Се чини дека Турција се движи кон вториот круг од претседателските избори, откако претседателот Реџеп Таип Ердоган водеше пред опозицискиот ривал Кемал Киличдароглу на изборите во неделата, но не освои апсолутно мнозинство за да го продолжи 20-годишното владеење на земјата.
Ниту Ердоган, ниту Киличдароглу не го поминаа прагот од 50 отсто потребен за да се избегне вториот круг, кој најверојатно ќе се одржи на 28 мај, на избори кои се сметаат за клучни за Ердоган.
Претседателските избори ќе одлучат не само кој ќе ја води Турција, туку и дали таа ќе се врати на посекуларен, демократски пат, како ќе се справи со тешката криза на трошоците на животот и како ќе управува со клучните односи со Русија, Блискиот Исток и Западот.
Киличдароглу, кој рече дека ќе победи во вториот круг, ги повика поддржувачите да бидат трпеливи и ја обвини партијата на Ердоган дека се меша во пребројувањето и известувањето на резултатите.
Сепак, Ердоган се претстави подобро отколку што предвидуваа предизборните анкети, изгледајќи самоуверено и борбено додека им се обраќаше на поддржувачите.
„Водеме нашиот најблизок ривал со 2,6 милиони гласови. Очекуваме оваа бројка да се зголеми со официјалните резултати“, рече Ердоган.
Преброени 97 отсто од гласовите: 49,39 за Ердоган, 44,92 за Киличдароглу
Со преброени речиси 97 отсто од гласачките кутии, Ердоган води со 49,39 отсто од гласовите, а Киличдароглу со 44,92 отсто, јави државната новинска агенција Анадолу.
Врховниот изборен одбор на Турција му даде предност на Ердоган од 49,49 отсто по преброените 91,93 отсто од гласачките кутии.
Илјадници приврзаници на Ердоган се собраа во седиштето на партијата во Анкара, а од звучниците се слушаа партиски песни и вееја знамиња. Некои од нив танцуваа по улиците.
Досегашните резултати ја одразуваат длабоката поларизација на земјата на политичката сцена. Ако владејачката алијанса на Ердоган освои мнозинство во парламентот, тоа ќе му даде потенцијална предност во вториот круг од изборите.
Не излезе според анкетите
Предизборните анкети укажаа на многу тесна трка, но на Киличдароглу, кој ја предводи шестпартиската алијанса, му „даваа“ благо водство. Двете анкети во петокот покажаа дека тој е над прагот од 50 проценти.
Земјата со 85 милиони жители, која веќе се бори со вртоглаво растечката инфлација, сега се соочува со две недели неизвесност што може да ги расипе пазарите, при што аналитичарите очекуваат промени на локалната валута и берзата.
„Следните две недели веројатно ќе бидат најдолгите две недели во историјата на Турција. Би очекувал значителен крах на берзата во Истанбул и многу валутни флуктуации“, вели директорот на Стратешки советодавни услуги, Хакан Акбас.
„Ердоган ќе има предност во вториот круг на гласање, откако неговата алијанса помина подобро од опозицискиот сојуз“, додаде тој.
Третиот претседателски кандидат Синан Оган имаше 5,3 отсто од гласовите. Тој би можел да биде одлучувачки во вториот круг во зависност од тоа кој кандидат ќе го поддржи, велат аналитичарите.
Меѓусебни обвинувања
Опозицијата рече дека Партијата на правдата и развојот (АК) на Ердоган ги одложува целосните резултати со поднесување приговори.
Киличдароглу, шеф на Републиканската народна партија (ЦХП), во претходниот говор рече дека партијата на Ердоган ја „уништува волјата на Турција“ со тоа што се спротивставува на пребројувањето на повеќе од 1.000 гласачки кутии.
„Не можете да го спречите тоа што ќе се случи со приговори. Никогаш нема да дозволиме ова да стане остварен факт“, рече тој.
