Вести
Пет дена рок доби цементарница „Усје“ да го замени мазутот со гас
Министерството за животна средина соопшти дека по вонредните инспекциски надзори во Цементарницата Усје се забележува надминување на дозволен азотен оксид во воздухот кој изнесувал 711, 9 милиграми на метар кубен од котларата за парно греење која користи мазут, додека измерените параметри од двете печки за азотен оксид (NOx), сулфур диоксид (SO2) и прашина се во рамки на дозволени концентрации според А-интегрираната еколошка дозвола.
Државниот инспекторат за животна средина денеска издаде решение со кое на „Цементарница УСЈЕ“ и се наложува во двата котли за парно греење со моќност од 4,2 мегавати со кои се загрева фабриката да се користи природен гас како гориво, согласно добиената А-Интегрирана еколошка дозвола и да изведе соодветен приклучок за вршење мерење на емисии со акредитирана метода. Рокот за реализирање на задолжението е пет дена.
„Да изврши мерење на емисија на гасови од емитерот – оџакот на парниот котел кој ќе биде во функција, за што рокот на реализирање на задолжението е 10 денови откако ќе биде користен природен гас како гориво, се наведува во решението на Државниот инспекторат.
„ На 4 јануари 2023 година извршени се мерења на емисија на гасови од оџакот на парниот котел со моќност од 4,2 мегавати кој користи мазут како гориво“, образложија од Министерството.
Градоначалничката на Скопје Данела Арсовска најави кривична пријава за загадување на воздухот кон „Цементарница УСЈЕ. По нејзината најава од компанијата во писмена реакција ги отфрлија како неточни нејзините тврдења. Сепак, најавија дека ќе ги имплементираат препораките на Државниот инспекторат за животна средина, од каде објавија за серизно надминување на испуст на азотни оксиди од Котларата за загревање на просториите. За ова, како што појаснија од Инспекторатот, казната изнесува 180.000-200.000 евра.
Од Цементарница велат дека вонредната контрола на 3 и 4 јануари, потврдила дека емисиите од производниот процес во „Цементарница УСЈЕ“ се пониски од дозволените гранични вредности, ама дополнуваат дека поради енергетската криза и нарушеното снабдување со природен гас, за загревање на просториите употребувале мазут кој им бил дозволен енергенс согласно А-Интегрираната еколошка дозвола.
„При оваа вонредна контрола, кај парниот котел, кој не е дел од производниот процес и е исклучиво наменет за загревање на просториите, беше регистрирано отстапување кај еден параметар од мерењата. Компанијата веднаш ќе ги имплементира препораките на Инспекторатот и ќе направи замена на енергенсот со природен гас,“ велат од „Цементарницата“.
Ако има пропуст ќе има и казна, но ние не поднесуваме кривична пријава против никого, изјави министерот за животна средина Насер Нуредини во однос на изнесените тврдења на градоначалничката Данела Арсовска дека цементарницата „Титан усје“ го загадувала воздухот повеќе од дозволеното.
„Резултатите ги имаме, сега ние го разгледуваме извшетајот и ќе продолжиме со тие процедури што се законски потребни и ако има некоја пропуст, ќе има и санкции на таа фирма. Целосно, транспарентно ќе го презентираме, кога извештајот ќе биде разгледан и комисијата ќе го има разгледано целиот“, истакна министерот.
Скопје во периодот околу Новогодишните и Божиќните празници се соочуваше со високо ниво на аерозагаденост и неколкудневна густа магла, што го врати градот на листата на најазагадени градови во светот, според апликациите кои собираат вакви информации.
види ги сите денешни вести
По Унгарија, Полска на чело на ЕУ
Полска од Унгарија од денеска го презема ротирачкото претседавање со Советот на ЕУ, а фокус на ова претседавање ќе биде безбедноста.
Токму слоганоѕт „Безбедност, Европа!“, Полска го промовира како мотив во нејзиното шестмесечно претседателство во текот на кое ќе ги поддржува активностите за зајакнување на европската безбедност во нејзините седум димензии: надворешна, внатрешна, информативна, економска, енергетска, храна и здравје.
