Вести
Пендаровски - Не се водат преговори со месеци, Софија до Скопје не доставила никаков документ
Со Република Бугарија со месеци наназад не се водат никакви преговори и поради тоа од Софија до Скопје не е доставен никаков документ, соопштуваат од Кабинетот на претседателот на државата, во врска со таканаречениот нон-пејпер кој беше објавен денеска во медиумите.
Во медиумите се појави наводен нон пејпер за решение на спорот со Бугарија. Во документот што го објави ТВ Клан се предлагаат двојни принципи, што ќе им овозможат на двете страни сопствена интерпретација на историските настани. Во документот се предлага и Бугарите да се внесат во македонскиот Устав. Според објавениот документ на Република Бугарија ќе и се дадат гаранции за зацврстување на сегашниот концепт на нација – држава, при што ќе и се признае историски контекст за бугарското потекло на нејзините граѓани без исклучок и со тоа Бугарија, како што се наведува, ќе се ослободи од траумата дека преку малцинските права ќе и се загрози долгорочната стабилност и безбедност.
„Ставот на претседателот Стево Пендаровски во однос на идентитетот и јазикот на македонскиот народ е јасен и непроменет, за тоа досега ниту се преговарало, ниту пак ќе се преговара во иднина“, стои во соопштението од Кабинетот на претседателот.
Од Владата велат дека за нив официјален е предлогот претставен за време на претседателството на Португалија со Европската унија.
„Сметаме дека тој предлог овозможува решенија прифатливи за сите страни“, велат од Владата во одговор за МИА дали во оптек е нов нон-пејпер за решавање на спорот меѓу Македонија и Бугарија.
Коментари за наводниот документ не даде ниту специјалниот претставник на ЕУ за Западен Балкан, Мирослав Лајчак.
види ги сите денешни вести
Макрон ќе и се обрати на нацијата во врска со глобалната „неизвесност“
Францускиот претседател Емануел Макрон најави дека денеска (5 март) ќе и се обрати на нацијата во врска со моменталната глобална неизвесност по радикалната промена во американската политика за Украина откако Доналд Трамп ја презеде претседателската функција.
„Драги мои сонародници – ќе ви се обратам вечерва во 20 часот во овој момент на голема неизвесност кога светот се соочува со најголемите предизвици“, напиша Макрон на мрежата „Х“, најавувајќи го своето прво такво обраќање откако Трамп го запрепасти светот со промените во надворешната политика.
Тоа доаѓа откако украинскиот претседател Володимир Зеленски во вторникот повика на „примирје“, како прв чекор за ставање крај на тригодишната војна со Русија, додека се обидуваше да ја намали температурата по петочниот препукување на Белата куќа со Трамп.
Трамп подоцна рече дека добил „важно“ писмо од Зеленски во кое се вели дека Киев е подготвен за разговори со Русија и финализирање на американскиот договор за минерали, додавајќи:
„Го почитувам тоа што тој (Зеленски) го испратил ова писмо“.
Макрон ја поздрави подготвеноста на Зеленски „повторно да се вклучи во дијалог“ со Трамп, соопшти француското претседателство во вторникот, откако расправијата во Овалната соба покрена прашања за иднината на нивната врска.
Макрон, кој беше во редовен контакт и со Трамп и со Зеленски во последниве денови, „ја повтори решеноста на Франција да работи со сите засегнати страни за спроведување на цврст и траен мир во Украина“, додаде француското претседателство.
Еден загинат во руски воздушен напад на Одеса
Еден седумдесет и седумгодишен маж е убиен во вториот руски воздушен напад за два дена врз украинскиот пристанишен град Одеса на Црното Море, соопштија властите во среда (5 март).
Воениот гувернер на регионот, Олех Кипер, на Телеграм напиша дека мажот починал од рани од шрапнели во едно предградие.
Тој додаде дека е оштетена и важна инфраструктура, делови од градот се без струја, вода и греење.
