Косовскиот премиер Албин Курти, денеска, 24 декември, обвини дека бизнисменот од северот на Косово, Милан Радоичиќ, дал наредба да се изврши нападот на каналот Ибар-Лепенац на 29 ноември, а по Србија како држава ја прозва дека стои зад финансирањето, планирањето и логистиката на нападот.

На прес-конференција, Курти рече дека овие тврдења ги базира на разузнавачки информации.

Според неговите зборови, поддршката што официјален Белград ја дава на, како што рече, „терористичката група на Милан Радоичиќ“, не може да се нарече поинаку, туку координација на државата Србија со оваа група за интензивирање на хибридната војна против Косово.

Курти презентираше хронологија од 15 напади во периодот од 20 јуни до 29 ноември годинава кои, според него, имале за цел да му наштетат на Косово „користејќи тероризам“. Како што рече, кулминацијата бил нападот на каналот Ибар-Лепенац.

Каналот беше нападнат на 29 ноември во селото Варага во општина Зубин Поток, општина со српско мнозинство на северот на Косово.

Косовската полиција соопшти дека нападот бил извршен со експлозив тежок до 20 килограми.

Видете и ова:

Вода на тензичната граница: Може ли Србија да го смени текот на Ибар?

Каналот Ибар-Лепенац преку езерото Ујман го снабдува со вода целиот север на Косово, регионите на Митровица, Приштина и околината, како и Косовската енергетска корпорација, за ладење на нејзините термоелектрани.

Курти изјави дека во повеќе наврати во текот на годинава Радоичиќ овластил луѓе да вршат напади во Косово.

Косовските власти го бараат Милан Радоичиќ откако тој призна дека го организирал и извршил нападот во Бањска во септември 2023 година.

Тогаш, група Срби ја нападна косовската полиција во селото Бањска во општина Звечан при што беше убиен еден полицаец.

Косово го окарактеризира овој напад како терористички акт и ја обвини Србија дека стои зад него, што Белград го негираше.

Милан Радоичиќ, поранешен политичар и бизнисмен од северот на Косово, е на црната листа на САД и Велика Британија поради обвинувања за корупција и организиран криминал.

Сообраќајот на Јутјуб во Русија во последните денови се намали на само 20 отсто од своето „нормално ниво“, изјави водечки руски експерт, опишувајќи ја ситуацијата како „де факто“ блокирање на платформата за споделување видеа.

Михаил Климарев, директор на непрофитно друштво за заштита на интернетот, на 23 декември на Телеграм напиша дека сообраќајот на Јутјуб во Русија паднал на една петтина од нивото на сообраќај во споредба со периодот пред властите наводно да почнат намерно да ја забавуваат услугата на оваа платформа во јули.

„Јутјуб де факто е блокиран во Русија“, рече тој.

Јутјуб, кој е во сопственост на Гугл, има десетици милиони корисници во Русија.

Видете и ова:

Загушување на Јутуб: Цензурата на Кремљ влегува во непознати води

Од јули, руските корисници на Јутјуб беа сведоци на масовни прекини и забавување на услугите.

Руските власти соопштија дека проблемите се предизвикани од неуспехот Гугл да ја надгради опремата и на тој начин да обезбеди пристап до услугите на компанијата во Русија.

Дел од критичарите, сепак, ја обвинуваат авторитарната влада во Москва дека намерно ја прекинала услугата за да ги спречи руските граѓани на Јутјуб да гледаат содржини во кои се критикуваат политиките на Кремљ.

Во јули, рускиот весник „Газета“ цитираше два извори блиски до администрацијата на претседателот Владимир Путин кои рекоа дека Москва планира да започне со блокирање на Јутјуб во септември.

Информативниот сајт „Медуза“ со седиште во ЕУ тогаш цитираше извор од руската телекомуникациска сфера кој тврдеше дека владата почнала да ја намалува брзината на платформата од 11 јули.

Видете и ова:

Русија го блокираше користењето на апликацијата Вибер

Од Јутјуб во август соопштија дека имаат информации оти некои луѓе во Русија не можат да пристапат до платформата, но дека проблемот не е предизвикан од никакво дејство или технички проблеми од страна на самата компанијата.

За време на неговата годишна прес-конференција на 19 декември, рускиот претседател Владимир Путин побара Гугл и Јутјуб да ги почитуваат руските закони и да не го користат интернетот како алатка за „постигнување на политичките цели на (американската) влада“.

