Вести
Дрезден: Средба Шредер - Ширак
види ги сите денешни вести
Неделава можен договор за примирје во Газа, наведува Белата куќа
Договор за прекин на огнот во Појасот Газа може да биде постигнат оваа недела, изјави денеска (13 јануари) советникот за национална безбедност на Белата куќа, Џејк Саливан.
„Блиску сме до договор и би можеле да го завршиме оваа недела. Не давам никакви ветувања или предвидувања, но тоа е на дофат“, рече Саливан за договорот што ќе вклучува ослободување на заложниците од Појасот Газа.
Преговорите за ослободување на 33 заложници се во напредна фаза, изјави денеска израелски официјален претставник кој сакаше да остане анонимен.
„Не сме сигурни дали се работи за часови, денови или повеќе“, рече претставникот.
Американските и арапските посредници постигнаа значителен напредок во текот на ноќта во разговорите за прекин на огнот во војната меѓу Израел и Хамас и ослободување на десетици заложници во Појасот Газа, но сè уште не е постигнат договор, изјавија официјални лица денеска.
Тројца функционери, кои побараа да не бидат именувани, рекоа дека е постигнат напредок и дека следните денови ќе бидат клучни за ставање крај на повеќе од 15-месечните борби меѓу Израел и палестински Хамас - што САД и Европската унија ја сметаат терористичка организација.
Денеска Катар им го даде на Израел и Хамас конечниот нацрт на договорот за ставање крај на војната во Појасот Газа, по „пробивот“ во разговорите на кои присуствуваше и пратеникот на новоизбраниот американски претседател Доналд Трамп, изјави за Ројтерс официјален претставник запознаен со преговорите.
Официјалниот претставник рече дека текстот на договорот за прекинот на огнот и ослободувањето на заложниците биле договорени на разговорите во Доха во кои учествувале шефовите на израелските разузнавачки агенции Мосад и Шин Бет и катарскиот премиер, како и Стив Виткоф, кој ќе биде американски претставник кога Трамп ќе ја преземе функцијата следната недела.
Се верува дека учествувале и официјални лица од американската администрација во заминување.
„Следните 24 часа ќе бидат клучни за да се постигне договор“, рече претставникот.
Израелското радио Кан, цитирајќи израелски официјален претставник, денеска објави дека делегациите на Израел и Хамас во Катар го примиле нацртот и дека израелската делегација ги известила израелските лидери.
Официјални лица од двете страни, иако не потврдија дека е постигнат конечен нацрт, рекоа дека има напредок во разговорите.
САД, Катар и Египет повеќе од една година работат на преговори за ставање крај на војната во Појасот Газа, досега безуспешно.
Инаугурацијата на Трамп на 20 јануари на Блискиот Исток се смета за де факто краен рок за постигнување договор.
Новоизбраниот претседател рече дека ќе биде „пеколно да се плати“ доколку заложниците што ги чува Хамас не бидат ослободени пред да ја преземе функцијата, додека претседателот во заминување Џо Бајден исто така инсистираше на договор пред да му заврши мандатот.
Официјалниот претставник рече дека разговорите продолжиле во раните утрински часови денеска, при што Виткоф извршил притисок врз израелската делегација во Доха, а катарскиот премиер Шеик Мохамед бин Абдулрахман Ал Тани ги притискал претставниците на Хамас да го финализираат договорот.
Шефот на египетската Генерална разузнавачка агенција, Хасан Махмуд Рашад, исто така беше во главниот град на Катар на разговори, рече официјалниот претставник.
Претставникот на Трамп, Виткоф, беше неколку пати во Катар и Израел од крајот на ноември. Тој беше во Доха во петокот (10 јануари) и отиде во Израел за да се сретне со премиерот Бенјамин Нетанјаху следниот ден, пред да се врати во Доха.
Бајден телефонски разговараше и со Нетанјаху во неделата (12 јануари), нагласувајќи ја „итната потреба за прекин на огнот во Појасот Газа и враќање на заложниците заедно со зголемена хуманитарна помош што би била овозможена со прекин на непријателствата според договорот“, соопшти Белата куќа.
Израел започна офанзива во Појасот Газа откако милитантите на Хамас го нападнаа југот на земјата во октомври 2023 година, убивајќи 1.200 луѓе и зедоа повеќе од 250 заложници, според израелските податоци.
Оттогаш, повеќе од 46.000 луѓе се убиени во Појасот Газа, според здравствените власти во Појасот Газа под контрола на Хамас, при што голем дел од територијата е опустошена од хуманитарна криза и најголемиот дел од населението е раселено.
