Продолжено гласањето во едно избирачко место во Крива Паланка
Во избирачкото место 0951 во населбата Баглак во Крива Паланка поради технички проблеми гласањето ќе биде продолжено за еден час, информираат од ОИК. На ова избирачко место на кое има регистрирано 901 избирачи, гласањето ќе трае до 20 часот.
Затворени гласачките места
Во 19 часот се затворени избирачките места на кои граѓаните можеа да гласаат на денешните шести локални избори во Република Македонија. По затворањето на избирачките места можат да гласаат само лицата кои во тој момент се затекнале во објектот каде што се гласа.
Мирни избори со помала излезност од претходните
Гласањето помина мирно, без поголеми нарушувања на јавниот ред и мир. Забележани се одредени нарушувања на изборниот процес и од стана на избирачки одбори и од гласачи и од партиски активисти, заклучуваат задолжените за спроведување и набљудување на изборниот процес. Излезноста е помала отколку на претходните избори.
МВР - Обид за физичка пресметка во Горно Седларце и фотографирање гласачки ливчиња
Министерството за внатрешни работи информира дека попладнево во текот на локалните избори е регистриран обид за физичка пресметка меѓу гласач и член на избирачки одбор, осум случаи на фотографирање гласачки ливчиња и две гласања во име на друго лице.