„За Европа ова е време на искушенија и одлуки. Европската унија мора да се заштити себеси и своите граѓани и да се грижи за своето непосредно соседство, а на Европејците мора да им даде чувство на сигурност и изгледи за развој“, се вели во програмата на полското претседателство.
При презентацијата на приоритетите на претседавањето со Полска, полскиот премиер, Доналд Туск, кој инаку беше претседател на Европскиот совет од 2014 до 2019 година, изјави дека Варшава ќе работи на овие седум сфери на безбедноста во услови на период на предизвици за ЕУ поврзани со „кризите во Украина и на Блискиот Исток и случувањата во Грузија“.
Шефот на полската дипломатија Радослав Сикорски, кој засега е единствениот министер за надворешни работи на една европска земја кој по вторпат ќе претседава со Советот на ЕУ по претседавањето во првата половина на 2011 година, оцени дека ова полско претседателство ќе се одвива во многу сложен меѓународен амбиент, кој се карактеризира со војната во Украина, растечки геополитички тензии, особено на Блискиот Исток, зголемени хибридни закани и ширењето на дезинформации.
Кога станува збор за проширувањето, се очекува, Полска особено да посветени внимание на пристапниот процес на Украина, која за време на белгиското претседавање со ЕУ во првата половина на 2023 година доби одлука за старт на преговорите и веќе го започна скрининг процесот. Како што најави претседателката на Европската комисија, Урсула фон дер Лајен на декемврискиот Самит на Унијата, многу веројатно Украина ќе ги започне преговорите по првиот Кластер – Основни вредности во првите месеци од 2025 година.
Извори во полската Мисија при Унијата изјавија дека Полска се надева оти за време на ова нејзино претседавање со Советот на ЕУ, Украина ќе отвори барем еден кластер, дека Молдавија исто така ќе ги започне преговарачкиот процес по кластери, а дека Албанија, Србија и Црна Гора ќе отворат преговори по нови поглавја.
Полското претседателство доаѓа во првите 100 дена од новата Европска комисија и првите месеци од мандатот на новоизбраниот американски претседател Доналд Трамп.
Полска посочува дека нејзина задача ќе биде да го зачува единството на ЕУ во односите со САД и смета дека е во добра позиција за оваа улога, имајќи ги предвид добрите билатерални односи со Вашингтон и фактот што, без разлика која партија е на власт, отсекогаш имала јасна трансатлантска ориентација. Меѓу членките на НАТО е една од оние кои најмногу трошат за одбрана.
Во однос на надворешната безбедност, полската влада ја нагласува потребата од зајакнување на европската одбрана, која треба да биде комплементарна на НАТО. Тие вклучуваат повисоки трошоци за одбрана, зајакнување на одбранбената индустрија и решавање на празнините во одбранбените способности.
Внатрешната безбедност вклучува барање нови сеопфатни решенија за прашањето на миграцијата, обезбедување на надворешните граници, намалување на илегалниот влез, поефикасно враќање на илегалните мигранти и одговор на хибридните закани.
Во рамките на информациската безбедност, Унијата и нејзините членки треба да ги препознаат и отстранат дезинформациите и странската манипулација, пренесуваат медиумите во регионот.
За енергетска безбедност, од суштинско значење е да се обезбеди сигурност на снабдувањето со енергија во доволни количини и по пристапни цени. Иако по руската агресија врз Украина, ЕУ го намали увозот на руски гас и нафта за околу две третини, Полска најавува дека ќе промовира целосно напуштање на увозот на енергија од Русија.
Неопходно е да се зајакне позицијата на земјоделците во синџирот на снабдување и да се обезбеди конкурентно и еластично земјоделство кое обезбедува безбедна храна за своето население, вели полското претседателство, зборувајќи за безбедноста на храната.
Во областа на здравствената безбедност, полското претседателство ќе се фокусира на дигиталната трансформација на здравството и потребата да се подобри безбедноста на снабдувањето со лекови во ЕУ, особено од перспектива на пациентите.
