Вести
Еден починат, 36 новозаразени со корона, најмногу во Тетово
Во изминатите 24 часа потврдени се 36 нови случаи на ковид-19 во Македонија, информираше Министерството за здравство. Од новозаболените седум се во Скопје, во Куманово четири, во Прилеп четири, во Тетово 12, во Велес 6, а во Гостивар, Пехчево и Берово има регистрирано по еден случај.
Како што се информира во минатите 24 часа направени се 411 тестирања. Во истиот период регистрирани се и 13 оздравени пациенти, а на Клиниката за инфективни болести и фебрилни состојби во Скопје почина пациент од Велес на 58 годишна возраст, хоспитализиран на клиниката пред една недела со тешка форма на болеста, приклучен на механичка вентилација од 6 мај.
Со овие последни податоци вкупната бројка на ковид дијагностицирани во земјата од почетокот на епидемијата изнесува 1622, бројката на оздравени пациенти е 1112, на починати е 91, а во моментов бројот на активни случаи изнесува 419.
види ги сите денешни вести
Вајц реагира за „притисок од владината коалиција кон членовите на Судскиот совет“
Во писмена изјава до медиумите, известувачот на Европскиот парламент (ЕП) за Северна Македонија Томас Вајц денеска (13 март) реагираше за „притисокот на владината коалиција членовите на Судскиот совет да поднесат оставки или да бидат разрешени поради нивната наводна политичка припадност“.
„Овој повик од страна на Владата е загрижувачки знак за политичко мешање во судството. Независноста на судскиот систем е клучна за владеењето на правото и поделбата на власта, коишто се темелни вредности на патот на Северна Македонија кон ЕУ“, наведува Вајц во пишаната изјава, пренесе МИА.
Реакцијата на австрискиот европратеник, кој од октомври 2024 е известувач на ЕП за Северна Македонија, слетува откако на 11 март Собранието им изгласа недоверба односно интерпелација на петмината членови на Судскиот совет кои се избираат во парламентот – Весна Дамева, Павлина Црвенковска, Миљазим Мустафа, Тања Чачарова-Илиевска и Селим Адеми.
Зад иницијативата за интерпелациите, која беше поднесена на 7 февруари, застанаа 67 пратеници од владејачкото мнозинство на ВМРО-ДПМНЕ, ЗНАМ и ВРЕДИ (ВЛЕН).
Интерпелациите не се правно обврзувачки односно останува на самите членови да одлучат дали ќе се повлечат, на што повикуваа претставници од власта. Меѓу нив, и премиерот Христијан Мицкоски кој порача дека очекува петмината членови, од кои на тројца секако годинава им истекуваат мандатите, да ги напуштат функциите затоа што немаат кредибилитет.
Претходно денеска (13 март) на оваа тема зборуваше и американската амбасадорка Анџела Агелер порачувајќи дека внимателно ги следат случувањата и изјавите.
„Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат“, изјави Агелер.
Уште откако беа најавени интерпелациите, а власта ја наметнуваше идејата и за целосно распуштање и на Судскиот и на Советот на јавни обвинители, од Судскиот совет порачаа дека единственото место каде може да се разреши член на ова тело е во самиот Совет.
Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.
Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.
Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.
Минатата недела пријавени еден смртен случај поврзан со грип и 2347 заболени
Во текот на минатата недела (до 9 март) биле пријавени еден смртен случај поврзан со грип и 2347 заболени лица, соопшти Институтот за јавно здравје (ИЈЗ).
Бројот на нови пријавени случаи е помал за 8,6 проценти во споредба со неделата претходно, но во споредба со истиот период лани е зголемен за дури 5,5 пати.
Од новозаболените, 1.454 се во возрасната група од 15 до 16 години. 516 се деца на возраст од 5 до 14 години, а 198 се лица на 65-годишна возраст.
Меѓу заболените се и 179 деца под 4 години.
