„Солење“ памет за историјата - Вие коментирате

„Во ЕУ ќе влеземе како Македонци кои зборуваат македонски јазик“, одговори премиерот Зоран Заев на својот ФБ профил по продолжените провокации од бугарскиот премиер Борисов, вицепремиерот Каракачанов и пред тоа министерката за надворешни работи Захариева, и по неговото интервју за бугарската агенција со кое ја разбранува и вознемири македонската јавност. А на ФБ страницата на РСЕ – река од негативни реакции и против него и против Бугарија, исполнети со непримерен јазик, навреди, а и говор на омраза.

Но Игор Стоевски со тупаница и кренат палец во знак на одобрување, а Сашко Дерчовски, по навредливите зборови кон бугарскиот политички врв, решението го наоѓа во барањето да се укине правото на вето и да решава мнозинството во ЕУ. Љубица Бубе со сликичка на раце што аплаудираат, а Перица Дадас ја објавил фотографијата на Антониjо Милошоски од пред десетина години како го вее бугарското знаме на планината Пирин. И под неа иронично прашање како одговор на нападите врз Заев: „И? Што има тоа врска со бугарскиот фашизам и велепредавството на Заев?“

На пораката со поддршка во писмото од Филип Рикер, помошникот државен секретар за европски прашања во американскиот Стејт Департмент, Скопје и ЕУ да бараат решение за билатералните прашања надвор од интеграцијата во Унијата, Дејан Божиновски постирал: „Поддршка е за решавање проблеми НАДВОР ОД ПРЕГОВАРАЧКА РАМКА!“ Па додал: „... Ја рушите Резолуцијата на ЕП за постоење на македонско малцинство во Бугарија!“ Ацо Спасов смета дека не ни треба „...солење памет, ние добро ја знаеме нашата историја и не сакаме други да ни ја кажуваат и кројат“. Николче Горгиев постирал: „Зборувате за период за кој сѐ уште има живи луѓе кои сведочат за состојбите, не зборуваме за пред 1000 години“. Славчо Малиновски, пак, со порака до Бугарија: „Признајте вие како сте ја заплеткале историјата и сѐ ќе биде во ред“.

Според коментарите по неделното интервју на РСЕ со министерката за труд и социјала, Јагода Шахпаска, дел од граѓаните и натаму немаат доверба во институциите на власта. Таа покрај другото вели дека бројот на невработени го зголемиле и нашинците кои се вратиле од странство, а Маре Маневска напишала: „Бројката ви е од тие што останале без работа, ако не е и поголема, никој не се вратил од нашите што излегле, не мешајте баби и жаби“. Димче Кизовски се чуди: „Што зборува, луѓе умираат тука, а они се вратиле, па не се будали да умрат ако се вратат“. Ордана Николова потсетува со прашање: „Гледате автобуси за Италија? Гледате некој оглас во Германија како порано? Секоја земја се справува за своите граѓани како знае и умее... кажете во која земја се намалила невработеноста. Цел свет е така. Е сега, начинот како се справуваме е тежок за сиромашните земји, мора да се преживее. Но дека З.З. е крив мало морген. Никој не знаел ниту предвидел ваква биолошка војна во светот. Сигурно некој Македонец не ја пуштил“. Розета Розе со напад: „Ја зголемија невработеноста? Јас, пак, мислев дека вие сакате да се вратат и тука да ги вработите со плати исти како вашите. А не е на одмет зашто највредните во овие години ви заминаа...“