ВО ЖИВО: Претседателски и парламентарни избори

Во Струга мала излезност во утринските часови

До 10 часот во регионот на Струга и струшко на гласање за претседателските избори излегле само 3,32 % од граѓаните, додека за парламентарните избори само 4,15%. И во струшките села Лабуништа, Боровец, Октиси и Подгорци исто така излезноста е многу мала. Гласањето во Струга тече без проблеми и нерегуларности изјави за Радио Слободна Европа, Џенгис Хани претседател на ОИК во Струга.И во Струга проблем е поголемиот број на гласачи во списокот за парламентарните избори, во однос на претседателските избори. Од ОИК во Струга, како што јави Мики Трајковски, велат дека тие тука немаат никакви ингеренции и дека располагаат со оние списоци кои до нив биле доставени од страна на ДИК. Во Струга за претседателските избори право на глас имаат 57,983 граѓани, а за парламентарните 57,096.

ДИК: До 10 часот одзивот околу 10%

До 10 часот на гласање на предвремените парламентарни избори гласале 166.310 граѓани или 9,52 отсто од вкупно запишани 1.780.128 избирачи, соопшти на првата прес конференција портпаролот на ДИК Билјана Јовановска.
Одѕизвот на вториот круг од претседателските избори е 8,81 процент, односно на гласање излегле 155.136 од вкупно 1.779.572 избирачи.
Најголем одѕив има во Новаци, на парламентарните избори одѕивот е 20,49 проценти, а на претседатлските 20,68 проценти

Излезност - Битола, Демир Хисар и Новаци

Во Битола до 10 часот излезеноста за претседателските избори е 12,68 отсто, додека за предвремените парламентарни 12,85 проценти. Гласањето се одвива во мирна, демократска атмосфера, без нерегуларности.

Во општина Демир Хисар до 10 часот за претседателските избори гласале 16,43 отсто од избирачите, а за парламентарните 16,54, додека во општина Могила 8,2 процента за претседателските и 8,3 отсто за парламентарните.

Најголем одѕив е регистриран во општина Новаци каде за претседателските избори до 10 часот гласале 20,68 отсто од граѓаните, додека за парламентарните гласале 20,9 проценти.

Куманово, Старо Нагоричане,Липково, Дебар и Центар Жупа

Во Куманово до 10 часот за вториот круг од претседателски избори излезеноста на избирачките места од Втората изборна единица е 8 отсто, додека на 18-те избирачки места во Третата изборна единица 14 проценти.

Во Старо Нагоричане каде право на глас имаат 3.600 граѓани на 38 избирачки места, излезеноста за претседателските избори до 10 часот е 8,03 отсто, а за парламенатрните 9,23, информира претседателката на ОИК Тина Костовска.

Во Липково правото на глас од 23.000 граѓани на 36 избирачки места, го искористиле - за претседател 0,74 отсто и за парламентарните избори 5,52 процента.

Гласањето во општините Дебар и Центар Жупа во сите 43 избирачки места минува мирно и без проблеми, потврдуваат општинските изборни комисии.