Двете страни со месеци главно се согласуваа за принципот на прекин на огнот во замена за ослободување на заложниците кои ги држеше Хамас и палестинските затвореници кои ги држеше Израел.
Сепак, Хамас инсистираше на тоа дека договорот мора да доведе до траен крај на војната и повлекување на Израел од Појасот Газа, додека Израел вели дека нема да ја прекине војната додека Хамас не биде уништен.
Извори: АП, Ројтерс
Нови ограничувања од САД за извоз на чипови со вештачка интелигенција
Соединетите Американски Држави денеска (13 јануари) претставија нови правила за извоз на чипови што се користат за вештачка интелигенција, зголемувајќи ги напорите во последните денови на Џо Бајден на претседателската функција, да го отежнат пристапот до напредната технологија на Кина и на другите ривали.
Ограничувањата следат по мерките објавени во 2023 година за извоз на одредени чипови за вештачка интелигенција во Кина, која САД ја гледаат како стратешки конкурент.
Во последниве години, Вашингтон ги засили напорите за ограничување на извозот на најсовремени чипови во Кина, кои можат да се користат во вештачката интелигенција и во системите за оружје, бидејќи технолошкиот напредок на Пекинг предизвикува загриженост.
„САД сега го предводат светот во областа вештачката интелигенција – и развојот на вештачката интелигенција и дизајнот на чипови со вештачка интелигенција – и од клучно значење е така да остане“, изјави министерката за трговија, Џина Раимондо.
Новите правила воведуваат нови контроли на чиповите, барајќи овластувања за извоз, реизвоз и трансфери во земјата - истовремено вклучувајќи голем број исклучоци за земјите кои се сметаат за пријателски настроени кон САД.
Центрите за податоци за вештачка интелигенција ќе мора да се усогласат со подобрените безбедносни параметри за да можат да увезуваат чипови.
Сепак, последниот потег на администрацијата во заминување наиде на критики од технолошката индустрија и предупредувања дека ќе и наштети на конкурентноста на САД.
Извршниот директор на Асоцијацијата на полупроводнички индустрии, Џон Нојфер, рече дека оваа организација е „длабоко разочарана што промена на политиката со таков размер и влијание се воведува неколку дена пред претседателската транзиција и без никаков значаен придонес во индустријата“.
Тој во соопштение додаде дека новите правила може да предизвикаат „трајна штета на американската економија и глобалната конкурентност“ со отстапување на клучните пазари на ривалите.
Гигантот за чипови Nvidia рече дека „иако се сокриени под маската на ‘анти-кинески' мерки, овие правила нема да направат ништо за да ја подобрат безбедноста на САД“.
Правилата им отежнуваат на стратешките конкуренти на САД да користат „шверц и далечински пристап“ за да ја избегнат контролата на извозот, рече советникот за национална безбедност на Белата куќа, Џејк Саливан.
Тие, исто така, според него, обезбедуваат поттик за американските пријатели и партнери да користат доверливи добавувачи за напредна вештачка интелигенција.
Реакција на Кина: „Флагрантно кршeње“
Кина соопшти дека новите американски правила за извоз на чипови кои се користат за вештачка интелигенција се „флагрантно кршење“ на меѓународните трговски правила.
Ова е „уште еден пример за генерализација на концептот на национална безбедност и злоупотреба на извозните контроли и флагрантно кршење на меѓународните мултилатерални економски и трговски правила“, се вели во соопштението на кинеското Министерство за трговија.
„Претходно, американските високотехнолошки претпријатија, индустриски организации и други го изразуваа своето незадоволство и загриженост преку различни канали... Но, администрацијата на Бајден ги игнорираше разумните гласови на индустријата и инсистираше на брзање со мерките“, соопшти кинеското министерство.
Во соопштението се додава дека Кина „ќе ги преземе неопходните мерки за цврсто да ги заштити своите легитимни права и интереси“.
Новите правила ќе стапат во сила за 120 дена, рече Раимондо, давајќи му време на новоизбраниот претседател Доналд Трамп да внесе промени.
Nvidia во своето соопштение наведува дека првата администрација на Трамп покажала како САД „победуваат со иновации, конкуренција и споделување на нашата технологија со светот“.
Трамп воведе високи царини за Кина за време на неговиот прв претседателски мандат.
