Во Сарај постигнат цензус до 17 часот, Ново Село со најмала излезност
Најголема излезност на референдумот до 17 часот има во Општина Сарај, каде што на гласање излегле скоро 17 илјади гласачи, односно над 54 отсто од запишаните избирачи. Над 40 отсто излезност има и во Липково и во Центар, а во Карпош и во Арачиново гласале над 38 отсто од регистрираните избирачи.
Најмала излезност има во Општина Ново Село, каде што до 17 часот на гласање излегле под 14 отсто од регистрираните избирачи. Во Илинден гласале 14,47 отсто од избирачите, а во Могила и во Старо Нагоричане гласале над 16 отсто од избирачите.
МВР – Фотографирање гласачи, навреди, кинење гласачко ливче
На еден час пред затворање на гласачките кутии, МВР информира за седум попречувања на гласањето на неколку избирачки места. Во текот на денот од полицијата соопштија за уште 13 инциденти за време на гласањето. Најголем дел од инцидентите се поврзани со фотографирање и снимање гласачи, навредување на оние кои гласаат, а имало и еден случај кога сопруг ѝ го искинал гласачкото ливче на сопругата.
Цивил – Без сериозни инциденти, но со голем број помали нерегуларности
Набљудувачите на Цивил – Центар за слобода, јавуваат за нерегуларности и несоодветно однесување на некои набљудувачи. Претседателот на организацијата, Џабир Дерала, вели дека е референдумскиот ден изминува без сериозни инциденти, но со голем број помали и поголеми нерегуларности.