Цивил – Над 2.000 луѓе немале можност да гласаат
Невладината организација Цивил, која ги следи изборите со 308 набљудувачи, оценува дека изборниот ден протекува со голем број нерегуларности. Претседателот на Цивил Џабир Дерала рече дека избирачкиот список е во хаос и повеќе од 2000 луѓе немале можност да го остварат своето гласачко право.
ДИК - До 17 часот излезноста 60,38 отсто
До 17 часот гласале 60,38 отсто од регистрирани гласачи, соопшти претседателот на ДИК, Александар Чичаковски на прес-конференција во 18 часот. Најголема излезност има во четвртата изборна единица каде гласале 67,15 отсто од гласачите. Во четворката се води битка меѓу лидерите на ВМРО-ДПМНЕ и СДСМ, Никола Груевски и Зоран Заев. Најмала излезност, пак, има во шестата единица, каде гласале 48,82 отсто. Чичаковски вели дека не се забележани поголеми нарушувања на изборниот процес, освен граѓани кои не можеле да се најдат на списокот за гласање.
Во првата изборна единица гласале 66,38 отсто од гласачите, во третата изборна единица на гласање излегле 64,89 од избирачите, во двојката 59,76 отсто, во петката 58,39 отсто.
Во Неготино и Демир Капија гласале три четвртини од гласачите до 17 часот
Во Неготино до 17 часот гласале 73,41 отсто од избирачите, а во Демир Капија 74,94 проценти, информираа Нетка Веселинова и Стојна Топчиева, претседатели на општинските изборни комисии во двете општини.
Манчевски – Големата излезност покажува дека граѓаните сакаат промени
Потпретседателот на СДСМ, Дамјан Манчевски, веднаш по завршувањето на денешното гласање изрази голема благодарност до граѓаните за големата излезност. На прес-конференцијата во партиското седиште во Скопје, тој рече дека големата излезност покажува дека граѓаните сакаат промени. Манчевски рече дека одредени стари навики на одредени групации блиски до власта продолжија и се обидоа да го спречат граѓаните да гласаат, но оти тие не се доволни.