Сепак, неговите поддржувачи во Силиконската долина може да ги гледаат новите правила како непотребно оптоварување на нивниот капацитет за извоз на производи.
Денеска акциите на Nvidia паднаа за околу три отсто во почетокот на тргувањето, додека Intel загуби 1,6 отсто, а AMD околу 0,8 отсто.
Извор: АФП
Руте: НАТО е загрижен за ситуацијата во БиХ и Косово
Генералниот секретар на НАТО Марк Руте денеска (13 јануари) рече дека Северноатлантската алијанса е особено загрижена за ситуацијата како во Босна и Херцеговина, така и во Косово.
Говорејќи во Европскиот парламент за ситуацијата во Босна и Херцеговина, Руте подвлече дека е од суштинско значење да не се создава безбедносен вакуум во земјата. Тој ја изрази својата целосна поддршка за мисијата АЛТЕА и додаде дека алијансата ќе одржува блиски контакти на сите нивоа за да обезбеди заеднички ефикасно да се управува со сите потенцијални предизвици во БиХ.
Осврнувајќи се на безбедносната ситуација во Косово, шефот на најголемата воена организација потврди дека претставниците на НАТО се во редовен контакт со Приштина и Белград, особено во предизборната кампања во Косово со цел да се спречат можни тензии.
„Ние сме во контакт и со Косово и со Србија за да обезбедиме изборите што ќе се одржат на почетокот на февруари да не доведат до дестабилизација. Ова е исто така клучно“, рече шефот на Алијансата.
Тој подвлече дека е неопходно да се посвети посебно внимание на регионот на Западен Балкан, кој го нарече клучно соседство.
Руте изрази „длабока загриженост“ за безбедносната ситуација на европскиот континент поради кампањата која ја води Русија.
„Не сме во војна, но не може да се каже дека сме во мир“, изјави генералниот секретар на алијансата.
Тој им порача на Европејците дека е неопходно да се инвестира во одбраната. Инаку, подвлече, „подгответе се да го научите рускиот јазик или бегајте во Нов Зеланд“.
И поранешната македонска министерка за одбрана, а актуелна заменичка на Руте, Радмила Шекеринска, вели дека за да се справи со сè потурбулентното безбедносно опкружување, Алијансата мора да ги зголемува трошоците за одбраната и одбранбеното производство.
Ова го порача за време на нејзиното денешно обраќање на Годишната национална конференција на здружението „Народ и одбрана“ во Селен, Шведска.
Фицо го кани Зеленски на разговор за рускиот гас, тој одговори: „Дојдете во Киев“
Словачкиот премиер Роберт Фицо денеска (13 јануари) го покани украинскиот претседател Володимир Зеленски на разговор за транзитот на гас поради спорот околу одлуката на Киев да не ги обнови договорите за транзит на руски гас.
Во краток одговор, Зеленски го покани Фицо да го посети Киев во петок.
„Во ред. Дојдете во петок во Киев“, напиша Зеленски на мрежата Х.
Украина го прекина протокот на гас кон Европа на почетокот на годината по истекот на транзитниот договор меѓу Киев и Москва, со цел да се спречи Москва да добива приходи од енергија и да ги користи за финансирање на инвазијата врз Украина што започна во февруари 2022 година.
Фицо бара обновување на транзитот, велејќи дека исклучувањето на гасот ја чини Словачка, која граничи со Украина, повисоки цени и изгубени такси за понатамошен транзит на гас во Европа.
Откако Фицо и рускиот претседател Владимир Путин се сретнаа во Москва во декември, Зеленски го обвини словачкиот премиер дека сака да му „помогне“ на Путин да заработи пари за финансирање на војната.
Во отвореното писмо до Зеленски, објавено од неговиот кабинет денеска, словачкиот премиер изјави дека средбата може да се одржи во Словачка во близина на границата со Украина и дека може да се искористи за разговори за технички решенија за проблемот.
„Таквата средба ќе создаде добра основа за отворена дискусија за снабдување со гас на Словачка и други земји преку украинска територија“, рече Фицо.
Тој претходно изјави дека е блиску до договор според кој испораките на гас преку Украина ќе продолжат така што прво би се сменила сопственоста над гасот.
Фицо рече дека на самитот на ЕУ во декември, Зеленски одбил да ја продолжи испораката на руски гас преку Украина.
Тој тврди дека Европа претрпела загуби од повеќе милијарди евра поради растот на цената на бензинот предизвикан од недостигот од околу 13,5 милијарди кубни метри гас што тече низ Украина, вклучително и околу три милијарди кубни метри за Словачка.