Русија веќе блокираше одредени социјални мрежи како Фејсбук и Икс (поранешен Твитер).

Поради палењето на новогодишна елка во Сирија избувнаа протести што предизвика реакции и повици до новата исламистичка власт да преземе чекори за заштита на малцинствата, јавува Би-би-си.

На видео објавено на социјалните мрежи се гледа како гори дрво на централниот плоштад во Сукајлабија, град со мнозинско христијанско население во централна Сирија.

Хајат Тахрир ал-Шам (ХТС), главната исламистичка фракција што ја предводеше офанзивата во која беше соборен сирискиот претседател Башар ал-Асад, соопшти дека поради инцидентот биле приведени странски борци.

Претставниците на ХТС претходно ветија дека ќе ги заштитат правата и слободите на верските и етничките малцинства во Сирија.

На протестите излегоа илјадници демонстранти, и во Дамаск и во Сукејлабија.

Видете и ова:

За 15 дена, речиси 25000 сириски бегалци од Турција се вратиле дома

На видеото на социјалните мрежи, се гледа како двајца маскирани борци палат новогодишна елка една ноќ пред христијаните да го прослават Бадник, пренесува Би-би-си.

Од видеата објавени потоа, се забележува дека верски службеник од владејачката бунтовничка група ХТС ја уверува толпата народ во Сукајлабија дека дрвото ќе биде обновено.

Сирија е дом на многу етнички и религиозни групи, вклучувајќи Курди, Ерменци, Асирци, христијани… А, сунитски Арапи го сочинуваат мнозинството од муслиманското население.

Сирискиот претседател Башар ал-Асад ја напушти земјата во доцните часови на 8 декември, откако ХТС и нејзините сојузници, од кои некои се поврзани со Турција, во молскавична офанзива ги соборија владините сили.

Со 61 односно 62 гласа „за“ пратениците во Собранието на Северна Македонија попладнето на 24 декември ги изгласаа двете автентични толкувања со кои се отвора можноста да бидат отповикани амбасадорите кои пред да бидат испратени во мисија, не беа сослушани пред собраниската Комисија за надворешни работи.

Против гласаа само пет односно шест пратеници, повеќето од опозицискиот СДСМ.

Автентичните толкувања се однесуваат на два члена од Законот за надворешни работи, кои пред да бидат изгласани на денешната пленарна седница, на 2 декември беа усвоени на Законодавно-правната комисија.

Радио Слободна Европа пишуваше дека актуелната власт планира да врати амбасадори кои беа испратени од минатата влада предводена од СДСМ и ДУИ без да ги бранат тезите пред пратениците во Комисијата за надворешни работи. Неофицијално, во прашање се десетина амбасадори.

Видете и ова:

Собраниската комисија на став дека амбасадорите мора да бидат „сослушани“ пред пратениците

Едно од автентичните толкувања кое го донесе парламентарното мнозинство е дека „сослушувањето“ во Собранието е задолжително, а не протоколарно како што сметаше минатата власт.

„Одредбата од ставот 3 на членот 39 треба да се толкува така што презентирањето на своите согледувања на кандидатот за амбасадор, за односите со државата на приемот или меѓународната организација, пред надлежното работно тело на Собранието, за надворешна политика е законска обврска, без којашто не може да биде потпишан указ за поставување на амбасадор од страна на претседателот“, гласи едното автентично толкување.

Другото, пак, се однесува на членот 45 од Законот за надворешни работи односно на постапката за отповикување амбасадори. Според него, таква иницијатива може да покрене и Владата, на барање на министерот за надворешни работи.

Иницијатор на овие автентични толкувања беше пратеникот од ВМРО-ДПМНЕ, Бојан Стојаноски, кој претходно за РСЕ рече дека ако бидат усвоени, како што и се случи денеска, тие како пратеници би барале од МНР да се отповикаат амбасадорите што не биле „сослушани“.

Ваквите автентични толкувања од СДСМ беа протолкувани дека власта сака на „мала врата да создаде услов за разрешување амбасадори“.

„Ставот 3 во член 45 е многу јасен, дека претседателот ќе го отповика амбасадорот ако се исполни еден од трите услови, а иницијатива за отповикување може да покрене и Владата. Сега, со ова (автентично толкување), ние велиме, не мора да се исполни ниту еден од условите, а Владата или министрите може да предложат промена на кој било амбасадор. Навлегуваме во рушење на тој поредок и создаваме правна несигурност“, рече пратеникот и координатор на пратеничката група на СДСМ, Оливер Спасовски, на собраниската седница на 24 декември.

