Од 17 до 23 август ќе се одржи осмото издание на фестивалот за феминистичката култура и акција „Прво па женско“, во организација на „Тиииит! Инк“.
Годинашното издание на „Прво па женско“ се организира под транспарентот „Жените се малцинство“. Петдневната програма ќе се реализира во Младинскиот културен центар во Скопје, ЦАЦ Монтажна галерија и Музејот на современа уметност. Програмата вклучува изложби, разговори, работилници, концерти, диџеј сетови и проекции на филм.
„Со ваквото политичко позиционирање имаме цел да го преиспитаме значењето на терминот „малцинство“, свесно одбегнувајќи ја неговата национална, доминантна претпоставеност. Сакаме да посочиме дека во значењето на овој поим многу поважни се, всушност, односите на моќ помеѓу најразличните општествени групи, како и доминацијата на едни врз други. Таквата доминација секојдневно се случува преку вкоренети штетни политички уредувања и општествени норми, кои подразбираат дискриминација на мноштво идентитети што не се вклопуваат во идеалот што му е припишан на хегемониското мнозинство. Токму затоа, прашањето за малцинствата е и феминистичко прашање“, велат организаторите.
На официјалното отворање во 21 часот ќе се обрати и претседателот Стево Пендаровски.
„Прво па женско“ е отворена платформа каде феминистичките вредности и дебати се водат со сите актери во општеството, без исклучоци, со цел да се подобри состојбата со женските права и родовите политики. Голем дел од фестивалската програма е во рамки на Women on Women (WoW) проектот – кофинансиран од програмата Креативна Европа на Европската Комисија, што Tiiiit! Inc. го спроведува заедно со Mesto Žensk – Љубљана, K-Zona – Загреб/VoxFeminae, Outlandish Theatre Platform – Даблин. Проектот се фокусира на родовата еднаквост низ феминистичка перспектива, трасирајќи го наследството на жените (жени, трансродови и интерсекс луѓе кои се идентификуваат како жени), низ интерсекциска перспектива, како и перспектива на различностите.
Годинава, „Прво па женско“ започнува посветено да ја реализира својата зелена агенда и преку конкретни акции да го промовира прашањето за заштита на животната средина, кое е несомнено и феминистичко прашање, зашто родовата нееднаквост и глобалната неправедност произлегуваат од истиот систем кој ги експлоатира природата и нејзините ресурси, исто како што ги експлоатира и луѓето.
Визуелното решение за осмото издание на Фестивалот е на интердисциплинарната уметница и архитектка Тамара Забазноска. Фестивалот е поддржан и од FRIDA – Young Feminist Fund, Министерство за култура на РСМ и Град Скопје и се реализира во соработка со Младински културен центар – Скопје, МОТ+, Музеј на современа уметност – Скопје, ИСКРА Букинг, Period Skopje, Од нула до дула.