Најголем дел од случаите се на подрачјето на Центарот за јавно здравје (ЦЈЗ) во Скопје – 931, потоа во ЦЈЗ Битола – 202, ЦЈЗ Куманово – 176, ЦЈЗ Струмица – 112, ЦЈЗ Тетово – 105 и др.
Починатото лице, кое е случај поврзан со грип, како што соопштија од ИЈЗ, било на 82-годишна возраст од Радовиш, кое било хоспитализирано во Клиничката болница Штип.
„Кај починатото лице е утврдено присуство на коморбидитети и не било вакцинирано со вакцина против сезонски грип“, велат од ИЈЗ.
Според податоците на здравствените власти, во сезоната 2024-2025 вкупниот број на случаи со грип изнесува 22 291. Досега регистрирани се четири починати лица.
Се разотидоа демонстрантите пред телевизијата Н1 во Белград
Стотината демонстранти кои претходно во текот на денот (13 март) се собраа пред телевизијата Н1 во Белград се разотидоа попладнето околу 13:30 часот.
Полицајци со штитови дојдоа пред телевизијата, дваесетина минути откако се собра групата демонстранти.
Насобраните лица носеа транспаренти на кои пишуваше „Каде ви е шефот“, скандираа „Не ја даваме Србија“ и не дозволуваа никој да влезе или излезе од дворот.
Телевизијата Н1 објави дека не се знае зошто се собрале.
За време на блокадата, репортерката на Н1 се обиде да открие кои се луѓето пред капијата на телевизијата. Тие не сакаа да одговорат, а еден од присутните рече дека ќе кажат кои се тие ако им дозволат да влезат во студиото да дадат изјава.
Н1 објави дека меѓу демонстрантите биле Иван Силер, помошник градоначалник на Нови Сад и Предраг Вулетиќ, секретар за социјална политика, демографија и родова еднаквост на автономната покраина Војводина, како и Мирослав Родиќ, член на Собранието на Војводина.
Радио Слободна Европа засега не може да ја потврди оваа информација.
Станува збор за функционери на Социјалистичкото движење, основано од прорускиот вицепремиер на Србија Александар Вулин, кој се наоѓа на црната американска листа, меѓу другото, и поради неговите врски со Русија. Социјалистичкото движење е малцински коалициски партнер на владејачката Српска напредна партија (СНС).
Српскиот вицепремиер Александар Вулин на седница на српскиот парламент изјави дека не е поддржувач на блокади, но...
„Но, ова беше само начин за Социјалистичкото движење да покаже дека сè што им прават на другите може да им се случи и на нив. Не сакаме да бидеме оправдување за какви било конфликти, бевме таму неколку часа, го завршивме тоа“, рече Вулин.
Тој додаде, „но јас само сакам да кажам дека можеме повторно да дојдеме и дека сето ова што го правите на другите, може еден ден да се направи и на вас“.
Јунајтед Медиа, групација од која е дел Н1 ТВ, ги повика полицијата и надлежните институции веднаш да преземат мерки, да ја отстранат блокадата и да обезбедат непречена работа на телевизијата.
„Ова го гледаме како директен притисок врз независното новинарство и резултат на кампањата предводена од највисоки владини функционери и режимски медиуми, која интензивно се води против Н1 во последните денови, поради нејзиното професионално известување за студентските протести во Србија“, се вели во соопштението.
Во него се додава дека „особено е неприфатливо владините функционери, како што се помошникот градоначалник на Нови Сад и покраински секретари, да учествуваат во блокадата на медиумите“.
„Очекуваме ваквото однесување да биде санкционирано, бидејќи во спротивно испраќа јасна порака дека власта директно ги поддржува нападите врз слободата на медиумите“, велат од Јунајтед Медиа.
Програмскиот директор на Н1 Игор Божиќ изјави дека не знае кои се луѓето кои ја блокирале зградата, но дека дошле организирано.
Божиќ рече дека во Н1 не знаеле дека е најавен таков собир, но смета дека полицијата знаела, бидејќи полицајците биле таму пред нивното пристигнување.