Бранењето на тезите од страна на амбасадорите пред пратениците претходната власт на СДСМ и ДУИ го прескокнуваше во неколку наврати во ситуации кога се соочуваше со блокада поради незакажување на седници на собраниската Комисија за надворешни работи од страна ВМРО-ДПМНЕ која како опозиција раководеше со ова тело. Претставниците на СДСМ и ДУИ беа на став дека „сослушувањето“ во парламентот не е задолжителен дел од процедурата.

Видете и ова:

Ќе бидат ли вратени амбасадорите што не беа „сослушани“ во Собранието?

Меѓу ваквите примери, беше случајот со амбасадорката на Северна Македонија во Бугарија, Агнеза Руси Поповска. За неа, како што сведочат и медиумските архиви, пет-шест месеци се чекаше да се закаже седница на Комисијата за надворешна политика од страна на тогашниот претседател на ова тело Антонијо Милошоски од ВМРО-ДПМНЕ.

Во истиот период во септември 2022, без бранење на тезите во парламентот, за амбасадор во Белгија замина и дипломатот од кариера Методија Белевски.

Од кабинетот на тогашниот претседател Стево Пендаровски, кој ги потпиша указите, тврдеа дека нема прескокнување на законската процедура односно дека законската обврска на амбасадорите била завршена со претставувањето на тезите пред Колегиумот на Министерството за надворешни работи.

И поранешниот министер за надворешни работи Бујар Османи во изјавите пред новинарите тврдеше дека тоа не е законска обврска туку повеќе да се покаже добра волја за инклузивност и вклучување на парламентот.

Рускиот суд денеска, 24 декември, го осуди американскиот државјанин Јуџин Спектор на 15 години затвор за „шпионажа“ во период кога на адреса на Москва стигнуваат обвинувања од неколку западни влади дека осудува странци за потоа да ги користи во преговори за размена на затвореници.

За обвиненијата со кои во Русија се соочи поранешниот директор на фармацевтска компанија малку се знае бидејќи судењето беше затворено за јавноста поради наводни доверливи материјали кои биле презентирани во текот на судскиот процес.

Овој случај доаѓа во време на влошување на односите меѓу Москва и Вашингтон, кои се на најниско ниво од крајот на Студената војна.

Москва е обвинета дека ги таргетира американските граѓани со тоа што ги приведува под лажни обвиненија за подоцна да ги користи во преговорите за екстрадиција на Русите кои се осудени за кривични дека во САД и други западни држави.

Најмалку десет американски државјани останаа зад решетки во Русија откако на 1 август беше направена размена на затвореници. Москва се согласи да ослободи 16 лица во замена за осум Руси кои биле осудени и отслужуваа затворски казни во САД и Европа.

Видете и ова:

Затворениците кои останаа во Русија по историската размена

„Иако размената на затвореници со право може да се смета за победа на дипломатијата, не треба набрзина да прогласиме дека правдата победи“, изјави по тогашната размена, Јулија Минеева, соработничка на „Чатам Хаус“.

Таа додаде дека „руската страна држела заложници за да ги ослободи своите убијци, шпиони и хакери, додека Западот донел тешка одлука во корист на слободата и животите на невините луѓе, не само на неговите, туку и на руските граѓани“.

За случајот со Спектор, државната руска новинска агенција ТАСС, наведе дека тој е роден во 1972 година во Санкт Петербург и се преселил во САД, каде што станал американски државјанин. Неговото руско име, според агенцијата, е Евгениј Миронович.

Спектор беше претседател на одборот на „Медполимерпром Груп“, фармацевтска компанија позната по својот фокус на развој на лекови за рак.

Тој во 2021 година беше осуден на четири години затвор за наводно примање мито. Во повтореното судење, казната му беше намалена за шест месеци.

Алсу Курмашева, Еван Гершкович и Пол Вилан - тројца американски државјани ослободени од Русија во најголемата размена на затвореници од Студената војна - беа пречекани од претседателот Џо Бајден и нивните семејства во воздухопловната база Ендрус кај Вашингтон.

Основното јавно обвинителство за гонење организиран криминал и корупција (ОЈО ГОКК) во мислење испратено до Основниот кривичен суд Скопје наведува дека за тројца од вкупно четворицата обвинети во предметот „Организаторите на 27 април“ треба да важи Законот за амнестија од 2018 година.