Машко бебе е првото во 2025 година
На Универзитетската клиника за гинекологија и акушерство во Скопје во 00.01 часот се роди првото бебе во Македонија.
„Се роди здраво машко бебе, тешко 3190 грама и долго 50 сантиметри, информираат од Универзитетската клиника за гинекологија и акушерство.
Мајката на новороденчето е Сања Талевски.
Азиските земји зачекорија во 2025 година
Полноќ отчука во Кина, вклучително и во Хонгконг, Сингапур, Малезија и Филипините, со што овие земји влегоа во Новата година.
Милиони луѓе се собраа од Пекинг до Куала Лумпур за да го прослават крајот на оваа и влезот во 2025 година.
Во Јапонија и Јужна Кореја полноќ беше дочекана со ѕвона, а граѓаните традиционално се собраа и во храмот Тодаи-џи во јапонската престолнина Токио.
Прославите во Јужна Кореја беа ограничени, а во некои делови откажани поради периодот на жалост по авионската несреќа во неделата (29 декември) во која загинаа 179 луѓе.
Повеќе од милион луѓе го гледаа спектакуларниот огномет над Сиднејскиот мост, со кој се одбележа почетокот на 2025 година во Австралија.
Жителите на пацифичкиот остров Киритимати, пак, први во светот ја дочекаа новата 2025 година.
Полноќ на овој остров беше кога по средноевропско време беше 11 часот.
Киритимати е дел од островската држава Кирибати, во средишниот дел на Тихиот Океан.
Оваа територија е позната и како Божиќен остров.
15 минути подоцна, Новата година беше прославена и на островот Чатам, на источниот брег на Нов Зеланд.
Покрај во Нов Зеланд, Новата година во исто време беше дочекана и во Токелау, Самоа, Тонга, одредени делови на Антарктикот, на островите Феникс, додека во австралискиот град Сиднеј во тек е голема прослава и огномет како дел од прославата на новогодишната ноќ.
САД воведоа санкции кон Иран и Русија поради мешање во американските избори
САД воведоа санкции за ентитети во Иран и Русија, обвинувајќи ги дека се обидувале да се мешаат во американските избори оваа година, соопшти американското Министерство за финансии на 31 декември.
Како што наведува Министерството, ентитетите – филијала на корпусот на иранската револуционерна гарда (ИРГЦ) и организација поврзана со руската воена разузнавачка агенција (ГРУ) – имале за цел „да ги разгорат општествено-политичките тензии и да влијаат врз американскиот електорат за време на изборите во САД во 2024 година“, објави Ројтерс.
Според соопштението, операциите за влијание се планирале „најмалку од 2023 година“.
Се додава и дека Центарот за геополитички експертизи (ЦГЕ) со седиште во Москва ширел дезинформации за кандидатите на изборите и насочувал и субвенционирал создавање лажни слики, видеа и аудиоснимки.
Министерството за финансии, исто така, соопшти дека овој Центар манипулирал со видеоснимка за да произведе „неосновани наводи во врска со кандидат за потпретседател во 2024 година“, без да прецизира кој кандидат.
На санкционираната листа е и директорот на ЦГЕ, Валери Коровин.
Со санкциите се замрзнуваат сите средства што овие субјекти ги имаат на американско тло и генерално им се забранува на Американците да склучуваат бизнис зделки со нив.
Американската влада претходно оваа година соопшти дека иранските власти се обидуваат да предизвикаат немири и да ја поткопаат довербата во американските демократски институции, користејќи „социјален инженеринг и други напори за да добијат пристап до поединци со директен пристап во претседателските кампањи на двете партии“.
Украина тврди дека првпат соборила руска цел со помош на поморски дрон
Украина тврди дека за првпат еден од нејзините поморски дронови соборил руска воена цел во воздухот во период кога се случуваат интензивни напади од двете страни.
