Со главно анти-имигрантска реторика, Словенечката демократска партија на Јанез Јанша, е главен фаворит на парламентарните избори во Словенија, што ќе се одржат во недела, на 3-ти јуни.
Во кампањата, оваа партија вети дека ќе ги отфрли квотите од Европската Унија за прием на мигранти, како и барањата за зголемување на буџетот за одбрана. На еден од нивните митинзи настапи и унгарскиот премиер Виктор Орбан.
Јанез Јанша претходно во два наврати беше премиер на Словенија, а во 2013-та беше осомничен за корупција, па помина и 6 месеци во затвор.
„Има многу предизвици. Покрај оние во врска со развојот, за кои веќе дискутиравме, постојат и многу безбедносни предизвици, Словенија ја брани Шенгенската граница во Европа. Таа граница еднаш падна, а сега ние се соочуваме со последиците. Ние нема да дозволиме тоа повторно да се случи“.
Изјави Јанша, алудирајќи на големиот бран бегалци во 2015-та и 2016-та година.
На второ место, според анкетите, е новиот политички субјект, - Листата на Марјан Шарец, кој има спротивни ставови од Јанша.
„Ние сакаме да донесеме стабилност, и во внатрешната и во надворешната политика. Ние сме партија која ја претставува нормалноста, не го гледаме светот црно – бело, ги почитуваме човековите права“.
Се предвидува дека словенечката економија годинава ќе има раст од 5,1 отсто, но главни проблеми има во здравството, каде што има недостиг од пресонал, како и во пензискиот систем, каде што поради стареењето на населението, притисокот врз буџетот е се поголем.
Како и да е, гласачите, се чини најмногу ги привлекоа слоганите на партијата на Јанша, и тоа во врска со мигрантите, бидејќи сеуште се свежи сеќавањата кога над милион бегалци и мигранти поминаа преку балканската рута, низ Словенија.
Политичкиот аналитичар Миха Ковач, вели:
„Оваа изборна кампања беше брилијантна за словенечки стандарди, тие (СДС) копираа многу работи од Фидез во Унгарија, многу работи од американските ултра-конзервативни републиканци. Направија микс во едно и навистина завршија добра работа“.
Но, доколку СДС, на Јанез Јанша и навистина победи на изборите, како што покажуваат анкетите, другите партии истакнуваат дека нема да соработуваат, што значи дека тешко ќе формира влада. Аналитичарите очекуваат долгу преговори по изборите и прогнозираат дека веројатно Словенија до септември ќе нема нова влада.
