ДПА им се заблагодари на сите што гласале за нив
Портпаролот на ДПА Беким Фазлиу вечерва им се заблагодари на активистите на партијата и на сите што го дале гласот за нив на предвремените парламентарни избори. Од ДПА информираа дека вечерва нема да има обраќање на нивниот претседател Мендух Тачи.
СДСМ тргна да слави пред Влада
Претседателот на подмладокот на СДСМ, Стефан Богоев ги повика поддржувачите на партијата пред Влада, за како што рече, да ја прослават победата. Симпатизерите на СДСМ кои беа собрани во партиското седиште тргнаа кон центарот на Скопје.
Шилегов – Победуваме во големите градски средини
Режимот на Никола Груевски станува минато и веќе се слави на плоштадите, рече портпаролот на СДСМ и носител на кандидатската листа во изборната единица 6, Петре Шилегов на прес-конференција во партиското седиште неколку минути пред 22 часот. Тој рече дека СДСМ извојувале победа во големите градски средини.
ДИК - Изборите поминаа беспрекорно, резултати околу полноќ
Денеска имавме успешен ден. Изборите во организациско - техничка смисла поминаа беспрекорно, изјави вечерва претседателот на Државната изборна комисија, Александар Чичаковски.
„Со оглед дека во рок од пет часа по завршување на гласањето сите избирачки одбори треба да ги предадат оригиналните записници до ОИК, целосна слика се очекува вечерва околу полноќ“, рече Чичаковски.