Воената разузнавачка служба на Украина (ГУР) на 31 декември преку Телеграм објави дека поморски дрон Магура В5, опремен со ракети, соборил хеликоптер Ми-8 кај западниот брег на Крим.
ГУР, исто така, објави дека бил погоден и втор руски хеликоптер, но тој успеал да се врати во руската воздухопловна база.
„За првпат во светот војниците на ГУР уништија воздушна цел со помош на поморскиот дрон Магура В5“, соопшти разузнавачката служба.
Тврдењето на ГУР доаѓа неколку часа откако сирените за воздушен напад се активираа ширум Украина додека Русија изврши уште еден голем воздушен напад низ целата земја, при што се слушнаа експлозии во некои области на Киев.
Сирените се активираа во регионите Чернихив, Суми, Полтава, Луганск, Дњепропетровск, Запорожје, Киев, Черкаси, Кировохрад и Винице, додека локалните медиуми објавија дека за време на нападот биле користени крстаречки и балистички ракети.
Воената администрација на Киев извести дека три згради и два автомобили во областа Дарницки биле оштетени од урнатини, додека системите за противвоздушна одбрана ги одвратиле руските ракетни напади.
Шефот на воената управа на Киев, Серхи Попко, изјави дека нема жртви.
Во исто време, шефот на градската управа во Шостка во регионот Суми, Микола Нога изјави дека се оштетени 12 станбени згради и две образовни институции. Нема информации за можни жртви.
Пакети оружје, во вредност од милијарди долари, на пат кон Украина
Украински беспилотни летала, пак, нападнаа складиште за нафта во областа Јарцево во руската област Смоленск.
Новите напади доаѓаат ден откако Соединетите Држави ветија дополнителна безбедносна помош за Украина за да помогнат во зајакнувањето на нејзината одбрана долж линијата на фронтот.
Белата куќа вети дополнителен пакет од 1,25 милијарди американски долари за украинската војска и пакет од 1,22 милијарди американски долари од Иницијатива за безбедносна помош за Украина.
Неколку часа подоцна, Министерството за финансии објави посебна исплата на 3,4 милијарди долари за Украина како директна буџетска поддршка.
Најавите следуваат додека пред да заврши мандатот на претседателот Џо Бајден следниот месец.
Бајден вети дека ќе продолжи да ја зголемува поддршката, но пакетот најверојатно ќе биде последниот донесен за време на неговата администрација поради загриженоста дека новоизбраниот претседател Доналд Трамп значително ќе го намали или запре снабдувањето со оружје за Украина со цел да го притисне Киев да преговара за мировен договор со Русија.
Трамп треба да биде инаугуриран на 20 јануари.
Русија со недели ги турка назад украинските трупи на фронтот и на 29 декември тврдејќи дека зазела уште еден град во украинскиот регион Доњецк додека продолжува со својата долга крвава акција против стратешкиот, но речиси уништен логистички центар Покровск, на југот од земјата.
Руското Министерство за одбрана на 30 декември соопшти дека нивните сили го зазеле Новотројитске, на околу 16 километри јужно од Покровск.
Украинската војска не коментираше конкретно за Новотројицке, но рече дека руските трупи извршиле 133 напади на нејзините позиции, од кои повеќето биле во областа Покровск.
Сиљановска-Давкова помилува седум осуденици за Нова година
Претседателката Гордана Сиљановска-Давкова, по повод новогодишните празници донесе одлука за помилување на седум осудени лица, соопштија од нејзиниот кабинет.
Од нив, едно лице е потполно помилувано, а шестмина делумно се ослободени од понатамошно извршување на казната затвор.
„Шестемина осудени лица се помилувани во траење од 3 месеци, а едно лице 3 месеци и 4 дена, што кај него доведе до потполно ослободување од извршување на казната затвор“, пишува во соопштението од кабинетот на Сиљановска-Давкова.
Во соопштението не се наведени имињата на помилуваните.