„Во предградието на Одеса куќите се оштетени од урнатините од соборените беспилотни летала. Украинската противвоздушна одбрана извести дека се соборени 10 дронови. Цивилната заштита пријави голема штета и пожари во приватни домови. Десетици работници за итни случаи беа на пат да ги „отстранат последиците од теророт““, соопштија властите.
Одеса беше цел на повеќекратни руски воздушни напади со беспилотни летала, ракети и крстаречки ракети. Во вторникот (4 март) четири лица беа повредени во напади со беспилотни летала врз градот.
Украина се брани од целосната руска инвазија повеќе од три години. Киев постојано повикува на зајакнување на својата противвоздушна одбрана за подобро да се заштити од воздушните напади на Москва.
Голем дел од воздушната одбрана на Украина ја обезбедуваат Соединетите Држави, кои под раководство на американскиот претседател Доналд Трамп ја прекинаа испораката на целата американска воена помош за Украина.
Кина ќе го зголеми воениот буџет за 7,2 отсто
Кина ќе го зголеми својот воен буџет за 7,2 отсто оваа година, предвидено е во нацрт-буџетот претставен денеска (5 март) на Националниот народен конгрес.
Со ова зголемување, воениот буџет достигнува 1,78 трилиони јуани (околу 245 милијарди долари).
Истото процентуално зголемување беше направено и минатата година, јавува ДПА.
Порастот на трошоците за одбрана доаѓа во услови на зголемени тензии околу Тајван и територијалните спорови во Јужното Кинеско Море, каде што Пекинг има сè поекспанзивни барања.
Тајван се управува самостојно од 1949 година, но Кина го смета за дел од својата територија и не ја исклучува можноста за присилно обединување.
Израел ја критикува резолуцијата за Газа усвоена на Самитот во Каиро
Израелското Министерство за надворешни работи ја критикуваше резолуцијата усвоена на самитот на Арапската лига во Каиро за обнова на Појасот Газа, оценувајќи дека таа „не успева да одговори“ на реалноста по нападот на радикалната палестинска групација Хамас врз израелска територија на 7 октомври 2023 година.
Од друга страна, Хамас го поздрави усвоениот арапски план за обнова на Газа и повика на обезбедување финансиски средства за негово спроведување.
„Во резолуцијата не се споменува дрскиот терористички напад на Хамас (прогласена за терористичка организација од САД и ЕУ) кој одзеде илјадници израелски животи, а стотици луѓе беа киднапирани. Во неа нема ни осуда за оваа терористичка организација“, стои во соопштението на израелското Министерство за надворешни работи.
Израел ја потврдува својата поддршка за планот на американскиот претседател Доналд Трамп, според кој палестинското население на Газа треба да биде преселено во соседните земји Јордан и Египет.
Според израелските власти, арапските лидери го отфрлиле овој предлог на состанокот во Каиро, без да му дадат можност за реализација.
Египетскиот претседател Абдел Фатах ел Сиси соопшти дека арапските држави го поддржале египетскиот план за поствоена обнова на Газа, кој предвидува двомилионското палестинско население да остане во енклавата.
Проектот вреден 53 милијарди долари, разработен на 112 страници, има цел да ја обнови Газа до 2030 година, без иселување на нејзиното население.
Во првата фаза е предвидено расчистување на над 50 милиони тони урнатини и отстранување на неексплодирани боеви средства останати по израелските бомбардирања и воени офанзиви.
Јавниот обвинител на Флорида отвори кривична истрага против браќата Тејт
Јавниот обвинител на Флорида Џејмс Утмајер започна кривична истрага против британско-американскиот влијателен Ендрју Тејт и неговиот брат Тристан, откако двајцата пристигнаа во американската сојузна држава минатата недела.
Утмајер на мрежата „Х“ изјави дека и наложил на неговата канцеларија да изврши налози за претрес и да издава судски покани поврзани со истрагата.