Фицо минатата недела се закани дека ќе го прекине вонредното снабдување со електрична енергија на Украина бидејќи Русија ја напаѓа нејзината електрична мрежа или дека ќе ја намали помошта за украинските бегалци. Тој, исто така, рече дека неговата влада би можела да ја запре хуманитарната помош или да го искористи правото на вето врз одлуките на ЕУ за Украина.
Извор: Ројтерс
САД ја означи екстремната десничарска мрежа „Терорграм“ како терористичка група
Соединетите Американски Држави денеска (13 јануари) воведоа санкции за екстремно десничарската онлајн мрежа „Терорграм“, означувајќи ја како терористичка група и обвинувајќи ја за промовирање на насилна надмоќ на белата раса.
Американскиот Стејт департмент во соопштението наведе дека групата, која првенствено функционира на социјалната мрежа Телеграм, и тројца нејзини лидери – од Хрватска, Јужна Африка и Бразил – се обележани како специјално означени глобални терористи.
Стејт департментот соопшти дека таа група мотивирала и овозможила напади и обиди за напади, вклучително и вооружен инцидент во 2022 година пред ЛГБТК бар во Словачка, планиран напад на енергетски објекти во Њу Џерси во 2024 година и напад со нож во август во џамија во Турција.
„Групата промовира насилна надмоќ на белците, поттикнува напади против перцепирани противници и обезбедува упатства и инструкциски материјали за тактиките, методите и целите на нападите, вклучително и критичната инфраструктура и владините службеници“, соопшти Стејт департментот.
Мерките на Стејт департментот ги замрзнуваат средствата на групата во САД и им забрануваат на Американците да имаат односи со неа.
Сиро Даниел Амприм Фереира од Бразил, кој е администратор на каналот „Терорграм“, Ноа Ликул од Хрватска и Хендри-Вал Мулер од Јужна Африка, кој е исто така администратор на каналот, се идентификувани како лидери на групата.
Во септември, американските обвинители пондесоа кривични пријави против двајца од наводните водачи на групата, тврдејќи дека користеле Телеграм за поттикнување напади врз афро-американци, Евреи, ЛГБТК луѓето и имигранти со цел да поттикнат расна војна.
Велика Британија во април објави дека ќе ја забрани групата „Терорграм“ како терористичка организација, што значи дека членството во групата или нејзиното промовирање би станало кривично дело во таа земја.
Американскиот претседател Џо Бајден, кој ја критикуваше идејата дека белата раса има надмоќ во однос на другите, ја започна првата национална стратегија за борба против домашниот тероризам во 2021 година. Ова вклучи ресурси за идентификување и кривично гонење на заканите и нови средства за одвраќање за да се спречи Американците да им се придружат на опасните групи.
Извор: Ројтерс
Прва трансплантација на коска од починат донор на прсти кај 13-годишник
Министерството за здравство (МЗ) попладнево (13 јануари) информира за успешна трансплантација на Клиниката за ортопедија, со имплант, односно коска од починат донор, на два прста кај 13-годишно дете со брахидактилија.
Според информациите од МЗ, во Северна Македонија за прв пат е извршен ваков тип на трансплантација, а детето има уреден постоперативен тек.
Проф.д-р Билјана Кузмановска, национален координатор за трансплантација во објавата на социјалните мрежи му честиташе на тимот предводен од д-р Даница Поповска и доц. д-р Илир Шабани.
„Ќе продолжиме со уште посилно темпо заедно со сите чинители да ја подигнуваме свесноста за овој највисок акт на човекољубие“, истакна проф. д-р Кузмановска.
Најголем напредок во трансплантацијата, покажуваат бројките, е постигнат во 2021 година кога имало девет донори, па се трансплантирани пет срца, 16 бубрези и се направени седум коскени трансплантации.
Од 2020 година до март 2024 година се трансплантирани 11 срца, 4 црни дроба, 38 бубрези и 24 коскени ткива, вкупно 77 органи, според податоците што ги објавуваше Министерството за здравство.
Во историјата на македонското здравство, првата трансплантација на бубрези е направена во Македонија во времето на Југославија во 1977 година, две децении после првата трансплантација во светот, во 1954 во САД.
За 47 години во Македонија се направени повеќе од 500 трансплантации на бубрези. Јубилејната 500 трансплантација беше направена минатата 2023 година, кај 25 годишна пациентка.