Ова е прво помилување на претседателката по формирањето на новата Комисија за помилување кој беше комплетирана во ноември. Дел од неа се: проф. д-р Оливер Бачановиќ, проф. д-р Александра Груевска Дракулевски, проф. д-р Блерта Ахмеди, проф. д-р Драгана Батиќ, проф. д-р Афет Мамути и м-р Доан Сулејманоски.
Претходниот состав на Комисијата која беше конституирана кон крајот на јули си поднесе колективна оставка, откако дел од помилувањата објавени за 23 Октомври - Денот на македонската револуционерна борба, предизвикаа реакции во јавноста поради некои имиња кои се најдоа на листата.
Таков беше случајот со затвореникот А.Р. кој по помилувањето беше пуштен од затворот „Идризово“ на условна казна, каде издржуваше казна од една година и три месеци заради нелегално поседување на оружје. Веднаш потоа беше уапсен како осомничен за обид за убиство во скопски Чаир, инцидент што се случил десетина дена пред помилувањето.
Помилувањата од страна на претседателот по повод Нова година и по повод поголеми државни празници, како што е и 2 Август – Илинден, се традиционални во Северна Македонија.
ЕУ: Изборите во Косово треба да бидат транспарентни и без политичко мешање
Процесот на верификација на политичките партии на претстојните избори во Косово треба да се заснова на правни стандарди и процедури во согласност со актуелниот закон, а не на политички преференци, порача Европската Унија (ЕУ).
„Додека Косово и неговите граѓани живеат во динамична демократија, неверификувањето на политичка партија од политички причини, наместо од правни процедури, би претставувало сериозен чекор назад“, пишува во соопштението на прес-службата на ЕУ.
Во него се наведува дека сите кандидати кои ги исполнуваат условите треба да имаат можност да учествуваат на слободни и фер избори, во целосна согласност со косовските закони.
„ЕУ нагласува дека изборниот процес треба да биде транспарентен, кредибилен и без политичко мешање“, се потенцира во соопштението.
ЕУ очекува дека Централната изборна комисија (ЦИК), чија улога во следењето на изборите е клучна, ќе ги користи сите применливи механизми за да обезбеди инклузивен, кредибилен и транспарентен изборен процес, овозможувајќи им на косовските гласачи јасно да го изразат својот избор.
„Одговорноста за зачувување на демократските гаранции е на сите членови на ЦИК, без разлика на нивната политичка определба. Ваквото фундаментално прашање не смее да се политизира и да се користи како ставка во предизборната кампања“, порачува ЕУ.
На 9 февруари во Косово ќе се одржат парламентарни избори.
Српската листа најави дека ќе учествува на овие избори откако изминатиот период ги бојкотираше политичките процеси на Косово.
На 23 декември ЦИК одби да ја верификува изборната листа на Српската листа, најголемата партија на Србите на Косово која има поддршка од властите во Србија. На верификувањето се противеа претставниците во ЦИК од редовите на владејачката косовска партија, Движењето Самоопределување, бидејќи, велат, станува збор за партија која не го признава Косово како држава.
Во своето решение објавено на 25 декември, Избирачкиот совет за жалби и претставки наведе дека Управата за регистрација, верификација и финансиска контрола на политичките субјекти препорачала проверка на Српската листа во согласност со Законот за општи избори и другите правила пропишани од ЦИК.
Според одлуката на Избирачкиот совет за жалби и претставки, Српската листа ги исполнила критериумите откако доставила „политичка изјава“, листа на кандидати и пријава за секој кандидат.
Меѓутоа, на 30 декември, заменик министерот за правда Блерим Салах, во име на Движењето Самоопределување, поднел жалба до Врховниот суд за ваквата одлука.
Врховниот суд ја одби жалбата и даде налог Српската листа да биде верификувана.
САД, Германија и ЕУ изразија загриженост поради одлуката на ЦИК да не ја верификува изборната листа на Српската листа.
Жителите на островот Киритимати први ја дочекаа Новата година
Жителите на пацифичкиот остров Киритимати први во светот ја дочекаа новата 2025 година.
Полноќ на овој остров беше кога по средноевропско време беше 11 часот.
