БЛОГ - Локални избори 2013

Проблеми во општина Долнени, избришани гласачи.

Многумина граѓани од Општина Долнени, реагираат, зошто, иако имаат биометриски документи, се избришани од единствениот избирачки список. Ова го потврдуваат од Општинската изборна комисија во Долнени, јави нашиот дописник од Прилеп.

„Не знаеме каде да ги упатиме, им кажуваме да се обратат до ДИК, зашто тие имаат биометриски документи, а ете ги нема во списокот. Други аномалии во изборниот процес нема“, вели Жарко Маркоски, претседател на ОИК-Долнени.

Во оваа општина 10.521 жител гласаат за еден од 5 кандидати за градоначалник и една од 7-те советнички листи, а до 13 часот, евидентирана е излезност од 27.5 отсто.

Според непотврдени информации, во Прилеп на избирачкото место 1352 констатирани се нерегуларности во гласањето.

„Недостигаат 12 гласачки ливчиња, со кои може да се случи таканаречениот „бугарски воз“. За ова известени се сите надлежни служби и ОБСЕ. А, на многу избирачки места истакнати активисти и членови на партијата, не можат да го остварат правото на глас, зашто се избришани од избирачкиот список, тврдат партиски извори, а пренесува нашиот дописник од Прилеп.

Од ОИК-Прилеп, тврдат дека нема пријавено никакви аномалии, и потенцираат по 19 часот ќе соопштуваат детали за евентуални проблеми.

Локалните избори досега: Мирно и без инциденти. Голем одзив, како што впрочем и се очекуваше. Посматрачите јавуваат за бројни неправилности на повеќе места, а за нерегуларности јавуваат и партиски штабови. Гласачките места се затвораат во 19 часот, кога ќе може и да се сублимира вкупниот одзив и влијанието на неправилностите врз изборните резултати.

Фотогалерија: Македонија гласа, посматрачите следат

Види ја фотогалеријата тука:
http://www.makdenes.org/media/photogallery/24937591.html?nocache=1