ВО ЖИВО: Претседателски и парламентарни избори

Во гевгелиско до 17 часот одѕивот преку 65 отсто Во Општина Гевгелија, според податоците од ОИК, до 17 часот на гласање излегле 12.739 граѓани од вкупно 19.509 евидентирани гласачи. Процентот на избирачи кои гласале за шеф на државата изнесува 65,3 отсто, а за новиот парламентарен состав 65,4 отсто.

Мал интерес кај Албанците за претседателските избори На два часа пред затворањето на гласањето, во Општина Желино, каде живее претежно албанско население, 9 отсто од граѓаните се решиле да гласаат за еден од двајцата кандидати за претседател кои влегоа во вториот круг. Слична е состојбата и во Боговиње каде е забележана излезност од 11,39 проценти на претседателските избори.

Новаци рекордер во излезност на гласање Пелагониската општина Новаци го собори рекордот во излезност на гласање. Според Стевче Ангелевски, претседател на Општинската изборна комисија, до 17 часот на предвремените парламентарни избори гласале 72,56 проценти од вкупниот број гласачи.

Обвинувања за организирано носење гласачи во струшко Претставници на политички партии во Струга реагираат дека активисти на други политички партии организираат превоз и носат дел од жителите на селските средини на гласање до избирачките места, јавува нашиот дописник Мики Трајковски.