Киритимати е дел од островската држава Кирибати, во средишниот дел на Тихиот Океан.
Оваа територија е позната и како Божиќен остров.
Новата година беше прославена 15 минути подоцна на островот Чатам, на источниот брег на Нов Зеланд.
Покрај во Нов Зеланд, Новата година во исто време беше дочекана и во Токелау, Самоа, Тонга, одредени делови на Антарктикот, на островите Феникс, додека во австралискиот град Сиднеј во тек е голема прослава и огномет како дел од прославата на новогодишната ноќ.
Мицкоски: Проблемот во ЈСП не е со нафтата туку е административен
Во Град Скопје денеска (31 декември) попладне сообраќаат само 40-тина автобуси на Јавното сообраќајно претпријатие (ЈСП) поради недостиг на нафта, но до крајот на денот се очекува бројот да се зголеми бидејќи фирмата „Пуцко Петрол“ ќе достави гориво, јави државната агенција МИА.
Сепак, премиерот Христијан Мицкоски, изнесе со тврдење дека повлекувањето на дел од автобусите не е поврзано со немање нафта туку во прашање е административен проблем.
„Од тоа коешто можам да го добијам како информација е дека раководството на ЈСП не доаѓа на работа. Административен е проблемот, не е проблемот дека нема количини на нафта туку дека е административен проблемот. И апелирам и до раководството на ЈСП и до раководството на Градот Скопје да ги надминат меѓусебните несогласувања за да можат скопјани да го користат јавниот превоз“, рече Мицкоски.
МИА претходно објави дека до крајот на денот ЈСП треба да добие 40-тина тони нафта кои ќе бидат доволни до божиќните празници.
Информациите за недостигот на нафта ги посочија и од Синдикатот на ЈСП. Претседателот на Синдикатот, Миќо Стојановски, изјави дека е точно оти уште синоќа било реагирано и дел од автобусите биле повлечени за да се заштети на нафта.
„Извршивме еден вид притисок и имаме информација дека нафта ќе пристигне за неколку часови“, изјави тој за МИА.
Стојановски исто така посочи дека денеска бил продолжен и мандатот на в.д. директорот на ЈСП, Драги Кушевски.
Во однос на беспатниот превоз за студентите, кој беше ставен под прашање откако изминатиот период билетарниците на ЈСП не им ги продолжуваа годишните карти, од Владата денеска соопштија дека донеле одлука да префрлат пари.
„Еве 120 милиони како Влада ќе префрлиме уште веднаш, би рекол во текот на денешниот ден ако е тоа возможно. Треба сепак прво да излезе одлуката. Оваа недела ќе добијат 120 милиони денари“, соопшти Мицкоски по денешната владина седница.
Претходно за продолжување на бесплатниот превоз реагираа и студентите. Од Универзитетското студентско собрание на Универзитетот „Св. Кирил и Методиј“, изјавија дека пратиле апел до Владата, Министерството за образование и наука, Советот на Град Скопје, градоначалничката Данела Арсовска и до ЈСП „Скопје“, за, „да се произнесат јавно дали се предвидени средства за бесплатен превоз на студентите во градот Скопје“.
Црна Гора го екстрадираше „кралот на криптовалутите“ во САД
Црна Гора го екстрадирала јужнокорејскиот државјанин Хјеонг До Квон во Соединетите Американски Држави (САД), соопшти црногорската полиција на 31 декември.
САД го бараа До Квон поради измама на пазарот на криптовалути во вредност од најмалку 40 милијарди долари.
„Денеска, на граничниот премин аеродром ’Подгорица‘, службениците на НЦБ Интерпол Подгорица, со поддршка на Специјалната полициска единица, го екстрадираа јужнокорејскиот државјанин Д.Х.К., по кого трагаа две држави, и тоа Јужна Кореја и САД“, пишува во соопштението од полицијата.
Оттаму потсетуваат дека До Квон беше уапсен во Црна Гора на 23 март 2023 година.