Предметот е поврзан со упадот во Собранието на 27 април 2017 година, настан познат во јавноста и како „крвавиот четврток“. Упадот беше со цел да се спречи избор на Талат Џафери за претседател на парламентот при што беа повредени пратеници и новинари.

Обвинети во „Организаторите на 27 април“ за делото терористичко загрозување на уставниот поредок и безбедноста се поранешниот претседател на Собранието од ВМРО-ДПМНЕ, Трајко Славевски, неговите сопартијци и поранешни министри Миле Јанакиески и Спиро Ристовски, како и бившиот директор на УБК, Владимир Атанасовски.

„Почитувајќи ги законските одредби и имајќи ги предвид ограничувањата при примената на законот, обвинителството темелно ги образложи причините за своето мислење со кое наоѓа дека кај тројца од обвинетите законските одредби налагаат амнестија, додека кај еден обвинет не може да се примени овој правен институт, бидејќи за истиот важат исклучоците од амнестијата која ја дал законодавецот со своето законско решение“, соопштија од ОЈО ГОКК.

Видете и ова:

Одложено судењето за „Организатори на 27 април“, Кривичен ќе одлучува по барањето за амнестија

Во соопштението испратено до медиумите, од Обвинителството не наведуваат за кои тројца сметаат дека треба да важи амнестијата.

Од ОЈО ГОКК наведуваат дека „барањето на одбраната на обвинетите за примена на законот не може да се спори, дотолку повеќе ако се земат предвид обвинетите и осудените што веќе се амнестирање“.

„Во секој случај имајќи ја предвид фазата во која се наоѓа оваа постапка, обвинителството е обврзано според Законот за амнестија да даде мислење, но судот ја носи конечната одлука по свое наоѓање и убедување како краен арбитер“, додаваат од ОЈО ГОКК.

Мислењето потенцираат го донеле врз основа на заземен став на стручниот колегиум на државното обвинителство во проширен состав.

За случајот „Организаторите на 27 април“ за денеска, 24 декември, беше закажано судско рочиште во Основниот кривичен суд но тоа се одложи за 23 јануари токму поради мислењето што го доставило Обвинителството откако обвинетите претходно поднесоа барање да бидат амнестирани.

Четворицата обвинети првостепено еднаш беа осудени во овој предмет и тоа: Вељановски на шест и пол години затвор, Јанакиески и Ристовски на по шест години и три месеци, а Атанасовски на шест години. Ваквата пресуда беше донесена во јули 2021, но во април минатата година Апелацискиот суд ја укина и го врати предметот на повторно судење.

Видете и ова:

Се бара начин осудените за „крвавиот четврток“ да излезат од затвор?

Инаку, како дел од организаторите во истрагата беа опфатени и поранешниот премиер Никола Груевски и ексразузнавачот Никола Бошковски, но бидејќи не беа достапни за органите за прогонот против нив не беше покренато обвинение заедно со останатите.

Покрај „Организаторите на 27 април“, за упадот во Собранието се водеше уште еден предмет во кој обвинетите се гонеа за терористичко загрозување на уставниот поредок и безбедноста.

Во него првично беа обвинети 33 лица од кои во пресрет на гласањето во парламентот за Преспанскиот договор со Закон за амнестија беа помилувани 15 лица меѓу кои и петмина пратеници од коалицијата на ВМРО-ДПМНЕ. За 16 лица кои беа осудени судот донесе пресуда со вкупно 188 години затвор.

Основниот кривичен суд Скопје одлучи дека притворот од 30 дена за поранешниот прв вицепремиер од ДУИ, Артан Груби, останува и тој ќе важи од денот кога тој ќе биде достапен за органите на прогонот.

Груби е осомничен во истрагата за набавката на ВЛТ апаратите во Државна лотарија. По него и по поранешниот директор на Лотарија, Перпарим Бајрами, на 18 декември беше распишана и меѓународна потерница.

30-дневен притвор и за двајцата беше одреден на 17 декември, по што Груби преку неговиот адвокат поднел жалба до судот.

„Кривичниот совет постапувајќи по жалба изјавена од одбраната на А.Г., недостапен за органите на прогон, против решението на судија на претходна постапка, донесе одлука со која ја одби жалбата на одбраната и го потврди решението на судија на претходна постапка“, соопштија од Кривичниот суд на 24 декември.

Во случајот со Државна лотарија, Груби и Бајрами се осомничени како соизвршители на делото проневера во службата, додека уште четири други лица како членови на комисијата за јавни набавки се гонат за злоупотреба на службената положба и овластувања.

