Општина Аеродром е лидер по изградбата на станови во скопскиот регион, а по неа следaт Карпош, Кисела вода и Центар. Ова може да се заклучи врз основа на податоците на Државниот завод за статистика во однос на бројката на завршени станови кои се градени од деловни субјекти.
Во Аеродром во изминатата година биле завршени 726 станови, во 2016 година, 1001, а во 2015 година 1051 станови. Во Карпош бројката е далеку помала. Ако се спореди вкупно во Аеродром во изминатите три години биле завршени 2776 стана, во Карпош 1164, додека пак во Кисела вода 844 станови, а во Центар 825.
| станови | Аеродом | Карпош | Кисела Вода | Центар |
| 2013 | 718 | 351 | 55 | 259 |
| 2014 | 768 | 145 | 79 | 107 |
| 2015 | 1051 | 383 | 175 | 352 |
| 2016 | 1001 | 323 | 245 | 322 |
| 2017 | 726 | 458 | 424 | 151 |
Граѓаните од Аеродром го кренаа својот глас откако на ред дојде изградбата на објект кај Мајчин дом на сметка на зеленилото. Но, видливо е дека населбата добива нов лик, а тоа особено може да се забележи во близина на Тобако два. Во радиус од околу 500 метри од 2013 година до денеска се изградиле или во тек е изградбата на 29 згради.
Поставени се и темелите на четири нови високо катници.
„Јас имајќи ги пред очи податоците од Државниот завод за статистика морам да констатирам дека урбаната мафија се уште цвета во Македонија и во Аеродром. Се чини дека онаму каде што ВМРО-ДПМНЕ застана со своето владеење од таму СДСМ продолжува“, вели Искра Манојлоска, активистка од граѓанската иницијатива „Сакаме Аеродром да дише“.
Градоначалникот на Аеродром, Златко Марин најпрвин се правдаше дека не може да ја спречи изградбата на девет катницата кај Мајчин дом за потоа да ја стопира, но на 15 дена. Марин во предизборието ветуваше дека ќе се стави во одбрана на зеленилото во Аеродром.
Неговиот колега, градоначалник на Центар, Саша Богдановиќ донесе одлука за мораториум за градба во општината во декември, минатата година со цел да се стопираат спорните дупови. Марин тврди дека тоа е незаконски, а Богдановиќ смета дека секој ДУП може да се поправи со нов ДУП.
Марин најави формирање ново тело во кое претставници од месните заедници, здруженија на граѓани и стручни лица од областа на урбанизмот директно ќе учествуваат во урбанистичкото планирање на општината.
„Новите згради во Аеродром се сосема непотребни. Доколку ги прашате луѓето коишто живеат тука сите до последен ќе ви кажат дека Аеродром е веќе населба која ги има пополнето своите капацитети за живеење“, додава Манојлоска.
Таа ја повикува и актуелната власт да не се вади со тоа дека претходната власт е виновна за ситуацијата.
Според статистика, во скопскиот регион во 2017 година во однос на завршени и незавршени градежни објекти од страна на деловни субјекти се забележани 248 високоградби, година претходно 242, а во 2015 година, нивната бројка изнесува 245.