Тој изјави дека по блокадата на РТС, „главните лидери“ повикувале кога ќе има блокада пред Н1.
„Ова е очигледно одговорот на режимот на тоа. Очигледно е дека ова е одвраќање од настаните околу студентските протести и режимот се обидува да покаже дека прорежимските медиуми не се единствениот проблем, туку дека за неговите поддржувачи проблем се и независните медиуми“, смета Божиќ.
На 10-ти и 11-ти март во 22 часот, студентите ја блокираа зградата на Радио телевизија на Србија (РТС) во центарот на Белград, барајќи објективно известување за протестите.
Студентите го блокираа Јавниот медиумски сервис среде повеќемесечните протести со кои се бара одговорност за смртта на 15 лица во уривањето на бетонската настрешница на Железничката станица во Нови Сад.
Студентите во блокада најавија голем митинг во Белград на 15 март. Тие од декември ги блокираат државните универзитети и водат мирни протести низ земјата.
Агелер: Внимателно ги следиме изјавите за интерпелациите на Судскиот совет
Американската амбасадорка во Северна Македонија, Анџела Агелер, изјави дека не може да ги коментира интерпелациите во Собранието за петте члена на Судскиот совет, но упати порака дека внимателно ги следат случувањата.
„Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат“, изјави Агелер на 13 март.
На 11 март, пратениците од владејачкото мнозинство изгласаа интерпелации на петте члена на Судскиот совет кои се избрани од Собранието. Интерпелациите не се правно обврзувачки односно останува на самите членови да одлучат дали ќе се повлечат, на што повикуваа претставници од власта.
Уште откако беа најавени интерпелациите во февруари, од Судскиот совет порачаа дека единственото место каде може да се разреши член е во самиот Совет.
На тројца од петте члена на Советот шестгодишните мандати им истекнуваат во јули односно декември 2025 година.
За нови членови кои се избираат од Собранието, според премиерот Христијан Мицкоски, не се дискутирано.
„Ние не влеговме во ова затоа што имаме однапред спремено тефтерчиња во коишто се наоѓаат имиња, како тие што беа во Речица и на Бихаќка. Ние влеговме од принципиелни причини бидејќи вие граѓаните им дадовте доверба помала два проценти, а и последните случувања за избор на вршител на должноста претседател на Врховниот суд, името коешто е избрано, е дополнителен мотив овие членови на Судскиот совет да бидат разрешени“ рече Мицкоски, кој заедно со Агелер присуствуваа на настан во Центарот за обука на полицијата во Идризово на 13 март.
Судскиот совет е составен од 15 члена, од кои тројца ги избира Собранието со Бадентерово мнозинство. Други двајца предлага претседателот на државата, но изборот го врши Собранието. Еден од овие два члена треба да биде припадник на помалите етнички заедници.
Осум члена, пак, ги избираат судиите од своите редови на непосредни избори, со тоа што тројца од нив се припадници на заедниците кои не се мнозинство во државава.
Останатите двајца членови се дел од Советот само по функција – може да присуствуваат на седници, но немаат право на глас, а тоа се претседателот на Врховниот суд и министерот за правда.
Доживотен затвор за обвинетиот за убиството кај Мавровка
Доживотен затвор доби обвинетиот Елвин Куртовиќ за убиството на едно лице кај трговскиот центар Мавровка на 20 август минатата година.
Пресудата, која е првостепена, беше изречена денеска (13 март) во Основниот кривичен суд Скопје откако Куртовиќ претходно призна вина.
Жртва на ова убиство беше скопјанецот Васил Ефтимов, а случајот беше во фокусот на јавноста бидејќи обвинетиот од претходно имал кривично досие, а истиот ден по убиството пукаше и кон четворица полицајци.
Судијката Моника Бахчовановска, пред изрекување на пресудата, во судница читаше и психијатриско вештачење за обвинетиот, во кое се наведува дека тој е психички здрава личност со нормална интелигенција.