Браќата Тејт, кои влегоа во Соединетите Држави минатата недела, се исто така под истрага во Романија за наводна трговија со луѓе и експлоатација на млади жени.
„Флорида има нулта толеранција за луѓето кои злоупотребуваат жени и девојчиња. Нема да го дозволиме тоа“, рече Утмајер.
На браќата, кои беа уапсени во Романија во декември 2022 година, првично им беше забрането да ја напуштат земјата. Сепак, романските власти на крајот го дозволија нивното заминување и браќата отпатуваа за Флорида.
Шпекулациите циркулираат дека ослободувањето било под влијание на американската администрација за време на претседателот Доналд Трамп, иако Трамп негираше каква било вмешаност, изјавувајќи минатата недела дека не знаел ништо за ослободувањето на браќата и одбил да одговори на прашања во врска со потенцијалната интервенција.
Во Романија, обвинителите ги обвинуваат брќата дека ги принудувале жените да продуцираат експлицитни комерцијални секс видеа.
Истрагите открија најмалку 34 наводни жртви, меѓу кои и 15-годишно девојче. Двајцата браќа ги негираат сите обвиненија.
Зеленски му порача на Трамп дека е подготвен за постигнување траен мир
Украинскиот претседател, Володомир Зеленски изрази подготвеност да „работи под водство“ на американскиот претседател, Доналд Трамп на „постигнување траен мир“ во Украина, во услови на тензии со Белата куќа по прекинот на американската воена помош за Украина.
„Мојот тим и јас сме подготвени да работиме под водство на претседателот Трамп за да постигнеме траен мир", напиша Зеленски денеска (4 март) на социјалната мрежа Икс (X), додавајќи дека сака да ги „среди работите" со неговиот американски колега по нивната жестока дискусија во петокот во Овалната соба на Белата куќа.
Нашата средба во Вашингтон, во Белата куќа, не помина според планираното. Жално е што се случи тоа. Време е работите да се поправат", рече Зеленски, додавајќи дека се надева на „конструктивна соработка и комуникација во иднина".
Зеленски предложи прекин на огнот во воздух и море, како и размена на затвореници со Русија, како први чекори за ставање крај на војната која започна со руската инвазија на Украина во февруари 2022 година.
„Првите чекори би можеле да бидат ослободување на затвореници и прекин на огнот на небото - забрана за ракети, беспилотни летала со голем дострел, бомби на цивилна инфраструктура, вклучувајќи ја и енергетската, како и прекин на огнот на море, ако Русија го стори истото", рече украинскиот претседател.
Украина е „благодарна" за воената помош на САД, рече Зеленски, како одговор на критиките од Трамп, кој го обвини за неблагодарност и непочитување на Вашингтон за напорите да се стави крај на војната за време на вербалната дискусија во Белата куќа во петокот.
Претседателот на САД потоа нареди „пауза" во понеделникот но воената помош на САД за Украина, што е од клучно значење за способноста на Киев да се брани.
„Ние навистина го цениме сето тоа што Америка го направи за да ѝ помогне на Украина да го задржи својот суверенитет и независност. И се сеќаваме кога работите се сменија кога претседателот Трамп (во неговиот прв мандат) ѝ испорача американски противтенковски ракети на Украина. Ние сме благодарни за тоа", рече Зеленски.
Украинскиот претседател додаде дека е подготвен „во секое време" да го потпише планираниот рамковен договор со САД за експлоатација на украинските минерални ресурси, чие потпишување беше одложено поради спорот со Трамп.
„Ние гледаме на овој договор како на чекор кон поголема безбедност и силни гаранции за безбедност и искрено се надевам дека ќе функционира ефективно", рече Зеленски.
САД ги прогласија Хутите за странска терористичка организација
Американскиот Стејт департмент денеска (4 март) соопшти дека го прогласува јеменското движење Хути, формално познато како Ансар Алах за „странска терористичка организација“. Ова следува две години по повикот на претседателот на САД, Доналд Трамп да биде направен ваков потег.