ЕК негира дека ја прикрила здравствената состојба на фон дер Лајен
Европската комисија (ЕК) денеска (13 јануари) негираше дека се обидела да ја прикрие здравствената состојба на својата претседателка Урсула фон дер Лајен, која беше хоспитализирана поради тешка пневмонија.
Фон дер Лајен (66) во септември го започна својот втор петгодишен мандат на чело на Европската комисија.
На 3 јануари комисијата изјави дека Фон дер Лајен има „тешка пневмонија“ и дека нејзините активности во следните две недели се откажани.
Детали за нејзината состојба или како за тоа како се разболела не се објавени, иако германската новинска агенција ДПА подоцна објави дека таа била примена во болница. Ова покрена прашања за транспарентноста во моќната извршна власт на ЕУ.
На новинарско прашање зошто се сокриени вестите за нејзината хоспитализација, портпаролката на Европската комисија Пола Пињо изјави: „Рековме дека претседателката имаше тешка пневмонија“.
Пињо рече дека медиумите биле информирани оти претседателката ги откажала своите состаноци на почетокот на јануари, но примала важни телефонски повици, вклучително и од италијанската премиерка Џорџа Мелони и дека можела да ги извршува своите должности.
„Затоа ви дадовме критични информации за здравствената состојба на претседателката, така што кажавме каква болест има и колку е сериозна“, рече Пињо одговарајќи на новинарски прашања, без да објасни зошто се сокриени детали од болницата.
Додаде дека претседателката „добро закрепнува“ и треба да се врати во Брисел во нејзината канцеларија на Комисијата, на крајот на оваа недела.
Фон дер Лајен обично има напорен распоред на патувања. Таа следната недела треба да присуствува на седницата на Европскиот парламент во Стразбур, Франција и на Светскиот економски форум во Давос, Швајцарија.
По преземањето на функцијата во 2019 година, фон дер Лајен ги предводеше напорите на ЕУ за обезбедување вакцини против КОВИД-19 и беше меѓу главните поддржувачи на Украина за време на руската инвазија. Со ослабените влади во Франција и Германија, таа се обиде да одигра поголема улога во активностите на Европската унија.
Извор: АП
Џихадистите убиле најмалку 40 фармери во западна Нигерија
Припадници на екстремистички исламски групи убиле најмалку 40 земјоделци во североисточната нигериска држава Борно, изјави денеска (13 јануари) владин претставник.
Борците на „Западноафриканска провинција на Исламска држава“ (ISWAP), која застана на страната на т.н. Исламска држава, вчера приведоа десетици земјоделци на обалата на езерото Чад и ги стрелаа, наведува во соопштението, Усман Тар, државен комесар за информации во Борно.
Земјоделците, според Тар, излегле од безбедните зони во кои војниците овозможуваат земјоделие и риболов, во област која е засолниште за милитантите на ISWAP и ривалот Боко Харам.
Гувернерот на Борно, Бабагана Умара Зулум, ги предупреди цивилите да останат во безбедните зони од каде армијата ги отстрани и екстремистите и муницијата и повика и на истрага за нападот.
Во 2009 година, групата Боко Харам започна вооружена борба против западното образование и за да ја наметне својата радикална верзија на исламскиот закон. Конфликтот се прелеа преку границата и кон северните соседи на Нигерија.
Според ОН, убиени се околу 35.000 цивили, а повеќе од два милиони се раселени во североисточниот регион.
Извори: АП, АФП
Шекеринска: Путин сакаше помалку, а доби повеќе НАТО
Патот кон членство во НАТО може да потрае подолго од очекуваното, барем така беше во случајот со Северна Македонија, а знаеме со какви предизвици се соочи и Шведска, но таа успеа да ги реши и сега е дома. Ова го изјави заменик генералната секретарка на Алијансата, Радмила Шекеринска, во обраќањето на Годишната национална конференција на здружението „Народ и одбрана“ на тема „Ковање на иднината: Стратешката визија на НАТО под новото раководство“, што се одржува во шведскиот град Селен.
„Вашето членство во НАТО е добро за стабилноста на Далечниот Север, Балтикот и пошироко“, рече Шекеринска во Шведска.
Таа ја нагласи важноста на членството во НАТО, особено кога е присутна закана од Русија во различни форми.
„Свесни сме и будни сме. Знаеме дека во НАТО нашите народи се побезбедни заедно отколку сами. Кога (рускиот) претседател (Владимир) Путин ја започна својата целосна инвазија на Украина пред речиси три години, тој сакаше помалку НАТО. Сега доби повеќе НАТО. Членството во НАТО е огромна одговорност за секој сојузник, без разлика дали е основач или најнова членка, како Шведска“, рече Шекеринска.
