БЛОГ: ВМРО-ДПМНЕ победи - Заев поднесе оставка

октомври 31, 2021

ВМРО-ДПМНЕ прогласи победа на локалните избори, а премиерот и лидер на СДСМ Зоран Заев поднесе оставка на двете функции. На вториот круг од локалните избори кој се одржа во 44 општини, во поголемиот дел од општините победи опозиционата ВМРО-ДПМНЕ.

ВМРО-ДПМНЕ и коалицијата е победник на локалните избори, со освоени најмногу градоначалнички места.
Во Скопје победи независната кандидатка Данела Арсовска, подржана од ВМРО-ДПМНЕ
Зоран Заев го призна поразот и си поднесе оставка и од премиерската функција и од лидерската во СДСМ
ДУИ загуби во Тетово и Гостивар, но победи во Кичево и во Чаир
ДИК гласањето во вториот круг од локалните избори го оцени како фер и демократски и без поголеми проблеми.

23:30 31.10.2021

По поразот од ВМРО-ДПМНЕ на локалните избори, Заев поднесе оставка

Премиерот Зоран Заев го призна поразот и поднесе оставка

Премиерот Зоран Заев си поднесе оставка, откако опозициската ВМРО–ДПМНЕ победи на локалните избори во повеќе општини, меѓу кои и во градот Скопје. Премиерот Заев најави дека ја презема целата одговорност и си поднесе оставка од премиерската функција и од партиската позиција претседател на СДСМ.