„Вештачењето покажува дека од увидот во казнената евиденција од 16 години е осудуван за кражби, насилство, сообраќајки, фалсификување …, а, имал и пресуди во странство. Од почетокот на адолесценцијата имал проблеми и асоцијалност, изразено непочитување на социјални норми и невозможно одржување на трајни релации, ниска толеранција и склоност кон насилство. Кога го сторил кривичното дело бил во секој момент пресметлив и со уредно психичко здравје“, рече судијката Бахчовановска.
Покрај за убиството, со обвинението Куртовиќ се гонеше и за убиство во обид и за неовластено изработување, држење, посредување и тргување со оружје и експлозивни материи.
Според Основното јавно обвинителство (ОЈО) Скопје, убиството на Ефтимов на 20 август 2024, обвинетиот го извршил од користољубие, со истрел од пиштол. Исто така, се заканил и на сопругата на жртвата и од неа ја одзел торбата која таа ја носела на рамо и гајба која била во возилото, а во којашто имало различен рачен алат.
Како што наведува и обвинителството, подоцна во текот на истиот ден кога полициски службеници го пресретнале обвинетиот заедно со уште едно лице во автомобил, тој излегол од совозачката врата и кон четворицата полицајци испукал 3 проектили во обид да ги лиши од живот.
Кос: Патувањето на Албанија кон ЕУ е сигурно и вистинито
Еврокомесарката за проширување и соседска политика, Марта Кос, која денеска (13 март) престојува во Албанија, порача дека патувањето на земјата кон ЕУ, е сигурно и вистинито и оти Албанија заслужува да биде дел од ЕУ, зашто е „шампион за регионалната соработка“.
„Геополитиката денес ни покажува дека се е можно и вашиот пат кон ЕУ е безбеден и вистинит. Процесот за членство треба да биде проект на сите албански граѓани. Според мене, важно е пристапниот процес да биде проект на целото албанско општество. Не само владата, туку секој град и село треба да се вклучи, за граѓаните да разберат зошто Албанија ќе стане членка на ЕУ,“ рече таа.
Кос се задржа и на парламентарните избори што ќе се одржат на 11 мај, оценувајќи притоа дека изборниот процес е меѓу најважните процеси во демократијата и оти е убедена дека изборите ќе бидат слободни и демократски.
„Парламентарните избори се еден од најважните процеси во една демократија. Ова е изборот на граѓаните да си ја исполнат должноста да гласаат, се надевам дека ќе гласаат и ќе има голема излезност. Сигурна сум дека ќе бидат слободни и фер и го поздравувам фактот што дијаспората ќе има можност да гласа на овие избори. Да проговорат со своите гласови за тие важни работи, за принципите и основите на демократијата“, порача таа.
Албанскиот премиер Рама пак, изјави дека за да се стигне до крајната дестинација ЕУ, мора да се завршат сите домашни задачи.
„Членството во ЕУ не е возење со автобус или авион, туку создавање услови и стандарди, овде, за да се биде член на тамошното семејство. Албанија 2030 во ЕУ ја гледаме како реализација на програмата што ја имаме. Преговорите се базираат на резултати. За да ги спречите да ве попречуваат колку што сакаат, дури и неправедно, да дадат уште една работа, треба да си ја завршите домашната задача. Ова е ЕУ“, нагласи Рама.
Тој исто така рече дека и Албанија и другите земји од регионот немаат друга алтернатива освен интеграцијата во европското семејство.
Непознати лица го блокираа влезот на телевизија Н1 во Белград
Група од околу стотина непознати лица се собрала пред влезот во дворот на редакцијата на телевизијата Н1 во Белград.
Насобраните носат транспаренти на кои пишува „Каде е вашиот шеф и извикуваат „Нема да се откажеме од Србија“ и не дозволуваат никој да влезе или да излезе од дворот.
Телевизијата Н1 објави дека не се знае зошто се собрале.
Полицијата со штитови пристигнала дваесетина минути откако се собрала групата луѓе.
Репортерот на Н1 се обиде да открие кои се луѓето кои се собрани пред капијата на телевизијата.