Според неа, за да се справи со сè потурбулентното безбедносно опкружување, Алијансата мора да ги зголемува трошоците за одбраната и одбранбеното производство.
Таа потенцира дека вкупните воени трошоци на Русија ќе достигнат најмалку седум или осум отсто од рускиот БДП и таа заедно со Кина, Иран и Северна Кореја имаат за цел да го дестабилизираат глобалниот поредок, да ги ослабат Европа и Северна Америка и да ги поткопаат нашите слободи.
„Ние сме подготвени да ги браниме нашите граѓани и нашата територија денес, но не можеме да го гарантираме тоа за во иднина, доколку не преземеме акција сега. Генералниот секретар и јас се согласуваме дека сојузниците мора да се префрлат на размислување како во време на војна. Треба да ги зголемиме одбранбеното производство и трошоците за одбраната за да можеме да продолжиме да гарантираме дека нашите луѓе се безбедни“, додаде Шекеринска.
Воената Алијанса во ноември минатата година објави дека поранешната македонска министерка за одбрана Шекеринска ќе биде назначена за заменик - генерална секретарка на НАТО.
Со ова назначување таа стана највисокиот функционер во Алијансата досега што доаѓа од регионот на Западен Балкан, но и од земја надвор од Европската унија.
Пополнувањето на заменичката позиција беше приоритет за генералниот секретар Марк Руте, кој ја презеде оваа функција на 1 октомври, по 14 години како холандски премиер.
Примарната улога на заменикот на генералниот секретар е да го заменува шефот и да претседава со состаноците на 32-та амбасадори во Северноатлантскиот совет двапати неделно или на кој било итен состанок, вклучувајќи го и Советот НАТО-Украина.
Српските студенти се оградија од екстремистичките и националистичките симболи на протестите
Студентите кои се дел од блокадите во Србија, денеска (13 јануари) се оградија од екстремистичките организации и националистичките обележја кои се појавија еден ден претходно за време на протестот пред Уставниот суд во Белград.
„Присуството на нивните знамиња и транспаренти во првите редови на протестот не е во согласност со нашите вредности и цели“, се вели во соопштението.
Дел од учесниците на протестот носеа и знамиња со симболи на ентитетот на Босна и Херцеговина, Република Српска, како и транспаренти со натпис „Нема предавање“ и нацртана карта на Косово, чија независност српската влада не ја признава.
Во соопштението студентите нагласуваат дека блокадите немаат идеолошка агенда.
„Не поддржуваме никакви форми на сепаратизам или поларизација во општеството. Наша единствена цел е исполнување на конкретните барања за кои влеговме во блокадите“, најавуваат студентите.
Тие ги повикаа сите учесници и поддржувачи да се фокусираат на заедничките цели и да се воздржат од истакнување симболи кои можат да доведат до поделба.
На повик на студентите кои ги блокираат факултетите, неколку десетици илјади демонстранти протестираа на 12 јануари пред Уставниот суд во Белград.
Во текот на изминатиот месец и половина во Србија беа блокирани повеќе од 60 факултети на четири државни универзитети.
На блокадите на факултетот претходеа протести кои почнаа со барање да се утврди политичка и кривична одговорност за несреќата во Нови Сад - каде 15 лица загинаа, а двајца тешко беа повредени при падот на настрешницата на железничката станица, на 1 ноември.
Неколку масовни протести, на кои се собраа десетици илјади граѓани, беа одржани и на покана на студентите кои ги блокираат факултетите, а пред Владата истакнуваат неколку барања.
Меѓу нив е и објавувањето на комплетната документација за реконструкцијата на Железничката станица во Нови Сад и падот на настрешницата, за да се утврди одговорноста за несреќата.
Исто така, бараат да бидат идентификувани и кривично гонети напаѓачите на демонстрантите на протестите кои по несреќата се одржуваат ширум Србија.
Се бара и ослободување на уапсените активисти на протестите и запирање на кривичната постапка против нив, како и зголемување на буџетот за универзитетите.
Претставници на власта тврдат дека се исполнети сите услови и ги повикуваат студентите да ги отворат факултетите.
Академците, пак, велат дека барањата се делумно исполнети и дека прекинот на работата на факултетите продолжува.
Мултимедија
Најпосетени
Што треба да знаете