Талибанците би можеле да го заземат Кабул за 90 дена

Талибанските борци би можеле да го изолираат главниот град на Авганистан, Кабул за 30 дена и евентуално да го преземат за 90 дена, јавува агенцијата Ројтерс, цитирајќи извори во американските разузнавачки служби.

Пентагон го критикува раководството на Авганистан за напредокот на Талибанците

Официјален претставник, кој сакаше да остане анонимен вели дека новата проценка за тоа колку долго може да издржи Кабул е резултат на брзите постигнувања на Талибанците, откако странските сили предводени од САД почнаа да си заминуваат.

„Но, ова не е конечен заклучок“, додаде официјалниот претставник, велејќи дека авганистанските безбедносни сили би можеле да го сменат моментумот со пружање поголем отпор.

Отпорот изостанува

Авганистанските власти денеска соопштија дека талибанците ја презеле контролата врз градот Газни, 150 километри од Кабул.

„Можам да потврдам дека денеска Газни падна во рацете на Талибанците. Тие ја презедоа контролата врз клучните области на градот: канцеларијата на гувернерот, полицискиот штаб и затворот“, изјави Насир Ахмад Факири, кој го предводи провинцискиот совет.

Талибанците исто така, потврдија дека ја презеле контролата врз градот. Газни е најблиску до Кабул.

Талибанците воено напредуваат и покрај осудите од меѓународната заедница и предупредувањата на Обединетите нации дека насилното преземање делови од територијата нема да биде меѓународно признато.

Исламистите сега контролираат 65 насто од Авганистан и преземаа или се заканија дека ќе преземат 11 провинциски главни градови, изјави висок претставник на ЕУ.

Фајзабад, во североисточната провинција Бадакшан, во средата стана осмиот покраински главен град што беше заземен од Талибанците.

Сите патишта за Кабул, кој лежи во долина опкружена со планини, деновиве се преполни со цивили што влегуваат во градот, бегајќи од насилствата, јавува Ројтерс, наведувајќи дека заедно со нив би можело да влегуваат и талибански борци.

Жестоки улични борби во Кундуз, талибанците влегоа во градот

„Стравот е од бомбаши самоубијци кои влегуваат во дипломатски згради и напаѓаат со единствена цел странците да заминат што е можно поскоро“, наведува еден разузнавач во Кабул. Странските земји се обидуваат да обезбедат нивниот персонал брзо да го напушти Кабул.

Под тортура на талибанците: Приказната на војникот кој се моли да умре

Губењето на Фајзабад е уште еден неуспех на авганистанската влада, која се бори да го спречи напредокот на талибанците. Претседателот Ашраф Гани во Мазар-Шариф ги собра старите воени команданти за одбрана на најголемиот град на северот на земјата.

Aвад Муџадиди, член на провинцискиот совет од Бадакшан, вели дека Талибанците го опколиле Фајзабад пред да ја започнат офанзивата.

„Со падот на Фајзабад, целиот североисток е под контрола на Талибанците“, изјави тој за Ројтерс. Талибанците сакаат да ја победат владата поддржана од САД и повторно да воведат строг исламски закон.

Брзината на напредувањето ги шокира сојузниците

Американскиот претседател Џо Бајден ги повика авганистанските лидери да се борат за својата татковина, истакнувајќи дека не жали за неговата одлука да ги повлече американските војници.

Гани: Несигурноста во Авганистан е поради ненадејната одлука на САД

Тој рече дека Вашингтон потрошил повеќе од трилион долари за 20 години и загубил илјадници американски војници. САД обезбедуваат значителна воздушна поддршка, храна, опрема и плати за авганистанските сили, рече тој.

Прес -секретарката на Белата куќа Џен Псаки одби да коментира за проценките дека Кабул наскоро би можел да биде под контрола на Талибанците.

„Внимателно ги следиме влошените безбедносни услови во делови од земјата, но ниеден конкретен исход, според наше мислење, не е неизбежен“, рече таа.

Соединетите држави ќе го завршат повлекувањето на своите сили овој месец во замена за талибанските ветувања дека ќе спречат Авганистан да се користи за меѓународен тероризам.

Псаки го повтори ставот на администрацијата дека авганистанските сили имаат поддршка од САД за да го возвратат ударот. Авганистанците „треба да покажат дали имаат политичка волја да возвратат и дали имаат способност да се обединат како лидери за да возвратат“, рече таа.

Талибанска делегација во Пекинг на средба со кинески владини претставници

Талибанците ветија дека нема да ги нападнат странските сили при нивното повлекување, но не се согласија со прекин на огнот со владата. Заложбата на Талибанците да разговараат за мир со владината страна не успеаја.

Висок лидер на Талибанците рече дека шефот на политичката канцеларија на групата, мула Абдул Гани Барадар се сретнал американскиот специјален пратеник Залмај Калилзад во вторникот во Доха. Не се соопштени детали за средбата. Тројката плус - платформа предводена од САД, Кина и Русија - се очекуваше да се состане во среда.

Руски, таџикистански и узбекистански војници на вежби на авганистанската граница

Напредокот на Талибанците го зголеми стравот од враќање на власта на тврдокорните милитанти, кои се појавија во раните 1990 -ти години од хаосот на граѓанската војна. Тие го контролираа поголемиот дел од Авганистан од 1996 до 2001 година, кога беа соборени од кампањата предводена од САД против шефот на Ал Каеда, Осама бин Ладен.

Новата генерација Авганистанци, кои се полнолетни од 2001 година, стравуваат дека ќе се расипе напредокот постигнат во области како што се правата на жените и слободата на медиумите.

Авганистанските власти апелираа за притисок врз Пакистан да ги запре залихите за Талибанците што минуваат преку границата. Пакистан негираше дека ги поддржува Талибанците.

За време на нивното претходно владеење, Талибанците никогаш не го контролираа целосно северот на Авганистан. Сега се чини дека имаат намера да го обезбедат пред да го нападнат Кабул.

На југ, владините сили се борат со талибанските борци околу Кандахар, а илјадници цивили од оддалечените области се засолнаа во градот. Еден тамошен лекар изјави за Ројтерс дека биле примени голем број тела на загинати авганистански војници и оти ранети талибански борци побарале медицинска поддршка. Талибанците зазедоа области што се граничат со Таџикистан, Узбекистан, Иран, Пакистан и Кина, зголемувајќи ја загриженоста за регионалната безбедност.