Тие не сакаа да одговорат, а еден од насобраните рече дека ќе кажат кои се тие ако им дозволат да влезат во студио и да дадат изјава.
Како што јави телевизијата Н1, откако група непознати мажи дошле пред нивната зграда, дел од вработените во канцелариите на соседната бизнис зграда излегле надвор или од прозорците им довикувале „одете си на Косово“.
Програмскиот директор на Н1 Игор Божиќ изјави дека не знае кои се луѓето кои ја блокирале зградата, но дека дошле организирано.
Божиќ рече дека во Н1 не знаеле дека е најавен таков собир, но смета дека полицијата знаела, бидејќи полицајците биле таму пред нивното пристигнување.
Тој изјави дека по блокадата на РТС, „главните лидери“ повикувале кога ќе има блокада пред Н1.
„Ова е очигледно одговорот на режимот на тоа. Очигледно е дека ова е одвраќање од настаните околу студентските протести и режимот се обидува да покаже дека прорежимските медиуми не се единствениот проблем, туку дека за неговите поддржувачи проблем се и независните медиуми“, смета Божиќ.
На 10-ти и 11-ти март во 22 часот, студентите ја блокираа зградата на Радио телевизија на Србија (РТС) во центарот на Белград, барајќи објективно известување за протестите.
Студентите го блокираа Јавниот медиумски сервис среде повеќемесечните протести со кои се бара одговорност за смртта на 15 лица во уривањето на бетонската настрешница на Железничката станица во Нови Сад.
Студентите во блокада најавија голем митинг во Белград на 15 март. Тие од декември ги блокираат државните универзитети и водат мирни протести низ земјата.
Кремљ отфрла каков било привремен прекин на огнот, американските преговарачи во Москва
Високиот помошник на претседателот Владимир Путин отфрли каков било привремен прекин на огнот со Украина, непосредно пред пристигнувањето на американска делегација на разговори во Москва, за да го натера Кремљ или да се согласи на 30-дневниот предлог за прекин на огнот или ќе се соочи со санкции.
Помошникот на Кремљ, Јуриј Ушаков, во интервју емитувано на државната телевизија на 13 март рече дека предложениот прекин на огнот на американскиот претседател Доналд Трамп, на кој Киев се согласи, само ќе и даде на Украина време да се опорави од притисокот што Русија го врши врз нејзините војници.
„Го кажав нашиот став дека ова не е ништо друго освен привремен одмор за украинската војска, ништо повеќе“, рече Ушаков, кој е повеќе од половина век во дипломатијата и се смета за главен советник за надворешна политика на Кремљ.
Тој додаде дека ја кажал позицијата на Москва во телефонскиот разговор со американскиот советник за национална безбедност Мајк Валц, еден ден претходно.
„Ми се чини дека никому не му требаат никакви чекори кои само имитираат мирни дејствија во оваа ситуација“, рече тој, истакнувајќи дека Русија сака долгорочно решение што ќе ги земе предвид нејзините интереси и грижи.
За време на состанокот во Белата куќа на 12 март со ирскиот премиер Мајкл Мартин, Трамп изрази уверување за обезбедување на прекин на огнот за Украина и рече дека американските преговарачи „во моментов патуваат во Русија“.
На 13 март, портпаролот на Кремљ, Дмитриј Песков, потврди дека американскиот тим, наводно, предводен од специјалниот пратеник на Трамп, Стив Виткоф, патува кон Москва.
Трамп претходно им изјави на новинарите дека Русија „нема излез освен прекин на огнот“.
„Доколку е потребно, ќе го санкционираме, но се надевам дека нема да ни треба“, рече Трамп.
Ставањето крај на повеќе од тригодишната целосна инвазија на Русија на Украина засега е главен приоритет на Трамп, откако ја презеде функцијата по втор пат пред помалку од два месеци. Тој брзо ги испрати своите највисоки функционери во Москва и Киев за да ја подготват основата за мировни преговори.
