Совет за безбедност: Осуда за Русија, состојбата во С. Македонија е стабилна

Членовите на Советот за безбедност ги осудија воените дејствија кои Русија ги презема над Украина и кои веќе донесоа загуба на човечки животи и материјална штета, соопштија од Кабинетот на претседателот на државата, по одржаната седница на Советот. На седницата се разговарало за безбедносната состојба во земјава и регионот поврзана со руската агресија врз Украина.

Членовите на Советот констатирале дека безбедносната состојба во земјата е стабилна.

Швајцарија ќе ги заостри мерките кон Русија

Швајцарија ќе ги заостри економските мерки против Русија по нејзината инвазија на Украина, изјави денеска претседателот Игнацио Касис.

Владата ќе ги прилагоди своите регулативи за да не може да се користи Швајцарија за заобиколување на санкциите наметнати од Европската унија, рече Касис на прес конференција во Берн.

Зеленски – Руските сили се обидуваат да ја заземат нуклеарната централа Чернобил

Украинскиот претседател Володимир Зеленски изјави дека руските сили се обидуваат да ја преземат контролата врз нуклеарната централа Чернобил, каде што се случи најголемата нуклеарна катастрофа во светот.

Руските воени сили влегоа во зоната на нуклеарната централа, а борбите ги зголемуваат стравувањата дека тоа може да предизвика еколошка катастрофа од огромни размери, соопштија украински претставници.

„Руските окупациони сили се обидуваат да ја преземат нуклеарната централа Чернобил. Нашите војници ги даваат своите животи за трагедијата од 1986 година да не се повтори“, напиша Зеленски на Твитер.

Состојбата во Македонија стабилна, осуда за руските дејствија во Украина

Безбедносната состојба во земјата е стабилна и осуда на воените дејствија кои Русија ги презема над Украина, кои веќе донесоа загуба на човечки животи и материјална штета. Ова е епилогот од Седницата на Советот за безбедност која денеска ја свика претседателот Стево Пендаровски.