Американскиот државен секретар, Марко Рубио објави дека Вашингтон ја прогласил оваа јеменска милиција која го поддржува Иран, за странска терористичка организација.
„Денеска Стрејт департментот исполнува едно од првите ветувања на претседателот Трамп по преземањето на должноста и со задоволство можам да објавам дека министерството го прогласи Ансар Алах за странска терористичка организација“, изјави Рубио.
„Како што претседателот Трамп истакна во извршната наредба 14175, активностите на Хутите ја загрозуваат сигурноста на американските цивили и персонал на Блискиот Исток, безбедноста на нашите најблиски регионални партнери и стабилноста на глобалната поморска трговија", додаде Рубио.
Тој рече дека Вашингтон нема да толерира која било земја да се ангажира со организации како што се Хутите во име на правење легитимен меѓународен бизнис.
„Денешната акција преземена од страна на Стејт департментот ја покажува посветеноста на администрацијата на Трамп за заштита на нашите национални безбедносни интереси, безбедноста на американскиот народ и безбедноста на САД", додаде тој.
Во соопштението од Белата куќа на 22 јануари оваа година, во кое беше најавено дека Хутите ќе бидат прогласени за терористичка организација се наведува дека тие се поддржани од Иранската револуционерна гарда Quds (IRGC-QF) која ги наоружува и обучува терористичките организации ширум светот од 2023 година кои повеќе пати ги загрозиле американските војници.
Од деведесеттите години, Хутите се борат против меѓународно признатата јеменска влада.
За време на својот прв мандат, Трамп ги прогласи Хутите за терористичка организација, но таа одлука беше променета од страна на администрацијата на Бајден поради загриженост дека тоа би можело да спречи потребната помош да стигне до Јемен.
Најновиот потег, еден од првите на Трамп во неговиот втор мандат во областа на надворешните работи, би можел да биде почетен чекор во кампањата за „максимален притисок“ која неговиот тим вети дека ќе ја обнови против Иран.
Во 2014-та година, Хутите зазедоа поголем дел од северозападниот дел на Јемен и неговиот главен град Сана, што доведе до војна во која загинаа десетина илјади луѓе, но создаде и хуманитарна катастрофа во најсиромашната земја во арапскиот свет.
Петгодишно дете се затруло со лекови за возрасни
На Детското одделение во Болницата во Кочани синоќа било донесено петгодишно дете од делчевското село Тработивиште, за кое било пријавено дека проголтало неколку таблети.
Од кочанската Болница го потврдија случајот и информираа дека детето било донесено со медицинска придружба од Делчево, било во свесна и контактибилна здравствена состојба. Сепак, поради понатамошна контрола и превентива, дежурниот педијатар го препратил на Детската клиника во Скопје – јави агенцијата МИА.
Директорот на Детската клиника, д-р Реџеп Мемеди денеска (4 март) изјави дека опсервацијата на детето продолжува.
„Петгодишното дете од Делчево синоќа беше примено на Детската клиника во Скопје со брза помош, со податок за испиени две таблети антидепресив за возрасни. Детето е примено во релативно стабилна состојба, мониторирано, во тек на дежурство со стабилни параметри. Денеска продолжуваме со опсервација на детето до утре, а ако сè е во ред, детето ќе биде пуштено дома“, додаде д-р Мемеди.
Тој посочи дека скоро секоја недела имаат вакви или слични случаи и апелираше родителите да бидат внимателни каде ги оставаат лековите за возрасни, средствата за хигиена и корозивни супстанци, односно да внимаваат тие да не бидат на дофат на децата.
Според првичните сознанија, петгодишното дете проголтало таблети золпиден, кои се користат за регулирање на сонот кај возрасните, при што се употребува половина таблета.
