Премиерот Димитар Ковачевски и специјалниот претставник и координатор на Центарот за глобален ангажман на Стејт департментот Џејмс Рубин, потпишаа Меморандум за разбирање кој ја дефинира соработката меѓу двете држави во борбата против манипулацијата со информации, соопшти прес службата на Стејт Департментот
Меморандумот бил потпишан по вчерашната средба на Ковачевски со државниот секретар на САД Ентони Блинкен.
„Овој Меморандум за разбирање уследи по средбите во Скопје на 11 април 2023 година, меѓу Владата на Северна Македонија и Американскиот Стејт департмент. На тие состаноци, како што беше соопштено, двете страни изразија загриженост за напорите на Русија и други да шират дезинформации за поткопување на демократијата и националната безбедност низ целиот свет“, се вели во соопштението.
Во него се додава дека „новиот Меморандум за разбирање ќе овозможи поблиска соработка во виталните напори за борбата против дезинформациите, заштита на демократските процеси и изградбата на издржливи информациски екосистеми“.
На опасноста од руските дезинформации Рубин предупреди за време на неговата неодамнешна посета на балканскиот регион. Тој порача дека Москва води пропагандна војна во регионот и дека Србија е една од главните „бази“ од каде тргнуваат руските манипулации во регионот.
Во Вашингтон, пак, премиерот Ковачевски, преходно, имаше средба со државниот секретар Блинкен, при која исткана дека односот меѓу САД и Северна Македонија е силен и базиран на вредности.
Блинкен, пак, му се зблагодари на Ковачевски за солидарноста на Северна Македонија и помошта за Украина со цел да се одрбрани од руската агресија и додаде и дека САД го поддржуваат патот на Северна Македонија во Европската Унија.