Неговите последни коментари за војната доаѓаат откако Киев се согласи со планот за привремен прекин на огнот по деветчасовните разговори со претставници на администрацијата на Трамп во Џеда, Саудиска Арабија.
Рации на белгиската полиција поврзани со истрагата за корупција во Европскиот парламент
Белгиската полиција извршила рации на неколку адреси во земјата како дел од истрагата за наводен корупциски скандал во Европскиот парламент, соопштија денеска (13 март) федералното обвинителство.
Неколку лица се приведени на распит поради нивна „наводна вмешаност во активна корупција во Европскиот парламент, како и за фалсификување и употреба на фалсификати“, соопшти обвинителството.
„Околу 100 полицајци учествуваа во операцијата во која беа извршени 21 претрес низ Белгија и Португалија“, се додава во соопштението.
Белгискиот весник Le Soir и истражувачката веб-страница Следете ги парите (Follow the Money) (FTM) соопштија дека истрагата е поврзана со кинескиот технолошки гигант Хуавеи (Huawei) и неговите активности во Брисел од 2021 година.
Компанијата Хуавеи не одговори на барањето на АФП за коментар.
Рациите доаѓаат по повеќе од две години по скандалот „Катаргејт“, во кој голем број пратеници на ЕУ беа обвинети дека биле платени за да ги промовираат интересите на Катар и Мароко, нешто што и двете земји категорично го негираа.
Обвинителството не соопшти детали за инволвирани лица или компании. Но, како што се наведува наводната корупција од страна на „криминална организација“ „се практикувала редовно и многу дискретно од 2021 година до денес“ и имала „различни форми“.
Тие вклучуваат „награда за преземање политички позиции или прекумерни подароци како што се храна и патни трошоци или редовни покани за фудбалски натпревари“ како дел од обидот за промовирање на „чисто приватни комерцијални интереси“ во политичките одлуки.
Наводните мита биле сокриени како трошоци за конференција и биле исплаќани на различни посредници, соопшти канцеларијата, додавајќи дека испитува дали во аферата е вклучено перење пари.
Во срцето на наводната корупција е поранешен парламентарен асистент, кој во тоа време бил вработен како директор за односи со јавноста во Хуавеи, објавија белгиските медиуми.
Ле Соар рече дека полицијата привела „неколку лобисти“ и тие требало да се појават пред судијата на сослушување. Ниту еден од оние кои беа приведени на сослушување во четвртокот наутро не беа пратеници на ЕУ, изјави полициски извор за АФП.
Портпаролот на Европскиот парламент за АФП изјави дека „ги зема предвид информациите и ако биде побарано, тој целосно ќе соработува со правосудните органи“.
Захарова: Mировни сили во Украина значат „директен вооружен конфликт“
Официјална Москва соопшти дека земјите што распоредуваат мировници во Украина ќе се вклучат во „директен вооружен конфликт“ со Москва и дека таа ќе одговори на тоа со „сите расположливи средства“.
Украина побара од своите европски сојузници да распоредат воени „контингенти“ на нејзина територија откако ќе заврши тригодишниот конфликт, за да се заштити од идни напади од Русија.
Франција и Обединетото Кралство сугерираа дека би можеле да распоредат мировни сили, но Москва се откажа од оваа идеја како дел од прекинот на огнот или како долгорочна безбедносна гаранција за Украина.
„За нас е апсолутно неприфатливо армиските единици на други држави да бидат стационирани во Украина под какво било знаме“, рече на брифинг портпаролката на Министерството за надворешни работи, Марија Захарова.
„Без разлика дали станува збор за странски контингент и воена база, сето тоа би значело вклучување на овие земји во директен вооружен конфликт со нашата земја“, додаде Захарова.
Нејзините коментари следуваат откако американските преговарачи отпатуваа во Русија за да го претстават својот план за 30-дневно примирје во Украина, откако претходно оваа недела ја добија поддршката за овој план од Киев.
Мултимедија
Најпосетени
Што треба да знаете