ја пробија пред околу две недели. Руското Министерство за одбрана соопшти дека војници од нејзината командна група Центар ја презеле контролата врз градот Очеретина во регионот Донецк, но посочија повеќе детали.
Сончев и топол ден
Денеска не очекува сончево време со мала до умерена локална облачност и со слаб до умерен ветер од јужен правец. Попладне во планинските региони ќе има услови за изолирана појава на краткотраен пороен дожд.
Температурите ќе се движат од 20 до максимални 26 степени.
Во Скопје сончево со мала облачност и со слаб ветер од јужен правец со максимална температура до 26 степен.
Во текот на утрешниот ден се очекува топло со мала до умерена облачност и изолирана појава на краткотраен пороен дожд со грмежи.
Израел тврди дека го затворил преминот за хуманитарна помош за Газа
Израел соопшти дека го затворил главниот граничен премин што се користи за доставување хуманитарна помош до Појасот Газа во неделата, 5 мај, велејќи дека бил цел на ракетен оган.
Израелската армија соопшти дека на преминот биле истрелани најмалку десет проектили, а неколку луѓе се ранети, пренесоа израелските медиуми, пишува АП.
Хамас, група која САД и Европската унија ја сметаат за терористичка група, тврди дека целта била на местото каде што се собрале војниците.
Детали за изворот на пожарот не беа објавени, но беше соопштено дека тој дошол од правец на блискиот премин Рафах, на границата со Египет.
Преминот Керем Шалом е главниот влез за испорака на хуманитарна помош за Палестинците во Газа.
Тој беше затворен во време кога Газа се соочува со хуманитарна криза поради недостиг на лекови и храна.
Истовремено со затворањето на граничниот премин, во неделата продолжија преговорите за прекин на конфликтот во Појасот Газа, но изгледите за постигнување договор се слаби.
Хамас го повторува своето барање за прекин на војната во замена за ослободување на заложниците, додека израелскиот премиер Бенјамин Нетанјаху цврсто го отфрла Војната во Појасот Газа започна откако Хамас го нападна Израел на 7 октомври минатата година, во која, според Според израелските податоци, 1.200 луѓе биле убиени, а 252 биле земени како заложници.
Според Министерството за здравство на Хамас, повеќе од 34.600 Палестинци се убиени во израелските напади.
Мултимедија
Најпосетени
Што треба да знаете