Видете и ова:

Што сè може да влезе во истрагата за Државна лотарија?

Првичните информации во јавноста беа дека Груби се наоѓа во Косово, по што актуелниот вицепремиер Изет Меџити во интервју за албанската ТВ „Ора њуз“ изминатиот викенд кажа дека неговите информации се оти тој повеќе не е во Косово туку во Албанија.

Премиерот Христијан Мицкоски, пак, ден потоа, на 22 декември, рече дека не би шпекулирал каде се наоѓа поранешниот прв вицепремиер.

Истрагата за Државна лотарија следуваше откако претходно на 9 декември тој, заедно со неговото семејство и судијата Енвер Беџети завршија на црната листа на САД поради „вмешаност во значителна корупција преку примање мито за поткопување на судските процеси поврзани со кривичната пресуда на Сашо Мијалков, поранешен директор на Управата за безбедност и контраразузнавање“, кој исто така од претходно е под американски санкции.

Груби тогаш се огласи преку социјалните мрежи велејќи дека е „чист како солза“ и дека ќе се повлече од јавниот живот за да не биде ничиј политички товар.

Кога излегоа информациите дека тој е во бегство, повторно преку социјалните мрежи на 15 декември објави дека патувал за приватна посета и штом ги заврши обврските ќе се врати кај неговото семејство во Скопје.

Министерството за здравство во Газа, под раководство на Хамас, на 24 декември објави дека во изминатите 24 часа на палестинска територија загинале 21 лице, со што вкупниот број на загинати во војната достигна 45338.

Министерството, исто така, во соопштението наведе дека најмалку 107 764 луѓе се ранети во повеќе од 14 месеци војна меѓу Израел и Хамас, според АФП.

Хамас е прогласен за терористичка организација од страна на САД и ЕУ.

„Израелските војници наредија евакуација на индонезиска болница во северниот дел на Газа и многу пациенти, некои од нив пеш, пристигнаа во друга болница која е многу подалеку во градот Газа“, соопшти Министерството за здравство на територијата.

Видете и ова:

Лекари без граници го обвинија Израел за етничко чистење во Газа

Индонезиската болница е една од ретките болници во Појасот Газа која сè уште делумно функционира во областа која е под интензивен израелски воен напад речиси три месеци.

Израел соопшти дека операцијата во северниот дел на Газа околу болницата Беит Лахија, Беит Ханун и Џабалија била насочена кон милитантите на Хамас.

Официјални лица во трите болници досега ги одбиваа израелските наредби да ги евакуираат нивните установи или да ги остават пациентите без надзор.

Војната во Газа беше предизвикана од напад на Хамас врз Израел на 7 октомври 2023 година, во кој загинаа 1208 луѓе, главно цивили.

Судењето за случајот „Организатори на 27 април“ е одложено за 23 јануари откако на денешното судење Јавното обвинителство дало мислење за примена на Законот за амнестија за обвинетите Миле Јанакиески, Спиро Ристески и Трајко Вељановски, а истото не се однесува на обвинетиот Владимир Атанасовски.

Како што информираат од Кривичен суд за МИА, Судот мислењето го доставил до странките во постапката и рочиштето се одложило за 23 јануари до кога треба да одлучи по барањето на странките и мислењето на обвинителство.

Од Основното јавно обвинителство за гонење на организиран криминал и корупција за МИА потврдија дека го дале мислењето по упатства од Апелациониот суд кој во април годинава ја укина првостепената пресуда од јули 2021 година. Оттаму најавија повеќе детали во текот на денот.

Претходно, обвинетите кои се товарат дека сториле кривично дело „терористичко загрозување на уставниот поредок и безбедноста“, поднесоа барање до Основниот кривичен суд да одлучи по поднесокот за амнестија, без да се изведуваат материјални и вербални докази.

Видете и ова:

Апелација ја укина пресудата за „организаторите на 27 април“, предметот вратен на повторно судење

Претседателот на Судечкиот совет, судијата Илија Трпков, тогаш информираше дека во поднесокот обвинетите навеле дека е потребно Судот да донесе решение за примена на Законот за амнестија, бидејќи веќе има воспоставено таква пракса, односно Кривичниот совет во 2018 година има донесено решение за амнестија во тек на главна расправа, во фаза на доказна постапка, и не се чекало завршување на доказната постапка.