Кривична пријава и притвор за пет лица поради трговија со дете
Националната единица за сузбивање на криумчарење мигранти и трговија со луѓе при Секторот за криминалистички истраги во Одделот за сузбивање на организиран и сериозен криминал, поднесе кривична пријава против А.М.(44), А.М.(35), Ф.А.(61) и Ѓ.К.(55), сите од Скопје и против М.М.(41) од Куманово поради постоење основи за сторено кривично дело „трговија со дете“.
Во текот на 2024 година, пријавените А.М., А.М., Ф.А. и Ѓ.К., користејќи ја финансиска состојба на пријавената М.М., која била бремена, ја измамиле така што ѝ обезбедиле финансиска помош во висина од 250 до 270 евра.
Освен тоа, тие ѝ обезбедиле и бесплатни лекарски прегледи за незаконско посвојување на нејзиното новородено бебе – соопшти МВР денеска (4 март).
На 18.02.2025, откако М.М. родила женско бебе, со нотарска изјава му дала старателството на А.М., дека бебето го остава доброволно на чување, воспитување и издржување. За тоа ѝ била исплатена сума од 4.000 евра.
Од страна на судија на претходна постапка, на А.М. и М.М. им е одредена мерка притвор во траење од 30 дена, додека на А.М., Ф.А. и Ѓ.К. им е одредена мерка домашен притвор.
Обвинителството нареди истрага за инцидентот во Собранието на Србија
Основното јавно обвинителство во Белград упати барање до полицијата за прибирање на потребните информации во врска со инцидентот во Собранието на Србија каде беа активирани пиротехнички средства.
Обвинителството соопшти дека барањето е упатено со цел да се утврдат извршителите и постоењето на суштинските елементи на кривичното дело Тешки дела против јавната безбедност. До инцидентот во собраниската сала дојде откако владеачката коалиција го усвои дневниот ред на кој се противеше опозицијата и кога опозициските пратеници ги напуштија своите места, активирајќи пиротехнички средства.
Обвинителството соопшти дека е наредено да се утврдат фактите и да се приберат сите достапни докази со цел да се утврди идентитетот на лицата кои ги внеле и употребиле пиротехничките средства, како и начинот кој начин тие биле внесени во Парламентот. Исто така, наредено е да се утврди идентитетот на лицата кои како што е наведено, фрлале различни предмети и со тоа им нанеле повреди на народните избраници.
Во соопштението на Обвинителството се наведува дека е наредено да се утврди идентитетот на повредените народни избраници, како и да се обезбеди медицинската документација за здобиените повреди.
Врховното јавно обвинителство соопшти дека пратеничкиот имунитет не штити од кривично гонење за извршени кривични дела. Ова Обвинителство наведе и дека повикува на „моментално смирување на ситуацијата во Народното собрание“.
Власта го усвои дневниот ред со 62 точки и го одби барањето на опозицијата да се расправа само за измените на Законот за високо образование со кои се исполнува четвртото барање на студентите во рамките на блокадата.
Студентите со протести блокираат повеќе од 60 факултети ширум целата земја, а нивното клучно барање е да се утврди кривична и политичка одговорност за загинувањето на 15 лица во несреќата на Железничката станица во Нови Сад.
Протестите и блокадите се одржуваат веќе четири месеци. Првото барање на студентите е да се објави целосната документација за реконструкцијата на станицата, со цел да се утврди одговорноста за несреќата.
Тие, исто така, бараат санкционирање на напаѓачите на студентите на протестите што следеа по несреќата во Нови Сад и суспензија на постапките против уапсените демонстранти.
Студентите, исто така, бараат 20% зголемување на буџетот за високото образование.
Претседателката на Националното собрание, Ана Брнабич, претходно изјави дека е постигнат договор со претставници на сите државни универзитети за измените на Законот за високо образование и дека ова студентско барање е исполнето.
Според владата, заедно со зголемувањето на буџетот, биле исполнети и други барања на студентите.
Студентите најавуваат дека блокадите и протестите продолжуваат и дека експертските групи ќе утврдат дали барањата се исполнети или не.
Мултимедија
Најпосетени
Што треба да знаете