Цивил – Извонредно голем број нерегуларности на изборите
Невладината организација Цивил оцени дека изборниот ден поминал со извонредно голем број нерегуларности.
„Нерегуларностите беа последица на долгогодишно структурно насилство, нерегуларности кои беа последица на политичка дискриминација, широко распространета корупција и отсуство на владеење на правото“, рече претседателот на Цивил, Џабир Дерала.
Груевски прогласи победа на изборите
Претседателот на ВМРО-ДПМНЕ, Никола Груевски, на вечерашната прес-конференција во партиското седиште во Скопје рече дека од скоро 89 отсто обработени гласови, ВМРО-ДПМНЕ освоиле 434 илјади гласови, додека СДСМ освоил 415 илјади. Со тоа ВМРО-ДПМНЕ е победник на овие избори, рече тој.
Заев – Победивме режим со пенкало
Лидерот на СДСМ, Зоран Заев, вечерва им се заблагодари на граѓаните на Македонија, кои, како што рече, пишуваат историја. На прославата на изборната победа на СДСМ пред владата во Скопје, Заев вечерва рече дека опозицијата предводена од СДСМ, според нецелосните резултати води со еден пратеник повеќе од ВМРО-ДПМНЕ.
„Македонија испиша светска историја. Падна режим со пенкало, со глас“, рече Заев, додека насобраните скандираа „Шутка не ти бега, Никола“.
Тој рече дека се уште се чекаат резултатите, но оти трендовите може само да растат.
Во исто време прослава за изборната победа организира и владејачката ВМРО-ДПМНЕ на плоштадот пред партиското седиште.
ВМРО-ДПМНЕ прогласи победа
Во моментов имаме 20 илјади гласови повеќе од СДСМ, но ќе имаме уште повеќе, рече на прес конференцијата во седиштето на ВМРО- ДПМНЕ Влатко Ѓорчев од оваа партија. И од ВМРО-ДПМНЕ најавија прослава пред седиштето на партијата. СДСМ веќе ја прославува изборната победа пред владата, каде што во моментов се мести бина.