Зеленски: Украина нема да ѝ се предаде на Русија
Украинскиот претседател Володимир Зеленски објави видео пред неговата канцеларија во Киев, во кое вели дека армијата „нема да го остави оружјето“.
„Добро утро до сите Украинци! Во последно време на Интернет имаше многу лажни информации дека ја повикувам нашата армија да го остави оружјето и да се евакуира. Слушајте, јас сум тука. Нема да го положиме оружјето. Ќе ја браниме нашата држава“, вели Зеленски во видеото.
САД разговараат со Индија за нејзиниот став за Украина
Соединетите Држави разговараат со Индија за нејзината позиција за руската инвазија на Украина, изјави доцна синоќа портпаролката на Белата куќа Џен Псаки, бидејќи Њу Делхи допрва треба јасно да се изјасни за нападот на руските сили. Во четвртокот, на прашањето на новинарите за позицијата на Њу Делхи, претседателот Џо Бајден призна: „Тоа не го решивме целосно“, објави АФП.
Папата во Твитер-порака на руски: Секоја војна е срамна капитулација
Секоја војна е срамна капитулација, напиша денеска Папата Франциск по повод руската инвазија врз Украина во Твитер порака на повеќе јазици, вклучително и на руски.
ОН – Над 50 илјади Украинци избегале од земјата за помалку од 48 часа
Над 50 илјади Украинци избегале од својата земја за помалку од 48 часа од почетокот на руската инвазија, соопшти денеска шефот на агенцијата за бегалци на ОН Филипо Гранди.