„Тој е предаден на надлежните органи на прогонот на САД и агентите на Федералното биро за истраги (ФБИ), а согласно решението на Министерството за правда на Црна Гора, заради водење кривична постапка во САД“, пишува во соопштението во кое се додава тој се товари за повеќе кривични дела.
Поради истото кривично дело До Квон беше баран од Јужна Кореја, но министерот за правда Бојан Божовиќ на 27 декември одлучи да го екстрадира во САД.
Тогаш тој објави дека „повеќето критериуми се во корист на барањето за екстрадиција во САД“, и дека биле земени предвид сериозноста на кривичните дела, местото на извршување, редоследот на поднесување на барањата, националноста на бараното лице, можноста за понатамошна екстрадиција во друга земја и други околности.
Т.н. „крал на криптовалутите“ До Квон, беше уапсен на аеродромот во Подгорица во март 2023 година со неговиот деловен партнер Чанг Џун, кога се обиделе да отпатуваат во Дубаи со фалсификувани пасоши.
Откако беа осудени на по четири месеци затвор, Чанг Џун во февруари беше екстрадиран во Јужна Кореја, а До Квон одлуката за екстрадиција ја чекаше во прифатилиштето за странци во Подгорица.
За тоа време беа донесени различни одлуки за барањата на двете земји за негова екстрадиција.
Низа судски одлуки
Судовите во Црна Гора за неговата екстрадиција одлучуваа осум пати во период од една година и девет месеци. Адвокатот на До Квон, Горан Родиќ, ова претходно во изјава за РСЕ го нарече „судси срам“.
Откако во февруари беше поништена одлуката на Вишиот суд за негова екстрадиција во САД, истиот суд во март одлучи да го екстрадира во Јужна Кореја, со образложение дека барањето за екстрадиција од оваа земја било примено пред американското.
Во август Врховниот суд објави дека се исполнети условите за екстрадиција и дека министерот за правда Бојан Божовиќ ќе одлучи во која земја ќе биде испорачан.
Во меѓувреме, во САД започна судењето на До Квон во негово отсуство.
Во април, судот во Њујорк ги прогласи Д Квон и неговата компанија „Тераформ лабс“ за виновни за граѓанска измама бидејќи, според американската Комисија за хартии од вредност, инвеститорите биле доведени во заблуда поради што изгубиле околу 40 милијарди долари.
Иако во граѓанска спогодба „Тераформ Лабс“ се согласи да плати околу 4,5 милијарди долари, САД не се откажаа од барањето за екстрадиција.
Во Јужна Кореја, пак, До Квон е обвинет за измама и кршење на законите за пазарот на капитал.
Според налогот за апсење издаден од локалните власти во септември минатата година, До Квон бил на црвена потерница од Интерпол по пропаѓањето на криптовалутите Тера и Луна и компанијата Тераформ Лабс, во која тој е косопственик.
Случајот До Квон и политичката сцена во Црна Гора
До Квон стана дел и од црногорската политичка сцена, бидејќи премиерот Милојко Спајиќ беше обвинет дека од него добивал донации за неговата партија „Движење Европа сега“.
Спајиќ за ова даде изјава во својство на граѓанин пред Специјалното државно обвинителство кое оформи предмет.
Документите на американската Комисија за хартии од вредност покажаа дека Спајиќ, како еден од првите инвеститори во компанијата на До Квон, „Термаформ Лабс“, како физичко лице, инвестирал 75.000 долари во таа компанија во 2018 година.
За обвинувањата дискутираше и Советот за безбедност пред изборите во јуни 2023 година, кој објави дека Спајиќ и До Квон се сретнале во Белград, во време кога јужнокорејскиот државјанин веќе бил по црвена потерница од Интерпол.
Адвокатот на Квон, Горан Родиќ, изјави дека тој е „увезен“ во Црна Гора за да биде злоупотребен за внатрешно-политички борби пред изборите.
Причината за доаѓањето на Квон во Црна Гора, како и неговиот престој во Србија, до ден денес не е разјаснета.
Мултимедија
Најпосетени
Што треба да знаете