„Во прилог е доставено решение на Кривичен совет, Одделение за организиран криминал и корупција, од 20.12.2018 година со образложение дека решението било донесено во текот на главна расправа, во фаза на доказна постапка и не се чекало завршување на доказна постапка. На Јавното обвинителство ќе му доставам примерок од ова решение, како и примерок од поднесокот… Јас го разгледав поднесокот и вистина е дека донесено е решение за амнестија во текот на доказна постапка, не само за обвинетиот во наведениот случај, туку и за други обвинети, меѓутоа јавниот обвинител нека се произнесе и нека даде мислење, со оглед на тоа дека овој поднесок го примивме во текот на денешниот ден“, посочи судијата Трпков.

Видете и ова:

Амнестија во пресрет на уставни измени?

Апелацискиот суд во април годинава ја укина првостепената пресуда од јули 2021 година, со која поранешниот спикер Вељаноски беше осуден на шест и пол години затвор, екс министрите Јанакиески и Ристовски добија казна од 6 години и три месеци затвор, додека поранешниот директор на УБК Атанасовски шест години затвор, и предметот го врати на повторно судење.

Основниот кривичен суд Скопје на 26 јули 2021 година им изрече вкупно 25 години затвор на четворицата обвинети за случајот познат во јавноста како „Организатори на 27 април“. Шест ипол години казна затвор доби поранешниот собраниски спикер Трајко Вељановски, 6 години и три месеци казна затвор екс-министерот за образование Спиро Ристовски, и 6 години и три месеци казна затвор министерот за транспорт Миле Јанкиески, додека екс директорот на УБК Владимир Атанасовски доби шест години казна затвор.

Владата нема да презема чекори спротивни на Уставот, туку секогаш ќе работи во насока на позитивните законски норми и Уставот коишто се за нас два клучни столба, истакна премиерот Христијан Мицкоски одговарајќи на новинарско прашање дали ќе донесат закон за рестриктивни мерки за лица кои се наоѓаат на црната листа на САД.

Мицкоски, кој денеска (24 декември) присуствуваше на ставање на камен темелник на спортска сала во Црешево, рече дека законодавството има предвидено сè што е потребно за лицата кои се дел од црната листа на САД.

„Она кое што е констатирано од одлуката на САД, а е содржано во листата на санкции каде што се опфатени овие имиња, тоа е судија од Апелација и поранешен член на владата е практично дел од основаното сомневање на обвинителството. Мислам дека имаме доволно квалитетни процедури во рамките на системот ова да го завршиме. Ние нема да преземаме чекори коишто ќе бидат спротивни на Уставот, затоа што тоа не беше причина зошто не гласаа граѓаните“, нагласи Мицкоски.

Во однос на шпекулациите дека поранешниот вицепремиер Артан Груби, за кој судот одреди 30 дневен притвор можно е да добие политички азил во соседна земја, меѓу кои е наведена Албанија, премиерот појасни дека лицето е на црната листа на САД поради основано сомневање за сторен криминал, а не од политички причини.

„Лицето е на листата на санкции на САД и јасно се наведени причините зошто се наоѓа, поради основано сомневање за сторен криминал. Поради тоа основано сомневање за сторен криминал обвинителството покрена истрага, а судот како што сум информиран изрече мерка за претпазливост, односно притвор во време траење од 30 дена. Така што, тука не станува збор за политички причини, туку очигледно дека има нешто различно од политиката, односно дека постои основано сомневање за сторен криминал. Така што не очекувам дека тоа ќе се случи, но тоа е сепак одлука на тие коишто би влегле во една таква процедура. Јас не би можел тука да додадам или одземам нешто“, истакна Мицкоски.

Видете и ова:

Што сè може да влезе во истрагата за Државна лотарија?

Груби и поранешниот директор на Лотарија, Перпарим Бајрами, се осомничени како соизвршители на делото проневера во службата, додека уште четири други лица како членови на комисијата за јавни набавки се гонат за злоупотреба на службената положба и овластувања.

И Груби и Бајрами се недостапни за органите на прогонот, а на 18 декември за нив беше распишана меѓународна потерница. На двајцата, ден претходно, судот им одреди мерка притвор од 30 дена.

Истрагата за Груби следуваше откако претходно на 9 декември тој, заедно со неговото семејство и судијата Енвер Беџети завршија на црната листа на САД поради „вмешаност во значителна корупција преку примање мито за поткопување на судските процеси поврзани со кривичната пресуда на Сашо Мијалков, поранешен директор на Управата за безбедност и контраразузнавање“, кој исто така од претходно е под американски санкции.